Marcos

8 Chay p’unchaykunapin wajmanta askha runakuna chaypi kasharqanku, manataq imapas mijunankupaq karqanchu, jinan Jesusqa discipulonkunata wajaspa nirqan: 2 “Khuyapayanin kay runakunata,+ paykunaqa kinsa p’unchayñan noqawan kashanku, manataqmi imapas mijunankupaq kanchu.+ 3 Mana mijusqatachus wasinkuman kachapusaq chayqa, ñanpichá pisipapunkuman, wakinqa karu llaqtakunamantaraqmi kanku”, nispa. 4 Discipulonkunataq nirqanku: “¿Maypitaq kay ch’inneqpiri khaytukuy runakunata sajsachinapaq t’antata tarimuykuman?”, nispa. 5 Jinan paykunata tapurqan: “¿Jayk’a t’antaykichismi kashan?”, nispa. Paykunataq: “Qanchisllan kashan”,+ nirqanku. 6 Chaymi Jesusqa runakunata kamachirqan pampapi tiyaykunankupaq. Chaymantataq qanchis t’antata jap’ispa Diosman graciasta qorqan, phasmispataq discipulonkunaman jaywarqan rakinankupaq, paykunataq runakunaman rakirqanku.+ 7 Kallarqantaqmi iskay kinsa challwachakunapas, Diosman graciasta qospataq discipulonkunata kamachirqan chaykunatapas rakinankupaq. 8 Jinan sajsanankukama mijurqanku, puchuq phasmikunatataq qanchis jatun canastakunapi junt’ata juñurqanku.+ 9 Chaypiqa tawa waranqa jina qharikunan kasharqanku. Chaymantataq Jesusqa paykunata kachapurqan.

10 Chay qhepallamanmi Jesusqa discipulonkunapiwan juj boteman seqarqan, jinaspa Dalmanuta llaqta ladoman jaykurqan.+ 11 Chaypin fariseokunaqa jamuspa paywan discutiyta qallarirqanku, pruebaman churayta munaspankutaq nirqanku: “Rikuchiwayku cielomanta juj señalta”,+ nispa. 12 Jinan Jesusqa sonqonpi sinchita llakikuspa nirqan: “¿Imaraykun kay tiempo runakuna juj señalta rikuyta munashanku?+ Cheqaqtan nini: Manan ima señaltapas kay tiempo runakunamanqa rikuchisaqchu”,+ nispa. 13 Paykunata saqespataq Jesusqa wajmanta boteman seqaspa qocha chimpaman rirqan.

14 Discipulonkunan ichaqa qonqapusqaku t’anta apayta, chaymi botepiqa mana imapas mijunankupaq karqanchu, juj t’antallan chaypiqa kasharqan.+ 15 Jinan Jesusqa paykunata nirqan: “Allinta ñawiykichista kichariychis; cuidakuychis fariseokunaq levaduranmanta* Herodespa levaduranmantawan”,+ nispa. 16 Chaymi paykunaqa t’antata mana apamusqankumanta discutiyta qallarirqanku. 17 Chayta reparaspan Jesusqa paykunata nirqan: “¿Imaraykun discutishankichis t’antata mana apamusqaykichismanta? ¿Manaraqchu reparankichis, manaraqchu entiendenkichis? ¿Rumiyasqaraqchu sonqoykichis kashan, chaychu mana entiendenkichis? 18 “Ñawiyoqña kashaspapas, ¿manachu rikunkichis? Ninriyoqña kashaspapas, ¿manachu uyarinkichis?”. ¿Manachu yuyarinkichis 19 pisqa t’antata+ pisqa waranqa qharikunapaq askhayachisqayta? ¿Jayk’a canasta junt’atan t’anta phasmikunata juñurqankichis?”, nispa. Paykunataq: “Chunka iskayniyoq canastatan”,+ nirqanku. 20 Jesusqa nillarqantaqmi: “Qanchis t’antata tawa waranqa qharikunapaq askhayachiqtiyri, ¿jayk’a jatun canasta junt’atan t’anta phasmikunata juñurqankichis?”, nispa. Paykunataq: “Qanchis canastatan”,+ nirqanku. 21 Jinan Jesusqa paykunata nirqan: “¿Manaraqchu entiendenkichis?”, nispa.

22 Bejsaidaman chayaqtinkun Jesusman pusamurqanku juj ñausa runata, jinaspa rogakurqanku payta llamiykunanpaq.+ 23 Jinan Jesusqa chay ñausa runata makinmanta jap’ispa llaqta jawaman pusarqan, ñawinkunaman thoqaykuspataq+ payman makinta churaykurqan, jinaspa tapurqan: “¿Imallatapas rikushankichu?”, nispa. 24 Jinan chay runaqa qhawakacharikuspa nirqan: “Runakunatan sach’ata jina rikushani, ichaqa purishaqta”, nispa. 25 Chaymi Jesusqa wajmanta chay runaq ñawinkunaman makinta churaykurqan, jinan chay runaqa qhaliyapurqan, allintataq tukuy imatapas rikupurqan. 26 Chaymantataq wasinman kachapurqan: “Aman kay llaqtamanqa jaykunkichu”, nispa.

27 Jinaspan Jesusqa discipulonkunapiwan Cesarea Filipo nisqa llaqtapi ayllukuna ladoman puririrqanku, ñanpin qatikuqninkunata tapurqan: “Runakunari, ¿pin niwankutaq?”,+ nispa. 28 Jinan paykunaqa nirqanku: “Wakinqa bautizaq Juanmi ninkun,+ wakintaq Eliasmi ninku,+ wakinñataq profetakunamanta jujninchá ninku”, nispa. 29 Jesustaq paykunata tapurqan: “Qankunari, ¿pin niwankichistaq?”, nispa. Jinan Pedroqa nirqan: “Qanqa Criston kanki”,+ nispa. 30 Jinaspanmi Jesusqa paykunata allin-allinta kamachirqan ama pimanpas pichus kasqanta willanankupaq.+ 31 Chaymantataq paykunaman willayta* qallarirqan runaq Churinqa imaymanapi ñak’arinanmanta, umalli sacerdotekunaq, umalliq runakunaq,* kamachikuy simita yachachiqkunaq pisichasqan kananmanta, wañuchisqa kananmanta,+ kinsa p’unchaymanta kausarimpunanmantawan.+ 32 Sut’itan paykunaman willarqan chaykuna pasananta. Chaymi Pedroqa payta waj ladoman pusaspa anyayta qallarirqan.+ 33 Jesustaq kutirispa discipulonkunata qhawaspa Pedrota anyarqan: “¡Manan uyarisaykichu, Satanás! Qanqa manan Dios jinachu piensanki, aswanpas runakuna jinallan piensanki”,+ nispa.

34 Jinaspan runakunata discipulonkunatawan wajaspa nirqan: “Pipas qhepayta jamuyta munaqqa pay kikinta negakuchun, jinaspa ñak’arina k’aspinta* apaspa qhepayta jamushallachun.+ 35 Pipas vidanta salvayta munaqqa chinkachinqan, pipas noqarayku allin willakuykunarayku ima vidanta chinkachiqmi ichaqa salvanqa.+ 36 Juj runachus kay pachapi tukuy imata tarinman, vidantataq chinkachinman chayqa, ¿ima allintaq paypaqri kanman?+ 37 Juj runa tukuy imantaña qonman chaypas, ¿atinmanchu vidan salvayta?+ 38 Pipas noqamanta rimasqaymantawan kay mana kasukuq* juchasapa runakuna* ukhupi p’enqakunqa chayqa, runaq Churinpas paymantaqa p’enqakullanqataqmi+ ch’uya angelninkunapiwan Taytanpa qhapaq atiy qosqanwan* kutimuspa”,+ nispa.