Marcos

14 Iskay p’unchayllañan kasharqan+ Pascua Fiestapaq+ Mana Levadurayoq T’anta Fiestapaqpas.+ Umalli sacerdotekunawan kamachikuy simita yachachiqkunawantaq imaynatachus ima tumpallapas* Jesusta jap’inkuman chayta piensasharqanku, chhaynapi wañuchinankupaq.+ 2 Ichaqa nisharqankun: “Ama fiestapiqa, mana chayqa runakunachá ch’aqwata jatarichinkuman”, nispa.

3 Jesusqa Betania llaqtachapin lepra onqoyninmanta qhaliyachisqa Simonpa wasinpi mijusharqan, jinan juj warmi jamurqan yuraq rumi p’uyñuchapi ancha valorniyoq mana imawan tupachisqa sumaq q’apaq nardo jawinantin. P’uyñuchaq kunkanta p’akispataq chay jawinata Jesuspa umanman jich’aykuyta qallarirqan.+ 4 Chayta rikuspan wakinqa phiñasqa ninakurqanku: “¿Imanaqtinmi chay sumaq q’apaq jawina aceiteta usuchin? 5 ¡Chay aceitetaqa kinsa pachaj denario qolqemantapas* aswanmanraq vendekunman karqan, chay qolqetataq wajchakunaman qokunman karqan!”, nispa. Paykunaqa sinchi phiñasqan kasharqanku chay warmipaq.* 6 Jinan Jesusqa paykunata nirqan: “Jinalla kachun, ¿imaraykun payta phiñachiyta munashankichis? Payqa ancha allintan noqapaq ruwapushawan.+ 7 Wajchakunaqa tukuy tiempon qankunawan kashan,+ munaspaykichisqa ima ratupas paykunataqa yanapawaqchismi; noqan ichaqa mana tukuy tiempochu qankunawan kasaq.+ 8 Payqa tukuy atisqantan ruwashan. Sumaq q’apaq jawinata cuerpoyman jich’aykuwaspaqa p’ampasqa kanaypaqmi alistashawan.+ 9 Cheqaqtan niykichis: Maypiña allin willakuykuna kay pachantinpi willakunqa chaypas,+ yachakullanqataqmi kay warmiq ruwasqantapas, chhaynapi yuyarisqa kananpaq”,+ nispa.

10 Chunka iskayniyoq apostolkunamanta jujnin Judas Iscariotetaq umalli sacerdotekunawan rimanakuq rirqan Jesusta paykunaman jap’ichinanpaq.+ 11 Jinan paykunaqa imachus nisqanta uyarispa anchata kusikurqanku, prometerqankutaq qolqeta qonankupaq.+ Chaymantapachan Judasqa piensasharqan imaynatachus Jesusta jap’ichinman chaypi.

12 Mana Levadurayoq T’anta Fiesta+ qallariy p’unchaypin Pascua Fiestapi+ mijunapaq juj uywata ñak’aqku, chaymi discipulonkunaqa Jesusta nirqanku: “¿Maypin alistamunaykuta munanki Pascua mijunata mijunaykipaq?”,+ nispa. 13 Jinan Jesusqa iskay discipulonkunata kacharqan: “Llaqtata riychis, chaypin unu p’uyñu apashaq runa qankunawan tupaq jamunqa. Paypa qhepantan rinkichis,+ 14 maymanchus jaykunqa chay wasiyoqtan ninkichis: Yachachikuqmi nin: ¿Maypin kashan visita chaskinayki cuarto, chaypi discipuloykunapiwan Pascua mijunata mijunaypaq?, nispa. 15 Jinan payqa altospi juj jatun cuartota rikuchisunkichis listollataña, chaypin Pascua mijunata mijunanchispaq alistamunkichis”, nispa. 16 Chaymi discipulonkunaqa chay llaqtaman rirqanku, jaykuspankutaq Jesuspa nisqanta jina tukuy imatapas tarirqanku, jinaspan Pascua Fiesta mijunapaq imachus necesitakusqanta alistarqanku.

17 Ch’isinyaqtintaq Jesusqa chunka iskayniyoq apostolkunapiwan chayman rirqan.+ 18 Mesapi tiyaykuspa mijushaqtinkun Jesusqa paykunata nirqan: “Cheqaqtan niykichis: Noqawan mijuq jujniykichismi enemigoykunaman jap’ichiwanqa”,+ nispa. 19 Jinan paykunaqa sinchi llakisqa sapankanku tapurqanku: “¿Noqachu kani?”, nispa. 20 Jesustaq paykunata nirqan: “Chunka iskayniyoqmanta jujniykichis noqawan kuska pocilloman t’antanta challpuqmi.+ 21 Runaq Churinqa ripunqan imaynachus paymanta qelqasqa kashan chayman jina, ichaqa, ¡ay imaraqmi kanqa runaq Churinta jap’ichiq runamantaqa!+ Chay runapaqqa mana naceymi aswan allin kanman karqan”,+ nispa.

22 Mijushaqtinkun Jesusqa juj t’antata jap’ispa Diosman graciasta qorqan, p’akispataq paykunaman jaywarqan: “Jap’iychis, kayqa cuerpoytan representan”,*+ nispa. 23 Chaymantapas copata jap’ispan Diosman graciasta qospa paykunaman jaywarqan, llapankutaq chaymanta ujarqanku.+ 24 Paykunatan nirqan: “Kayqa mosoq rimanakuypaq* yawarniytan representan,*+ chay yawarmi askha runakunarayku jich’asqa kanqa.+ 25 Cheqaqtan niykichis: Manapuniñan uvas vinotaqa ujasaqchu Diospa gobiernonpi mosoq vinota ujanay p’unchaykama”, nispa. 26 Diosta jatunchana takikunata takispankutaq Olivos orqoman rirqanku.+

27 Jinan Jesusqa paykunata nirqan: “Llapaykichismi saqerpariwankichis, qelqasqan kashan: Michiqtan k’irisaq,+ jinan ovejakunaqa ch’eqeripunqa,+ nisqa. 28 Kausarichisqa* kasqay qhepamanmi ichaqa Galileaman risaq,+ chaypin suyamusaykichis”, nispa. 29 Jinan Pedroqa nirqan: “Llapankuña saqerparisunkiku chaypas, noqaqa manapunin saqerparisaykichu”,+ nispa. 30 Jesustaq payta nirqan: “Cheqaqtan niyki: Kunan tutan manaraq iskay kutita gallo waqashaqtin kinsa kutita negawanki”,+ nispa. 31 Pedrotaq atipakusparaq nirqan: “Qanwan kuskaña wañunay kaqtinpas manapunin negasaykichu”, nispa. Chhaynatakaman llapankupas nirqanku.+

32 Chaymantataq Getsemaní nisqa pataman chayarqanku, chaypin discipulonkunata Jesusqa nirqan: “Kayllapi tiyashankichis Diosmanta mañakamushanaykama”,+ nispa. 33 Jinaspan Pedrota, Santiagota, Juantawan pusarikurqan.+ Jesuspa sonqonmi sinchi llakikuymanta nanayta qallarirqan, 34 chaymi paykunata nirqan: “Llakikuymantan sonqoy* phatarunqaña,+ kayllapi kashaychis, ichaqa rijch’ashallankichis”,+ nispa. 35 Juj chhikan ñaupaqman rispataq pampakama k’umuykuspa mañakuyta qallarirqan, atikuqtinqa chay ñak’arina hora ama payman chayananpaq. 36 Nirqanmi: “Aba,* Papáy,+ qanpaqqa tukuy imapas atikuqmi; kay copata* noqamanta karunchay. Ichaqa ama munasqaychu kachun, aswanpas qanpa munasqayki kachun”,+ nispa. 37 Kutimuspataq puñushaqta paykunata tarirqan, jinan Pedrota nirqan: “Simón, ¿puñushankichu? ¿Manachu juj horallatapas rijch’asqalla kayta atirqanki?+ 38 Rijch’ashallaychis, mañakushaychistaq ama tentacionman urmanaykichispaq.+ Sonqoqa munallanpunin, cuerpon* ichaqa mana kallpayoq”,+ nispa. 39 Wajmanta rispan chhaynallatataq mañakurqan.+ 40 Wajmanta kutimuspataq Jesusqa paykunata puñushaqta tarillarqantaq, chaymi paykunaqa mana ima niytapas atirqankuchu, paykunataqa sinchitan puñuy aysasharqan. 41 Kinsa kutipi kutimuspataq Jesusqa paykunata nirqan: “¿Khayna tiempo kashaqtinchu puñushankichispas samashankichispas? ¡Chaykamalla! Ñan hora chayaramunña+ runaq Churin juchasapakunaq makinman jap’ichisqa kananpaq. 42 Jatariychis, jaku, jap’ichiwaqniyqa ñan chayaramunña”,+ nispa.

43 Jesús rimashallaqtinraqmi Judasqa chayamurqan, payqa chunka iskayniyoq apostolkunamanta jujninmi karqan; paywan kuskan jamurqanku askha runakuna espadakunantin k’aspikunantin ima, paykunataqa umalli sacerdotekuna, kamachikuy simita yachachiqkuna, umalliq runakunapiwanmi* kachamusqaku.+ 44 Jap’ichiqnin Judasmi imaynatachus Jesusta reqsinankupaq paykunata nisqa: “Pitachus much’aykusaq chaymi, payta jap’ispan ama kacharispa apankichis”, nispa. 45 Chayamuspa jinan Judasqa Jesusman qayllaykurqan, jinaspa “¡yachachikuq!”* nispa much’aykurqan. 46 Jinaspa Jesusta presota jap’irqanku. 47 Jesuswan kashaqkunamanta jujnintaq espadanta orqokuspa uma sacerdoteq kamachinta waqtaspa ninrinta qhorurqan.+ 48 Jesustaq paykunata nirqan: “¿Suwata jina jap’iwanaykichispaqchu espadakunantin k’aspikunantin jamurqankichis?+ 49 Sapa p’unchaymá riki templopi yachachispa qankunawan kasharqani,+ ¿imaraykutaq manari jap’iwarqankichischu? Ichaqa llapa kaykunaqa pasashan Diospa simin qelqakuna junt’akunanpaqmi”,+ nispa.

50 Llapa discipulonkunataq payta saqerparispa ayqekurqanku.+ 51 Sumaq lino p’achawan churaykusqa waynallan paytaqa qatiparqan, ichaqa chay waynatapas jap’iytan munarqanku, 52 jinan payqa lino p’achanta saqerparispa ukhu p’achallantin* ayqekurqan.

53 Chaymantataq Jesustaqa uma sacerdoteman aparqanku,+ jinan chaypi juñukurqanku llapa umalliq runakuna, umalli sacerdotekuna,+ kamachikuy simita yachachiqkunapiwan. 54 Pedroqa karullamanta qatipaspan uma sacerdoteq wasin patioman jaykurqan, chaypin tiyaykurqan wasipi kamachikunawan kuska ninapi q’oñikuspa.+ 55 Chaykamataq umalli sacerdotekunaqa llapallan Jatun Juntapi* kaqkunapiwan testigokunata maskhasharqanku Jesuspa contranpi rimanankupaq, chhaynapi Jesusta wañuchinankupaq, ichaqa manan tarirqankuchu.+ 56 Askhaña paymanta llullakuspa willarqanku+ chaypas, willasqankuqa manan tuparqanchu. 57 Juj testigokunapas jatarillarqankutaqmi, jinaspan llullakuspa Jesús contra nirqanku: 58 “Noqaykun payta uyariyku: Noqan thunisaq runakunaq ruwasqan templota, jinaspa kinsa p’unchayllapi jujta jatarichisaq runakunaq mana ruwasqanta,+ nispa niqta”, nispa. 59 Ichaqa chay willasqankupas manan tuparqanchu.

60 Jinaqtinmi uma sacerdoteqa chaupipi sayaykuspa Jesusta tapurqan: “¿Manachu imatapas ninki? ¿Imaninkin kay runakuna contraykipi rimasqankumanta?”,+ nispa. 61 Jesusmi ichaqa ch’inlla karqan, manataq ima nirqanpaschu.+ Jinan uma sacerdoteqa wajmanta tapullarqantaq: “¿Qanchu kanki ch’uya Diospa Churin Cristo?”, nispa. 62 Jinan Jesusqa nirqan: “Arí, noqan kani. Qankunan runaq Churinta rikunkichis+ atiyniyoq Diospa paña ladonpi tiyashaqta+ phuyupi jamushaqtawan”,+ nispa. 63 Jinaqtinmi uma sacerdoteqa p’achanta llik’ikuspa nirqan: “¿Imapaqñan testigokunatapas munasunman?+ 64 Uyarishankichisñan Diosta k’amisqanta, ¿imaninkichismi?”, nispa. Jinan llapanku juchacharqanku wañuchisqa kananpaq.+ 65 Jinaspan wakinninku thoqaykurqanku,+ uyanta taparuspataq saqmakacharqanku, nirqankutaq: “Profeta kanki chayqa, niwayku pichus saqmashasunki chayta”, nispa. Juzganapi kaq guardiakunapas ch’aqlakacharqankun, chaymantataq apapurqanku.+

66 Pedroqa uraypin kasharqan, patiopi; chayllamanmi uma sacerdoteq jujnin warmi kamachin jamuspa+ 67 Pedrota rikurqan ninapi q’oñikushaqta, jinan qhawaykuspa nirqan: “Qanpas Nazaret llaqtayoq Jesuswanmá kasharqanki riki”, nispa. 68 Pedron ichaqa negarqan: “Manan paytaqa reqsinichu, imatachá rimakunkipas”, nispa. Chaymantataq jawa punkuneqman lloqsirqan. 69 Warmi kamachitaq payta rikuruspa chaypi sayashaqkunata nillarqantaq: “Kayqa paypa discipulonkunamanta jujninmi”, nispa. 70 Jinan Pedroqa wajmanta negallarqantaq. Juj ratumanqa chaypi sayashaqkunapas nillarqankutaqmi: “Qanqa paypa discipulonkunamanta jujninpunin kashanki, Galilea llaqtayoq runamá kashanki riki”, nispa. 71 Pedrotaq pay kikinta ñakakusparaq jurarqan: “¡Manapunin chay runataqa reqsinichu!”, nispa. 72 Chayllamanmi iskay kaq kutita gallo waqarqan,+ jinan Pedroqa yuyarirqan: “Manaraq iskay kutita gallo waqashaqtinmi kinsa kutita negawanki”,+ nispa Jesuspa nisqanta. Chaymi Pedroqa sinchi llakisqa waqayta qallarirqan.