Ageo

1 Rey Darío iskay kaq watapi kamachikushaqtinmi, soqta kaq killaq qallariynin p’unchaypi Jehová Diosqa Judapi kamachikuq Sealtielpa churin Zorobabelman,+ Jehozadacpa churin uma sacerdote Josuemanwan profeta Ageowan*+ kay simikunata willachirqan:

2 “Ejercitokunata kamachiq Jehová Diosmi* nin: Kay runakunan nishanku: Manan tiemporaqchu Jehová Diospa wasinta jujmanta jatarichinapaqqa,+ nispa”.

3 Jujmantan Jehová Diosqa profeta Ageowan+ kay simikunata willachillarqantaq: 4 “Qankunaqa allin wasikunapin, maderawan ruwasqa munay wasikunapin tiyashankichis, ¿chhayna kausana tiempochu kanman wasiy khayna thuni-thuni kashaqtin?+ 5 Chayraykun ejercitokunata kamachiq Jehová Dios nin: Allinta piensaykuychis imatachus ruwashankichis chaypi. 6 Askhatan tarpunkichis, ichaqa pisitan oqarinkichis.+ Mijunkichismi, ichaqa manan sajsankichischu. Ujankichismi, ichaqa ch’akichikushallankichismi. P’achakunkichismi, ichaqa manan q’oñirinkichischu. Llank’apakuqpas t’oqo bolsapin pagonta waqaychan, nispa”.

7 “Ejercitokunata kamachiq Jehová Diosmi nin: Allinta piensaykuychis imatachus ruwashankichis chaypi, nispa.

8 ”Jehová Diosmi nin: Orqoman wichaychis, maderata apaychis,+ kusikunaypaq jina wasiyta ruwaychis,+ chhaynapi jatunchasqa kanaypaq,+ nispa”.

9 “Ejercitokunata kamachiq Jehová Diosmi nin: Askhatan munasharqankichis, ichaqa pisitan chaskirqankichis, wasiykichisman apaqtiykichismi juj phukuyllapi chinkachirqani.+ ¿Imarayku? Qankunaqa wasiykichistan sumaqta cuidashankichis, wasiytaq thuni-thuni kashan.+ 10 Chaymi cieloqa mana sullachimurqanchu,* jallp’apas mana mijuyta wiñachimurqanchu. 11 Noqan ch’akiriyta chayachimurqani kay jallp’aman, orqokunaman, mijuykunaman,* mosoq vinoman, aceiteman, jallp’api tukuy ima wiñaqman, runakunaman, uywakunaman, runaq tukuy ima ruwasqanmanwan, nispa”.

12 Sealtielpa+ churin Zorobabelpas,+ Jehozadacpa+ churin uma sacerdote Josuepas, llaqta runakunapas uyarikurqankun Jehová Diosninkuq siminta, profeta Ageoq imachus nisqantapas. Chay profetataqa Jehová Diosninkun paykunaman kacharqan. Chaymi runakunaqa Jehová Diosta manchakuyta qallarirqanku.

13 Chaymantataq Jehová Diospa siminta willaq Ageoqa Jehová Diospa kamachisqanman jina llaqta runakunata nirqan: “Jehová Diosmi nin: Noqaqa qankunawanmi kashani,+ nispa”.

14 Chhaynatan Jehová Diosqa kallpacharqan+ Judapi kamachikuq+ Sealtielpa churin Zorobabelta, Jehozadacpa churin uma sacerdote Josueta,+ llaqta runakunatawan. Chaymi paykunaqa ejercitokunata kamachiq Jehová Diosninkuq wasinta jujmanta sayarichiyta qallarirqanku.+ 15 Chayqa karqan rey Darío iskay kaq watapi kamachikushaqtinmi,+ soqta kaq killapi, iskay chunka tawayoq p’unchaypi.