Mateo

24 Templomanta Jesús ripushaqtinmi discipulonkunaqa payman asuykuspa chay templota qhawachirqanku. 2 Jesustaq paykunata nirqan: “¿Rikushankichischu llapa kaykunata? Cheqaqtan niykichis: Kaypiqa manapunin juj rumillapas rumi patapi qhepanqachu, llapallanmi thunisqa kanqa”,+ nispa.

3 Olivos orqopi Jesús tiyashaqtinmi discipulonkunaqa sapaqllapi payman qayllaykuspa tapurqanku: “Niwayku, ¿jayk’aqmi chaykuna kanqa? ¿Ima señalmi kanqa chayamunayki tiempoña* kashaqtin,+ kay tiempopas* tukukapunanpaqña kashaqtin?”,+ nispa.

4 Jesustaq paykunata nirqan: “Allinta qhawarikuychis, paqtataq pipas pantachisunkichisman.+ 5 Askhan sutiywan sutichakuspa jamunqaku, noqan Cristoqa kani nispa, jinan askhata pantachinqaku.+ 6 Qankunaqa qayllapi karupi guerrakuna kasqanmantan uyarinkichis, ichaqa aman mancharikunkichischu; chaykunaqa kananpunin, chaywanpas manaraqmi tukukuychu.+

7 ”Juj nacionmi juj nación contra jatarinqa, juj llaqtataq juj llaqta contra jatarinqa,+ kayneqpi chayneqpin kanqa yarqaypas+ terremotokunapas.+ 8 Tukuy chaykunaqa sinchi nanay* qallariyllaraqmi.

9 ”Runakunan entregasunkichis ñak’arichisqa kanaykichispaq,+ jinaspa wañuchisunkichis.+ Sutiyraykun lliu nacionkuna cheqnikusunkichis.+ 10 Chaymantapas askhan iñiyninkuta saqepunqaku, paykunapuran jap’ichinakunqaku cheqninakunqaku ima. 11 Falso profetakunapas askhan rijurimunqa, jinaspa askha runakunata pantachinqaku.+ 12 Mana allin kausay* yapakusqanwantaq yaqa llapa runakunaq munakuynin chiriyapunqa. 13 Tukukuykama aguantaqmi ichaqa salvasqa kanqa.+ 14 Diospa gobiernonmanta allin willakuykunan pachantinpi willasqa kanqa llapa nacionkuna yachananpaq,+ jinan tukukuyqa chayamunqa.

15 ”Profeta Danielmi willarqan millakunapaq ch’usaqyachiq kaqmanta (kayta* leeqqa allin reparaqmi kanan entiendenanpaq), chayta juj ch’uya partepi sayashaqta+ rikuqtiykichisqa, 16 Judeapi kaqkuna orqokunaman ayqechunku.+ 17 Wasi patapi kaqpas amaña wasinman jaykuchunchu ima kaqnintapas orqomunanpaq, 18 chajrapi kaqpas amaña p’achanman kutichunñachu. 19 ¡Ay chay p’unchaykunapi onqoq warmikunamanta, ñuñuq wawayoq warmikunamantapas! 20 Diosmanta mañakushallaychis ayqenaykichis p’unchay ama chiri tiempopichu nitaq samana p’unchaypichu kananpaq. 21 Chay tiempopiqa manchay ñak’ariymi kanqa,+ chay ñak’ariy jinaqa manan karqanchu kay pachaq qallariyninmantapacha kunankamapas, nitaq qhepamanpas kanqachu.+ 22 Chay p’unchaykuna mana pisiyachisqachu kanman chayqa, manan pipas salvasqachu kanman, ajllasqakunaraykun ichaqa chay p’unchaykuna pisiyachisqa kanqa.+

23 ”Sichus pipas nisunkichisman: ¡Qhawariychis, kaypin Cristoqa kashan!,+ otaq, ¡jaqaypin kashan!, nispa chayqa, aman creenkichischu.+ 24 Falso cristokunan, falso profetakunan rijurimunqa,+ jinaspan jatun milagrokunata* admiranapaq jina kaqkunatawan ruwanqaku,+ chaykunawanmi ajllasqakunatawanraq pantachiyta munanqaku. 25 Chaykunataqa ñaupaqmantañan willashaykichis. 26 Chayrayku, runakunachus nisunkichis: ¡Qhawariychis, ch’inneqpin kashan!, nispa chayqa, aman lloqsinkichischu. Otaq, ¡qhawariychis, wasi ukhupin kashan!, nispa niqtinkupas, aman creenkichischu.+ 27 Imaynan llifllikiypas inti lloqsimuy ladomanta lloqsimuspa inti jaykuy ladokamaraq k’ancharin, chhaynallataqmi kanqa runaq Churin chayamunan tiempopas.*+ 28 Maypichus wañusqa cuerpo kanqa, chaypin ankakunaqa juñukunqaku.+

29 ”Chay ñak’ariy p’unchaykuna qhepallatan inti tutayanqa,+ killapas manaña k’anchanqachu, ch’askakunapas cielomanta urmaykamunqa, cielopi atiykunapas chhafchirisqa kanqa.+ 30 Chayllamanmi runaq Churinpa señalnin cielopi rijurinqa, jinan kay pachapi llapa ayllukuna llakikuymanta sonqonkuta takakunqaku,+ runaq Churintataq rikunqaku+ atiywan sinchi lliflli kaywan phuyupi* jamushaqta.+ 31 Paymi angelninkunata kachamunqa, paykunataq trompeta sinchita waqashaqtin ajllasqankunata juñunqaku kay pachaq tawantin ladonmanta,* cieloq juj k’uchunmanta juj kaq k’uchunkama.+

32 ”Higos sach’amanta kay yachachikuyta yachaychis: K’allmakuna ch’ijchirimuqtinmi, raphinkunapas lloqsimuqtinmi qankunaqa yachankichis q’oñi tiempoqa cercapiña kashasqanta+ ¿riki? 33 Chhaynallataq tukuy chaykunata rikuspaykichisqa yachaychis runaq Churin qayllaykamushasqanta, punkupiña kashasqanta.+ 34 Cheqaqtan niykichis: Manapunin kay tiempo runakunaqa wañunqakuchu llapa chaykuna junt’akunankama. 35 Cielopas kay pachapas tukukapunqan, imachus nisqaykunan ichaqa manapuni tukukunqachu.+

36 ”Chay p’unchaymanta chay horamantawanmi ichaqa mana pipas yachanchu,+ ni janaq pachapi angelkunapas ni Churipas, aswanpas janaq pacha Taytallan yachan.+ 37 Imaynan Noepa p’unchayninkunapi karqan+ chhaynallataqmi runaq Churinpa chayamunan tiempopipas* kanqa.+ 38 Chay p’unchaykunapin manaraq jatun para chayamushaqtin runakuna mijusharqanku, ujasharqanku, qharikunapas casarakusharqanku, warmikunapas casarachisqa kasharqanku, Noepa arcaman jaykusqan p’unchaykama,+ 39 manataq imatapas repararqankuchu jatun para chayamuspa llapankuta millp’unankama,+ chhaynallataqmi runaq Churin chayamunan tiempopas* kanqa. 40 Iskay runakunan chajrapi kashanqaku; jujninmi apasqa kanqa, jujnintaq saqerparisqa kanqa. 41 Iskay warmikunan kutanapi kutashanqaku; jujninmi apasqa kanqa, jujnintaq saqerparisqa kanqa.+ 42 Chayrayku, makilla kashaychis, manan yachankichischu ima p’unchaytachus Señorniykichis jamunqa chayta.+

43 Kayta yachaychis: Wasiyoq runachus yachanman karqan tutapi ima horastachus suwa jamunanta chayqa,+ rijch’asqallan kashanman karqan, chhaynapi wasinta mana jaykunankupaq.+ 44 Chayrayku, qankunapas listollapuni kashaychis,+ mana piensasqaykichis horatan runaq Churinqa jamunqa.

45 ”¿Pipunitaq kanman allin yuyayniyoq junt’aq kamachiri? Paytan patronninqa churanqa wasinpi kamachinkunata qhawarinanpaq, tiempollanpi mijunata qonanpaqwan.+ 46 Chay kamachiqa maytan kusikun patronnin kutimuspa chhayna ruwashaqta tariqtinqa.+ 47 Cheqaqtan niykichis: Paytan patronqa llapa kaqninkuna qhawaqta churanqa.

48 Chay kamachitaqchus millayman tukupuspa sonqonpi ninman: Patronniyqa jayk’aqraqchá kutimunqa,+ nispa, 49 jinaspa kamachimasinkunata maqayta qallarinman, machaqkunawantaq mijunmanpas ujanmanpas chayqa, 50 patronninmi mana suyasqan p’unchayta mana yachasqan horata jamuspa+ 51 sinchitapuni castiganqa, jinaspa iskay uyakunatawan kuskata churanqa. Chaypin payqa waqanqa, mana imanakuyta atispataq kiruntaraq k’achachachinqa.+