Hechos

20 Manaña ch’aqway kaqtintaq Pabloqa iñiqkunata wajachimurqan, jinaspa paykunata kallpachaspa despedikapurqan, chaymantataq Macedonia provinciaman rirqan. 2 Chayninta purispan payqa chaypi kaq lliu iñiqkunata allinta rimapayaspa kallpacharqan, jinaspa Grecia provinciaman chayarqan. 3 Payqa kinsa killan chaypi karqan, Siria provinciaman barcopi ripunanpaqña kashaqtinmi ichaqa yacharurqan judiokuna+ payta wañuchinankupaq rimanakusqankuta, chaymi Macedonia provincianta kutipurqan. 4 Paywan kuskan rirqanku Berea llaqtayoq Pirroq wawan Sópater, Derbe llaqtayoq Gayo, Timoteo,+ Asia provinciamanta Tiquicowan+ Trofimowan,+ Tesalónica llaqtamanta Aristarcowan+ Segundowan ima. 5 Paykunaqa ñauparirqankun, jinaspa Troas llaqtapi suyamuwarqanku. 6 Noqaykutaq Mana Levadurayoq T’anta Fiesta+ p’unchaykuna qhepata Filipos llaqtamanta barcopi rirqayku, jinaspa pisqa p’unchaypi Troas llaqtaman chayaspayku paykunawan tuparqayku, chaypin qanchis p’unchayta qhepakurqayku.

7 Semana qallariy p’unchaypi* mijunaykupaq juñunasqa kashaqtiykun Pabloqa llapa chaypi juñunasqa kaqkunata rimapayarqan, qhepantin p’unchay ripunan kasqanraykun chayta ruwarqan; kuska tutakaman payqa rimarqan. 8 Juñunakusqayku altos cuartopin askha mecherokuna* k’anchasharqan, 9 ventanapitaq Eutico sutiyoq wayna tiyasharqan, payqa Pabloq rimashanankaman misk’ita puñurapusqa, chaymi kinsa pata altosmanta urmaykurqan; wañusqatañan paytaqa oqarirqanku. 10 Chaymi Pabloqa uraykuspa payman k’umuykurqan, abrazaykuspataq+ nirqan: “Ama llakikuychischu, payqa kausashanmi”,*+ nispa. 11 Chaymantataq cuartoman wicharqan, jinan llapayku mijuyta qallarirqayku. Payqa illarimunankaman unayta rimallarqantaq, jinaspa ripurqan. 12 Waynachatataq kausashaqta pusapurqanku, chaywanmi paykunaqa ancha kusisqa qhepakurqanku.

13 Noqaykutaq barcoman seqaspa Asón llaqtaman rirqayku, Pablon ichaqa chakillapi rirqan, chay llaqtapiñan paytaqa barcopi oqarinayku karqan niwasqankuman jina. 14 Asonpi kashaqtiyku aypamuwaqtinkun paytaqa barcoman seqachirqayku, jinaspa Mitilene llaqtaman rirqayku; 15 qhepantin p’unchaytaq chay llaqtamanta barcopi ripurqayku, jinaspa Quíos isla qayllaman chayarqayku. Qhepantin p’unchaytaq Samos islaman chayaspayku juj chhikanta chaypi sayarqayku, paqariqtintaq Mileto llaqtaman chayarqayku. 16 Pabloqa Asia provinciapi manaña qhepakunanraykun manaña Éfeso llaqtaman jaykuyta munarqanchu.+ Payqa usqhayllan Jerusalén llaqtaman chayayta munasharqan,+ atikuqtinqa Pentecostés Fiesta p’unchaymi chayayta munasharqan.

17 Mileto llaqtapi kashaspan Pabloqa Éfeso llaqtapi kaq iñiq t’aqamanta umalliqkunata wajachimurqan. 18 Chayamuqtinkun paykunata nirqan: “Wayqeykuna, qankunaqa allintan yachashankichis Asia provinciaman chayamusqaymantapacha imaynatachus qankuna ukhupi kausarqani chayta;+ 19 noqaqa kamachi jinan ancha k’umuykukuywan waqaspa imaraq Señorta servirqani,+ chaymantapas judiokuna wañuchiyta munawasqankuraykun imaymana pruebakunapi tarikurqani. 20 Yachallankichistaqmi imapas allinniykichispaq kaqkunataqa mana upallakuspa qankunaman willasqayta, runa qayllapipas+ wasin-wasinpipas mana upallakuspa qankunaman yachachisqayta.+ 21 Noqaqa judiokunamanpas griegokunamanpas llapankumanmi allintapuni yachachirqani juchankumanta pesapakuspa+ Diosman kutirikunankupaq, Señor Jesuspi iñinankupaqwan.+ 22 Kunanqa santo espirituq apasqanmi Jerusalén llaqtaman rishani chaypi imachus pasawananta mana yachaspa, 23 ichaqa llaqtan-llaqtanpin santo espíritu yapa-yapamanta nimushawan: Carcelpin wisq’asqa kanki, imaymanapin ñak’arinki,+ nispa. 24 Ichaqa manan valorniyoqpaqchu vidaytaqa* qhawarini, aswanmi imachus ruwanayta, Señormanta chaskisqay llank’aytawan junt’ayta munani,+ chay llank’ayqa Diospa ancha sumaq sonqo kayninmanta allin willakuykunata llapa runakunaman willaymi.*

25 ”Noqaqa Diospa gobiernonmanta willaspan qankuna ukhupi puriq kani, kunanmantan ichaqa manaña mayqenniykichispas uyayta rikuwankichisñachu. 26 Noqaqa wajachimurqaykichis piqpa wañunanmantapas manapuni juchayoqchu kanaymanta kunan p’unchay testigo kanaykichispaqmi,+ 27 noqaqa mana upallaspan lliutapuni qankunaman Diospa munayninmanta willarqaykichis.+ 28 Chhaynaqa, qankuna kikiykichista allinta waqaychakuychis,+ allinta qhawaychis llapa ovejakunatapas, paykuna qhawariq kanaykichispaqmi santo espirituqa churarqasunkichis,+ chhaynapi Diospa iñiq t’aqanta michinaykichispaq,+ payqa Churinpa yawarninwanmi chay iñiq t’aqata rantirqan.+ 29 Noqaqa allintan yachani ripusqay qhepaman qankuna ukhuman yarqasqa lobokuna* jaykumunanta,+ paykunaqa manan ovejakunata khuyapayanqakuchu aswanmi ñak’arichinqaku. 30 Qankuna ukhumantapunin runakuna jatarinqaku, jinaspa q’ewisqata yachachinqaku iñiqkunata qhepankuta aysanankupaq.+

31 ”Chayrayku, rijch’asqalla kashaychis, amapuni qonqankichischu kinsa watata+ tuta-p’unchay sapankaykichista waqasparaq yuyaychasqayta. 32 Chaymi kunanqa Diosman, sumaq sonqo kay siminmanwan jap’iykachisaykichis; chay simiqa atiyniyoqmi qankunata kallpachanasuykichispaq, ch’uya kaqkunaq chaskisqan herenciatapas qonasuykichispaq.+ 33 Noqaqa manan piqpa qolqentapas, qorintapas ni p’achantapas munapayarqanichu.+ 34 Aswanmi, yachasqaykichis jina, kay makiykunawan llank’asqayrayku mana ima necesitasqaykupas pisiwarqankuchu noqamanpas+ ni puriqmasiykunamanpas. 35 Tukuy imapin rikuchirqaykichis chhayna tukuy kallpawan llank’aspa+ necesitaqkunata yanapanaykichis kasqanta. Yuyallankichistaqmi Señor Jesuspa nisqantapas, paymi nirqan: Qoypin aswan kusikuyqa kan,+ manan chaskiypichu, nispa”.

36 Chaykunata nispan Pabloqa paykunawan kuska qonqoriykukuspa Diosmanta mañakurqan. 37 Llapankun khuyayta waqaykurqanku, Pablota abrazaykuspataq ancha munakuywan much’aykurqanku. 38 Paykunataqa astawan llakichirqan “kunanmantaqa manañan uyayta rikunkichisñachu” nispa nisqanmi.+ Chaymantataq barcokama riysirqanku.