Hechos

19 Chaykuna pasashaqtinmi, Corinto llaqtapi Apolos+ kashaqtin Pabloqa orqon-orqonta purispa Éfeso llaqtaman chayarqan,+ chaypin tuparqan wakin iñiqkunawan. 2 Paykunatan tapurqan: “¿Chaskirqankichischu santo espirituta iñiqman tukupushaspaykichis?”,+ nispa. Jinan paykunaqa nirqanku: “Manapunin uyarillarqaykupaschu santo espirituq kasqanmantaqa”, nispa. 3 Jinan Pabloqa nirqan: “Chhaynaqa, ¿imayna bautismopitaq bautizasqari karqankichis?”, nispa. Paykunataq nirqanku: “Juanpa yachachisqanman jinan bautizasqa karqayku”,+ nispa. 4 Chaymi Pabloqa nirqan: “Juanqa bautizarqan runakuna juchankumanta pesapakusqankuta rikuchinankupaqmi,+ paykunatan niq: Pichus qhepayta jamunqa chaypin creenkichis,+ nispa, chay qhepanta jamuqqa Jesusmi karqan”, nispa. 5 Chayta uyarispan paykunaqa Señor Jesuspa sutinpi bautizakurqanku. 6 Pablo paykunaman makinta churaykuqtintaq santo espirituta chaskirqanku,+ jinaspan juj rimaykunapi rimayta qallarirqanku profetizarqanku ima.+ 7 Llapankupiqa chunka iskayniyoq qharikunan karqanku.

8 Pabloqa kinsa killan sinagogaman rirqan,+ chaypin Diospa gobiernonmanta+ mana manchakuspa rimaq, payqa runakunata iñichiyta munaspan allinta piensachispa yachachiq. 9 Wakinkunan ichaqa k’ulluchakuspa manapuni iñiyta munaspanku lliu runaq ñaupanpi millayta rimarqanku Señorpa Ñanninmanta,+ chaymi Pabloqa paykunamanta t’aqakapurqan,+ iñiqkunatapas t’aqarqanmi; jinaspa sapa p’unchay yachachirqan Tirano sutiyoq runaq yachachinan wasipi. 10 Iskay watan payqa chaypi yachachirqan, chaymi Asia provinciapi tiyaqkunaqa llapanku judiokunapas griegokunapas Señorpa siminta uyarirqanku.

11 Diosqa imaymana jatun milagrokunatan Pablowan ruwachisharqan.+ 12 Churakusqan telakunata mandilkunata imaraqmi onqosqakunaman apaqku,+ chaywantaq onqosqakunaqa qhaliyapuqku, millay espiritukunapas lloqsipuqku.+ 13 Supaykunata qarqoq wakin judiokunapas Señor Jesuspa sutinta oqarispan runakunamanta millay espiritukunata qarqoyta munarqanku, khaynatan niqku: “Pabloq willasqan Jesuspa sutinpin kamachiykiku lloqsinaykichispaq”,+ nispa. 14 Esceva sutiyoq judío umalli sacerdoteqmi karqan qanchis churinkuna, paykunapas chhaynatan ruwaqku. 15 Juj kutinmi chayta ruwasharqanku, jinan millay espirituqa paykunata nirqan: “Noqaqa reqsinin Jesustapas+ Pablotapas.+ Qankunari, ¿pikunataq kankichis?”, nispa. 16 Jinan millay espirituq junt’aykusqan runaqa paykunaman phawaykuspa llapankuta atiparqan, chaymi paykunaqa sinchi k’irisqa q’alalla chay wasimanta ayqekurqanku. 17 Chay pasasqanmantaqa Éfeso llaqtapi tiyaq llapa judiokuna griegokuna iman yacharqanku, chaymi llapallanku sinchita mancharikurqanku; Señor Jesuspa sutinpas astawanraqmi jatunchasqa karqan. 18 Askha iñipuqkunan jamuspanku sut’ita willakurqanku juchasapa kasqankumanta, imaymana mana allinkuna ruwasqankumantawan. 19 Supaykunaq yanapayninwan imaymana layqa ruwaykunata ruwaqkunapas askhan libronkuta juñurqanku jinaspa llapa runakunaq ñaupanpi kanaykapurqanku.+ Chay librokunaq jayk’achus valesqanta tanteaspan yacharqanku pisqa chunka waranqa qolqe valesqanta. 20 Chhaynapin Jehová* Diospa siminqa ancha atiywan jinantinman ch’eqerisharqan.+

21 Tukuy chaykunaq pasasqan qhepatan Pabloqa sonqonpi nirqan Macedonia provinciata+ Acaya provinciatawan rispaña Jerusalenta rinanpaq.+ Paymi nirqan: “Chaymantañan Roma llaqtamanqa risaq”,+ nispa. 22 Chaymi payqa Macedoniaman iskay yanapaqninkunata kacharqan Timoteota+ Erastotawan,+ paytaq ichaqa juj tiempotawan Asia provinciapi qhepakurqan.

23 Chay p’unchaykunapin Señorpa Ñanninmanta+ sinchi ch’aqwa jatarirqan.+ 24 Demetrio sutiyoq runan qolqe takaqmasinkunaman askha qolqeta ganachiq Ártemis nisqa idoloq capillachankunata qolqemanta ruwaspa,+ 25 chaymi paykunata juj qolqe takaqkunatawan juñuspa nirqan: “Amigoykuna, yachasqaykichis jina kay negociopi llank’asqanchiswanmi noqanchisqa askha qolqeta gananchis. 26 Chay Pablo sutiyoq runan ichaqa, rikusqaykichis uyarisqaykichis jina, askha runakunaq yuyayninta cambiachishan: Makiwan ruwasqa dioskunaqa yanqan, nispa. Chaytaqa manan Éfeso llaqtallapichu+ ruwashan, aswanpas jinantin Asia provinciapin.+ 27 Jinallata chayta qhawasun chayqa, yaqapaschá runakuna negocionchismanta mana allinta rimayta qallarinkuman, atiyniyoq Ártemis diosaq templontapas mana imapaq qhawaripunkuman. Yachasqanchis jinapas, Ártemis diosataqa kay Asia provinciantinpi pachantinpi iman adoranku, ichaqa Pabloq rimasqanta kasuspankuqa manañan respetapunkumanchu”, nispa. 28 Chayta uyarispan runakunaqa sinchita phiñakurqanku, jinaspa qaparirqanku: “¡Jatunmi Éfeso llaqta runakunaq diosan Artemisqa!”, nispa.

29 Jinan llaqtantin ch’aqwayta qallarirqanku, jinaspa juj nisqalla coliseoman phawaykurqanku Pabloq puriqmasinkuna Gayota Aristarcotawan+ aysarikuspanku, paykunaqa Macedonia provinciamantan karqanku. 30 Chaymi Pabloqa chay runakunaq kasqanman jaykuyta munarqan, ichaqa iñiqkunan jark’arqanku. 31 Fiestakunamanta pujllaykunamantawan wakin encargasqa kaqkunapas paypa amigon kasqankuraykun runakunata kacharqanku: “Amapuni coliseomanqa jaykuychu”, nispa nimunankupaq. 32 Chaykaman runakunaqa ch’aqwapi kasharqanku, wakinmi jujta qaparisharqanku, wakintaq jujnirayta qaparisharqanku; yaqa llapankun mana yacharqankuchu imapaqchus juñukurqanku chayta. 33 Chayllamanmi Alejandrota runakuna ukhumanta orqorqanku, judiokunataq tanqarqanku ñaupaqman rinanpaq, jinan Alejandroqa makinwan runakunata upallachiyta munarqan, chhaynapi paykunata rimapayananpaq. 34 Runakunan ichaqa judío kasqanta reparaspanku astawanraq juj nisqalla yaqa iskay horata jina qaparkacharqanku: “¡Jatunmi Éfeso llaqta runakunaq diosan Artemisqa!”, nispa.

35 Jinan llaqta alcaldeqa runakunata upallachispa nirqan: “Éfeso llaqta runakuna, lliu runakunan yachanku Éfeso llaqtaqa Ártemis diosaq templonta waqaychaq kasqanta, cielomanta urmaykamuq rijch’aynintapas waqaychaq kasqantawan. 36 Lliutaq chaykunata yachanku chayqa, thajllan kanaykichis, manataq mana allinta piensaspaqa imatapas ruwanaykichischu. 37 Kay apamusqaykichis runakunaqa manamá riki templokunata suwaqkunachu kanku, nitaq diosanchista k’amiqpaschu kanku. 38 Chhaynaqa, Demetriochus+ qolqe takaqmasinkunawan pitapas quejayta munanku chayqa, kanmi juezkunapas provinciapi kamachikuqkunapas chaykunamanta quejakamunankupaq. 39 Ichaqa chaykunamanta astawanchus imatapas munashankichis chayqa, juzgana juñunakuypiyá chaymantaqa rimakuchun. 40 Kay p’unchay pasasqanmantaqa gobierno contra jatariqkunamantan tumpasqa kasunman, manataqmi kay ch’aqwa jatarisqanmanta imaniytapas atisunmanchu”, nispa. 41 Chaykunata nispan payqa llapa runakunata kacharparipurqan.