Deuteronomio

22 ”Llaqtamasiykiq torontapas ovejantapas chinkasqata tarinki chayqa, aman jinataqa qhawarparinkichu+ aswanmi dueñonman qatipunki. 2 Ichaqa manachus payta reqsinki manataq wasiyki qayllapipaschu tiyanman chayqa, wasiykimanmi chay uywata qatinki, chaypin jap’inki dueñon maskhamunankama, maskhaspa jamuqtintaq payman qopunki.+ 3 Chaytan ruwallankitaq asnontaña, p’achantaña, imantaña tarinki chaypas. Aman chaykunataqa jinatachu qhawarparinki.

4 ”Llaqtamasiykiq asnonpas toronpas ñanpi urmanqa chayqa, aman jinataqa qhawarparinkichu aswanmi chay uywanta jatariysichinki.+

5 ”Aman mayqen warmipas qhari p’achawanqa churakunqachu, amallataqmi mayqen qharipas warmi p’achawanqa churakunqachu. Jehová Diosqa cheqnikunmi chay ruwaqkunataqa.

6 ”Ñan purisqaykipi pampapipas sach’apipas juj phalaq animalta tarinki q’esanpi malqotapas* runtutapas oqllashaqta chayqa, aman malqotawan mamantawanqa aparikunkichu.+ 7 Mamantaqa kacharipunkipunin, malqokunallatan apaspaqa apanki. Chayta ruwanki chayqa allillanmi kanki, unaytataqmi kausankipas.

8 ”Mosoq wasita ruwakunki chayqa, wasi pata muyuriqtan llapanta perqanki,+ mana chayqa paqtapas pipas chay patamanta urmaykamunman chhaynapitaq wasipi kaqkuna chay runaq wañusqanmanta* juchayoq kankuman.

9 ”Uvas chajraykipiqa uvasllan wiñanqa, aman chaymanqa ima juj mujutapas tarpunkichu.*+ Imatawanpas tarpunki chayqa, llapa tarpusqaykipas uvas rurupas Diosta yupaychana karpapaqmi kanqa.

10 ”Chajrapi llank’aspaqa aman asnotawan torotawanqa masachankichu.+

11 ”Aman churakunkichu willma q’aytuwan lino q’aytuwan chhaqrusqa p’achawanqa.+

12 ”P’istukunaykiq tawantin ch’ullpanmanmi churanki jatun chhaqchakunata.*+

13 ”Pipas juj warmiwan casarakuspa paywan puñunman chaymantataq cheqnikapunman, 14 jinaspa qhelli warmimanta tumpanman, mana allinpi qhepachiyta munaspataq ninman: Kay casarakusqay warmiqa ñan qhariwan kasqaña, paywan puñuspaymi chhaynata tarini, nispa chayqa, 15 chay sipaspa tayta-mamanmi ususinku doncella sipaspuni* kasqan señalta llaqta jaykuna punkupi umalliqkunaman* apamunqaku. 16 Chaypin sipaspa taytanqa chay umalliqkunata ninqa: Noqan kay qhariman ususiyta warminpaq qorqani, kunantaq ichaqa cheqnikapun, 17 qhelli warmimanta tumpaspataq nishan: Ususiykiqa ñan qhariwanqa kasqaña, manan doncella sipaschu kasqa, nispa. Qhawariychis, qankunamanmi doncella sipas kasqan señalta apamushaykichis, nispa. Chaymantataq chay puñuna mast’anata llaqtapi umalliqkunaq ñaupanpi mast’arinqa. 18 Jinan llaqtapi umalliqkunaqa+ chay runata jap’ispa soq’anqaku,+ 19 pachaj siclo* qolqeta iman pagachinqaku, chaytataq chay sipaspa taytanman qopunqaku. Israelpi juj doncella sipasta yanqa tumpaspa p’enqayman churasqanraykun+ chay runaqa chayta paganqa. Chaymantapas chay sipasqa wañukapunan p’unchaykaman chay runaq warmin kanqa, manan chay runaqa paymanta t’aqakuyta atinqachu.

20 ”Ichaqa chay runaq rimasqanchus cheqaq kanman, ñachus chay warmipas qhariwan kanmanña karqan chayqa, 21 chay sipastan taytanpa wasin punkuman orqomunqaku, jinaspa llaqtanpi llapa runakuna rumiwan ch’aqespa wañuchinqaku. Israelpi p’enqay ruwayta ruwasqanrayku,+ taytanpa wasinpi qhelli juchata ruwasqanraykun* wañuchisqa kanqa.+ Chhaynatan qankuna ukhumanta mana allin kaqta chinkachinkichis.+

22 ”Sichus juj qharita jujpa warminwan puñushaqta tarinkichis chayqa, iskayninkutan qharitapas warmitapas wañuchinkichis.+ Chhaynapin Israel llaqtamanta mana allin kaqta chinkachinkichis.

23 ”Sichus juj doncella sipas juj qhariwan casarakunanpaq rimanasqa kashaqtin waj qhari paywan llaqtapi tupanman jinaspa paywan puñunman chayqa, 24 iskayninkutan llaqta punkuman apankichis, jinaspa wañunankukama rumiwan ch’aqenkichis. Warmin wañunqa llaqta ukhupi kashaspa mana qaparisqanrayku, qharitaq wañunqa runamasinpa warminta p’enqayman churasqanrayku.+ Chhaynatan qankuna ukhumanta mana allin kaqta chinkachinkichis.

25 ”Ichaqa yaqapaschá juj qhari campopi tarinman casarakunanpaq rimaykusqa kashaq sipasta, jinaspa payta violanman, chhayna kaqtinqa qharillan wañuchisqa kanqa. 26 Warmitan ichaqa ama imanankichispaschu. Payqa manan ima juchatapas ruwarqanchu chayraykun mana wañunqachu. Chay pasasqanqa juj runapas runamasinta jap’ispa wañuchinman karqan jinan.+ 27 Chay qhariqa mana munashaqtataq chay sipasta jap’irqan chayqa, qaparirqanchá sipasqa, manataq pipas yanapaqnin karqanchu.

28 ”Sichus casarakunanpaq manaraq rimapayasqa doncella sipasta juj qhari jap’inman jinaspa paywan puñunman, paykunataq jap’isqa kankuman chayqa,+ 29 chay qharin sipaspa taytanman pisqa chunka siclo qolqeta qonqa, chhaynapin chay sipasqa chay runaq warmin kapunqa.+ P’enqaymantaq chay sipasta churarqan chayqa, manan chay qhariqa jayk’aqpas paymanta t’aqakapuyta atinqachu.

30 ”Aman pipas taytanpa warminwanqa casarakunqachu, mana chayqa taytantachá pisichanman.+