Jueces

9 Tiempowanmi Jerubaalpa churin Abimelecqa+ Shejen llaqtata rirqan mamanpa turankunata visitaq. Chaypin paykunata abuelonpa familiankunatawan nirqan: 2 “Ama jinachu kaychis, Shejen llaqtapi llapa umallikunata niykapuwaychis: ¿Imatan munawaqchis? ¿Jerubaalpa qanchis chunka churinkuna kamachinasuykichistachu+ icha jujlla kamachinasuykichistachu? Yachasqaykichis jina noqapas qankunaq familiaykichismi kashani, kikin yawarniykichis, nispa”.

3 Jinan Abimelecpa mamanpa turankunaqa chay willakuyta aparqanku Shejen llaqtapi umallikunaman, paykunataq: “Abimelecqa wayqenchismá riki”, nispa payman sayapakurqanku.* 4 Chaymantapas chay umallikunaqa Baal-Berijpa+ templonmantan qanchis chunka qolqeta qorqanku. Chaywantaq Abimelecqa mana respetoyoq qella runakunata contratarqan payta compañanankupaq. 5 Jinaspa Ofrá llaqtata+ rirqan, papan Jerubaalpa wasinta. Chaypin Abimelecqa juj rumi patapi qanchis chunkantin wayqenkunata wañuchirqan.+ Jerubaalpa sullk’a churin Jotanmi ichaqa pakakurqan, chaymi mana wañuchisqachu karqan.

6 Chaymantataq Shejen llaqta umallikunaqa, Bej-Milopi runakunapiwan jatun sach’aq qayllanpi juñukurqanku, Shejen llaqtapi kaq columnaq qayllanpi. Chaypin Abimelecta rey kananpaq nombrarqanku.+

7 Chayta yacharuspan Jotanqa usqhaylla Guerizin orqo+ pataman rirqan, chaymantapachan fuerte kunkawan nimurqan: “¡Uyariwaychis Shejen llaqta umallikuna, sichus uyariwankichis chayqa Diospas uyarillasunkichistaqmi!

8 ”Juj kutinsi sach’akunaqa juñukuspanku kamachiqninkuta ajllaq puririsqaku. Chaysi aceituna sach’ata nisqaku: Reyniyku kanaykitan munayku,+ nispa. 9 Aceituna sach’ataqsi nisqa: Noqamanta lloqsiq aceitewanmi Diostapas runakunatapas jatunchanku, ¿chayta saqespaychu kunan riyman qankunata gobiernaq?* Manan chaytaqa ruwaymanchu, nispa. 10 Chaysi paykunaqa higos sach’atañataq nisqaku: Jamuy, qan reyniyku kay, nispa. 11 Higos sach’ataqsi nisqa: ¿Sumaq misk’i rurukuna rurusqayta saqespaychu qankunata kamachiq riyman? Manan chaytaqa ruwaymanchu, nispa. 12 Jinaspas sach’akunaqa uvas sach’atañataq valekusqaku: Chhaynaqa qanyá reyniyku kay, nispa. 13 Uvas sach’ataqsi nisqa: ¿Diostapas runakunatapas kusichiq vinoyta saqespachu qankunata kamachiq riyman? Manan chaytaqa ruwaymanchu, nispa. 14 Chaysi paykunaqa t’ankar kiskatañataq nisqaku: Chhaynaqa qanyá jamuy, gobiernawayku,+ nispa. 15 Jinas t’ankar kiskaqa chay sach’akunata nisqa: Qankunata gobiernanaypaqtaq ajllakuwankichis chayqa, jamuychis llanthuypi llanthukuychis, mana chayqa noqamantan nina raurarinqa jinaspan Líbano orqopi cedro sach’akunata rupharparinqa, nispa.

16 ”Kunantaq kayta tapusaykichis: Abimelecta reyniykichispaq ajllarukuspaykichis,+ ¿allintachu chayta ruwashankichis, chanintachu ruwashankichis? ¿Chaychu qankunapaq Jerubaalta familiantapas munakuy? ¿Chaychu qankunapaq Jerubaalta respetay? 17 Papayqa wañuytapas mana manchakusparaqmá riki Madián runakunamanta librarqasunkichis.+ 18 Qankunataq ichaqa papaypa familian contra jatarispaykichis churinkunata qanchis chunkantinta juj rumillapi wañurachipunkichis.+ Warmi kamachinpa churin Abimelectataq+ yawarniykichis kasqanrayku Shejen llaqtapi rey kananpaq churaykunkichis. 19 Allintachus ruwashankichis, chanintachus ruwashankichis Jerubaalpaq wasinpi kaqkunapaqpas chayqa, kusikuychis Abimelecwan, paypas qankunawan kusikuchun. 20 Mana chayqa Abimelecmanta nina raurarimuchun jinaspa ruphachun Shejen llaqta umallikunata Bej-Milotawan,+ kaqllataq Shejen llaqta umallikunamanta Bej-Milomantawan nina raurarimuchun jinaspa Abimelecta ruphachun”,+ nispa.

21 Chaykunata nispan Jotanqa+ wayqen Abimelecta manchakuspa Ber ladoman ayqekurqan, chaypin tiyapurqan.

22 Abimelecqa kinsa watan Israel runakunata kamachirqan. 23 Diosmi cheqninachirqan* Abimelecta Shejen llaqta umallikunatawan, jinan Shejen llaqta umallikunaqa Abimélec contra jatarirqanku. 24 Chaykunan pasarqan Jerubaalpa qanchis chunkantin churinkunata wañuchisqanku ama jinallachu kananpaq, yawar jich’ariq runakunapas juchankumanta paganankupaqwan. Abimelecmi wayqenkuna wañuchisqanmanta paganan karqan,+ Shejen llaqta umallikunataq wañuchiypi yanapakusqankumanta pagananku karqan. 25 Shejen llaqta umallikunan orqo patakunapi runakunata churarqanku Abimelecman qonqaylla phawaykunankupaq, chay runakunan ñan puriqkunata suwaqku. Qhepamanmi ichaqa chaykuna pasasqanta Abimelecman willamurqanku.

26 Chay tiempopin Ebedpa churin Galqa wayqenkunantin Shejen+ llaqtaman chayarqanku, Shejen llaqta umallikunataq paypi confiarqanku. 27 Juj kutinmi Shejen llaqta umallikunaqa chajrankumanta uvasta pallamuspa sarurqanku, jinaspa jatun fiestata ruwarqanku. Chaymantataq idolonkuq templonman+ jaykuspa mijurqanku tomarqanku ima, chaypin Abimelecmanta mana allinta rimaspa ñakarqanku. 28 Chaypin Ebedpa churin Galqa nirqan: “¿Pitaq Jerubaalpa+ churin Abimelecri? ¿Pitaq Shejenpi encargakuq Zebulri? ¿Imaraykutaq paykunatari servinanchis? ¿Manachu aswanpas servisunman Shejenpa taytan Jamorpa mirayninkunata? ¡Ama servisunchu Abimelectaqa! 29 Noqalla kay llaqtapi kamachishayman, ñachá Abimelectaqa qarqorapuymanña”, nispa. Chaymantataq Abimelecmanta burlakuspa nirqan: “Abimélec, soldadoykikunata yapaykuspa jamuy noqawan maqanakuq”, nispa.

30 Ebedpa churin Galpa rimasqanta yacharuspataq Shejen llaqtapi gobiernaq Zebulqa sinchita phiñakurqan. 31 Jinaspa mana piqpa yachasqallan Abimelecman willachimurqan: “Ebedpa churin Galmi wayqenkunantin Shejen llaqtapi kashanku, paykunan runakunata qanpa contraykipi churashanku. 32 Soldadoykikunapiwan tutalla jamuychis jinaspa campollamanta kay llaqtata makilla qhawamunkichis. 33 Tutamantan inti lloqsimuqtin jinataq kay llaqtaman phawaykamunkichis. Gal runankunantin qanwan maqanakuq lloqsimuqtinqa atipankipunin imata ruwaspapas”, nispa.

34 Jinan Abimelecqa soldadonkunapiwan tutallapi lloqsimurqanku, jinaspa tawaman t’aqarukuspa Shejen llaqta jawallapi suyaparqanku.* 35 P’unchayaramuqtintaq Ebedpa churin Galqa llaqta punkuman lloqsimurqan, Abimelectaq soldadokunantin pakakusqankumanta phawaykamurqanku. 36 Chay runakunata rikuruspan Galqa Zebulta nirqan: “¡Qhawariy! Jaqay orqomanta askha runakuna jaykumushanku”, nispa. Zebultaq ichaqa nirqan: “Orqokunaq llanthuntachá runakunata jina rikushanki”, nispa.

37 Juj ratumantaq Galqa Zebulta nillarqantaq: “¡Qhawariy! Chaupi ladomanta runakuna jamushan. ¡Qhawariy! Meonenin nisqa jatun sach’anta pasaq ñannintapas runakuna jamushallantaq”, nispa. 38 Jinan Zebulqa nirqan: “Kunanri imaninkitaq. ¿Pitaq Abimelecri payta servinanchispaq?,+ nispataq nisharqankiqá. ¿Manachu jaqay runakunaqa pisichasqayki runakuna kashanku? Kunanqa phawayyá paykunawan maqanakamuy”, nispa.

39 Jinan Galqa Shejen llaqta umallikunaq ñaupanman churakuspa Abimelecwan maqanakuq lloqsirqan. 40 Abimelectaq Galta qatirirqan, jinan Galqa escapakurqan. Chay p’unchayqa askha runakunan wañurqanku, llaqta punkukamaraqmi mast’a pampa kasharqanku.

41 Abimelecqa tiyasqan Arumá llaqtamanmi kutipurqan, Zebultaq+ Galta wayqenkunatawan Shejen llaqtamanta qarqopurqan. 42 Qhepa p’unchaytaq Shejen llaqta runakunaqa campoman lloqsirqanku, chaytan Abimelecqa yacharurqan. 43 Jinan Abimelecqa runankunata kinsaman t’aqaruspa Shejen llaqta runakunata suyaparqanku. Llaqtamanta runakuna lloqsimushaqtintaq phawaykuspa wañuchirqanku. 44 Abimelectaq paywan kaq runakunapiwan llaqta punkuman phawaykurqanku, jinaspa chaypi sayarqanku. Iskaynin t’aqa runakunataq campopi kaq llapa runakunata wañuchirqanku. 45 Abimelecqa ch’isiyaqmi chay p’unchay Shejen llaqta runakunawan atipanankama maqanakurqan. Lliutan runakunatapas wañuchirqan, chaymantataq chay llaqtata thunispa+ kachiwan wisñirqan.

46 Chayta yacharuspankun Shejen llaqta torrepi umallikunaqa El-Berij nisqa idolonkuq templonpi+ kaq pakakuna cuartoman jaykurqanku. 47 Shejen llaqta torrepi umallikunaq maypichus pakakusqanta willaruqtinkun Abimelecqa, 48 paywan kashaq runakunantin Zalmón orqota rirqan. Chaypin payqa hachawan sach’aq k’allmanta wit’urqan, rijranman churaykuspataq runankunata nirqan: “¡Apuraychis! Qankunapas noqa jina ruwaychis”, nispa. 49 Jinan paykunapas llapanku sach’aq k’allmanta wit’uspa Abimelecpa qhepanta rirqanku. Jinaspa chay apasqanku k’allmakunata runakunaq pakakusqanman montoykurqanku, chaytataq ninawan kanaykurqanku. Chhaynapin Shejen llaqta torrepi kaq runakunapas wañupurqanku, llapanpiqa yaqa waranqa runakunan wañurqanku warmikunantin qharikunantin.

50 Chaymantataq Abimelecqa Tebez llaqtata rirqan, chaypin chay llaqta runakunawan maqanakuspa atiparqan. 51 Jinan chay llaqtapi umallikunapas, qharikunapas, warmikunapas llaqta chaupipi kaq allin perqasqa torreman ayqekurqanku. Punkuta wisq’akamuspankutaq torreq alto patanman wicharqanku. 52 Abimelecqa chay torrekaman chayarqan, ninawan jap’iyachinanpaq punkuman qayllaykushaqtintaq, 53 torre patamanta juj warmi kutana rumita kachaykamurqan, jinan Abimelecpa umanman chayaspa umanta ch’eqtarqan.+ 54 Abimelectaq arma apaysiqnin runata nirqan: “Espadaykiwan apuray wañuchiway, chhaynapi: Juj warmin wañuchin, nispa ama rimashanankupaq”, nispa. Jinan yanapaqninqa espadanta orqokuspa wañuchipurqan.

55 Abimelecpa wañupusqanta rikuspan Israel runakunaqa sapankanku wasinkuman kutipurqanku. 56 Chhaynatan Diosqa Abimelecta juchanmanta pagachirqan. Payqa qanchis chunka wayqenkunata wañuchispan papan contra mana allinta ruwarqan.+ 57 Kaqllatataqmi Diosqa Shejen llaqta runakunamanpas mana allinkuna ruwasqankumanta kutichipurqan. Chhaynapin Jerubaalpa+ churin Jotanpa ñakasqanqa paykunaman chayarqan.+