1 Reyes

5 Tiro+ llaqtamanta rey Hirammi yacharurqan Davidpa rantinpi churin Salomón rey kapusqanta, chaymi kamachinkunata rey Salomonman kacharqan. Davidqa tukuy kausasqan tiempon Hiramwanqa amigontin karqanku.+ 2 Jinan Salomonqa Hiramman juj willakuyta apachirqan:+ 3 “Yachasqayki jina, papay Davidqa guerrallapin kasharqan, tukuy ladomantan pay contra jatarirqanku, chaymi mana atirqanchu Jehová Diospa sutinta jatunchananpaq juj wasita ruwapuyta, llapan enemigonkunata Jehová Dios atipanankama.+ 4 Kunanmi ichaqa Jehová Diosniyqa tukuy ladopi thaj kayta qoykuwan.+ Manan ima ñak’ariypas kanchu nitaqmi pipas noqa contraqa sayarinchu.+ 5 Chaymi yuyaykushani Jehová Diosniypa sutinta jatunchananpaq juj wasi ruwayta, imaynan papay Davidman Jehová Dios prometerqan jina. Paymi nirqan: Qanpa rantiykipin churiykita reyta churasaq, paymi juj wasita ruwapuwanqa, chay wasin sutiyta jatunchanqa,+ nispa. 6 Chayrayku valekuyki, runaykikunata kamachiy Líbano orqomanta cedro sach’akunata+ wit’umpuwanankupaq. Kamachiykunaqa kamachiykikunawan kuskan llank’anqaku, jayk’atachus mañakusqaykiman jinataqmi kamachiykikunamanqa pagapusaq. Yachasqayki jina, noqayku ukhupiqa manan pipas kanchu Sidón runakuna jina sach’a wit’uyta allinta yachaqkunaqa”,+ nispa.

7 Salomonpa chay willachisqanta uyarispan rey Hiramqa anchata kusikurqan, jinaspan nirqan: “¡Jatunchasqa kachun Jehová Diosqa! Paymi allin yachayniyoq churita Davidman qorqan chay jatun llaqtata* kamachinanpaq”,+ nispa. 8 Jinan Hiramqa Salomonman willachimurqan: “Uyariniñan willachimuwasqaykitaqa. Llapa mañakuwasqaykitan ruwasaq, cedro maderakunatapas enebro maderakunatapas apachimusaykin.+ 9 Runaykunan chay maderakunata Líbano orqomanta lamar-qocha pataman apayamunqaku, k’ullukunamanta barcokunata ruwachispataq chaypi apachimusayki. Maykamachus apamunaykuta munanki chaykaman apachimusayki, chaymantaqa qankunaña apakapunkichis. Qantaq ichaqa mañakusqayman jina wasiypi kaqkunapaq mijuykunata qowanki”,+ nispa.

10 Chhaynatan Hiramqa Salomonpa mañakusqanman jina cedro maderakunatapas enebro maderakunatapas apachimurqan. 11 Salomontaq sapa wata apachiq Hirampa wasinpi kaqkunapaq iskay chunka waranqa carga* trigota, tawa waranqa tawa pachaj litro* aceituna aceitetawan,* chay aceiteqa manan común aceitellachu karqan.+ 12 Jehová Diosqa prometesqanman jinan Salomonman yachayta qorqan.+ Salomonwan Hiramwanmi thajpi kausanankupaq rimanakurqanku, chhaynapin sumaqta kausarqanku.

13 Rey Salomonqa lliu Israelmantan juñumurqan kinsa chunka waranqa qharikunata, paykunan kamachisqa karqanku reypaq llank’anankupaq.+ 14 Líbano orqopi llank’amunankupaqmi Salomonqa sapa killa chunka waranqa qharikunata kacharqan. Juj killan Líbano orqopi llank’amuqku, iskay killataq wasinkupi qhepakuqku. Adoniranmi+ llapa chay runakunamanta encargakuq karqan. 15 Chaymantapas qanchis chunka waranqa runakunan karqan q’epispa llank’aqkuna, orqokunapi+ rumita ch’eqtaspa llank’aqkunataq karqan pusaq chunka waranqa runakuna,+ 16 Salomonpa llank’aqninkunamanta encargakuqkunataq karqan kinsa waranqa kinsa pachaj runakuna, paykunan capatazkuna jina karqanku.+ 17 Wasiq cimentacionninpaqmi+ rey Salomonqa rumikunata orqochispa thupachirqan,+ chay rumikunaqa ancha valeq jatun rumikunan karqan.+ 18 Jinan Salomonpa llank’aqninkunapas Hirampa llank’aqninkunapas Guebal llaqta runakunawan+ kuska rumikunata thuparqanku. Chay rumikunatawan maderakunatawanmi alistarqanku Diospa wasinta ruwanankupaq.