1 Reyes

22 Israel runakunawan Siria runakunawanqa kinsa watañan thajpi kausasharqanku. 2 Jinan kinsa kaq watapi Judá rey Jehosafatqa+ Israel reywan tupaq rirqan.+ 3 Israel reymi kamachinkunata nirqan: “Qankunaqa allintan yachankichis Ramoj-Galaad+ llaqtaqa noqanchispa kasqanta. Chhaynaqa, ¿imatan suyashanchis? Jaku chay llaqtanchista Siria reymanta qechukampusun”, nispa. 4 Chaymantataq Judá rey Jehosafat-ta nirqan: “¿Manachu Ramoj-Galaad llaqtata riysiwankiman Siria runakunawan maqanakuq?”, nispa. Jinan Jehosafatqa nirqan: “Jakuyá risunchis. Noqanchisqa kaqllan kanchis, llaqtaypas llaqtayki jinan, caballoykunapas caballoykikuna jinan”,+ nispa.

5 Chaymantapas Jehosafatqa nillarqantaqmi: “Ñaupaqta ichaqa Jehová Diostaraq tapuy”,+ nispa. 6 Jinan Israel reyqa yaqa tawa pachaj profetakunata juñurqan, jinaspa nirqan: “¿Risaqchu icha manachu Ramoj-Galaad contra maqanakuq?”, nispa. Chay profetakunataq nirqanku: “Rillay, Jehová Diosmi paykunataqa makiykiman entregasunki”, nispa.

7 Jinan Jehosafatqa nirqan: “¿Manachu Jehová Diospa juj profetan kaypi kan? Paytapas tapullasuntaq”,+ nispa. 8 Chayta niqtinmi Israel reyqa Jehosafat-ta nirqan: “Arí, kashanraqmi juj profeta Jehová Diosta tapunanchispaq,+ payqa Inlapa churin Micayan. Ichaqa chay profetaqa noqa contrallan profetizan,+ chaymi cheqnikuni”,+ nispa. Jinan Jehosafatqa nirqan: “Rey Ajab, ama chhaynata rimaychu”, nispa.

9 Jinan Israel reyqa palacionpi kaq oficialta wajaspa nirqan: “Phaway usqhaylla Inlapa churin Micayata pusaramuy”,+ nispa. 10 Israel reywan Judá rey Jehosafatwanqa Samaria llaqta punkupin era patapi* kasharqanku, chaypin paykunaqa rey p’achankuwan churarusqa trononkupi tiyasharqanku, ñaupankupitaq llapa profetakuna profetizasharqanku.+ 11 Jinan Kenanapa churin Sedequiasqa fierromanta waqrakunata ruwarukuspa nirqan: “Jehová Diosmi nin: Kay waqrakunawanmi Siria runakunata chinkachinaykikama waqranki,* nispa”. 12 Wakin profetakunapas llapankun nisharqanku: “Rillay Ramoj-Galaad llaqtataqa, atipamunkipunin. Jehová Diosmi paykunataqa makiykiman entregasunki”, nispa.

13 Micayata wajamuq oficialmi Micayata nirqan: “Llapa profetakunan reyta nishanku: Chay maqanakuypiqa atipamunkin, nispa. Qanpas ama jinachu kay, kaqllatataq niy”,+ nispa. 14 Micayan ichaqa nirqan: “Wiñaypaq kausaq Jehová Diospa sutinpin jurayki, noqaqa Jehová Diospa nisqallantan rimasaq”, nispa. 15 Reypa kasqanman Micaya jaykuqtintaq reyqa payta tapurqan: “Micaya, ¿risaqkuchu icha manachu Ramoj-Galaad contra maqanakuq?”, nispa. Jinan Micayaqa kaq ratupacha nirqan: “Rillay, atipamunkin. Jehová Diosmi paykunataqa makiykiman entregasunki”, nispa. 16 Chayta uyarispan reyqa nirqan: “¿Jayk’a kutitan jurachisayki cheqaqllata niwanaykipaq? ¿Jayk’a kutitan nisayki Jehová Diospa nisqallantapuni niwanaykipaq?”, nispa. 17 Jinan Micayaqa nirqan: “Llapa Israel runakunatan orqokunapi ch’eqesqata rikushani+ mana michiqniyoq ovejakunata jina. Chaymi Jehová Diosqa nin: Paykunaqa mana michiqniyoq ovejakuna jinan kashanku. Sapankanku wasinkuman thajpi kutipuchunku, nispa”.

18 Jinan Israel reyqa Jehosafat-ta nirqan: “Nishaykin riki, kay runaqa mana allinllatapunin noqamantaqa profetizan”,+ nispa.

19 Chaymantataq Micayaqa nirqan: “Uyariy Jehová Diospa nisqanta. Jehová Diostan rikuni janaq pacha trononpi tiyashaqta.+ Paña ladonpi lloq’e ladonpi imataq angelkuna llapallanku sayashasqaku.*+ 20 Jinan Jehová Diosqa nirqan: ¿Pin Ajabta engañaramunman Ramoj-Galaadta rinanpaq, jinaspa chaypi wañunanpaq?, nispa. Chaymi angelkunaqa khaynata jaqaynata nispa nirqanku. 21 Jinan juj angelqa*+ Jehová Diosman qayllaykuspa ñaupanpi sayaykurqan, jinaspa nirqan: Noqa engañaramusaq, nispa. Chaymi Jehová Diosqa nirqan: ¿Imaynatataq engañamunkiri?, nispa. 22 Jinan chay angelqa nirqan: Rispay chay profetakunaq siminman imatachus rimanankuta churaramusaq, chhaynapi pantasqata rimanankupaq,+ nispa. Chaymi Diosqa nirqan: Phaway nisqaykiman jina ruwamuy, yuyaykusqaykiqa allinmi kanqa, engañaramunkin, nispa. 23 Chayraykun Jehová Diosqa juj angelta kachamurqan kay profetakunata pantasqata rimachinanpaq.+ Jehová Diosmi ichaqa ña willanña imapichus tarikunaykita”,+ nispa.

24 Jinan Kenanapa churin Sedequiasqa Micayaman qayllaykuspa uyanpi ch’aqlarqan, jinaspa nirqan: “Chhaynaqa, ¿Jehová Diospa espiritunmi saqepusunki nishawankichu? ¿Kunanqa qanwanñataqchu rimashan? ¿Maynintataq qanmanri chimparurqan?”,+ nispa. 25 Jinan Micayaqa nirqan: “Chaytaqa yachanki wasi ukhuman pakakuq ayqekushaspaykiñan”, nispa. 26 Chaymi Israel reyqa nirqan: “¡Jap’iychis Micayata! Jinaspa llaqtata umalliq Amonman reypa churin Joasmanwan entregamuychis. 27 Paykunatataq ninkichis: Reymi nin: ¡Kay runata carcelman wisq’aychis!+ T’antatapas unutapas pisillata qoychis maqanakuymanta atipaspa kutimunaykama, nispa”. 28 Micayan ichaqa nirqan: “Sichus maqanakuymanta atipaspa kutimunki chayqa, manapas Jehová Dios noqawan rimanmanchu jinan kanqa”,+ nispa. Llapa runakunatataq nirqan: “Allinta chayta uyariychis, ama qonqaychischu”, nispa.

29 Jinan Israel reyqa Judá rey Jehosafatwan Ramoj-Galaad llaqtata rirqanku.+ 30 Israel reymi Jehosafat-ta nirqan: “Noqaqa juj p’achawan churarukuspan maqanakuq risaq, qantaq ichaqa rey p’achaykiwan rinki”, nispa. Jinan Israel reyqa juj p’achawan churakuspa maqanakuq rirqan.+ 31 Siria reymi ichaqa carretakunapi kaq soldadokunaq kinsa chunka iskayniyoq comandantenkunata+ nisqaña: “Aman piwanpas maqanakunkichischu, juch’uywanpas ni jatunwanpas, aswanpas Israel reyllawanmi maqanakunkichis”, nispa. 32 Jinan chay comandantekunaqa Jehosafat-ta rikuruspa paykunapura ninakurqanku: “Jaqayqa Israel reypunin kanman”, nispa. Jinaspa paywan maqanakunankupaq usqhaylla phawarirqanku, Jehosafatmi ichaqa qaparispa yanapayta mañakurqan. 33 Jinan chay comandantekunaqa mana Israel reychu kasqanta reparaspa manaña qatiparqankuñachu.

34 Juj runan ichaqa comunta flechasharqan, jinaspan qonqaylla Israel reyta jap’irachirqan, chay flechaqa reypa maqanakunan chalecontan* jaykururqan. Jinan Israel reyqa carretanta apaq soldadota nirqan: “Carretata kutirichiy, jaku juj ladoman, sinchitan k’iriruwanku”,+ nispa. 35 Chay p’unchay maqanakuyqa sinchipunin karqan. Israel reytaqa carreta patapin jap’isharqanku Siria runakuna qhawashaqta, yawarninqa carreta patamanmi askha phawasharqan, jinan tardeyaykuyta jina wañupurqan.+ 36 Inti jaykuyta jinataq karpa-karpapi juj kunka uyarikurqan: “¡Llaqtaykichisman kutipuychis! ¡Jallp’aykichisman kutipuychis!”,+ nispa. 37 Chhaynatan Israel reyqa wañupurqan, Samaria llaqtaman apapuspataq chaypi p’ampapurqanku. 38 Chaymantataq reypa carretanta Samaria estanquepi maqchirqanku, jinan alqokuna reypa yawarninta llaqwarqanku, ramera warmikunataq chay estanquepi bañakurqanku.* Chayqa Jehová Diospa nisqanman jinapunin junt’akurqan.+

39 Rey Ajabpa wakin ruwasqankunapas, marfilmanta wasi*+ ruwasqanpas, llapa llaqtakuna sayarichisqanpas lliumi Israel reykunamanta willaq libropi qelqasqa kashan. 40 Chaymantataq Ajabqa ñaupa taytankuna jina wañukapurqan,+ chay qhepamantaq churin Ocozías+ rey kapurqan.

41 Rey Ajab Israelpi tawa wataña kamachikushaqtinmi Asapa churin Jehosafatqa+ Judá ayllupi rey kapurqan. 42 Jehosafatqa kinsa chunka pisqayoq watanpi kashaspan rey kapurqan, iskay chunka pisqayoq watataqmi Jerusalenmanta kamachikurqan. Paypa mamanmi karqan Silipa ususin Azubá. 43 Jehosafatqa papan Asá jinan ruwarqan,+ payqa Jehová Diospa munasqanman jinan lliutapas ruwarqan.+ Yupaychana patakunatan* ichaqa mana chinkachirqanchu, chaymi runakunaqa sacrificiokunata jaywaspa diosninkuman q’osñichishallarqanku.+ 44 Jehosafatqa sumaqtan kausarqan Israel reywanqa.+ 45 Jehosafatpa wakin ruwasqankunapas, maqanakuypi atipasqankunapas, imayna maqanakusqanpas lliumi Judá ayllu reykunamanta willaq libropi qelqasqa kashan. 46 Paymi kamachikusqan jallp’amanta wijch’urqan qharimasinkunaman cuerponkuta vendespa idolonkuta yupaychaq qharikunata.+ Chay qharikunaqa papan Asapa kamachikusqan tiempomanta qhepaqkunan karqanku.+

47 Chay tiempopiqa manan juj reychu Edom+ jallp’apiqa kamachikusharqan, aswanpas juj oficial-llan rey jina kamachikusharqan.+

48 Chaymantapas Jehosafatqa Tarsis barcokunatan* ruwarqan Ofirmanta qorita apamunanpaq.+ Chay barcokunan ichaqa sinchi wayraq kasqanwan Ezión-Gueberpi chhallukapurqan,+ chaymi manaña rirqankuchu. 49 Ajabpa churin Ocoziasmi Jehosafat-ta nirqan: “Kamachiykikuna kamachiykunapiwan chay barcokunapi richunku”, nispa.* Jehosafatmi ichaqa mana munarqanchu.

50 Chaymantataq Jehosafatqa ñaupa taytankuna jina wañukapurqan,+ jinaspa ñaupa taytankunawan kuskata Davidpa Llaqtan nisqapi p’ampapurqanku. Chay qhepamantaq churin Jehoram+ rey kapurqan.

51 Israelpitaq Ajabpa churin Ocozías+ rey karqan, paymi Samaria llaqtamanta kamachikuyta qallarirqan Judá ayllupi rey Jehosafat chunka qanchisniyoq wataña kamachikushaqtin. Ocoziasqa iskay watan Israelpi kamachikurqan. 52 Payqa taytan jinan maman jinan Jehová Diospa cheqnisqan ruwaykunata ruwashallarqan.+ Payqa Israel runakunata juchallichiq Nebajpa churin Jeroboán jinan mana allinkunata ruwarqan.+ 53 Ocoziasqa taytan jinan Baalta adorarqan,+ chhaynapin Israelpa Diosnin Jehová Diosta phiñachirqan.+