2 Reyes

9 Profeta Eliseon profetakunaq churinta* wajaspa nirqan: “P’achaykita cinturaykiman watarukuy, jinaspa kay p’uyñuchapi aceiteta aparikuspa usqhaylla Ramoj-Galaad+ llaqtata riy. 2 Chayman chayaspataq maskhanki Ninsipa nieton, Jehosafatpa churin Jehuta.+ Payqa soldadokunaq umallinkunapiwanmi kashanqa, paykunaq kasqanman jaykuspataq Jehuta sapallanta wasi ukhuman pusaykunki. 3 Wasi ukhuman pusaykuspataq apasqayki aceitewan umanpi jich’aykunki, jinaspa ninki: Jehová Diosmi nisunki: Qantan Israelpi rey kanaykipaq ajllayki,+ nispa. Chaymantataq punkuta kichaspa usqhaylla ayqekamunki”, nispa.

4 Jinan Eliseoq kamachin profetaqa Ramoj-Galaad llaqtata rirqan. 5 Chayananpaqqa chaypin soldadokunaq umallinkunaqa tiyashasqaku. Jinan chay profetaqa nirqan: “Wiraqocháy, juj willakuytan apamushayki”, nispa. Jehutaq tapurqan: “¿Mayqenniykupaqtaq chay willakuyri?”, nispa. Paytaq nirqan: “Qanpaqmi wiraqocháy”, nispa. 6 Chayta niqtinmi Jehuqa sayarispa wasi ukhuman jaykurqan. Jinan chay profetaqa aceitewan umanpi jich’aykuspa nirqan: “Israelpa Diosnin Jehová Diosmi nisunki: Noqa Jehová Diosmi qanta ajllayki Israel llaqtaypi rey kanaykipaq.+ 7 Ajabpa familianmanta kaqkunata lliuta wañuchiy, noqa Jehová Diostaq vengakusaq profetaykunatapas kamachiykunatapas Jezabelpa+ wañuchisqanmanta. 8 Ajabpa familianmanta kaq qharikunatan* lliuta Israelmanta chinkachisaq, pisichasqakunatapas pisi kallpakunatapas manan khuyapayasaqchu.+ Ajabpa familianmanta kaqkunaqa llapankun wañunqaku. 9 Imaynan Nebajpa churin Jeroboanpa familiantapas+ Aiyaq churin Basapa familiantapas+ chinkachirqani, chhaynatan Ajabpa familiantapas lliuta chinkachisaq. 10 Jezabeltataqmi Jezrel jallp’api alqokuna mijunqaku,+ manan pipas paytaqa p’ampanqachu, nispa”. Chayta nispan chay profetaqa wasi punkuta kichaspa usqhaylla ayqekurqan.+

11 Soldadokunaq umallinkuna kasqanman Jehú kutiqtintaq paykunaqa tapurqanku: “¿Iman pasarun? ¿Imamanmi chay loco jamusqa?”, nispa. Jehutaq nirqan: “Manan imamanpas, qankunaqa yachankichismá riki imayna runachus kasqanta, imaynatachus rimasqantapas”, nispa. 12 Umallimasinkunan ichaqa nirqanku: “¡Qanqa llullakushankin, sut’inta willawayku!”, nispa. Jinan Jehuqa chay profetaq nisqanta paykunaman willarqan, chaymantataq nirqan: “Chaymantapas niwallantaqmi: Jehová Diosmi nisunki: Qantan Israelpi rey kanaykipaq ajllayki,+ nispa”. 13 Chayta niqtin jinan chay umallikunaqa Jehupa chaki sarunan gradas pataman usqhaylla p’achankuta mast’arqanku,+ oveja waqrata tocaspataq nirqanku: “¡Kunanqa Jehumi rey kapun!”,+ nispa. 14 Chaymantataq Ninsipa nieton, Jehosafatpa churin Jehuqa+ Israel rey Jehoram contra jatarirqan.

Jehoramqa soldadonkunantinmi Ramoj-Galaad+ llaqtapi kasharqanku, chaypin paykunaqa Siria rey Azaelwan+ maqanakusharqanku. 15 Chaypi maqanakushaqtinmi Jehoramtaqa Siria runakuna k’irirqanku, chaymi Jehoramqa Jezrel+ llaqtaman kutirqan k’irinmanta qhaliyananpaq.+

Chaymantataq Jehuqa nirqan: “Sichus noqawan kashankichis chayqa ama pitapas kay llaqtamanta kachariychischu, chhaynapi Jezrel llaqtaman rispa ama pimanpas willamunankupaq”, nispa. 16 Chaymantataq Jehuqa carretanman wichaspa Jezrel llaqtaman rirqan. Chay llaqtapin Jehoramqa k’irinmanta qhaliyasharqan, Judá ayllu rey Ocoziaspas payta watukuq rispan chaypi kasharqan. 17 Jezrel llaqta qhawaqmi torre patamanta rikurqan Jehuta askha runakunantin jamushaqta, jinan Jehoramta nirqan: “Askha runakunan jamushanku”, nispa. Chaymi Jehoramqa nirqan: “Juj soldadota wajamuy, caballopi ayparuspa chay runakunata tapumuchun: ¿Sumaqpichu jamushankichis?, nispa”. 18 Jinan juj soldadoqa caballopi sillaykusqa Jehuman ayparqan, jinaspa nirqan: “Reymi nisunki: ¿Sumaqpichu jamushanki?, nispa”. Jehutaq nirqan: “¿Imataq qanmanri qokusunki? ¡Qhepayta jamuy!”, nispa.

Jinan llaqta qhawaqqa reyta nirqan: “Kachasqanchis soldadoqa ayparunmi, ichaqa manan kutimunchu”, nispa. 19 Jinan reyqa juj soldadotañataq caballopi sillaykusqata kacharqan, chay soldadopas Jehupa kasqanman chayaspan nirqan: “Reymi nisunki: ¿Sumaqpichu jamushanki?, nispa”. Jehutaq nirqan: “¿Imataq qanmanri qokusunki? ¡Qhepayta jamuy!”, nispa.

20 Chaymantataq llaqta qhawaqqa reyta nirqan: “Kunan kachasqanchis soldadopas ayparunmi, ichaqa paypas manan kutimullantaqchu. Chay runakunaq umallinqa Ninsipa nieton* Jehú jinan loco jina caballokunata phawachimushan”, nispa. 21 Chaymi Jehoramqa nirqan: “¡Carretayta alistapuwaychis!”, nispa. Chaymantataq Israel rey Jehoramqa Judá ayllu rey Ocoziaspiwan+ carretankupikama Jehuman aypaq rirqanku, jinaspa Jezrel llaqtayoq Nabotpa+ chajranpi tuparqanku.

22 Jinan Jehoramqa Jehuta nirqan: “¡Jehú! ¿Sumaqpichu jamushanki?”, nispa. Jehumi ichaqa nirqan: “¡¿Mamayki+ qhelli juchapi purishaqtinchu,* layqa ruwaykunata ruwashaqtinchu+ sumaqpi jamuyman?!”, nispa. 23 Chayta niqtin jinan Jehoramqa ayqekuyta munaspa carretanta kutirichirqan, jinaspa Ocoziasta nirqan: “¡Ocozías, Jehupa makinmanmi urmarunchis!”, nispa. 24 Jinan Jehuqa flechanwan flechaspa Jehoramta jap’irachirqan, chay flechaqa wasanta jaykuspan sonqonta lloqsiramurqan. Chhaynapin Jehoramqa carretan patapi wañupurqan. 25 Chaymantataq Jehuqa Bijcar oficialninta nirqan: “Phaway Jehoramta oqarispa Jezrel llaqtayoq Nabotpa jallp’anman wijch’uykamuy.+ Yuyariy taytan Ajabpa qhepanta carretapi rishaqtinchis Jehová Dios pay contra nisqanta, paymi nirqan:+ 26 Noqa Jehová Diosmi niyki: Imaynan qayna-unchay Nabot-tapas churinkunatapas kay jallp’api wañuchirqanki,+ chhaynatan noqa Jehová Diospas kay jallp’api ruwasayki,+ nispa. Chhaynaqa oqariy Jehoramta, jinaspa Jehová Diospa nisqanman jina chay jallp’aman wijch’uykuy”,+ nispa.

27 Chayta rikuspan Judá rey Ocoziasqa+ huertapi kaq wasiman riq ñanninta ayqekurqan. (Qhepamantaq Jehuqa Ocoziasta qatipaspa nirqan: “¡Paytapas wañuchiychis!”, nispa. Jinan Jehupa runankunaqa Iblean+ llaqta qayllapi kaq Gurman carretanpi ayqekushaqtin k’irirqanku, Ocoziasmi ichaqa Meguidokama ayqekushallarqan, jinan chaypi wañupurqan. 28 Chaymantataq kamachinkunaqa juj carretapi Jerusalén llaqtaman apapurqanku, chaypin ñaupa taytankunawan kuskata Davidpa Llaqtan+ nisqapi p’ampapurqanku. 29 Ocoziasqa+ Judá ayllupin kamachikuyta qallarirqan Ajabpa churin Jehoram chunka jujniyoq wataña Israelpi kamachikushaqtin).

30 Jezrel+ llaqtaman Jehú chayamusqanta yacharuspa jinan Jezabelqa+ ñawinta yanata pintakurqan, chujchanmantaq adornokunata churakurqan, jinan ventanamanta qhawakamusharqan. 31 Llaqta punkuta Jehú jaykushaqtintaq Jezabelqa nirqan: “Zimripas reynintan wañuchirqan, ¿thajchu chayta ruwaspa tiyarqan?”,+ nispa. 32 Altos pata ventanata qhawarispataq Jehuqa nirqan: “¿Pikunan noqawan kashankichis?”,+ nispa. Chayllamanmi reypa palacionpi kaq iskay kinsa oficialkuna qhawakamurqanku. 33 Paykunatan Jehuqa nirqan: “¡Wijch’uykamuychis chay warmita!”, nispa, jinan paykunaqa wijch’uykamurqanku. Jezabel pampaman urmaykamuqtintaq yawarninqa perqa qhataman caballokunaman imaraq ch’iukarqan,* Jehutaq carretantin pay patanta pasarurqan. 34 Wasiman jaykuspataq chaypi mijurqan ujarqan ima. Chaymantataq nirqan: “¡Chay ñakasqa warmita p’ampamuychis! Reypa ususin kasqanrayku jinata p’ampamuychis”,+ nispa. 35 P’ampanankupaq riqtinkun ichaqa mana imapas kapusqachu, makinkunawan, chakinkunawan, uma tullunwan imallañan kapushasqa.+ 36 Kutimuspankutaq chaykunata Jehuman willarqanku, jinan Jehuqa nirqan: “Chayqa Jehová Diospa nisqanman jinapunin junt’akushan,+ paymi Tisbe llaqtayoq Eliaswan willachirqan: Jezrel jallp’apin Jezabelpa aychanta alqokuna mijunqaku.+ 37 Chay jallp’apin Jezabelpa ayanqa wanuman tukupunqa, chhaynapin mana pipas ninqachu: Kayqa Jezabelmi, nispa”.