1 Juan

1 Noqaykun qelqamushayku kausay simimanta,+ qallariymantapacha kaqmanta, arí, pitachus uyarirqayku, ñawiykuwan rikurqayku, tukuy yuyaywan qhawarqayku, makiykuwanpas llamiykurqayku paymanta. 2 (Arí, wiñay kausayqa noqaykumanmi rijuriwanku, rikuykun paytaqa, paymantan rimashaykupas,+ paymantan qankunamanpas willamushaykiku. Chay wiñay kausayqa+ janaq pacha Taytamantan jamun noqaykumantaqmi rijuriwankupas). 3 Imatachus rikurqayku, imatachus uyarirqayku chaytan qankunamanqa willamushaykiku,+ chhaynapi imaynan noqaykupas Taytawan Churin Jesucristopiwan jujllachasqa kashayku+ chhaynata qankunapas noqaykuwan jujllachasqa kanaykichispaq.* 4 Chaymantapas kaykunataqa qelqamushayku, llapanchispa kusikuyninchis junt’asqa kananpaqmi.

5 Noqaykuqa paypa willawasqanku kay willakuytan qankunaman willayta munayku: Diosqa k’anchaymi,+ manapunin ima laqhayaqpas* paypiqa* kanchu. 6 Sichus “Dioswan jujllachasqan kashayku” nishaspa laqhayaqpi purishasunman chayqa, llullakushasunmanmi, manataqmi cheqaq kaqman jinachu kausashasunman.+ 7 Ichaqa, k’anchaypichus purisun imaynan paypas k’anchaypi kashan chhaynata chayqa, jujllan noqanchispura kasunchis, Churin Jesuspa yawarnintaq tukuy ima juchamantapas limpiawasun.+

8 “Mana juchayoqmi kayku” nisunmanchus chayqa, noqanchis kikillanchistaqmi engañakushasunman,+ manataqmi cheqaq kaqqa noqanchispichu kashanman. 9 Ichaqa juchanchiskunatachus willakusun chayqa, junt’aq kasqanrayku chanin kasqanrayku iman payqa juchanchiskunata perdonawasun, tukuy mana chanin kaqkunamantataqmi limpiawasunpas.+ 10 “Manan jayk’aqpas juchataqa ruwaykuchu” nisunchus chayqa, paytapas “llulla” nishasunman jinan kanman, manataqmi siminqa noqanchispichu kashanman.