Lucas

11 Juj kutinmi Jesusqa Diosmanta mañakusharqan, mañakuyta tukuqtintaq juj discipulon nirqan: “Señor, yachachiwayku mañakuyta imaynan Juanpas discipulonkunata yachachirqan jinata”, nispa.

2 Chaymi payqa nirqan: “Mañakuspaykichisqa khaynatan ninkichis: Taytayku,* sutiyki ch’uyapaq jap’isqa kachun.+ Gobiernoyki jamuchun.+ 3 Sapa p’unchaypaq t’antaykuta qoykuwayku necesitasqaykuman jina.+ 4 Juchaykutapas perdonawayku,+ noqaykupas perdonaykun contraykupi juchallikuqkunataqa.*+ Amataq munaychu tentacionkunaman urmanaykutaqa”,*+ nispa.

5 Jesusqa nillarqantaqmi: “Qankunamanta jujniykichispas juj amigon kanman, jinaspa payman kuska tuta horasta riwaqchis: Amigolláy, ama jinachu kay, kinsa t’antaykita ayniriway, 6 juj amigoymi viajemanta chayaramuwan, manan imaypas kanchu jaywarinaypaq, nispa. 7 Paytaq wasi ukhumanta nimunman: Ama rimapayamuwaychu, punkupas allin wisq’asqañan kashan, wawakunantinmi puñushanipas, manan jatarimuyta atiymanchu imatapas qonaypaq, nispa. 8 Niykichismi: Amigoykiña kashaspapas manapaschá jatarimuyta munanqachu, chaywanpas mana sayk’uspa wajakusqaykiraykun+ payqa jatarimuspa imachus necesitasqaykita qosunki. 9 Chayraykun niykichis: Mañakushallaychis,+ chaskinkichismi; maskhashallaychis, tarinkichismi; punkutapas takashallaychis, kicharimusunkichismi.+ 10 Pipas mañakuqqa chaskinmi,+ pipas maskhaqqa tarinmi, pipas takaqmanqa punkupas kichasqan kanqa. 11 ¿Qankunamanta mayqen taytataq wawan challwata mañakushaqtin mach’aqwayta qonman?+ 12 ¿Runtuta mañakushaqtinpas alacrán kuruta qonman? 13 Qankunapas millay runaña kashaspapas yachankichismi wawaykichiskunaman allin regalokuna qoytaqa ¿riki? ¿Chaychu janaq pachapi kaq Taytaqa mañakuqninkunaman santo espiritunta mana qonman?”,+ nispa.

14 Chaykuna qhepamanmi Jesusqa juj runamanta upayachiq supayta qarqorqan.+ Chay supay lloqsiqtintaq chay upa runaqa rimarirqan. Chaywanmi runakunaqa anchata admirakurqanku.+ 15 Wakin runakunan ichaqa nirqanku: “Kay runaqa supaykunata kamachiq Belcebupa* atiyninwanmi supaykunata qarqon”,+ nispa. 16 Wakintaq pruebaman churayta munaspa payta nisharqanku cielomanta juj señalta rikuchinanpaq.+ 17 Chaymi Jesusqa imachus piensasqankuta yachaspa+ nirqan: “Mayqen nacionpas t’aqanasqa kaspaqa tukukapunmanmi, mayqen familiapas t’aqanasqa kaspaqa urmapunmanmi. 18 Chhaynaqa Satanaschus pay kikillantaq contranpi sayarinman chayqa, ¿imaynapitaq gobiernonri sayashallanman? Qankunan niwankichis: Belcebupa atiyninwanmi supaykunata qarqon, nispa. 19 Belcebupa atiyninwanchus qarqoni chayqa, ¿piqpa atiyninwantaq qankunata qatikuq runakunari qarqonku? Chayraykun paykunaqa qankunata juzgasunkichis. 20 Ichaqa Diospa atiyninwanchus*+ supaykunata qarqoni chayqa, Diospa gobiernonmi qonqaylla qankunaman chayaramun.+ 21 Juj kallpasapa allin armasqa runa wasinta cuidaqtinqa, ima kaqninkunapas allin waqaychasqan kanqa. 22 Ichaqa aswan kallpasapa runachus pay contra jamuspa atipanman chayqa, llapa jap’isqan armakunatan qechunman, jinaspa kaqninkunata jap’ikapunman, chaytataq jujkunaman rakipunman. 23 Pipas mana noqawanchu kashan chayqa contraypin kashan, pipas mana noqawanchu juñuqqa ch’eqechishanmi.+

24 ”Juj millay espíritu juj runamanta lloqsispaqa ch’aki ch’inneqkunapin purin mayllapipas samaykunanpaq maskhaspa, mana tarispataq nin: Lloqsimusqay wasiman aswanpas kutipusaq,+ nispa. 25 Chayaspataq wasitaqa allin pichasqata munay allichasqata tarin. 26 Jinan payqa chaymanta rispa qanchis espiritukunatawan pusamun, paymanta aswan millaykunataraq, chay wasiman jaykuspankutaq chaypi tiyanku. Jinan chay runaqa ñaupaqpi imayna tarikusqanmantapas aswan mana allinpiraq tarikapun”, nispa.

27 Chayta rimashaqtinmi runakuna ukhumanta juj warmi fuerteta nimurqan: “Kusisqan onqokuqniyki, ñuñunta qosoqniyki warmiqa”,+ nispa. 28 Jesustaq nirqan: “Manan, aswanpas Diospa siminta uyarispa waqaychaqkunan kusisqaqa kanku”,+ nispa.

29 Askha runakuna payman juñunakamushaqtinmi Jesusqa nirqan: “Kay tiempo runakunaqa millaymi kanku, señal-llatan rikuyta munanku. Ichaqa manan ima señaltapas rikunqakuchu, aswanpas Jonasta imachus pasasqan milagrollan paykunapaqqa señal kanqa.+ 30 Imaynan Jonaspas+ Nínive llaqta runakunapaq juj señal karqan, chhaynallataqmi runaq Churinpas kay tiempo runakunapaq juj señal kanqa. 31 Uray ladomanta kaq reinan+ kay tiempo runakunawan kuska juicio p’unchaypi jatarimunqa, jinan kay tiempo runakunata juchachanqa; payqa kay pachaq k’uchunmantaraqmi jamurqan Salomonpa yachaywan rimasqanta uyariq. Qhawariychis, Salomonmantapas aswan yachayniyoqmi kaypi kashan.+ 32 Nínive llaqta runakunapas kay tiempo runakunawan kuskan juicio p’unchaypi jatarimunqaku, jinan kay tiempo runakunata juchachanqaku; paykunaqa Jonaspa willasqanwanmi juchankumanta kutirikurqanku.+ Qhawariychis, Jonasmantapas aswan jatun profetan kaypi kashan. 33 Pipas mecherota* jap’ichispaqa manan paka k’uchumanchu churan nitaq canastawanchu* pakaykun ¿riki? Aswanpas k’anchana patamanmi churan,+ chhaynapi wasiman jaykuqkunata k’anchananpaq. 34 Cuerpoq k’anchayninqa ñawin. Ñawiykichus jujllata qhawanqa chayqa, llapa cuerpoykin k’anchayniyoq kanqa. Ichaqa ñawiykichus envidiakuq* kanqa chayqa, llapa cuerpoykin tutayaqpi kanqa.+ 35 Chayrayku, allinta qhawarikuy; qanpi kaq k’anchaytaq tutayaq kashanman. 36 Chhaynaqa, llapan cuerpoykichus k’ancharishan, manataq imachallanpas tutapichu kashan chayqa, cuerpoykin mechero jinaraq allinta k’ancharinqa”, nispa.

37 Chaykunata rimayta tukuqtinmi juj fariseo Jesusta nirqan paywan mijunanpaq. Jinan Jesusqa fariseoq wasinman jaykuspa mesapi tiyaykurqan, 38 ichaqa manan maqchikurqanchu* mijunanpaq; chayta rikuspan chay fariseoqa anchata admirakurqan.+ 39 Chaymi Señorqa nirqan: “Qankunaqa, fariseokuna, copatapas platotapas jawallantan maqchinkichis, sonqoykichismi ichaqa junt’a kashan munapayaywan mana allin kaqwan ima.+ 40 ¡Mana yuyayniyoqkuna! ¿Manachu jawanta ruwaqqa ukhuntapas ruwallarqantaq? 41 Chayrayku, tukuy sonqowan wajchakunaman qoychis, chhaynapin tukuy imaymanapi limpio kankichis. 42 ¡Ay qankunamanta fariseokuna! Qankunaqa diezmotan qoshankichis mentamanta, rudamanta, huertapi plantakunamantawan,*+ ichaqa manan Dios jinachu chanin kayta rikuchinkichis nitaq paytapas munakunkichischu. Diezmotaqa qonaykichispunin karqan, ichaqa manan juj ruwaykunatapas qonqanaykichischu karqan.+ 43 ¡Ay qankunamanta fariseokuna! Qankunaqa sinagogakunapipas ñaupaqllapin tiyayta munankichis, mercado plazakunapipas napaykunatan munankichis.+ 44 ¡Ay qankunamanta! Qankunaqa mana rikukuq sepultura* jinan kankichis,+ chay patantan runakunaqa purinku sepultura kasqanta mana yachaspa”, nispa.

45 Chaymi kamachikuy simita allinta yachaqkunamanta jujninku Jesusta nirqan: “Yachachikuq, chayta nispaqa noqaykutawanmá k’amishawankiku”, nispa. 46 Jinan Jesusqa nirqan: “¡Ay qankunamantapas kamachikuy simita allinta yachaqkuna! Llasa q’epikunatan runakunaman q’epichinkichis, qankunataq ichaqa mana ni juj dedollaykichiswanpas chay q’epikunata tupaykunkichischu.+

47 ”¡Ay qankunamanta! Qankunaqa profetakunaq sepulturantan jatarichinkichis, ñaupa taytaykichiskunan ichaqa paykuna wañuchiqkuna karqanku.+ 48 Qankunaqa ñaupa taytaykichiskunaq imachus ruwasqankuta yachashaspapas allinmi ninkichismi; paykunan profetakunataqa wañuchirqanku,+ qankunataq ichaqa chay profetakunaq sepulturanta jatarichinkichis. 49 Chayraykun Diospas yachayninpi nirqan: Noqan paykunaman kachasaq profetakunata apostolkunata ima; wakintan wañuchinqaku, wakintataq qatikachanqaku, 50 chhaynapi runakunaq qallariyninmantapacha* profetakunaq yawarnin jich’akusqanmanta kay tiempo runakuna manuchasqa kananpaq,+ 51 Abelpa yawarnin jich’akusqanmantapacha+ Zacariaspa yawarnin jich’akusqankama (Zacariastan wañuchirqanku templowan altarwan tupaypi),+ nispa. Niykichismi: Paykunaq yawarninqa kay tiempo runakunamantapunin manuchasqa kanqa.

52 ”¡Ay qankunamanta kamachikuy simita allin yachaqkuna! Qankunaqa Diosmanta yachay llavetan jap’ikapunkichis, qankuna kikiykichispas manan jaykunkichischu, jaykushaqkunatapas jark’ankichismi”,+ nispa.

53 Chaymanta lloqsiqtintaq kamachikuy simita yachachiqkunawan fariseokunawanqa sinchi phiñasqa Jesusta muyuykurqanku, imaymanatataq tapupayarqankupas 54 rimasqanpi pantachiyta munaspanku, chhaynapi juchachanankupaq.+