Daniel

6 Rey Darion kamachisqan suyupi pachaj iskay chunka jatun kamachikuqkunata churarqan.+ 2 Paykuna patamantaq churarqan+ kinsa jatun autoridadkunata, paykunamanmi cuentata qonanku karqan, chhaynapi reypa kaqninkuna ama ch’usaqyananpaq. Chay kinsantinkumanta jujninmi karqan Daniel.+ 3 Danielqa atiyniyoq autoridadkunamanta jatun kamachikuqkunamantapas aswan yachaysapan karqan,+ chayraykun reyqa kamachikusqan suyupi aswan allin puestoman churayta munasharqan.

4 Chaymi aswan atiyniyoq autoridadkunapas jatun kamachikuqkunapas Danielta imallamantapas tumpayta munaspa kamachisqanpi mana allinkunata maskharqanku, ichaqa manan ima mana allintapas tarirqankuchu. Payqa confianapaq jinan karqan, chaymi mana imamantapas tumpayta atirqankuchu. 5 Jinan chay runakunaqa ninakurqanku: “Manan Danieltaqa imamantapas tumpayta atisunmanchu, Diosnin yupaychaypi imatapas tarisunman chayllachá”,+ nispa.

6 Jinan chay atiyniyoq autoridadkunaqa jatun kamachikuqkunapas rey Darioq kasqanman jaykurqanku, jinaspa nirqanku: “¡Wiñaypaq kausachun reyqa! 7 Llapaykun atiyniyoq autoridadkuna, prefectokuna, jatun kamachikuqkuna, gobernadorkuna ima rimanakamuyku juj kamachikuyta orqonaykipaq, jinallataq chay kamachikuy orqosqaykitapas llapa kasukunankupaq: Reyníy, kinsa chunka p’unchay ama pipas mayqen diosmantapas ni pi runamantapas mañakuchunchu. Aswanpas qanllamanta imatapas mañakuchun. Chayta mana kasukuqtaq leonkunaq t’oqonman wijch’uykusqa kachun.+ 8 Chhaynaqa reyníy, chay kamachikuyta orqoy jinaspa firmay+ mana cambiasqa kananpaq. Media runakunaq Persia runakunaq orqosqan kamachikuyqa manan jayk’aqpas p’akisqaqa kanmanchu”,+ nispa.

9 Jinan rey Darioqa chay kamachikuyta orqospa firmarqan.

10 Danielqa reypa kamachikuy orqosqanta yacharuspa jinan wasinta rirqan, altos patanqa Jerusalén ladoman kicharayashaq ventanayoqmi karqan,+ chaypin payqa kinsa kutita p’unchay qonqorikurqan Diosninmanta mañakunanpaq jatunchananpaqwan, imaynatachus ruwallaqpuni jinata. 11 Qonqayllan chay kamachikuyta orqochiq runakunaqa Danielpa wasinman jaykurqanku, jinaspa chaypi tarirqanku Diosninmanta mañakushaqta rogakushaqta ima.

12 Chaymi chay runakunaqa reypa kasqanman rispa kamachikuy orqomusqanta yuyarichirqanku, nirqankun: “Reyníy, kamachikuy orqosqaykiman jinaqa, kinsa chunka p’unchaymi mana pipas diosninmanta ni pi runamantapas mañakunanchu karqan, aswanmi qanllamanta mañakunanku karqan ¿riki? Chayta mana kasukuqqa leonkunaq t’oqonmanmi wijch’uykusqa kanan karqan”, nispa. Jinan reyqa nirqan: “Chhaynapunin karqan. Media runakunaq Persia runakunaq kamachikuyninqa manan jayk’aqpas p’akisqaqa kanmanchu”,+ nispa. 13 Jinan paykunaqa kaq ratupacha nirqanku: “Reyníy, Judamanta presota apamusqanku Danielqa manan kasukusunkichu.+ Firmaspa kamachikuy orqosqaykitapas manan kasukunchu, aswanmi payqa kaqlla kinsa kutita p’unchaypi Diosninmanta mañakushan”,+ nispa. 14 Chayta uyarispan reyqa sinchita llakikurqan, imaymananmantan Danielta yanapayta munasharqan. Inti chinkaykunankaman imaymanata ruwarqan Danielta librananpaq. 15 Jujmanta kutispan chay runakunaqa reyta nirqanku: “Reyníy, yuyariy, Media runakunaq Persia runakunaq kamachikuyninkunaman jinaqa, manan reypa orqosqan kamachikuyqa p’akisqaqa kanmanchu”,+ nispa.

16 Jinan reyqa kamachikurqan Danielta apamuspa leonkunaq t’oqonman wijch’uykunankupaq.+ Apamuqtinkutaq reyqa Danielta nirqan: “Tukuy tiempo servisqayki Diosniykin librasunki”, nispa. 17 Chaymantataq rumita apamuspa chay t’oqota taparqanku, reytaq sellanan anillonwan autoridadninkunaq anillonwan ima chay rumita sellaykurqan, chhaynapi Danielta imachus ruwasqankuta ama pipas cambiananpaq.

18 Chay qhepamanmi reyqa palacionman kutipurqan. Manan payqa imatapas mijurqanchu, manan imawanpas kusirikuyta munarqanchu,* manan puñuytapas atirqanchu. 19 Pacha illariramuqtin jinan payqa jatarispa phawaylla leonkunaq t’oqonman rirqan. 20 T’oqoman chayaspataq Danielta llakisqa wajarqan, nirqanmi: “Kausaq Diosta serviq Daniel, ¿tukuy tiempo servisqayki Dios librarqasunkichu leonkunamanta?”, nispa. 21 Jinan Danielqa kaq ratupacha reyta nimurqan: “¡Wiñaypaq kausachun reyqa! 22 Leonkunaqa manan imanawanpaschu,+ Diosniymi leonkunaq+ siminta wisq’ananpaq angelninta kachamusqa. Manan Diosniy contraqa ima juchatapas ruwarqanichu. Reyníy, manan qan contrapas ima mana allintapas ruwarqanichu”, nispa.

23 Chaymi reyqa maytapuni kusikurqan, kamachirqantaq Danielta leonkunaq t’oqonmanta orqomunankupaq. Danielta orqomuqtinkuqa manan ima k’irillapas paypiqa kasqachu Diosninpi confiasqanrayku.+

24 Chaymantan reyqa kamachikurqan Danielta tumpaq runakunata apamunankupaq. Jinaspan chay runakunata, wawakunantinta, warmikunantinta leonkunaq t’oqonman wijch’uykurqanku. Manaraq pampamanpas chayashaqtinkun leonkunaqa chay runakunata mijupurqanku, tullunkunatapas ñut’utaraqmi ruwarqanku.+

25 Chaymantataq rey Darioqa jallp’antinpi kaq llapa llaqtakunaman, nacionkunaman, imaymana rimayniyoq runakunaman qelqarqan:+ “¡Thaj kay qankunawan kachun! 26 Llapa kamachisqay suyupi runakunatan kamachini Danielpa Diosninta manchakunankupaq.+ Payqa kausaq Diosmi, wiñay-wiñaypaq Diosmi, gobiernonpas manan chinkanqachu, kamachikuyninpas wiñaypaqmi.+ 27 Chaymantapas payqa kacharichiq,+ libraq Diosmi, milagrokunata ruwaq Diosmi, janaq pachapipas kay pachapipas musphanapaq kaqkunata ruwaq Diosmi.+ Paymi Danielta leonkunamanta librarqan”, nispa.

28 Darío kamachikushaqtinpas,+ Persia nacionmanta Ciro kamachikushaqtinpas+ Danielqa tukuy imapin allillanpuni kasharqan.