Hebreos

6 Ñataq Cristomanta qallariy yachachikuykunata yachanchisña chayqa,+ kallpachakusunyá iñiypi allin poqosqa kayman chayananchispaq.+ Amaña wajmantaqa kutisunchu qallariy yachachikuykunaman, arí, amaña kutisunchu yanqa ruwaykunamanta* pesapakuy yachachikuyman, Diospi iñiymanta yachachikuyman, 2 bautismokunamanta yachachikuyman, jujkunaman maki churanamanta yachachikuyman,+ wañusqakunaq kausarimpunanmanta yachachikuyman,+ wiñaypaq juzgasqa kaymanta yachachikuymanpas. 3 Ichaqa, Dios munallaqtinmi iñiypi allin poqosqa kaymanqa chayasunchis.

4 Pipas Diospa k’anchaykusqan kashaspa,+ janaq pachamanta jamuq regalota chaskishaspa, santo espirituta chaskishaspa, 5 Diospa sumaq siminta yachashaspa, jamuq tiempopi* mosoq kausaywan tupaq bendicionkunatapas* chaskishaspa 6 iñiymanta t’aqakuqtaqa+ manañan atikunmanchu juchanmanta pesapakunanpaq yuyayman kutichiytaqa; chhayna runakunaqa wajmantan paykuna kikinku Diospa Churinta k’aspiman clavashanku, jinaspa lliupa ñaupanpi p’enqayman churashanku.+ 7 Sapa kuti parasqanqa Diospa bendicionninmi jallp’apaqqa, chay parata ch’onqaspan jallp’aqa chajra llank’aqman allin cosechata qon. 8 Kiskakunata kisakunata wiñachiq jallp’an ichaqa mana imapaqpas valenchu, ñakasqa kananpaqñataqmi kashanpas; tukukuypiqa kanasqan chay jallp’aqa kanqa.

9 Munasqa wayqe-panaykuna, chhaynataña rimamushayku chaypas, allintan yachayku iñiymanta t’aqakuqkunamantaqa aswan allintapuni qankunaqa kausashasqaykichista, chhayna kausasqaykichismi apasunkichis salvasqa kayman. 10 Diosqa chaninpunin, payqa manapunin qonqanqachu imachus ruwasqaykichista sutinta munakusqaykichistapas,+ chaytan qankunaqa rikuchishankichis iñiqmasikunata kunankama servispa. 11 Ichaqa maytan munaykuman sapankaykichispas qallariypi jina llank’ashanaykichista, chhaynapi suyakuyniykichisqa+ tukukuykama allinpuni kananpaq,+ 12 ama qellaman tukunaykichispaqwan;+ munallaykumantaqmi iñiywan pacienciawan ima promesata chaskiqkuna jina kanaykichistapas.

13 Diospa sutinmantaqa manan ima sutipas aswan jatunqa kanchu, chaymi Abrahanman juj promesata ruwashaspaqa pay kikinpa sutinpi jurarqan:+ 14 “Cheqaqtapunin bendicionniyta qosayki, cheqaqtapunin mirayniykitapas askhaman tukuchisaq”,+ nispa. 15 Chay promesataqa pacienciawan suyakusqan qhepatañan Abrahanqa chaskirqan. 16 Pipas juj promesata ruwaspaqa aswan importante runaq sutinpin juran, chhaynapi ima nisqanpas cheqaq kasqanta rikuchinanpaq,+ chhaynapitaq ama ima jap’inakuypas kananpaq. 17 Chhaynatan Diospas ruwarqan, imachus munasqan mana cambiaq kasqanta rikuchinanpaqmi promesa chaskiqkunaman+ juj juramentota ruwarqan. 18 Diospa chay iskay ruwasqanqa* manapunin jayk’aqpas cambianmanchu, manataqmi Diosqa jayk’aqpas llullakunmanchu;+ chaykunan noqanchis Diospa pakaykusqanman ayqeqkunataqa allinta kallpachawanchis, chhaynapi ñaupanchispi kaq suyakuyman qaqatapuni jap’ipakunanchispaq. 19 Chay suyakuyqa+ ancla jinan vidanchispaqqa,* cheqaqpunitaqmi mana kuyuriqtaqmi kanpas; chay suyakuyninchismi cortina ukhumanpas jaykun+ 20 maymanchus ñaupaqta puriq noqanchisrayku jaykurqan chayman, chay ñaupaqta puriqqa Jesusmi;+ paymi Melquisedec jina uma sacerdote kapun,+ wiñaypaqtaqmi kanqapas.