Ezequiel

38 Jujmantan Jehová Diosqa rimapayamuwarqan, paymi niwarqan: 2 “Runaq churin, Magog ladota qhawariy jinaspa Magogmanta kaq Gog+ contra rimay, Mesecpa Tubalpa+ qollana umallin Gog contra juj profeciata willay.+ 3 Payta niy: Tukuy munayniyoq Señor Jehová Diosmi nin: Yau Mesecpa Tubalpa qollana umallin Gog, noqan qan contra kashani. 4 Qantan kutirichimusayki, simiykimanmi ganchokunata churasaq,+ jinaspa llapa soldadokunantinta, caballokunantinta, caballopi sillasqa soldadokunantinta ima aysamusayki;+ allin p’achasqa soldadokunantintan, jatun jark’apakuna escudokunantintan, juch’uy escudokunantinta* iman askhallataña orqomusayki. Llapa soldadoykikunan espadantinkama kashanqaku. 5 Persiapas, Etiopiapas, Pujpas+ paykunawanmi kashanqaku, llapankun jark’apakuna escudontinkama, cascontinkama kashanqaku. 6 Gomerpas, tropankunapas, wichay ladoq k’uchunkunapi kaq Togarmapa+ miraynin runakunapas, tropankunapas qanwanmi kashanqaku. Askha llaqtakunan qanwan kashanqaku.+

7 ”Yau Gog, alistakuy, qanwan kaq llapa ejercitokunapas alistakuchunku; qanmi paykunata umallinki.

8 ”Askha p’unchaykuna qhepamanmi wajasqa kanki. Tukukuy p’unchaykunapin jujmanta perqasqa llaqtaman phawaykunki, espadaq ch’eqechisqanmanta kutimuq runakunamanmi, llaqtakunamanta kutimpuq runakunamanmi, Israelpi orqo-orqokunaman apamusqa runakunamanmi rinki. Paykunaqa unay watakunan ch’innichisqa karqanku. Chaymantapas chay llaqtapi tiyaqkunaqa lliu llaqtakunamantan juñumusqa karqanku, chaypin paykunaqa thaj tiyashanku.+ 9 Paykuna contran qanqa sinchi wayra jinaraq jamunki. Llapa tropaykikunawan kuskan, askha llaqtakunawan kuskan jamunki, phuyu jinaraqmi chay jallp’aman junt’aykunki, nispa.

10 ”Tukuy munayniyoq Señor Jehová Diosmi nin: Chay p’unchaymi sonqoykiman imaymana piensaykuna jamunqa, jinan qanqa sinchi mana allin kaqta yuyaykunki. 11 Qanmi ninki: Chay mana defiendekuy atiq llaqtamanmi,+ campopi tiyaq llaqtamanmi phawaykusaq. Mana imata manchakuspa thaj tiyaq llaqtamanmi jaykusaq. Paykunaqa campo pampallapin tiyashanku, manan punkukunayoq trancanakunayoq perqa ukhukunapichu, nispa. 12 Qanqa imaymanata qechunaykipaqmi, imaymanata apakunaykipaqmi chayman phawaykunki. Thunisqamanta sayarichisqa llaqtamanmi,+ nacionkunamanta juñumusqa runakunamanmi phawaykunki;+ qhapaq kaykunata, imaymana allin kaqkunata juñuq llaqtamanmi,+ jallp’a pacha chaupipi tiyaq llaqtamanmi rinki.

13 ”Saba llaqta,+ Dedán llaqta,+ Tarsismanta qhatuqkuna,+ llapa maqanakuqninkuna iman nisunkiku: ¿Llapa kaqninkunata qechuqchu chay llaqtaman phawaykunki? ¿Qorita, qolqeta, qhapaq kaykunata, imaymana allin kaqkunata apakapunaykipaqchu khayna askha ejercitota juñumurqanki?, nispa.

14 ”Chhaynaqa, runaq churin, Gog contra rimay, payta niy: Tukuy munayniyoq Señor Jehová Diosmi nin: Chay p’unchay Israel llaqtay thaj kausashasqantaqa yachankipunin.+ 15 Maypichus kasqaykimantan, wichay ladoq k’uchunkunamantan qanqa askha runakunantin jamunki.+ Qanwan kuskan jamunqaku askha llaqtakuna, llapankun caballokunapi sillaykusqakama jamunqaku. Sinchi askha ejerciton qanwan jamunqa.+ 16 Phuyu jinaraqmi Israel llaqtayman junt’aykunki. Yau Gog,+ tukukuy p’unchaykunapin llaqtay contra pusamusayki,+ qanwanmi nacionkunaq ñaupanpi ch’uyanchakusaq, chhaynapin llapa nacionkuna yachanqaku pichus kasqayta, nispa.

17 ”Tukuy munayniyoq Señor Jehová Diosmi nin: ¿Manachu unay tiempokunamantapacha Israelpi kamachiy profetakunawan qanmanta willachirqani? Unay tiempokunamantaraqmi paykunaqa rimarqanku qanta paykuna contra pusamunaymanta, nispa.

18 ”Tukuy munayniyoq Señor Jehová Diosmi nin: Israel llaqtaman Gog phawaykusqan p’unchaymi nina jinaraq phiñakuyniy raurarinqa.+ 19 K’araq phiñasqan, sinchi colerasqan rimasaq. Chay p’unchayqa juj jatun terremoton Israelpi pasanqa. 20 Noqa causan lamar-qochapi challwakuna, alton phalaq animalkuna, campopi salqa animalkuna, llapa suchuq animalkuna, jallp’a pachapi llapa runakuna ima khatatatanqaku.* Orqokunan urmaykunqa,+ qaqakunan thunikunqa, allin sayachisqa perqakunan pampaman kumpakunqa, nispa.

21 ”Tukuy munayniyoq Señor Jehová Diosmi nillantaq: Llaqtay orqo-orqokunamanmi Gog contra juj espadata kachasaq. Paykunapuran wañuchinakunqaku.+ 22 Castigotan payman chayachisaq,* millay onqoykunata+ wañuywan castigota iman chayachisaq. Payman, tropankunaman, paywan jamuq askha llaqtakunaman iman+ sinchita parachimusaq, chijchitan chijchichimusaq,+ azufreta+ ninata+ iman paykunaman chayachimusaq. 23 Chaykunata ruwaspan jatunchakusaq, ch’uyanchakusaq, askha nacionkunamanmi rikuchisaq may jatun kasqayta, may ch’uya kasqayta; chhaynapin paykunaqa yachanqaku noqa Jehová Dios kasqayta, nispa.