Jesuspa amigonkunaqa ruruq k’allma jinan kananku

Última cena qhepatan Jesusqa sonqoman chayaqtapuni apostolninkunata rimapayaran. Chay horapaqqa kuska tuta pasayñan kashanman karan, chaypin payqa paykunata niran:

“Noqan cheqaq uvas sach’aqa kani, Yayaytaq chajra llank’aq”, nispa (Juan 15:1). Bibliapiqa Israel naciontan uvas sach’awan comparakuq, Jehová Diostataq uvas chajrayoqwan (Jeremías 2:21; Oseas 10:1, 2). Ichaqa chay nacionta Jehová Dios wijch’upunanñataq karan chayqa, Jesusqa manan chaymantachu rimasharan (Mateo 23:37, 38). Aswanmi payqa pay kikinta uvas sach’awan comparakusharan. Paytan Yayanqa uvas sach’ata jina cuidasharan 29 watapi santo espiritunwan ajllasqanmantapacha. Chaymantan Jesusqa nillarantaq:

“Noqapi kaq llapa mana ruruq k’allmakunataqa paymi wit’upunqa, llapa ruruqtataq kuchupaspa limpianqa, chhaynapi astawan rurunanpaq [...]. Imaynan uvas k’allmaqa mana kikillanmantaqa rurunmanchu, aswanpas sach’api kaspalla, chhaynallataqmi qankunapas mana ruruyta atiwaqchischu manachus noqawan jujllachasqa kankichis chayqa. Noqan uvas sach’aqa kani, qankunataq k’allmakuna kankichis”, nispa (Juan 15:2-5).

¿Jayk’aqmi Jesuspa discipulonkuna uvas sach’aq k’allmankuna jina kapunanku karan? Pentecostés p’unchaypin. Chaypin Jesusqa yanapaq santo espirituta kachaykamunan karan. Jesuspa discipulonkunaqa k’allmakuna jinan Jesusman jujllachasqapuni kananku karan.

Chaymantan Jesús niran: “Pipas noqawan jujllachasqalla kashanqa chayqa, noqapas jujllachasqallan paywanqa kashasaq, chhaynapitaq askhata rurunqa. Noqamanta t’aqasqaqa manan imatapas ruwayta atiwaqchischu”, nispa. Paykuna allinta rurunankupaqqa Jesús jinan kananku karan, Diospa gobiernonmantan tukuy sonqo willananku karan, yachachispataq runakunata yanapananku karan Jesuspa discipulonkuna kanankupaq. Chaymantataq Jesusqa niran: “Pipas mana noqawan jujllachasqallachu kanqa chayqa, wit’usqa k’allma jinan wijch’usqa kanqa [...]. Sichus noqawan jujllachasqalla kankichis, simiykunapas qankunapi kashallanqa chayqa, tukuy ima mañakusqaykichismi ruwasqa kanqa”, nispa (Juan 15:5-7).

Jinaspan Jesusqa discipulonkunata wajmanta kallpacharan kamachikusqankunata kasukunankupaq (Juan 14:15, 21). Chaypaqmi paykunaqa Jesusta Jehová Diostawan munakunanku karan. Chaymi Jesusqa niran: “Kamachikuyniykunatachus kasukunkichis chayqa, munakuynillaypin kashankichis, imaynan noqapas Yayaypa kamachikuyninkunata kasukuspa munakuynillanpi kashani jinata”, nispa. Jesusqa nillarantaqmi: “Jujkuna-jujkunawanmi munanakunkichis, imaynan noqapas qankunata munakuykichis jinata. Amigonkunarayku vidanta qoqmi aswan munakuqqa, chaymanta aswan munakuqqa manan kanchu. Kamachikuyniykunatachus kasukunkichis chayqa, amigoykunan kankichis”, nispa (Juan 15:10-14).

Jesusqa pisillamantan wañunan karan llapa paypi iñiqkunarayku. Chaywanmi llapa discipulonkunapaq allin ejemplota saqenan karan paykunapas chhaynata munanakunankupaq. Jesusmi chaymanta niranña: “Qankunapura munanakusqaykichispin lliupas yachanqaku discipuloykuna kasqaykichista”, nispa (Juan 13:35).

¿Imanaqtinmi Jesús paykunata “amigoykuna” niran? Chaymantan pay niran: ‘Noqaqa Yayaymanta tukuy imaymana uyarisqaytan qankunaman willaykichis, chaymi “amigoykuna” niykichis’, nispa. Paykunaqa Jesuspa amigonkuna kaspaqa Yayanpa imachus willasqankunatan yachananku karan, chaypaqmi ichaqa ‘rurushanallanku’ karan. Chhaynapin ‘Yayaqa Jesuspa sutinpi imatapas mañakuqtinkuqa paykunaman qonan karan’ (Juan 15:15, 16).

Jesuspa discipulonkunaqa runakunaq cheqnisqanmi kananku karan, chaymi aguantanankupaqqa munanakunanku karan. Chaymantan Jesús niran: “Kay pacha runakunachus cheqnikusunkichis chayqa, yuyariychis qankunamanta ñaupaqtaraq noqata cheqnikuwasqankuta. Kay pacha runakuna jinachus kawaqchis chayqa, paykunaqa munakusunkichismanchá kaqninkutaqa. Qankunan ichaqa mana kay pacha runakuna jinachu kankichis, [...] chaymi paykunaqa cheqnikusunkichis”, nispa (Juan 15:18, 19).

Jesusqa nillarantaqmi: “Sutiy jawan llapa chaykunataqa ruwasunkichis, pichus kachamuwaran chayta mana reqsisqankurayku”, nispa. Jinaspa niran: “Manachus paykunaq ñaupanpi mana piqpa ruwasqan ruwaykunata ruwayman karan chayqa, manan juchayoqchu kankuman karan, kunanmi ichaqa rikunkuña, chaywanpas cheqniwankun noqatapas Yayaytapas”, nispa. Runakuna Jesusta cheqnikusqankuqa juj profeciatan junt’aran (Juan 15:21, 24, 25; Salmo 35:19; 69:4).

Chaymantan Jesusqa discipulonkunaman wajmanta prometeran santo espirituta kachaykamunanpaq. Chay kallpataqa llapan cristianokunan chaskinku, chhaynapi ‘Jesusmanta willaspa’ rurunankupaq (Juan 15:27).