Diospa angelnin Ezequiasta yanapan

Asiria nacionmi Israelpa chunka ayllunkunata jap’ikapurqan. Chay qhepamanmi Asiriamanta rey Senaqueribqa Judá nacionpa iskaynin ayllunta jap’ikapuyta munarqan. Jinan Judá nacionpa llaqtankunata pisi-pisimanta jap’ikapurqan, astawanqa Jerusalén llaqtatan jap’ikapuyta munarqan. Jehová Diosmi ichaqa chay llaqtata pakaykurqan.

Judá nacionmanta rey Ezequiasmi Asiria reyman askha qolqeta qorqan ama atacananpaq. Chaywanpas Senaqueribqa jatun ejercitotan kacharqan Jerusalenta jap’ikapunanpaq. Chay ejercitoqa pisi-pisimantan llaqtaman qayllaykamusharqan, jinan runakunaqa sinchi manchasqa kasharqanku. Chaymi Ezequiasqa nirqan: “Ama manchakuychischu, Jehová Diosmi yanapawasun”, nispa.

Senaqueribqa jujnin oficialnintan kacharqan Jerusalén runakunamanta burlakunanpaq. Llaqta jawamantan alto kunkawan nirqan: “Ama Ezequiaswan engañachikuychischu, manan Jehová Diospas ni mayqen diospas makiykumanta salvasunkichischu”, nispa.

Chaymi Ezequiasqa Diosta tapurqan imatachus ruwananpaq. Diostaq nirqan: “Ama kasuychu, Asiria reyqa manan Jerusalenta jap’ikapunqachu”, nispa. Chay qhepamanmi Senaqueribqa juj cartata apachimurqan. Chaypin nirqan: “Entregakuychis, Jehová Diosqa manan salvasunkichischu”, nispa. Jinan Ezequiasqa mañakurqan: “Diosníy, chay reymanta salvawayku cheqaq Dios kasqaykita yachanankupaq”, nispa. Diostaq nirqan: “Senaqueribqa manan jaykumunqachu, noqan Jerusalentaqa jark’aykusaq”, nispa.

Senaqueribqa seguron kasharqan Jerusalenta jap’ikapunanpaq. Jehová Diosmi ichaqa juj angelninta kachamurqan, chay angelmi Jerusalén qayllapi kashaq 185.000 Asiria soldadokunata juj tutallapi wañuchirqan. Chaymi Senaqueribqa mana imanakuyta atispa llaqtanman kutipurqan. Jehová Diosmi Ezequiasta llaqtantapas pakaykurqan prometesqanman jina. Jerusalenpi tiyawaq karqan chayri, ¿confiawaqchu karqan Jehová Diospa yanapayninpi?