Cristianokuna askha nacionkunapi predicanku

Apostolkunaqa Jesuspa kamachisqanman jinan tukuy llaqtakunapi predicarqanku. 47 watapin Antioquía llaqtamanta cristianokuna Pablota Bernabetawan kacharqanku waj nacionkunapi predicamunankupaq. Iskayninkun tukuy sonqowan predicarqanku Asia Menor ladopi kaq llaqtakunapi.

Pablowan Bernabewanqa llapa runamanmi predicarqanku: wajchakunaman, qhapaqkunaman, waynakunaman, kuraqkunamanpas. Askhan Jesuspi iñipurqanku. Chaymantapas predicarqankun Chipre llaqtamanta kamachikuq Sergio Pauloman. Ichaqa juj layqa runan jark’akuyta munarqan. Chaymi Pabloqa nirqan: “Jehová Diosmi castigasunki”, nispa. Chay ratupitaq layqaqa ñausayapurqan. Chayta rikuspan Sergio Pauloqa Jesuspi iñipurqan.

Pablowan Bernabewanqa wasin-wasinta, mercadokunapi, ñankunapi, sinagogakunapi iman predicarqanku. Juj kutinmi Listra llaqtapi such’u runata Pabloqa qhaliyachirqan, jinan runakunaqa paykunata adorayta qallarirqanku. Paykunan ichaqa nirqanku: “¡Diosllatan adorananchis! Noqaykuqa runakunallan kayku”, nispa. Wakin judiokunataq jamuspanku runakunata tanqarqanku Pabloq contranpi kanankupaq. Chaymi rumiwan ch’aqespa llaqta jawaman aysarqanku wañusqa kananpaq piensaspa. Pablon ichaqa mana wañurqanchu, hermanokunataq llaqtaman aparqanku. Chaymantan Pabloqa Antioquía llaqtaman kutirqan.

Pabloqa 49 watapin jujmanta Asia Menor ladopi hermanokunata visitarqan, jinaspa Europa ladopi kaq Atenas, Éfeso, Filipos, Tesalónica, juj llaqtakunamanwan viajarqan. Rillarqankutaqmi Silas, Lucas, Timoteopas. Kuskataq llank’arqanku iñiq t’aqakunata jatarichispa, hermanokunata yanapaspa ima. Pabloqa Corinto llaqtapin wata kuskanta qhepakurqan hermanokunata iñiyninkupi yanapaspa. Chaypin predicarqan, yachachirqan, cartakunatapas askha iñiq t’aqakunapaq qelqarqan, karpakunata ruwaspataq llank’arqan. Tiempowantaq Antioquía llaqtaman kutirqan.

52 watapitaq wajmanta Asia Menor ladomanta viajayta qallarirqan wichay ladoman Filipos llaqtakama, chaymantataq Corinto llaqtakama uraykamurqan. Askha watakunataq Éfeso llaqtapi tiyarqan yachachispa, jujkunata qhaliyachispa, iñiq t’aqatapas yanapaspa. Sapa p’unchaymi discursokunata qoq yachachina wasipi. Jinan askha runakuna kasukuspa vidankuta cambiarqanku. Pabloqa askha llaqtakunapin predicarqan, qhepamantaq Jerusalenman viajarqan.