51 YACHACHIKUY
Jehová Diosta kusichinapaq jinan rimananchis
Jehová Diosqa rimay atiqtan kamawarqanchis. Paypa regalonmi rimay atisqanchisqa. ¿Rikushanmanchu pay imatachus chay regalowan ruwashanchis chayta? Arí, rikushanmi (leey Santiago 1:26). Chaymi rimasqanchisqa paypa sonqonpaq jina kanan, ¿imatan chaypaq ruwasunman? Chayta kunan yachasun.
1. ¿Imaraykun jujkunata kallpachanapaq jina rimananchis?
Biblian nin: “Qankunapura sonqochanakuychis kallpachanakuychis”, nispa (1 Tesalonicenses 5:11). Yaqapaschá mayqen iñiqmasipas llakisqa kashanman, ¿imaynatan payta yanapawaq? Payta munakusqaykitan rikuchinayki. Yaqapaschá niwaq imakunatas allinta ruwashan chayta. ¿Ima textokunatan leepuwaq? ¿Ima textokunawanmi yanapawaq chhaynapi tarikuqkunata? Imakunachus rimasqaykipas, imaynachus rimasqaykipas kallpachanman pisichanman iman jujkunataqa. Chayraykun pacienciawan allinta piensarispa ima rimananchis, chaymantapas sumaqllatan rimananchis (Proverbios 15:1).
2. ¿Imaraykun manapuni qhelli simikunata rimananchischu?
Biblian nin: “Amapunin simiykichismantaqa ima millay rimaypas lloqsinqachu”, nispa (leey Efesios 4:29). Arí, manapunin noqanchisqa rimananchischu ima qhelli simitapas ni k’araq simikunatapas, manan rimananchischu pita pisichaq jinapas ni k’iriq jinapas. Chaymantapas manan cuento q’epichu kana nitaqmi yanqapas qasiqa pitapas tumpanachu (leey Proverbios 16:28).
3. ¿Iman yanapawasunman kallpachanapaq jina rimananchispaq?
Imayna rimasqanchismi rikuchin imaynachus kashanchis imaynatas piensanchis chaykunata (Lucas 6:45). Chayraykun kallpachakunanchis allin kaqkunapi piensananchispaq. Tukuy chanin kaqpi, ch’uya kaqpi, munakuyman apaq kaqpi, jatunchanapaq jina kaqkunapi piensananchispaq (Filipenses 4:8). Chaypaqqa allintan ajllakunanchis amigonchiskunata imakunawanchus kusirikunchis chaykunatapas (Proverbios 13:20). Chaymantapas manaraq rimashaspan allinta piensananchis, chhaynapin mana jujkunata llakichisunchu nitaq phiñachisunchu. Biblian nin: “Comunta rimasqa simikunaqa espada jinan k’irikun, yachayniyoqpa rimasqanmi ichaqa jampi jina”, nispa (Proverbios 12:18).
ASTAWAN YACHASUNCHIS
Kaypin astawan yachasun imaynatas Jehová Diosta kusichinanchispaq jina jujkunata kallpachanapaq jina rimasunman chayta.
4. Allinta piensaykuspa rimay
Llapanchismi mayninqa mana piensaspa imatapas rimarunchis, chaymantataq nishanchis: “Ama niymanchu karqan, khaynata niyman karqan”, nispa (Santiago 3:2). Leeychis Gálatas 5:22, 23 textota, jinaspa jamuq tapuykunaman jina parlariychis:
Allinta sumaqta rimanaykipaq, ¿chay textopi nisqanmanta imakunatan Jehová Diosmanta mañakuwaq? ¿Imaynatan chay mañakusqayki yanapasunkiman?
Leeychis 1 Corintios 15:33 textota, jinaspa jamuq tapuyman jina parlariychis:
Allin simikunatataq rimayta munashawaq chayqa, ¿yanapasunkimanchu mana allin amigokuna mana allin kusirikuykunapas?
¿Imapin masta tiempota pasanki? Chayman jinan rimasqaykipas kanqa.
Leeychis Eclesiastés 3:1, 7 textota, jinaspa jamuq tapuyman jina parlariychis:
¿Imay ratukunan upallakuna otaq suyakuna chaymantaña rimanapaq?
5. Jujkunamanta allinta rimay
¿Imatan ruwananchis jujkunamanta ama mana allinta rimanapaq ama sonqonkuta k’irinapaqpas? VIDEOTA qhawaychis, jinaspa jamuq tapuykunaman jina parlariychis:
¿Imaraykun videopi rikusqanchis hermano jujkunamanta imaynachus rimasqanta cambiayta munasharqan?
¿Imatan ruwarqan cambiananpaq?
Leeychis Eclesiastés 7:16 textota, jinaspa jamuq tapuyman jina parlariychis:
¿Imatan yuyarinanchis manaraq jujkunamanta ima mana allintapas rimashaspa?
Leeychis Eclesiastés 7:21, 22 textota, jinaspa jamuq tapuykunaman jina parlariychis:
¿Yanapasunkimanchu kay texto pipas personaykimanta mana allinta rimaqtin ama phiñakunaykipaq? ¿Imarayku?
6. Familiaykiwan sumaqllata rimay
Jehová Diosqa familianchiswan mana phiñachinakuspa sumaqta parlarinanchistan munan. VIDEOTA qhawaychis, jinaspa jamuq tapuyman jina parlariychis:
¿Iman yanapasunkiman familiaykiwan sumaqta parlarinaykipaq?
Leeychis Efesios 4:31, 32 textota, jinaspa jamuq tapuyman jina parlariychis:
¿Imaynan rimayninchis kanan familiapi sumaqta kausananchispaq?
Jehová Diosqa niqmi wawan Jesusta munakusqanta. Leeychis Mateo 17:5 textota, jinaspa jamuq tapuyman jina parlariychis:
¿Imatan ruwananchis Jehová Dios jina familianchis munakusqanchista rikuchinanchispaq?
Jujkunata felicitay allinkuna ruwasqankumanta.
WAKIN RUNAKUNAN NINKU: “Noqaqa chhaynatapunin rimani. Rimasqayri imanantaq jujkunatari”, nispa.
Personaykiri, ¿ima niwaqtaq chhayna piensaymanta? ¿Imarayku?
IMATAN YACHAMURQANCHIS
Imaynachus rimasqanchisqa atiyniyoqmi. Chayraykun manaraq rimashaspa allinta piensananchis imatachus rimasun, imaynatachus rimasun, jayk’aqchus rimasun chaykunapi.
Yuyarisun
¿Imaynatan jujkunata kallpachanaykipaq jina rimawaq?
¿Imakunatan mana jayk’aqpas rimananchischu?
¿Iman yanapawasun jujkunamanta allinta rimananchispaq, kallpachanapaq jina rimananchispaqpas?
ASTAWAN YACHANAYKIPAQ
Kay videopin rimashan imas yanapawasunman jujkunamanta allinta rimananchispaq chaymanta.
¿Iman yanapawasunman qhelli simikunata ama rimananchispaq? Chaymanta kaypi yachay.
Kaypin yachanki imatas ruwawaq jujkunamanta ama mana allinta rimanaykipaq chayta.
Jehová Diosmi juj runata yanaparqan amaña qhelli simikunata rimananpaq, paymanta kay qelqapi astawan yachay.