¿Pin kay Pachata kamachishan?

MANAPASCHÁ hayk’aqpas reqsirqankichu runa wañuchiqkunaq jefenta. Chayraykuchu niwaq, ¿manan kanchu runa wañuchiqkunaqa, nispa? Manan riki. Paykunaqa mana reqsichikunankupaqmi pakakunku. Wakinqa carcelmantapacha mana allin ruwaykunata kamachimushallanku. Ichaqa noticiakunapin yachanchis millay ruwayninkuta, droga vendeqkuna paykuna kikinku wañuchinakushanku, rabona warmikunatan paykunapaq llank’achinku, runamasintapas vendeshanku. Yaqapaschá paykunataqa mana rikunchischu, ichaqa sut’itan rikunchis runa ñak’arichisqankuta.

Chhaynallataqmi Saqrawanpas, manaña rikunchischu chaypas, Biblia nisqanman hina payqa kanpunin. Satanasqa runa wañuchiq jefe hinan q’otuspa llullakuspa ima munasqanta ruwan. Hinaspapas Bibliaq nisqan hina, ‘kikin Satanasqa k’anchashaq angelmanmi tukun’ (2 Tesalonicenses 2:9, 10; 2 Corintios 11:14). Chaywanpas manan pakakuyta atinchu, millay ruwayninkunawanmi sut’ita reqsichikun. Chhaynaqa, ¿imaraykun askha runakuna ninku: “Saqraqa manan kanchu”, nispa? Pantasqa yachachikuykunarayku. Ñawpaqta chay pantasqa yachachikuykunamanta rimasun, chaymanta yachasun ima ninmi Biblia Satanasmanta.

◼ “Munakuq Diosqa, manan Saqrataqa kamarqanchu”. Biblia nisqan hina munakuq Diosqa manan kamarqanchu millay espiritutaqa. Bibliapiqa manan maypipas ninchu chhayna millay espíritu kamasqanta. Aswanmi Jehová Diosmanta nin: “Hatun Qaqa hinan Señor Diosqa. Hunt’asqan ruwasqankunaqa, chaninmi ruwasqankunaqa, hunt’aq Diosmi payqa, mana waqlliqmi payqa, chanintaq cheqaqtaqmi payqa”, nispa (Deuteronomio 32:4; Salmo 5:4).

Chhaynaqa, ¿imaynapin Saqra paqarirqan? Chayta yachanapaqqa ñawpaqta yachana sichus Diospa ch’uya kawsayniyoq kamasqakuna pantankuman chayta. Diosqa manan pitapas máquina hinataqa kamarqanchu, aswanpas munayniyoqtan kamarqan. Chhaynaqa pipas ch’uya kashaspapas akllakunmanmi allinta otaq mana allinta ruwananpaq. Chaymi, angelkunapas runakunapas tukuy allin ruwasqankurayku allin qhawarisqa kanqaku sichus paykunallamanta chay ruwayta akllakurqanku chayqa.

Diosqa munarqan wawankuna kikinkumanta decidispa imatapas ruwanankuta, chhaynaqa, ¿hark’anmanchu karqan munaqtinkuqa mana allin ruwanankuta? Manan. Pipas ch’uya kashaspapas akllakunmanmi mana allin ruwayta, imaynan Saqrapas ruwarqan hinata. Jesusmi paymanta nirqan: ‘Manataq cheqaq-kaypi sayarqanchu’, nispa (Juan 8:44, Mosoq Rimanakuy). Chaywanmi yachanchis qallariypiqa kay millay angelqa ch’uya kasqanta, cheqaqpi kawsasqantapas.a Chhaynaqa, ¿imaraykun Jehová Dios munarqan wawankuna kikinkumanta decidinankuta? Munakuq kasqanraykun, paykunapi confiasqanraykupiwan (qhaway “¿Huchapi urmankumanchu ch’uya kawsayniyoqkuna?” nisqa recuadrota, 6 paginapi).

◼ “Saqraqa Diospaqmi llank’an.” Chhaynatan wakinqa yuyaykunku Bibliapi Job librota leespa. Bibliamanta yachaq runaq nisqanman hinaqa, Saqraqa kay pachaq ‘k’uchun-k’uchunta purimusqansi’ tupan ñawpa Persia suyumanta qhamiyaqkunawan, paykunas k’uchun-k’uchunta purimuqku rikusqankuman hinataq reyninkuman willaqku (Job 1:7). Ichaqa kaypi yuyaykusun: Sichus Saqra Diospa qhamiyaqnin kanman chayqa, ¿tapunmanraqchu Dios maymanta Saqra hamushasqanta? Manan riki. Hinaspapas, Job libropiqa manan Saqrata qhawarichinchu Diospa yanapaqnin hinataqa, aswanpas millay awqanta hinan. ¿Imaynapin chayta yachanchis? Chay willakuypin Satanás nispa sutichakusqanrayku, chay sutiqa “contrapi churakuq” ninanmi (Job 1:6). Chhaynaqa, ¿imaraykun ninku: “Saqraqa Diospaqmi llank’an”, nispa?

Chay yuyaykuyqa apostolkunaq tiemponpiraqmi rikhurimurqan Diospa mana yuyaychasqan librokunapi, Libro de los jubileos y la Regla de la comunidad de los hombres de Qumrán nisqakunapi. Chay librokunapin Saqrata rikuchin Dioswan imapas ruwanankupaq rimanakusqankuta, chaymantataq Satanasqa Diosta kasukuspa imatapas ruwasqanta. Chhaynatan unay tiempo yuyaykurqanku. Martín Luteroq yuyaykusqantan El Príncipe de las Tinieblas nisqa libronpin Jeffrey B. Russell qelqarqan: “Payqa Saqratan qhawarin Diospa huerta ruwananpaq rastrillonta hina”, nispa. Luteropaqqa, chay rastrillos otaq Saqra kusikun mana allin qorata wañuchispa, ichaqa Diospa makinpi kaspaqa Paypa munaynintas ruwan. Chhayna yuyaykusqankun phiñachirqan askha iñiqkunata, tiempowantaq teólogo francés Juan Calvino chay yuyaykuyta hap’ikurqan. Runakunapaqqa sasa entiendeymi karqan Dios ñak’ariykunata hinalla qhawasqanqa, chaymi aswan sasa karqan Saqra Diospaq llank’asqanta entiendenankuqa (Santiago 1:13). Chhayna yuyaykusqanku, qhepa watakunapi runaq ñak’arisqanpiwan askha runakuna manaña creepunkuchu Diospipas Saqrapipas.

◼ “Mana allin ruwaykunata rikch’anachinallapaqmi Saqraqa.” Chhayna kanman chayqa, manan entiendekunmanchu Bibliapi wakin qelqakuna. Qhawarisunchis Job 2:3-6 textota. ¿Piwanmi Dios parlasharqan? ¿Jobpa mana allin kayninwanchu? Icha, ¿Pay kikinpa mana allin kayninwanchu? Hinaspapas Diosqa chay ratollan Job allin runa kasqanrayku paypi confiasqanmanta rimarqan, ¿chaychu mana allinkunawan pruebaman churanman karqan? Chhaynata Diosmanta yuyaykuyqa millay Diospas kanman hinatan qhawarichin. Ichaqa Diospiqa ‘manan ima mana chaninpas’ kanchu (Salmo 92:15). Aswanmi Diosqa mana imatapas Jobpa contranpiqa ruwayta munarqanchu. Chaywanmi rikunchis Saqraqa mana millay ruwaykunaq rikch’anachiyllanchu nitaq Diospa mana allin kayninchu kasqanta. Aswanpas Saqraqa kanpunin, allin espiritumanta Diospa enemigonman tukupuq.

¿Pipunin kay pachata kamachishan?

Wakinqa ninku: “Saqrapiqa ñawpa runakunallan creenku”, nispa. Ichaqa Saqraq kasqallanmi entiendechiwanchis sinchi millaykuna kasqanta. Saqraq mana kasqanta yuyaykuspan, askha runakuna mana Diosta kamachikuyninkunatapas kasukunkuchu.

Poeta Charles-Pierre Baudelaire nin: “Saqraqa munan mana kananta yuyaykunanchistan”, nispa. Chayta ruwaspan Saqraqa iskayachin Diospa kawsasqanta. Hinaspapas sichus Saqra mana kanmanchu chayqa, Dioschá huchayoq kanman millay ruwaykunamanta. ¡Chaytapunin Saqraqa munan yuyaykunanchista!

Imaynan runa wañuchiqkunaq jefenqa mana munanchu yachanankuta pi kasqanta, chhaynallataqmi Saqrapas mana munanchu pi kasqanta yachananchista. ¿Imarayku? Biblian kutichiwanchis: “Chay mana iñiqkunaq yuyaynintan kay pacha kamachiq diosqa tutayachin, lliphlli-kayniyoq Cristomanta allin willakuykunaq k’anchayninta mana rikunankupaq. Cristoqa Diospa rikch’ayninpunin”, nispa (2 Corintios 4:4).

Chaymi tapukunanchis, ¿hinallatachu Dios qhawanqa Saqraq chhaynaniraq millaykuna ruwasqanta? Qatimuqpi yachasun.

[Uranpi willakuy]

[5 paginapi willakuy]

Saqra, ¿Diospa kamachinchu icha awqanchu?

[6 paginapi dibujo recuadropiwan]

¿Huchapi urmankumanchu ch’uya kawsayniyoqkuna?

Arí. Diosqa yuyayniyoq kawsaqkunatan mana pantaqta kamarqan. Adanpas ch’uya runa mana pantaqmi karqan. Chhaynaña kashaspapas Kamaqninpa leykuna churasqantaqa kasukunanpunin karqan. Payqa manan mikhunmanchu hallp’ata, rumita, k’aspita imaqa, chaykunata mikhuqtinqa mana allinninpaqmi kanman. Nitaq altopatamanta wikch’uykunmanchu, chayta ruwaspaqa k’irikunmanchá otaq wañunmanpas.

Ahinallataqmi mayqen kawsaq runawanpas angelwanpas, Diospa kamachikuyninkunata mana kasukuspaqa manan allintachu kawsankuman. Chhaynaqa ch’uya yuyayniyoqkunaqa urmankumanmi huchapi (Génesis 1:29; Mateo 4:4).