Bibliata estudiayqa ancha allinpunin. Ichaqa yaqapaschá wakin runakunapaqqa sasa kanman Bibliata estudiay. ¿Imaraykun mana saqenaykichu Biblia estudiayta? ¿Iman yanapasunkiman sasachakuykunapiña tarikuspapas Bibliata estudiashanallaykipaq?

1. ¿Imaraykun Bibliata estudiananchis?

Bibliapin nishan: “Diospa siminqa kausashaqmi, atiyniyoqtaqmi kanpas”, nispa (Hebreos 4:12). Bibliaqa ancha allin libron. Chaypin willashan Jehová Diospa imayna piensasqanmanta, may tukuyta munakuwasqanchismanta, Diospa munay promesankunamantapas. Bibliata estudiayqa yanapasunkin allin yuyaywan imatapas ruwanaykipaq, Jehová Diospa amigon kanaykipaq, aswan kusisqa kausanaykipaq ima.

2. ¿Imaraykun Bibliaq yachachisqanta valorananchis?

Bibliaq yachachisqanqa qorimantapas aswan valorniyoqmi. Chaymi Bibliapas nin: “Cheqaq kaqta rantiy, amataq jayk’aqpas chayta vendeychu”, nispa (Proverbios 23:23). Sichus Bibliaq yachachisqanta ancha valorniyoqpaq qhawarisunchis chayqa, ima sasachakuykunapiña tarikuspapas manan Biblia estudiaytaqa saqesunchu (leey Proverbios 2:4, 5).

3. ¿Imaynatan Jehová Dios yanapasunki?

Jehová Diosqa tukuy atiyniyoq Diosmi. Payqa amigoykin, allintataqmi reqsisunkipas. Chaymantapas Jehová Diosqa payta astawan reqsinaykitan munan, chaymi kallpachasunki “ima ruwayta munanaykipaqpas, payllataqmi atiytapas qosunki chayta ruwanaykipaq” (leey Filipenses 2:13). Paymi yanapasunki Biblia estudiayta ama saqenaykipaq. Sasachakuykunapiña tarikuqtiykipas, jujkunaña contraykipi jatariqtinpas Diosqa liston kashanqa yanapanasuykipaq. Chhaynaqa Jehová Diospa yanapayninta mañakuy Biblia estudiayta ama saqenaykipaq (1 Tesalonicenses 5:17).

ASTAWAN YACHASUNCHIS

4. Bibliata estudiaytan ñaupaqman churanayki

Mayninpiqa imaymana ruwanayoq kaspan mana tiempota aypachikusunmanchu Bibliata estudianapaq. ¿Imatan ruwasunman chhaynapi tarikuspa? Leeychis Filipenses 1:10 textota, jinaspa jamuq tapuykunaman jina parlaychis:

• ¿Imakunan qanpaq “aswan allin kaqkuna” kanman?

• ¿Imatan ruwawaq Biblia estudiayta ñaupaqman churanaykipaq?

1. Sichus aqota juj vasoman ñaupaqta churanki chayqa, manan rumikunaqa jaykuyta atinqañachu.

2. Sichus ñaupaqta rumita vasoman churanki chayqa, aqoqa facil-llatan jaykunqa. Chhaynatan noqanchispas “aswan allin kaqkunata” ñaupaqta ruwananchis.

Lliu runapas Diosta reqsispallan kusisqa kausaytaqa atisunman, chaypaqmi Biblia estudiay yanapawasun. Leeychis Mateo 5:3 textota, jinaspa jamuq tapuyman jina parlariychis:

• ¿Imaynatan kausasunchis Biblia estudiayta ñaupaqman churaspa?

5. Jujkunaña jark’asunkiku chaypas estudiashallay Bibliata

VIDEO: Mana pisipaspan ñaupaqllaman purirqan (5:22)

• ¿Imatan ruwarqanku Franciscoq familianpas amigonkunapas Bibliata estudiashasqanta yachaspa?

• ¿Allinchu karqan Francisco mana pisipaspa Bibliata estudiasqan?

Leeychis 2 Timoteo 2:24, 25 textota, jinaspa jamuq tapuykunaman jina parlariychis:

• ¿Imaninkun familiaykipas amigoykikunapas Bibliata estudiasqaykimanta?

• Bibliaq nisqan jina, ¿imatan ruwanayki Biblia estudianaykita mana munaqtinku? ¿Imarayku?

6. Jehová Diospa yanapayninpi confiay

VIDEO: Jehová Diosmi yanapawasun cambiananchispaq (3:56)

• ¿Ima ruwaykunatan Jim saqepurqan Jehová Diospa munayninman jina kausananpaq?

• ¿Imata ruwasqanmi astawan kallpachasunki?

Leeychis Hebreos 11:6 textota, jinaspa jamuq tapuykunaman jina parlariychis:

• ¿Imatan Jehová Dios qonqa “payta tukuy sonqowan maskhaq” runakunaman?

• ¿Imaynan Jehová Dios kashanman Bibliata estudianaykipaq kallpachakusqaykita rikuspa?

IMATAN YACHAMURQANCHIS

Bibliata estudiaymi yanapasunki wiñaypaq kusisqa kausanaykipaq, chayrayku amapuni Biblia estudiayta saqeychu. Chaymantapas Jehová Diospi confiashallay, payqa yanapasunkipunin.

Yuyarisun

• ¿Imaraykun Bibliaq yachachisqanta ancha allinpaq qhawarinanchis?

• ¿Imatan ruwanayki “aswan allin kaqkunata” ñaupaqman churanaykipaq?

• ¿Imaraykun Jehová Diospa yanapayninta mañakunayki?

ASTAWAN YACHANAYKIPAQ

Kaypin yachanki ima tawa ruwaykunas yanapawasunman tiemponchista ama usuchinanchispaq chayta.

¿Imakunatan ruwawaq tiempoykita mana usuchinaykipaq? (¡Rijch’ariy!, 2014 watapi marzo killa)

Juj señoran karqan Diospi mana iñiq qosayoq, ¿imaynatan Jehová Dios chay señorata yanaparqan? Chaymantan kay videopi yachanki.

Jehová Diosmi yanapaqninchisqa (5:05)

Juj wiraqochan manapuni munarqanchu Jehová Diosmanta yachayta, ichaqa señoranmi payta yanaparqan. Chaymantan kay videopi yachanki.

Manan creerqanichu Jehová Diospa testigonkunaq yachachisqanta (6:30)

Wakin runakunan ninku: “Jehová Diospa testigonkunaqa familiakunatan t’aqanachinku”, nispa. ¿Cheqaqchu chay nisqanku kanman?

¿Cheqachu Jehová Diospa testigonkuna familiakunata t’aqanachinku? (jw.org paginapi leey)

Ima ruwasqanchispas vidanchistan cambianman, Jehová Dioswan amigontin kasqanchistapas cambianmanmi. Chaymi allinta piensaykuspa imatapas ruwananchis. Yaqapaschá piensashanchis maypis tiyasun, imaynatas mantenekusun, casarakusunchus manachus chaykunapi. Allinta piensaykuspa imatapas ruwasun chayqa, kusisqan kasunchis, Jehová Diostapas kusichisunmi.

1. ¿Yanapasunkimanchu Biblia allinta imatapas ruwanaykipaq?

Imatapas ruwayta munashanchis chayqa, ñaupaqtan Jehová Diosmanta mañakunanchis. Chaymantataq Bibliapi maskhananchis imatas pay piensan chayta (leey Proverbios 2:3-6). Mayninpiqa juj kamachikuytan tarinki imatachus ruwanaykipaq, chhayna kaqtinqa kasukunaykin chayta.

Mayninpin ichaqa mana tarinkichu ima kamachikuytapas. Chhaynaña kaqtinpas Jehová Diosqa rikuchisunkipunin “may ñannintachus purinaykita” (Isaías 48:17). ¿Imaynatan chayta ruwanqa? Bibliapi kaq willakuykunawan yachachikuykunawan iman. Chaykunan reparachiwasun imaynatas Jehová Dios piensan, imaynatas imatapas qhawarin chayta. Mayninpiqa Bibliapi imapas pasasqanmanta leespan chay willakuykunata yachachikuykunatapas tarisun. Chhaynapin Jehová Diospaq jina imatapas ruwasun.

2. ¿Imakunapin piensanayki imatapas manaraq ruwashaspa?

Biblian nin: “Allin yuyayniyoqqa allinta tanteakuspan imatapas ruwan”, nispa (Proverbios 14:15). Chhaynaqa imata ruwananchispaqpas ñaupaqtan allintaraq piensarinanchis. Chaypi piensashaspan tapukunanchis: “¿Bibliapi kaq mayqen yachachikuymi yanapawanman? ¿Thajchu kasaq kayta ruwaspa? ¿Imaninqakun jujkuna kay ruwasqayta rikuspa? ¿Kusikunqachu Jehová Dios kay ruwasqaywan?”, nispa (Deuteronomio 32:29).

Jehová Diosqa derechonpin kashan imachus allin imachus mana allin chayta niwananchispaq. Sichus allinta yachasun kamachikuyninkunata, Bibliapi kaq yuyaychaykunatapas, chayman jinataq kausasunpas chayqa, allin concienciayoqmi kasunchis. Concienciaqa pipas rimapayawashasunman jinan niwanchis imapas allinchus kashan icha manachus chayta (Romanos 2:14, 15). Conciencianchis Bibliawan allin educasqa kanqa chayqa allintan imatapas ruwasunchis.

ASTAWAN YACHASUNCHIS

3. Bibliaq nisqanman jina imatapas ruway

VIDEO: Bibliapi nisqanman jina kausasunchis (5:54)

• ¿Ima regalotan Dios qowarqanchis?

• ¿Imaraykun Dios chay regalota qowarqanchis?

• ¿Ima yanapaykunatan Dios qowarqanchis libreña kanchis chaypas allin yuyaywan imatapas ruwananchispaq?

Juj yachachikuyta Bibliapi qhawasunchis. Leeychis Efesios 5:15, 16 textota. Chay textoqa allintan reparachiwanchis imaynas tiempotaqa mana usuchinachu chayta ¿riki?

• ¿Imaynatan tiempota mana usuchiy yanapawasunman Bibliata sapa p’unchay leenapaq?

• ¿Imaynatan yanapawasunman allin qosa, allin esposa, allin tayta-mama, allin wawa kanapaq?

• ¿Imaynatan yanapawasunman juñukuykunaman mana faltakunapaq?

4. Concienciaykita yachachiy imatapas allinta reparachinasuykipaq

VIDEO: “Allin concienciawanpuni kausaychis” (5:13)

• Videota qhawasqanchisman jina, ¿imaynatan chay hermana conciencianta yachachirqan, chhaynapi ima ruwasqanpas Jehová Diospa munayninman jina kananpaq?

Imata ruwananchis kaqtinpas, sapankanchismi reparananchis imatachus ruwasun chayta, manan jujkunaq imapas niwananchistaraqchu suyananchis. Leeychis Hebreos 5:14 textota, jinaspa jamuq tapuykunaman jina parlariychis:

• Jujkunaq yanapayninta mañakuy allinña chaypas, ¿imaraykun sapankanchispuni reparananchis imachus allin imachus mana allin chayta?

• ¿Imatan ruwananchis conciencianchis allinta imatapas reparachiwananchispaq, chhaynapi allin yuyaywan imatapas ruwananchispaq?

5. Jujkunaq conciencianta respetasun

Llapanchispas jujniraytan piensanchis, chaymi mana igualtachu imatapas ruwanchis. ¿Imaynatan rikuchisunman jujkunaq imaynachus piensasqanta respetasqanchista? Kaypi iskaymanta yachasun.

Juj kaq: Juj hermanas juj iñiq t’aqaman astakunman, paymanqa allin pintasqa puriysi gustanman, chay iñiq t’aqapi hermanakunas ichaqa mana allinpaqchu qhawarinkuman chhayna pintakuyta.

Leeychis Romanos 15:1; 1 Corintios 10:23, 24 textokunata, jinaspa jamuq tapuykunaman jina parlariychis:

• Chaypi leesqanchisman jina, ¿imatan ruwanman chay hermana? Qanpas concienciaykiman jinaqa atiwaqpaschá ima ruwaytapas, ichaqa manapaschá jujkunaqa allinpaqchu chayta qhawarinkuman, ¿imatan ruwawaq chhaynapi tarikuspa?

Iskay kaq: Juj hermanos kanman manapuni pisillatapas alcoholniyoq ujanakunata tomaq. Manaña Biblia prohibinchu pisilla ujariyta chaypas, chay hermanoqa totaltapunis prohibikunman. Paytas invitankuman juj juñukuyman, chaypis rikunman hermanokuna juj chhikan ujashaqta.

Leeychis Eclesiastés 7:16; Romanos 14:1, 10 textokunata, jinaspa jamuq tapuykunaman jina parlariychis:

• Chaypi leesqanchisman jina, ¿imatan chay hermano ruwanman? Qanri, ¿imatan ruwawaq mana ruwasqaykikunata jujkuna ruwaqtinku?

¿Iman yanapasunkiman imatapas allinta ruwanaykipaq?

1. Jehová Diosmanta mañakuy, paymi allin yuyayta qosunki (Santiago 1:5).

2. Reparachiq yachachikuykunata maskhay, chaypaqqa Bibliata qelqanchiskunata iman estudianayki, chhaynapin reparanki imaynatas imatapas ruwawaq chayta. Tapurikuwaqmi allin iñiyniyoq hermanokunatapas.

3. Piensay imas pasanman chaypi. ¿Imaynan concienciayki qhepanqa? ¿Imaynatan jujkuna qhawarinqaku ima ruwasqaykitapas? Chaykunapi piensay.

IMATAN YACHAMURQANCHIS

Imatapas allinta ruwananchispaqqa yachananchismi Jehová Diospa imayna piensasqanta. Chaymantapas qhawarinanchismi jujkunata yanapanqachus icha phiñachinqachus chayta.

Yuyarisun

• ¿Imatan ruwanayki ima ruwasqaykiwanpas Jehová Dios kusikunanpaq?

• ¿Imatan ruwanayki concienciayki allinta imatapas reparachinasuykipaq?

• ¿Imaynatan rikuchiwaq jujkunaq piensasqan respetasqaykita?

ASTAWAN YACHANAYKIPAQ

¿Imaynatan Diospaq jina imatapas ruwawaq? Chaymantan kay qelqapi yachanki.

“Diosta jatunchanapaq jina imatapas ruwasun” (Qhawaq, 2011 watapi 15 abril)

¿Imaynatan Jehová Dios yuyayta qowanchis? Chaymantan kay videopi yachanki.

¿Imaynatan Jehová Dios pusariwanchis? (9:50)

¿Imatan juj runa ruwarqan Diosta servinanpaq? Chaymantan kay videopi yachanki.

Jehová Diosllan qowasunchis tukuy allin kaqtaqa (5:46)

Ima ruwanapaqpas Bibliapi mana juj kamachikuy kaqtin, ¿imaynatan yachasunman ima ruwananchistas Jehová Dios munan chayta? Chaymantan kay qelqapi yachanki.

“¿Juj kamachikuy kallaqtinchu imatapas kasukunanchis?” (Qhawaq, 2003 watapi 1 diciembre)