7 ¿Uyariwanchischu Dios mañakusqanchista?

CHAY tapuymantaqa askha runakunan yachayta munanku. Yachamusqanchis jina, Diosqa uyarinmi mañakusqanchista. Ichaqa noqanchismantan kanqa uyarinanpaq mana uyarinanpaqpas.

Jesusqa sut’itan nirqan religionpi umalliqkuna iskay uya kasqankuta. Paykunaqa manan sonqomantachu mañakuqku, aswanpas Dios sonqo runaman rijch’akuyllatan astawanqa munaqku. Chaymi paykunamanta Jesusqa nirqan: “Paykunaqa junt’asqa premioyoqñan kanku”, nispa. Chay umallikunaqa manan Dios uyarinantachu astawanqa munarqanku, aswanpas runakunaq allin qhawarisqan kaytan. Chayllatan paykunaqa chaskikunanku karqan (Mateo 6:5). Kay tiempopipas chay jinan pasallantaq. Askha runakunan mana Diospi piensaspachu mañakunku, aswanpas paykunallapi piensaspa. Jinaspapas manan ñaupaqpi rimamusqanchis willakuykunaman jinachu ruwanku, chaymi mañakusqankuqa mana uyarisqachu.

¿Qantari uyarisunkimanchu Dios? Uyarinasuykipaqqa manan juj castamantachu, juj nacionmantachu otaq ima t’aqamantachu kanayki. “Diosqa lliutapas igual-llatan rikun”. Jinaspapas “payta manchakuspa allin kaqta ruwaq runakunataqa may nacionmantaña kanku chaypas sumaqtan chaskin” (Hechos 10:34, 35). Dios “manchakuq” runaqa manan ima mana allintapas ruwayta munanchu, Diosta anchata respetasqanrayku. “Allin kaqta ruwaq runapas” Diospa munayninman jinan kausan, manan pay kikinpa munayninman jinachu nitaq juj runakunaq munayninman jinachu. Chhaynaqa sichus munanchis Jehová Dios mañakusqanchista uyarinanta chayqa, Palabranpi imachus nisqanman jinan ruwananchis.a

Askha runakunan piensanku Diosqa mañakusqankuman juj milagrota ruwaspa kutichimunanta. Ichaqa ñaupa tiempopipas Diosqa imaynallanpin milagrotaqa ruwarqan. Bibliaq willasqanman jina, juj milagro kananpaqqa pachaj-pachaj watakunaraqmi pasarqan. Chaymantapas Biblian willarqan apostolkunaq wañupusqan qhepamanqa manaña milagrokuna kananta (1 Corintios 13:8-10). Ichaqa manan chaywanqa nishanchischu: “Diosqa manan mañakusqanchisman kutichimunchu”, nispachu. Kunanmi yachasun imaynatachus Dios mañakusqanchisman kutichimusqanta.

Yachaytan qowanchis. Jehová Diosqa cheqaq yachayta qoqmi, payqa sumaq sonqowanmi yanapayninta maskhaq, kasukuq runakunamanqa yachayta qon (Santiago 1:5).

Santo espirituntan qowanchis. Santo espirituqa Jehová Diospa kallpanmi, paypa atiynin. Chay kallpanwanmi Diosqa yanapawanchis ima sasachakuytapas atipananchispaq, llakisqa kashaqtinchispas thaj-kaytan qowanchis, chaymantapas allin kaqkunata sonqonchispi wiñachinapaqmi yanapawasun (Gálatas 5:22, 23). Jinaspapas Jesusmi prometerqan necesitasqanchisman jina santo espiritunta qowananchispaq (Lucas 11:13).

Diosqa yachaytan qon payta maskhaqkunaman. Hechos 17:26, 27 nisqanman jina, pachantinpin allin sonqoyoq runakuna Diosta maskhanku. Paykunaqa yachaytan munanku sutinta, kay pachapaq runakunapaqpas imachus munasqanta, payman imaynata asuykuytawan (Santiago 4:8). Jehová Diospa testigonkunaqa tarillankun chay jina runakunata, chaymi Bibliaq imachus nisqanta paykunaman yachachinku.

Yaqapaschá chayrayku kay qelqata leeshanki. ¿Diostachu maskhashanki? Chhayna kaqtinqa, yaqapaschá kay qelqawan Diosqa mañakusqaykiman kutichimushan.