Jesús sinchi wayrata thanichin

Jesusqa Capernaum llaqtapi ch’isiyaq imaymanata ruwasqanraykun sayk’usqa kasharan. Chaymi discipulonkunata niran: “Jaku qocha chimpaman”, nispa (Marcos 4:35).

Chay chimpapin kasharan Gerasa runakunaq tiyasqan llaqtakuna, chaykunatan nillaqkutaq “Decápolis” nispa. Chay llaqtakunapi griego runakuna tiyaranku, ichaqa judío runakunapas askhan chaypiqa tiyaranku.

Jesusta botepi chimpashaqta rikuspankun juj runakunapas botepi qhepanta riranku (Marcos 4:36). Chimpaman chayayqa manan nishu karuchu karan. Galilea qochaqa 21 kilómetro jinan largonman karan, aswan ancho partentaq 12 kilómetro jinalla karan, chaywanpas chay qochaqa ukhun karan.

Jesusqa mana juchayoq runaña karan chaypas, sayk’uqmi karan. Chaymi payqa boteq qhepanpi saunaykukuspa puñuykuran.

Apostolkunamanta wakinqa allintaña yacharanku bote purichiyta chaypas, sinchi sasachakuypin chay kutipi tarikuranku. Chay qochapiqa q’oñi wayrallan kaq, muyuriqninpi askha orqokuna kasqanrayku; mayninpin ichaqa orqokunamanta chiri wayra qonqaylla jaykumuq, chhaynapin sinchi wayra jatariq. Chaymi chay kutipipas pasaran, chaymi sinchita wayramusqanrayku ‘unupas boteman junt’aykusharanña, yaqañan chinkaykusharankupas’ (Lucas 8:23). Jesusmi ichaqa puñushallaran.

Apostolkunaqa tukuy atisqankutan ruwasharanku boteta allinta purichinankupaq, ichaqa manan atirankuchu. Chaymi wañukapunankuta manchakuspa Jesusta rijch’achiranku, jinaspa niranku: “¡Señor, salvawayku, chinkaykushanchisñan!”, nispa (Mateo 8:25).

Jinan Jesusqa paykunata niran: “Pisi iñiyniyoq runakuna, ¿imaraykun sinchi mancharisqa kashankichis?”, nispa (Mateo 8:26). Jinaspa wayrata qochatawan phiñarikuran: “¡Ch’inlla kay! ¡Upallay!”, nispa (Marcos 4:39). Wayrataq thanipuran, qochapas thaj kapuran (Marcospa, Lucaspa qelqasqankuman jinaqa chay milagrota ruwaspañan Jesusqa apostolkunata ‘pisi iñiyniyoqkuna’ niran).

Apostolkunaqa ancha admirasqa mancharisqa iman kasharanku chhayna wayrata thanichisqanmanta. Chaymi ninakuranku: “¿Pipunitaq kay runari, chaytaq wayrapas qochapas kasunri?”, nispanku. Jinan qocha chimpaman chayaranku (Marcos 4:41–5:1). Jesusta qatikuq wakin botekunaqa yaqapaschá qocha pataman kutipuranku.

Rikusqanchis jina, Diospa Churin Jesusqa ancha atiyniyoqmi. Chaymi kay pachata kamachimuqtinqa manaña kanqachu jatun wayrakuna, terremotokuna, ni ima llakichiwaqninchispas, lliumi mana manchakuspa thaj kausasunchis.