Jesusta tapunku ayunaymanta

30 watapi Pascua fiestaman Jesuspa risqanmantaqa yaqañan juj wata kasharan, bautizaq Juanpas unayñan carcelpi kasharan. Juanqa munaran llapan discipulonkuna Jesusta qatikunankutan, ichaqa wakillanmi Jesuspa discipulon kapuranku.

31 watapi Pascua fiestapaq pisillaña kashaqtinmi Juanpa discipulonkunaqa Jesusta niranku: “Noqaykupas fariseokunapas ayunaykun, ¿imanaqtintaq discipuloykikunari mana ayunankuchu?”, nispa (Mateo 9:14). Fariseokunaqa costumbrenkuman jinan ayunaqku, chaychá Jesuspa ejemplo churasqanpi fariseopas niran: “Diosníy, [...] noqaqa iskay kutitan semanapi ayunani”, nispa (Lucas 18:11, 12). Yaqapaschá Juanpa discipulonkunapas ayunasharanku chay ruway costumbrenku kasqanrayku otaq Juanmanta llakikusqankurayku. Imaynaña kaqtinpas, paykunaqa munasharankuchá Jesuspa discipulonkunapas paykuna jina ayunanankuta.

Chaymi Jesusqa paykunata niran: “¿Llakikunkumanchu novioq amigonkuna paykunawan novio kashaqtin? Manan ¿riki? Ichaqa chayamunqan p’unchaykuna, chaypin novioqa paykunamanta qechusqa kanqa, chayñan paykunaqa ayunanqaku”, nispa (Mateo 9:15).

Chay novioqa Jesusmi karan (Juan 3:28, 29). Paykunawanraq Jesús kashaqtinqa manan discipulonkunaqa ayunanankuchu karan, payta wañuchiqtinkun ichaqa llakikuymanta ayunananku karan. Ichaqa Jesús kausarimpuqtinqa manañan imamantapas ayunanankuchu karan.

Chaymantan Jesusqa niran: “Manan pipas mauk’a p’achamanqa mosoq telawan remiendanmanchu, mana chayqa chay mosoq telan q’estispa mauk’a p’achata chutarinman, chhaynapitaq astawan llik’irparinman. Manallataqmi pipas mana poqosqa vinotaqa mauk’a odrekunaman jich’aykunmanchu, chhayna kaqtinqa odrekunachá phatapunman vino poqoqtin, vinotaq jich’akapunman, odrekunapas manaña imapaqpas valepunmanchu. Aswanpas mana poqosqa vinotaqa mosoq odrekunamanmi jich’aykuna”, nispa (Mateo 9:16, 17).

Jesusqa mauk’a p’achamanta mauk’a odremantawan rimaspaqa judiokunaq religionninpi imaymana costumbrekunamantan rimasharan. Payqa manan chaykunata allichaqchu jamuran, chaykunaqa ñan tukupunanpaqña kasharan. Diosta imayna adoranamanta Jesuspa yachachisqanqa manan judío runakunaq costumbrenkuman jinachu karan. Chayraykun Jesuspa discipulonkunaqa mana chaykunata ruwanankuchu karan, manan ayunanankupaschu karan.