Sábado p’unchaypi allin kaqta ruwan

Jesusqa askha runatan yanaparan Galileapi predicaspa, ichaqa paypa nisqan jina, ‘juj llaqtakunapipas willamunanmi karan Diospa gobiernonmanta allin willakuykunataqa’. Chaymi payqa Judea ladota riran, jinaspa ‘chaypi kaq sinagogakunapi allin willakuykunata willaran’ (Lucas 4:43, 44). Chaymantapas cercañan kasharan Jerusalenpi Pascua fiestapaq.

Judeapiqa manan Galileapi jinachu Jesustaqa sumaqta chaskiranku, chaychá Bibliaqa pisillata willashan Judeapi predicasqanmanta. Manaña sumaqtachu chaskiranku chaypas, Jesusqa tukuy atisqantan chaypi predicaran, milagrokunatapas ruwaranmi.

31 watapi Pascua fiesta ruwakunanpaqñataq kasharan chayqa, Jerusalén llaqtatan Jesusqa riran. Chay llaqtapin karan “Betzata” nisqa estanque “oveja punku” nisqaq kasqanpi. Chaymanqa askhan jamuqku onqosqakuna, ñausakuna, wist’ukuna ima. Paykunan piensaqku unu aytirikushaqtin chay estanqueman jaykuspa qhaliyapunankuta.

Chaypin Jesusqa sábado p’unchaypi 38 wataña onqoshaq runata rikuran. Paytan Jesusqa niran: “¿Munawaqchu qhaliyapuyta?”, nispa. Jinan chay runaqa niran: “Wiraqocha, manan pipas yanapaqniy kanchu unu aytirikuqtin estanqueman jaykunaypaq, jaykunay kashaqtinmi juj ñaupayruwan”, nispa (Juan 5:6, 7).

Chaymi Jesusqa niran: “Sayariy, camillaykita oqarispa puririy”, nispa (Juan 5:8). Jinan chay runaqa kaq rato qhaliyapuran, camillanta oqorispataq puririran. Jesuspa chay ruwasqanqa ancha admirakunapaqmi karan.

Judiokunataq chay runata rikuspa niranku: “Kunanqa sábado p’unchaymá riki, manan allinchu camillaykita apasqaykiqa”, nispa. Jinan payqa niran: “Kikin qhaliyachiwaqniymi: ‘Camillaykita oqarispa puririy’, nispa nimuwan”, nispa (Juan 5:10, 11). Chay judiokunaqa juchapaqmi qhawariranku chay runa sábado p’unchaypi qhaliyachisqa kasqanta.

Chaymi judiokunaqa chay runata tapuranku: “¿Pitaq nirasunki: ‘Chayta oqarispa puririy’, nispari?”, nispa. Chay runaqa manan yacharanchu pichus qhaliyachiran chayta, ‘Jesusqa ñan runa-runa ukhumanña jaykurapusqa’ (Juan 5:12, 13). Chay qhepatan ichaqa Jesuswan templopi tuparan, chhaynapin yacharan pichus qhaliyachiran chayta.

Chaymi chay runaqa judiokunaman willaran qhaliyachiqninqa Jesús kasqanta. Chayta yachaspan chay judiokunaqa Jesusta juchacharanku sábado p’unchaypi chay runata qhaliyachisqanmanta, chaymantapachan paytaqa cheqniyta qallariranku. Rikusqanchis jina, chay runakunaqa manan Jesusta tapurillarankupaschu imaraykus milagrokunata ruwasharan chayta.