Mañakunapunin, k’umuykukuqtaq kanapas

Juj kutinmi Jesusqa juj ejemplowan discipulonkunaman yachachiran Diosmanta mañakunapuni kasqanta (Lucas 11:5-13). Chaymantan payqa juj ejemplotawan willaran chayta allinta entiendechinanpaq, chaytaqa Samariapi otaq Galileapi kashaspan willanman karan.

Khaynatan niran: “Juj llaqtapin karan juj juez, payqa manan Diosta manchakuqchu, nitaq runakunatapas respetaqchu. Chay llaqtapin kallarantaq juj viuda, paymi rillaqpuni chay juezman: ‘Ama jinachu kay, justiciata ruwapuway contraypi kaqmanta’, nispa; chay jueztaq mana kasuqchu. Chaymantan ichaqa sonqollanpi niran: ‘Manaña Diosta manchakunichu, ni pi runatapas respetanichu chaypas, jinatapas kay viudapaq justiciata ruwapusaq, chhaynapi amaña sapa rato jamuwashananpaq, mana chayqa jamushallanqan rogakuyninkunawan sayk’uchiwaqniy’”, nispa (Lucas 18:2-5).

Jinaspan Jesusqa niran: “¿Repararankichischu chay mana chanin juezpa imachus nisqanta? Chhaynaqa, ¿manachu Diosqa tuta-p’unchay wajakuqnin ajllasqankunapaq justiciata ruwapunqa?”, nispa (Lucas 18:6, 7).

Chhaynaqa juj mana chanin juezpas uyarikurantaq askha kutita juj viuda mañakuqtin chayqa, astawanraqchá riki Jehová Diosqa sumaq sonqo chanin kasqanrayku mañakuqninkunata uyarinqa. Chaytan Jesusqa chay ejemplowan yachachisharan. Chaymi payqa niran: “[Diosqa] mana suyachikuspan justiciata ruwapusunkichis”, nispa (Lucas 18:8).

Jehová Diosqa manan runakuna jinachu qhapaqkunallapaq justiciata ruwanqa, aswanmi payqa sapanka runapaq imachus ruwasqanman jina ruwanqa. Mana chanin runakunatan castiganqa, serviqninkunamantaq wiñay kausayta qonqa.

Chay ejemplowanmi Jesusqa yachachisharan Diosmanta mana sayk’uspa mañakuna kasqanta, chay viuda jina iñiywan mañakuna kasqantawan. Chaymantataq niran: “Runaq Churin chayamuspa, ¿tarinqachu chhayna iñiyta kay pachapi?”, nispa (Lucas 18:8). Chaywanmi rikuchisharan paypa kutimunanpaqqa pisilla chhayna iñiyniyoqkuna kananta.

Jesusta uyariq wakin runakunan ichaqa paykuna kikinkuta allin runapaq qhawarikuqku, jujkunatapas pisichaqkun, chaymi Jesusqa juj ejemplota churaran:

“Iskay runakunan temploman wicharanku Diosmanta mañakuq, jujninmi karan fariseo jujnintaq impuesto cobraq. Fariseon sayaykuspa sonqollanpi khaynata mañakuran: ‘Diosníy, graciastan qoyki, manan wakin runakuna jinachu kani suwa, mana chanin, jujwan pantaq, manallataqmi kay impuesto cobraq runa jinapaschu kani. Noqaqa iskay kutitan semanapi ayunani, tukuy adquirisqaymantan diezmotapas qoni’”, nispa (Lucas 18:10-12).

Fariseokunaqa Dios sonqo runakuna jina qhawachikunankupaqmi imaymanata ruwaqku. Lunesninpi martesninpi iman costumbrenkuman jina ayunaqku, chay p’unchaykuna mercado plazaman askha runakuna jamusqankurayku. Mijuna sumaqyachiq qorachakunamantapas mana faltaytan diezmota qoqku (Lucas 11:42). Ichaqa mana valeqpaq jinan común runakunataqa qhawariqku mana paykuna jinachu kamachikuy simita entiendesqankurayku, chaymi iskay kinsa killa ñaupaqllata niranku: ‘Chay runakunaqa ñakasqan kanku’, nispa (Juan 7:49).

Chaymantan Jesusqa ejemplo churasqanta khaynata tukuparan: “Impuesto cobraqtaq ichaqa karullapi sayaykuspa mana munaranchu cielota qhawariyllatapas, aswanpas sonqonta takakuspan niran: ‘Diosníy, khuyapayaykuway noqa juchasapa runata’, nispa. Niykichismi: Chay runan wasinman uraykapuran fariseomanta aswan chaninpaq jap’isqa. Pipas jatunchakuqqa k’umuchisqan kanqa, pipas k’umuykukuqtaq jatunchasqa kanqa”, nispa (Lucas 18:13, 14).

Chhaynatan Jesusqa yachachiran k’umuykukuqpuni kana kasqanta. Chay nisqanqa llapan discipulonkunapaqpas ancha allinpunin karan, fariseokunaq yachachiynin chay tiempopi ancha mast’arisqa kasqanrayku. Noqanchispas allintan jap’ikunanchis Jesuspa chay yachachisqantaqa.