Apostolkuna munanku uma kayta

Perea ladonta urayman rispan Jesusqa discipulonkunapiwan Jordán mayuta chimparanku Jericó llaqta qayllanta. Askhan paywanqa risharanku Jerusalén llaqtapi 33 watapi Pascua fiestaman.

Jesusqa discipulonkunaq ñaupantan purisharan tiempollanpi Pascua fiestaman chayayta munaspa. Discipulonkunan ichaqa manchasqa kasharanku imachus chaypi pasananmanta. Ñaupaq kutipi Jesús paykunata “jaku, Judeata kutisun” niqtinmi Tomasqa niran: “Jaku noqanchispas paywan kuska wañumunanchispaq”, nispa (Juan 11:16, 47-53). Chaymi manchasqa kasharanku.

Chaymi Jesusqa apostolninkunata preparananpaq niran: “Jerusalén llaqtamanmi wichashanchis, chaypin runaq Churinqa umalli sacerdotekunaman, kamachikuy simi yachachiqkunamanwan entregasqa kanqa. Paykunan wañunanpaq juchachanqaku, jinaspa waj nacionmanta runakunaman entreganqaku burlakunankupaq, soq’aykunankupaq, k’aspipi warkunankupaq ima; kinsa p’unchaymantan ichaqa kausarichisqa kanqa”, nispa (Mateo 20:18, 19).

Chaywanqa kinsa kutitañan Jesusqa willakusharan wañuchisqa kananmanta, kausarimpunanmantawan (Mateo 16:21; 17:22, 23). Ichaqa chayraqmi willasharan k’aspipi warkusqa kananta. Discipulonkunan ichaqa mana entienderankuchu Jesuspa willakusqanta. Paykunaqa Jesús Israel llaqtapi rey kanantan piensashankuman karan, chaymi munasharanku paypa ladonpi allin puestoman churasqa kayta.

Chaytan apóstol Santiagowan wayqen Juanwanpas munasharanku. Paykunatan Jesusqa “rayo t’ojaypa wawankuna” nispa suticharan tukuy sonqo imatapas ruwaq kasqankurayku (Marcos 3:17; Lucas 9:54). Paykunaq mamitan Salomepas yacharanmi uma kayta munasqankuta, chaymi Jesusman achhuykuspa ñaupanpi k’umuykuran. Jinan Jesusqa tapuran: “¿Imatan munanki?”, nispa. Paytaq niran: “Valekuykin kay iskay wawaykuna gobiernoykipi qanwan kuska tiyanankupaq, jujnin paña ladoykipi jujnintaq lloq’e ladoykipi”, nispa (Mateo 20:20, 21).

Salomeqa chay wawankunaq tanqasqanmi chaytaqa niran, chaymi Jesusqa Santiagota Juantawan niran: “Qankunaqa manan yachankichischu imatachus mañakushankichis chayta. ¿Atiwaqchischu ujanayña kashan chay copa ujayta?”, nispa. Paykunataq niranku: “Atisaqkun”, nispa (Mateo 20:22). Chaywanpas paykunaqa manan allintachu entiendenkuman karan imas chay copa ujay karan chayta.

Jinan Jesusqa niran: “Ujankichismi copaytaqa, paña ladoypi lloq’e ladoypi pipas tiyananmi ichaqa mana noqaq ninaychu, aswanpas Yayaymi ajllanqa pikunachus chaypi tiyanqa chaytaqa”, nispa (Mateo 20:23).

Chaykuna pasasqanta yacharuspan wakin apostolkunaqa phiñakuranku. Yaqapaschá juj kutipi paykuna ukhupi pichus uma kanankumanta discutisqankupipas Santiagowan Juanwan astawan atipakuranku (Lucas 9:46-48). Imaynaña kaqtinpas, allin puestota mañakusqankuwanmi rikuchisharanku llapa apostolkunapas uma kaytapuni munasqankuta. Llapankun mana kasukurankuchu k’umuykukuq kaymanta Jesuspa yachachisqanta.

Chaymi Jesusqa llapankuta wajaspa sumaqllata niran: “Yachasqaykichis jina, nacionkunapi kamachikuq jina kaqkunaqa kamachisqan runakunatan dueñochakunku, umalli kaqkunapas jujkunatan sarunchanku. Qankuna ukhupin ichaqa mana chhaynachu kanan, aswanmi pipas qankuna ukhupi kuraq kayta munaqqa serviqniykichis kanan, mayqenniykichispas ñaupaqpi kayta munaqtaq llapaykichispa kamachin kanan”, nispa (Marcos 10:42-44).

Jinaspan paykunata kallpacharan pay jina kanankupaq. Niranmi: “Runaq Churinpas manan servichikuqchu jamuran, aswanpas jujkunata servinanpaqmi, vidanwan pagaspa askha runakunata kacharichinanpaqwan”, nispa (Mateo 20:28). Jesusqa kinsa wata jinañan jujkunata servisharan, lliu runakunaraykutaqmi wañunanpas karan. Chaymi discipulonkunaqa servichikunankumantaqa jujkunata servinanku karan, uma kayta munanankumantapas jujkuna serviytan maskhananku karan.