Judas Jesusta jap’ichin

Kuska tuta pasaytañan Judasqa askha umalli sacerdotekunata fariseokunatawan pusarisharan Jesusta maskhanankupaq. Paykunan Judasman prometeranku 30 qolqeta qonankupaq. Paykunawanmi askha soldadokunapas risharanku juj capitanpa umallisqan.

Pascua mijunamanta Judasta Jesús lloqsichiqtinqa, usqhayllachá Judasqa umalli sacerdotekunaman riran (Juan 13:27). Chaypichá paykunaqa guardiankunata soldadokunatawan juñuranku. Chaymantaqa última cena ruwakusqan wasimanchá Judasqa ñaupaqta pusaran. Chaymantañan Cedrón wayq’ota chimpankuman karan Getsemaní huertaman chayanankupaq. Paykunaqa armakunantin, k’anchaykunantin, mecherokunantin iman risharanku.

Olivos orqoman chay runakunata pusashaspaqa Judasqa segurochá kasharan maypichus Jesusta tarinanmanta. Chay p’unchaykuna Jerusalenman rispa chaymanta kutimuspapas Jesuswan apostolkunawanqa Getsemaní huertapipunin samaqku, chaymi Judasqa chayman pusasharan runakunata. Ichaqa tutataq kasharan chayqa manan facilchu karan Jesusta reqsiy, wakin soldadokunapas manapaschá jayk’aqpas Jesustaqa rikurankuchu. Chaymi Judasqa Jesusta reqsinankupaq niran: “Pitachus much’aykusaq chaymi, payta jap’ispan ama kacharispa apankichis”, nispa (Marcos 14:44).

Chay huertaman chayaspan Judasqa Jesusta wakin apostolkunatawan rikuran. Jinaspataq Jesusman achhuykuspa niran: “Yachachikuq, napaykuykin”, nispa; jinamantaq much’aykuran. Jinan Jesusqa payta niran: “Amigo, ¿imata munaspan kaypi kashanki?”, nispa (Mateo 26:49, 50). Jinaspa nillarantaq: “Judas, ¿juj much’awanchu runaq Churinta jap’ichinki?”, nispa (Lucas 22:48). Chaymantaqa manañan Judasmanqa imatapas niranñachu.

Jinaspataq Jesusqa runakunaman achhuykuspa niran: “¿Pitan maskhashankichis?”, nispa. Jinan paykunaqa niranku: “Nazaret llaqtayoq Jesustan”, nispa. Jesustaq niran: “Noqan kani”, nispa (Juan 18:4, 5). Paykunataq mana ima ruwayta atispa kumpakapuranku.

Jinan Jesusqa ayqekunanmantaqa wajmanta paykunata tapuran: “¿Pitan maskhashankichis?”, nispa. Paykunataq niranku: “Nazaret llaqtayoq Jesustan”, nispa. Jinan Jesusqa nillarantaq: “‘Noqan kani’ niykichisñatáq, chhaynaqa noqatataq maskhawashankichis chayqa, jinalla kay runakunaqa ripuchunku”, nispa. Chhayna sasapiña tarikushaspapas Jesusqa junt’aq apostolninkuna ripunankupaqmi mañakusharan, chhaynapi mana mayqenpas chinkananpaq (Juan 6:39; 17:12). Judasllan ‘chinkachisqaqa kanan karan’ (Juan 18:7-9).

Soldadokuna Jesusman achhuykuqtinkutaq apostolkunaqa repararanku imachus pasanan karan chayta, chaymi Jesusta niranku: “Señor, ¿k’irirusaqkuchu espadawan?”, nispa (Lucas 22:49). Manaraq imatapas Jesús nishaqtintaq Pedroqa apostolkunaq jap’isqanku iskay espadamanta jujninta orqospa uma sacerdoteq kamachin Malco sutiyoq runaman phawaykuran, jinaspa ninrinta qhororuran.

Jinan Jesusqa Malcoq ninrinta llamiykuspa qhaliyachiran. Jinaspa Pedrota niran: “Espadaykita waqaychay churananman, pipas espadata jujpa contranpi oqariqqa espadallawantaqmi wañuchisqa kanqa”, nispa. Jesusqa manan ayqekuyta munaranchu, chaymi niran: ‘¿Imaynapin junt’akunman chhayna kananmanta Diospa simin qelqapi willakusqan? Yayaq qowasqan copataqa, ¿manachu ujanay?’, nispa (Mateo 26:52, 54; Juan 18:11). Payqa wañunankaman Diospa munayninta ruwanan karan.

Chaymantataq Jesusqa runakunata niran: “¿Suwata jina jap’iwanaykichispaqchu espadakunantin k’aspikunantin jamurankichis? Sapa p’unchaymá riki templopi yachachispa tiyasharani, ¿imaraykutaq manari jap’iwarankichischu? Ichaqa profetakunaq qelqasqan junt’akunanpaqmi llapa kaykunaqa kashan”, nispa (Mateo 26:55, 56).

Jinan soldadokuna, capitán runa, guardiakunapas Jesusta jap’ispa wataranku. Chayta rikuspan apostolkunaqa ayqekapuranku. Juj ‘waynan’ ichaqa chay runakunaq kasqanpi qhepakuran, payqa Jesuspa discipulon Marcosmi kanman karan (Marcos 14:51). Paytapas jap’iyta munaqtinkun payqa lino p’achanta saqerparispa ukhu p’achallantin ayqekuran.