Waranqanpi runakunaman Jesús mijuchin

Jinantin Galileapi predicasqankumantan 12 apostolkunaqa kusisqa kutimuspa Jesusman willaranku “tukuy ima ruwamusqankumanta yachachimusqankumantawan”. Ichaqa sayk’usqan kasharanku, manan mijunallankupaqpas tiemponku karanchu sapa rato runakuna jamusqankurayku. Chaymi Jesusqa paykunata niran: “Jaku ch’in ladoman chaypi juj chikanta samarimunaykichispaq”, nispa (Marcos 6:30, 31).

Paykunaqa Capernaum ladopin kashankuman karan. Jinan botepi chimparanku Betsaida ladoman. Runakunataq chayta yacharuspa qocha patanta phawaspa ñaupaqtaraq chayaruranku.

Paykunata rikuspan Jesusqa anchata khuyapayaran mana michiqniyoq ovejakuna jina kasqankurayku, chaymi Diospa gobiernonmanta ‘yachachiyta qallariran’, “onqosqakunatapas qhaliyachiran” (Marcos 6:34; Lucas 9:11). Tardeña kaqtintaq discipulonkunaqa Jesusta niranku: ‘Kayneqqa ch’inmi. Kachapullayña kay runakunata, chhaynapi ayllukunaman rispa mijunata rantikunankupaq’, nispa (Mateo 14:15).

Jinan Jesusqa paykunata niran: “Qankuna imallatapas mijuchiychis”, nispa (Mateo 14:16). Payqa yacharanña imatachus ruwananta chaypas, “ima nillanqas” nispan Felipeta tapuran: “¿Maymantan t’antata rantimusunman kay runakunaman mijuchinapaq?”, nispa. Felipeqa chay Betsaida ladomantan karan, chaywanpas payqa mana atikuqpaqmi Jesuspa nisqanta qhawariran. Chaypiqa 5.000 jina qharikunan kasharanku, warmikunawan wawakunawan imaqa 10.000 masraqchá karanku. Chaychá Felipeqa niran: “Iskay pachaj denario qolqewanña t’antata rantikunman chaypas, manan aypanmanchu”, nispa (Juan 6:5-7). Juj denario qolqeqa karan juj p’unchay llank’asqamanta pagon.

Andrespas niranmi: “Kaypin juj erqecha jap’ishan pisqa cebada t’antata, iskay challwachakunatawan. Ichaqa, ¿aypanmanchu kaychalla khaytukuy runakunapaq?”, nispa (Juan 6:9).

32 watapi Pascua fiestapaq cercañataq kasharan chayqa, q’omermi campokunaqa kasharan. Chaymi Jesusqa discipulonkunata niran llapan runakuna pachaj pachajmanta, pisqa chunka pisqa chunkamanta ima pasto patapi tiyaykunankupaq. Chaymantan Jesusqa chay pisqa t’antata iskay challwatawan jap’ispa Diosman graciasta qoran, jinaspa discipulonkunaman jaywaran runakunaman rakimunankupaq, jinan llapanku sajsanankukama mijuranku.

Chaymantan Jesusqa discipulonkunata niran: “Puchuq phasmikunata llapanta juñumuychis ama imapas usunanpaq”, nispa (Juan 6:12). Jinan 12 canasta junt’ata juñuranku.