Nicodemo tutallapi Jesusta visitan

30 watapi Pascua fiestapaq Jerusalenpi kasqan p’unchaykunapin Jesusqa askha milagrokunata ruwaran. Chaymi askha runakuna paypi iñipuranku. Nicodemo sutiyoq fariseopas anchatan admirakuran Jesuspa ruwasqankunawan, payqa jatun juntamanta jujninmi karan. Paymi astawan yachayta munaspa tutallapi Jesusman riran. Yaqapaschá payqa tutallapi riran juj judío umallikunata manchakusqanrayku.

Chay kutipin Nicodemoqa Jesusta niran: “Yachachikuq, yachaykun qanqa Diospa kachamusqan yachachiq kasqaykita; ruwasqayki señalkunataqa manan pipas ruwayta atinmanchu manachus Dios paywan kashanman chayqa”, nispa. Jinan Jesusqa niran: ‘Pipas Diospa gobiernonman jaykunanpaqqa wajmantan nacenan’, nispa (Juan 3:2, 3).

Nicodemotaq niran: “¿Imaynapitaq runari machuña kashaspa wajmanta nacenman? ¿Atinmanchu mamanpa wijsanman kutiykuyta, chhaynapi wajmanta nacenanpaq?”, nispa (Juan 3:4).

Jesusmi ichaqa mana chaymantachu rimasharan, chaymi Nicodemota niran: “Pipas Diospa gobiernonman jaykunanpaqqa unumanta espiritumantawanmi nacenan”, nispa (Juan 3:5). Jesuspas “unumanta espiritumantawanmi” naceran Diospa espiritun payman uraykamuqtin. Chay kutipin cielomanta juj kunka nimuran: “Kaymi Churiyqa, paytan munakuni, payqa sonqoypaq jinan”, nispa (Mateo 3:16, 17). Chaywanmi Diosqa rikuchisharan Jesusqa qhepaman juj espíritu kapuspa janaq pacha gobiernoman jaykunanta. 33 watapi Pentecostés fiestapin juj runakunapas santo espirituta chaskiranku, chhaynapin paykunapas wajmanta naceranku (Hechos 2:1-4).

Nicodemoqa manan entiendesharanchu Jesuspa yachachisqanta. Chaymi Jesusqa imapaqchus kay pachaman jamuran chayta entiendechinanpaq niran: “Imaynan Moisespas ch’inneqpi kashaspa mach’aqwayta warkuran, chhaynallataqmi runaq Churinpas warkusqa kanqa, chhaynapi pipas paypi creeqqa wiñay kausayniyoq kananpaq”, nispa (Juan 3:14, 15).

Arí, imaynan Moisespa tiemponpi mach’aqwaypa kanisqan Israel runakunaqa cobremanta ruwasqa mach’aqwayta qhawananku karan, chhaynallataqmi Jesuspa tiemponpi runakunapas Diospa Churinpi iñinanku karan, chhaynapi wiñay kausayniyoq kanankupaq (Números 21:9). Chaymantan Jesusqa may munakuqchus Dios kasqanta entiendechinanpaq Nicodemota niran: “Diosqa anchatapunin runakunata munakuran, chaymi sapallan Churinta kachamuran, pipas paypi iñiqqa ama wañunanpaq aswanpas wiñay kausayniyoq kananpaq”, nispa (Juan 3:16). Chaywanmi Jesusqa predicasqanmanta soqta killa jinaña kashaqtin rikuchishallarantaq payllapuni runakunata salvaq kasqanta.

Chaymi Nicodemota nillarantaq: “Diosqa Churinta kay pachaman kachamuran manan runakunata [wañuyman] juchachananpaqchu, aswanpas kay pacha runakuna paywan salvasqa kanankupaqmi”, nispa (Juan 3:17).

Jesusqa imayna kausasqanwan yachachisqanwan iman k’anchay jina karan, chaymi tutallapi visitaqnin Nicodemota niran: “K’anchaymi kay pachaman jamuran, runakunan ichaqa k’anchayta munakunankumantaqa tutayaqta munakunku ima ruwasqankupas mana allinpuni kasqanrayku, chayraykun paykunaqa juchachasqa kanku. Pipas mana allin kaqkunata ruwaqqa cheqnikunmi k’anchayta, manataqmi k’anchaymanpas jamunchu, chhaynapi mana allin ruwasqankuna mana sut’iman orqosqa kananpaq. Allin kaqkunata ruwaqmi ichaqa k’anchayman jamun, chhaynapi ima ruwasqankunapas Diospa munayninman jina kasqanta sut’ita reparakunanpaq”, nispa (Juan 3:19-21). Chhaynapin Jesusqa Nicodemowan rimayta tukuran.

Rikusqanchis jina, Jesusqa allintan willaran imapaqchus Dios payta kachamuran chayta. Chhaynaqa Nicodemomantañan karan chaykunapi allinta piensananpaqqa.