¿Iñinkuchu Jesuspi Jehová Diospa testigonkuna?

Antonio: Imaynalla kashanki Luis, kusikunin yapamanta tupasqanchiswan.

Luis: Ñoqapas kusisqan kashani qanwan tupaspa.

Antonio: Chayllaraq lloqsimuq Qhawaq, ¡Rikch’ariy! revistakunatan apamushayki. Sumaq temakunan kashan leenaykipaq.

Luis: Anchatan agradecekuyki. Ichaqa manaraq ripushaqtiykin tapukuyta munasharqayki.

Antonio: ¿Imamantachá?

Luis: Qayninpakunallan huk llank’aqmasiyman willasharqani apamuwasqayki revistakuna ancha allinpuni kasqanta. Hinan niwarqan: “Aman chay revistakunataqa leenkichu, Testigokunaqa manan Jesuspi iñinkuchu”, nispa. Chaymi nirqani: “Revistakuna apamuwaqniyta tapusaq”, nispa. ¿Cheqaqtachu Jesuspi mana iñinkichis?

Antonio: Allinmi chay tapukusqayki. Pimantapas yachayta munaspaqa aswan allinmi pay kikinta tapukuy, riki.

Luis: Arí, cheqaqmi chayqa.

Antonio: Testigokunaqa iñiykun Jesuspi. Ñoqaykuqa salvaqniykuta hinan paytaqa qhawariyku.

Luis: Chaytan ñoqapas sonqoypi yuyaykusharqani. Llank’aqmasiy huk hinata niwasqaraykullan tapukuyta munasharqayki. Hinaspapas manan hayk’aqpas chaymantaqa rimarqanchischu.

Antonio: Arí, manan rimarqanchischu. Ñoqaykuqa predicasqaykupin runakunaman Bibliapi textokunata rikuchiyku Jesuspi iñiy ancha importante kasqanmanta. ¿Manachu kunan chay textokunata qhawasunman?

Luis: Riki, allinmi kanman.

Antonio: Ñawpaqta leesun Juan 14:6 textota. Chaypin Jesús qatikuqninkunata nirqan: “Ñoqan kani ñanpas, cheqaq-kaypas, kawsaypas. Pipas ñoqallantapunin Yayamanqa chayanqa”, nispa. Chaypi nisqan hina, ¿imaynatan Yayaman chayasunman?

Luis: Jesuspa yanapayninwanmi.

Antonio: Arí. Chaypin Testigokunapas iñiyku. Bibliamanta yachasqaykiman hina, ¿piqpa sutinpitaq mañakunanchis?

Luis: Jesuspa sutinpiyá, riki.

Antonio: Arí, chaymi ñoqapas Jesuspa sutinpipuni mañakuni. Chaytan llapa Testigokunapas ruwayku.

Luis: Allinmi chay ruwasqaykichisqa.

Antonio: Arí. Kunanqa Juan 3:16 textotañataq qhawarisun. Chaypin pisillapi willashan Jesuspa kawsayninmanta predicasqanmantawan, chaytan sutichanku “huch’uy evangelio” nispa. ¿Leewaqchu?

Luis: Riki, nishanmi: “Diosqa anchatapunin runakunata munakurqan, chaymi sapan Churinta kachamurqan, pipas paypi iñiqqa ama wañunanpaq, aswanpas wiñay kawsayniyoq kananpaq”.

Antonio: Gracias Luis. ¿Hayk’aqllapas chay textota leerqankichu?

Luis: Manan, ichaqa iglesiaypi leeqtinkun uyarirqani.

Antonio: Yaqa llapa runakunan chaypi nisqanta yachanku. Chaypi Jesús nisqan hina, Diosqa munanmi wiñaypaq kawsananchista. Ichaqa, ¿imatan chaypaq ruwananchis?

Luis: Iñiyniyoqmi kananchis.

Antonio: Arí, chaypiqa Diospa phiwi Churin Jesuspi iñinanchismantan rimashan. Hinaspapas Qhawaq revistapin willashan Jesuspi iñispalla wiñay kawsayniyoq kananchista. 2 paginapin willashan Diospa Gobiernonpi kamachikuq Jesuspi iñinanchispaq chay revista lloqsimusqanta. Paymi ñoqanchisrayku wañurqan wiñay kawsayta chaskinanchispaq.

Luis: Mmm... ¡revistaykichispipunimá willashasqa Jesuspi iñisqaykichismanta!

Antonio: Arí.

Luis: Chhaynaqa, ¿imaraykutaq runakuna huknirayta qankunamanta rimanku?

Antonio: Wakinqa hukkunaq rimasqantapaschá uyarikunku otaq religionninkupi pastorkuna chaykunata nimunku.

Luis: Yaqapaschá kanman “Jehová Diospa testigon” kasqaykichismanta, manataq “Jesuspa testigon” kasqaykichismantachu.

Antonio: Arí, chaypas kanmanmi.

Luis: ¿Imaraykutaq qankunari Jehová sutimanta astawan rimankichis?

Antonio: Jehová suti, Diospa sutin kasqanrayku. Chaymi paymanta rimaspa mañakuspapas sutintapuni hoqarinanchis. Chaytan Jesuspas ruwarqan. Chaypaq qhawarisun Jesuspuni qatikuqninkunata imayna mañakunankupaq yachachisqanta. ¿Leewaqchu Mateo 6:9 textota?

Luis: Riki, nishanmi: “Qankunaqa kay hinata mañakuychis: Yayayku hanaq pachapi kaq, sutiyki yupaychasqa kachun”, nispa.

Antonio: Gracias leesqaykimanta. Chaypin Jesús qatikuqninkunata kallpacharqan Diospa sutin hatunchasqa kananpaq mañakunankuta. ¿Imaraykutaq chayta ruwanankupaq kallpacharqan?

Luis: Mmm... imaraykuchá.

Antonio: Chayta yachanapaq leesun Hechos 2:21 textota. Chaypi nishan: ‘Pipas Señor [Diospa] sutinpi waqyakuqqa qespichisqan kanqa’, nispa. Chaypi nisqan hina, salvasqa kanapaqqa Diospa sutintan hoqarinanchis. ¿Yachanmanchu karqan chayta Jesús?

Luis: Yacharqanyá riki.

Antonio: Arí, chaymi payqa munarqan qatikuqninkuna Yayanpa sutinta reqsinankuta, sutinmanta waqyakunankutapas, chayta ruwaspallan salvakunanku karqan. Chaymi Testigokunapas Diospa sutinmanta rimashallaykupuni, munaykutaqmi runakuna Diospa sutinta reqsinankutapas.

Luis: Runakunaqa reqsinkun Diosta, manaña sutinta yachankuchu nitaq sutinmantachu waqyakunku chaypas.

Antonio: Wakinqa yachankupaschá, ichaqa Dios kikinmi sutinta yachachiwarqanchis payman astawan asuykunanchista munaspa.

Luis: ¿Imaynataq chayri?

Antonio: Chaypaq kaypi yuyaykusun. Yaqa llapa runakunan yachanchis huk runa Puka Qochata kicharisqanta, Diosmanta chunka kamachikuykuna chaskisqantapas. Huk runa familianta animalkunatapas salvananpaq arca ruwasqanta. Chaymantapas yachanchismi salvawananchispaq huk runa hanaq pachamanta hamusqanta. ¿Yanapawasunmanchu imallapipas paykunaq sutinta yachay?

Luis: Manayá.

Antonio: Chaywanpas Diosmi munarqan Moisespa, Noepa, Jesuspa sutinpas qelqasqa kananta. Sutinkuta yachasqanchismi yanapawanchis cheqaqpuni kawsasqankuta yachanapaq.

Luis: Arí, cheqaqmi chayqa, manan hayk’aqpas chaypi yuyaykusqanichu.

Antonio: Testigokunapas munaykun llapa runakuna Diosta reqsispa paypi confianankuta, amigonkuta hina rikunankutapas. Ichaqa yachaykun Jesuspa yanapaynillanwan salvacionman aypay atisqaykuta. ¿Qhawarisunmanchu huk textotawan?

Luis: Riki.

Antonio: Juan 14:6 texto leesqanchispin Jesús nirqan: “Ñoqan kani ñanpas, cheqaq-kaypas, kawsaypas”, nispa. Kunanqa Juan 14:1 textota leesun. ¿Leeykuwaqchu tukuyninta?

Luis: Chaypi nishan: “Diospi iñiychis, ñoqapipas iñillaychistaq”, nispa.

Antonio: Chaypi nisqan hina, ¿akllakusunmanchu Jesuspi otaq Jehová Diospi iñinanchista?

Luis: Manan akllakusunmanchu, Jesusqa nirqanmi iskayninkupi iñinapaq.

Antonio: Arí. Ichaqa, ¿simillawanchu ninanchis iñisqanchista icha kawsayninchispichu rikuchinanchis?

Luis: Kawsayninchispiyá rikuchinanchis.

Antonio: Arí. Ichaqa, ¿imaynatan chayta ruwasunman? ¿Manachu chaymanta huk kutipi parlarisunman?a

Luis: Riki, allinmi kanman.