Diosta agradecekusun llut’aqninchis kasqanmanta

 1. ¿Imaraykun mana pipas Dios jina llut’aq kanchu?

CHINA nacionpi ruwasqa ancha munay p’uyñutan 2010 wata noviembre killapi 70 millón dolarman Inglaterra nacionpi venderanku. ¡May admirakunapaqmi t’urullamanta ruwasqa p’uyñu chhayna valesqanqa! Jehová Diospas llut’aq runakuna jinan, ichaqa manan pipas pay jinaqa kanchu. Biblian nin: ‘Ñut’u allpamantan Señor Diosqa runata ruwaran’, nispa (Gén. 2:7). Adanqa ‘Diospa wawanmi’ kapuran, Diosman rijch’akuq kananpaqtaqmi kamasqa karan (Luc. 3:38, Traducción del Nuevo Mundo [NM]).

2, 3. ¿Imaynatan juchankumanta kutirikuq Israel runakunata qatikusunman?

² Juchallikusqan qhepamanmi Adanqa manaña Diospa wawanchu kapuran. Chaywanpas Adanpa mirayninmanta wakin runakunan Jehová Diosta kamachiqninkuta jina qhawariranku (Heb. 12:1). Paykunaqa Satanasta qhepanchaspan Diosta tukuy sonqowan kasukuranku. Chaypin rikuchiranku Diosllata taytankuta, llut’aqninkuta jina qhawarisqankuta (Juan 8:44). Juchankumanta kutirikuq Israel runakunapas Diostan niranku: “Diosnillayku, qanmi taytaykuqa kanki. Noqaykuqa t’urullan kayku, qantaq llut’aqniyku kanki, llapallaykutan ruwawarankiku”, nispa (Is. 64:8).

³ Kay tiempopi Diospa llaqtanpas sapa p’unchaymi kallpachakun kasukuq k’umuykukuq kananpaq. Anchatan kusikunku Diosta “Taytay” nisqankumanta, llut’aqninkuta jinataqmi qhawarinku. Qanri, ¿munankichu Jehová Dios sumaq p’uyñuta jina llut’anasuykita? ¿Llamp’u t’uru jinachu kashanki? ¿Diospa llut’ashasqan p’uyñuta jinachu iñiqmasikunata qhawarinki? Chaykunamantan kay estudiopi yachasun. Ichaqa ñaupaqtan kay tapuykunata kutichisun: ¿Imaynatan Jehová Dios ajllan llut’anan runakunata? ¿Imaraykun llut’awanchis? ¿Imaynatan llut’awanchis?

 4. ¿Imaynatan Dios ajllan llut’anan runakunata? Juj ejemplota willay.

⁴ Payta serviq runakunata ajllaspaqa manan noqanchis jina jawallantachu qhawan. Diosqa sonqonkutan qhawan, chaypin yachan imayna kasqankuta (leey 1 Samuel 16:7). Chaytan ruwaran ñaupa tiempopi cristiana iñiq t’aqata jatarichishaspa. Diosqa mana allinpaq qhawarisqa runakunatan ajllaran churinta qatikunankupaq (Juan 6:44). Jujninmi karan judío religionpi umalliq Saulo runa. Payqa sinchi jatunchakuq, millay runan karan, sinchitataqmi cheqnikuran cristianokunata (1 Tim. 1:13). Chaywanpas Diosqa sonqontan qhawariran, jinan repararan llamp’u t’uru jina kasqanta (Prov. 17:3). Chaymi ‘servinanpaq ajllakuran’, paymi Diosmanta willanan karan “waj suyu runakunaman, reykunaman, Israel runakunamanpas” (Hech. 9:15). Chaymantapas juj runakunatan ajllakuran “sumaq waqaychana mankata” jina llut’ananpaq. Chay runakunaqa machaq, suwa, qhelli juchapi puriqkunan karanku. Ichaqa Diosmanta yachasqanku qhepamanmi paypi iñipuranku, chaymi Diosqa llamp’u t’uruta jina paykunata llut’aran (Rom. 9:21; 1 Cor. 6:9-11).

5, 6. a) ¿Imaynatan qhawarinanchis predicasqanchis runakunata? b) ¿Imaynatan qhawarinanchis iñiqmasinchiskunata?

⁵ Jehová Diosqa manan jayk’aqpas pantanmanchu payta serviq runakunata ajllaspaqa. Chaymi manapuni predicasqanchis runakunata juzganachu. Michael runamanta yachasun. Paymi nin: “Jehová Diospa testigonkuna visitamuwaqtinkun sapa kutilla punkuyta wisq’aruq kani, mana allintan trataq kani. Juj kutinmi juj familiawan reqsinakurani, paykunaqa sumaqtan kausaranku. Chay qhepamanmi yacharurani Testigo kasqankuta. ¡Anchatan admirakurani! Paykunata qhawarispan chayraq repararani jujkunaq rimasqan yanqa kasqanta, yanqamanta paykuna contra jatarisqaytapas”, nispa. Chay qhepamanmi payqa Testigokunamanta astawan yachayta munaspa Biblia estudiayta qallariran. Kunanqa bautizasqañan kashan tukuy tiemponwantaq Diosta servishan.

⁶ Jehová Diosta llut’aqninchista jina qhawarisun chayqa, manan mayqen iñiqmasitapas juzgasunchu. Aswanmi Diospa llut’ashasqan p’uyñuta jina qhawarisun. Diosqa chhaynatan llapanchistapas qhawariwanchis. Payqa sonqonchistan qhawan, yachanmi aswan sumaq runaman tukupuy atisqanchista, qhepaman ch’uya runa kapunanchistapas (Sal. 130:3). ¿Imaynatan Diosta qatikusunman? Pantaq runakunaña kanku chaypas, llapa iñiqmasikunatan sumaqta qhawarinanchis. Jinaspapas yanapananchismi cambianankupaq, chayta ruwaspan Diosta yanapasun sumaqta llut’ashanallanpaq (1 Tes. 5:14, 15). Umallikunan astawanqa ejemplonkuwan iñiqmasikunata yanapankuman (Efes. 4:11-13).

 7. ¿Imaraykun Diospa wanachiyninta chaskikunanchis?

⁷ Wakin runakunaqa wawayoq kapuspañan ninku: “Allillantan tayta-mamayqa wanachiwaran”, nispa. Arí, kuraq kapuspañan reparanchis tayta-mamanchisqa munakuwasqanchisrayku wanachiwasqanchista (leey Hebreos 12:5, 6, 11). Diosninchispas wawankunata jinan rikuwanchis. Payqa munakuwasqanchisraykun wanachiwanchis, sumaq p’uyñu jina kananchispaqtaqmi pacienciawan llut’awanchis. Payqa munan kusisqa kausananchista, imatapas allinta decidikunanchista, Taytanchista jina rikunanchistapas (Prov. 23:15). Payqa manan munanchu ñak’arinanchista, phiñakuynin p’unchaypi wañunanchistapas (Efes. 2:2, 3).

8, 9. a) ¿Imaynatan Dios yachachiwashanchis? b) ¿Imaynatan jamuq tiempopi yachachiwasun?

⁸ Manaraq Jehová Diosta reqsishaspaqa manan sonqonpaq jinachu kausaranchis. Ichaqa paypa yanapayninwanmi kunanqa mosoq runaman tukupushanchis (Is. 11:6-8; Col. 3:9, 10). Jinaspapas espiritual paraisopin kashanchis. Chaypin Jehová Dios yachachiwashanchis, munay p’uyñu jina kananchispaqtaq llut’awashanchis. Chaypiqa manan imamantapas manchakunchischu millay runakuna ukhupiña tiyashanchis chaypas. Wakinqa mana munakuq familiayoqña karanchis chaypas, kunanqa munakuq familiayoqmi kapunchis (Juan 13:35). Llapanchismi kallpachakunchis munakuq kananchispaq, jinaspapas cheqaq Diostan reqsinchis, paypa amigontaqmi kanchis (Sant. 4:8).

⁹ Jamuq tiempopiqa astawanmi Diospa yanapayninta chaskisun. Jinaspapas Diospa gobiernonmi kay allpata sumaq paraisoman tukuchinqa. Chaypin Diosninchis astawanraq yachachiwasun, ancha munay p’uyñu jina kananchispaqtaq llut’awasunchis (Is. 11:9). Chay tiempopiqa yuyayninchispas cuerponchispas ch’uyan kapunqa. Facil-llatan imatapas yachasun, manañan sasachu kanqa Diosta kasukuypas. Chaypaqmi ichaqa kunanmantapacha llut’achikunanchis, chaypin rikuchisun agradecido kasqanchista (Prov. 3:11, 12).

10. ¿Imaynapin yachanchis Taytan jina Jesuspas sumaq sonqo allin llut’aq kasqanta?

¹⁰ Allin llut’aqqa allintan reqsin llut’anan t’uruta. Jehová Diospas allintan reqsiwanchis, payqa yachanmi imapi pantasqanchista, imakuna ruway atisqanchista, imakunapi allinyasqanchistapas (leey Salmo 103:10-14). Chayta allinta entiendenapaq qhawarisun imaynatan Jesús apostolninkunata yanaparan pantaqtinku chayta. Paykunaqa sapa kutillanmi jap’inakuranku mayqenninkuchus aswan importante kasqankumanta. Chaypi kaspa, ¿ima niwaqmi karan paykunamanta? Yaqapaschá niwaq karan: “Jayk’aqtaq cambianqakuri, ch’aki t’uru jinamá kay runakunaqa kanku”, nispa. Jesusqa manan chhaynatachu qhawariran, aswanmi pacienciawan yanaparan cambianankupaq. Payqa sumaq sonqowanmi aconsejaran, ejemplonwantaqmi yanaparan k’umuykukuq kanankupaq (Mar. 9:33-37; 10:37, 41-45; Luc. 22:24-27). Jesuspa kausarimpusqan qhepamanmi Diospa santo espiritunta chaskiranku. Chaymantapachan manaña importante runapaqchu qhawarikuranku. Aswanmi Diospa kamachisqan llank’anata makilla junt’aranku (Hech. 5:42).

11. a) ¿Imaynapin yachanchis David llamp’u t’uru jina kasqanta? b) ¿Imatan noqanchispas ruwananchis llamp’u t’uru jina kanapaq?

¹¹ Kunanpas Jehová Diosqa Bibliawan, santo espiritunwan, llaqtanwan iman llut’awashanchis. ¿Imatan ruwananchis Bibliawan llut’asqa kananchispaq? Chaypaqqa sapa p’unchaymi leenanchis, yachasqanchispi yuyaymanananchis, Diosmantataq mañakunanchis kasukuq sonqota qowananchispaq. Rey Davidmi niran: “Puñuykuspaymi yuyariyki, tutakunapin yuyaymanayki”, nispa (Sal. 63:6). Juj kutipin nillarantaq: “Yuyaychawaqniy Señor Diostan saminchasaq, sonqoymi tutakunapipas yachachiwan”, nispa (Sal. 16:7). Davidqa llamp’u t’uru jinan karan, chaymi Diospa yuyaychasqanta uyarikuran. Mayninpi sasaña karan chaypas, Diospa nisqanman jinapunin ruwaran (2 Sam. 12:1-13). Noqanchisri, ¿David jinachu kanchis? ¿Yuyaymananchischu Bibliata leespa? ¿Chaypi yachasqanchisman jinachu imatapas ruwanchis? (Sal. 1:2, 3.)

12, 13. ¿Imaynatan Jehová Dios santo espiritunwan llaqtanwanpas llut’awanchis?

¹² ¿Imaynatan Diospa santo espiritun llut’awanchis? Jesusman rijch’akunapaq yanapawaspanchis, noqanchispi sumaq kaykunata wiñachispa ima (Gal. 5:22, 23). Jujninmi munakuq kay. Sichus Diosta munakusun chayqa, tukuy kamachikusqantan kasukusun, munasuntaqmi sumaq p’uyñu jina kananchispaq llut’awananchista. Chaymantapas yanapawasunmi kay millay pachapi ruwaykunamanta karunchakunanchispaq (Efes. 2:2). Apóstol Pablota yuyarisun. Payqa wayna kasqanmantapachan religionninpi jatunchakuq runakunawan samaykachikuran. Ichaqa Diospa santo espiritunmi yanaparan cambiapunanpaq. Paymi niran: “Tukuy imapaqmi kallpa qowaqniyqa kallpata qowan”, nispa (Filip. 4:13, NM). Noqanchispas Pablo jinan Diospa santo espiritunta mañakunanchis (Sal. 10:17).

¹³ ¿Imaynatan Jehová Dios llut’awallanchistaq? Llaqtanwan umallikunawan ima yanapachiwaspanchis. Umallikunaqa imapipas pantasqanchista rikuspaqa, manan jinallatachu qhawawanchis nitaq piensasqankuman jinachu aconsejawanchis (Gál. 6:1). Ñaupaqtaqa Diosmantan yachayta mañakunku, chaymantataq Bibliata qelqanchiskunatawan t’aqwirinku. Chhaynaqa, sichus juj umalli sumaq sonqowan anyasunki imayna p’achakusqaykimanta chayqa, Diospa munakuyninta jina qhawariy. Paykunata kasukunki chayqa, Diospa makinpi llamp’u t’uru jinan kanki. ¡Chayqa allinniykipaqmi kanqa!

14. ¿Obligawanchischu Jehová Dios cambiananchispaq?

¹⁴ Jehová Dios imayna llut’awasqanchista entiendespaqa sumaqtan iñiqmasinchiskunawan kausasun. Jinaspapas sumaqtan qhawarisun estudiantekunata predicasqanchis runakunatapas. Ñaupa tiempopi llut’aq runaqa, ñaupaqtan allpamanta rumichakunata qhellikunatawan orqoruspa t’uruta preparaq llut’ayta qallarinanpaq. Jehová Diospas chhaynatan noqanchiswan ruwan. Ichaqa manan pitapas obliganchu cambiananpaq. Aswanmi kamachikuyninkunata llapa runaman yachachiwanchis, munaqkunataq chay kamachikuyninta kasukuspa kausayninkuta cambiapunku.

15, 16. ¿Imaynatan estudiantekuna rikuchinkuman Diospa llut’asqan kay munasqankuta? Juj ejemplota willay.

¹⁵ Yachasun Australia nacionpi tiyaq Tessie sutiyoq iñiqmasimanta. Payqa facil-llatan entienderan Bibliapi yachachikuykunata, ichaqa manan kausayninta cambiaqchu nitaq juñunakuykunaman riqchu. Chayta qhawarispan yachachiqnin hermana Diosmanta mañakuspa decidikuran saqepunanpaq. Ichaqa ultimollataña estudiachiq riqtinmi Tessie niran: “Qolqepaq pujllaymi anchata gustawan, Diospaqqa iskay uyachá kashani. Ichaqa decidikuniñan chay viciota saqepunaypaq”, nispa.

¹⁶ Chay qhepamanmi juñunakuykunaman riyta qallariran, mana allin ruwaykunatapas saqepuran. Amigonkunan burlakuqku paymanta, ichaqa manan kasuqchu. Qhepamanmi bautizakapuran, jinan juch’uy wawakunayoqña karan chaypas, precursora regular kapuran. ¿Imatan kay experiencia yachachiwanchis? Sichus mayqen estudiantepas mana allin ruwayninkunata saqepunqa chayqa, Diosmi payta chaskinqa jinan sumaq p’uyñu jina kananpaq llut’anqa.

17. a) ¿Ima ninkin Jehová Dios llut’aqninchis kasqanmanta? b) ¿Imakunamantan qatimuq estudiopi yachasun?

¹⁷ Kunanpas wakinqa ruwashankuraqmi makillankuwan t’urumanta ancha munay p’uyñukunata, vasokunata, jujkunatapas. Diosninchispas pacienciawanmi llut’awashanchis, chaypaqmi Bibliapi consejokunata qowanchis, makillataqmi qhawawashanchis consejonkunata imayna chaskikusqanchista (leey Salmo 32:8). ¿Reparashanchischu Diosninchis sapankanchispi interesakusqanta? ¿Reparashanchischu allillamanta llut’awasqanchista? ¿Iman yanapawasun llamp’u t’uru jina kananchispaq? ¿Imakunan mana llut’ay atina ch’aki t’uruman jina tukuchiwasunman? ¿Imaynatan tayta-mamakuna wawankuta sumaqta llut’ankuman? Chaykunamantan qatimuq estudiopi yachasun.