Jesús milagrokunata ruwan

Jesusqa Diospa gobiernonmanta willananpaqmi jamurqan. Diosmi ichaqa santo espiritunta qorqan milagrokunata ruwananpaq, chaywanmi yachakurqan rey kaspa imakuna ruwananta. Jesusqa atirqanmi ima onqoymantapas runakunata qhaliyachiyta, chaymi onqosqakunaqa payman jamurqanku, jinan llapankuta qhaliyachirqan. Chaymi ñausakuna qhawaripurqanku, roqt’ukuna uyaripurqanku, mana kuyuriqkuna puriripurqanku, wakinmantataq supaykunata qarqorqan. P’achanpa puntallanta llamiykuspapas qhaliyapurqankun. Askhan qatikurqanku, mayninpi sapallanña kayta munarqan chaypas, manan jark’akurqanchu runakunaq jamunantaqa.

Juj kutinmi mana kuyuriq runata Jesuspa kasqanman apamurqanku, ichaqa junt’an runakunaqa wasipi kasharqanku. Chaymi wasiq techonta t’oqoruspanku chayninta Jesuspa kasqanman uraykachirqanku. Chaymi Jesusqa chay runata nirqan: “Puririy”, nispa. Puririsqanta rikuspataq anchata admirakurqanku.

Juj kutipitaq Jesús juj llaqtaman rishaqtin, lepra onqoyniyoq chunka runakuna karullamanta Jesusta valekurqanku: “Jesús, yanapaykuwayku”, nispa. Chay tiempopiqa lepra onqoyniyoq runakunaqa manan runakunaman qayllaykunankuchu karqan. Jinaspapas Diospa leyninpi nirqan pipas lepra onqoymanta qhaliyaspaqa templota rinan kasqanta, chaymi Jesusqa nirqan templota rinankupaq. Ñanta rishaqtinkun qhaliyapurqanku. Jinan chunkantinmanta jujnillan kutirimurqan Jesusta agradecekunanpaq, Diosman graciasta qonanpaqpas.

Juj warmin 12 wataña sinchita onqorqan, payqa qhaliyayta munaspan Jesuspa kasqanman rirqan. Runakunan Jesusta muyuykusharqanku chaymi payqa Jesuspa p’achanpa puntallanta llamiykurqan, jinan kaqpacha qhaliyapurqan. Jesustaq nirqan: “¿Pin llamiykamuwan?”, nispa. Warmiqa sinchitan mancharikurqan, chaywanpas Jesusmanmi willakurqan imachus ruwasqanta. Jinan Jesusqa warmita kallpachaykurqan: “Ususíy, thajpi ripuy”, nispa.

Jairon Jesusta valekurqan: “Jaku wasiyta, ususichaymi sinchi onqosqa kashan”, nispa. Ichaqa manaraq wasinman chayashaqtinkun sipaschaqa wañupurqan. Jesusqa rikurqanmi askha runakuna waqashasqanta. Chaymi nirqan: “Ama waqaychischu, sipaschaqa puñushallanmi”, nispa. Jinan sipaschata makinmanta jap’ispa nirqan: “¡Sayariy!”, nispa. Jinan sipaschaqa sayarirqanpacha, Jesustaq tayta-mamanta kamachirqan mijunata qonankupaq. ¡Tayta-mamanqa anchatachá kusikurqanku!