¿Jatun escudo jinachu iñiyninchis kashan?

1, 2. a) Efesios 6:16 textopi nisqan jina, ¿imaraykun ‘iñiyninchis jatun escudo jina’ kanan? b) ¿Ima tapuykunamantan yachasun?

¿JATUN escudo jinachu iñiyninchis kashan? (Leey Efesios 6:16.) Chhaynapunin kashanan. Imaynan jatun escudoqa yaqa llapa cuerpota protegen chay jinallataqmi iñiyninchispas cuidawanchis qhelli kausaymanta, maqanakuykunamanta, Diospa cheqnisqan juj millay ruwaykunamantapas.

² ‘Tukukuy p’unchaykunapin’ kausashanchis, chaymi imaymana sasachakuykunapi tarikusun, chaypaqmi allin iñiyniyoq kananchis (2 Tim. 3:1). Chhaynaqa, ¿imaynatan yachasunman iñiyninchis escudo jina allin kashasqanta? ¿Imatan ruwasunman allin iñiyniyoq kananchispaq? Chay tapuykunamantan kaypi yachasun.

 3. ¿Imaynatan soldadokuna escudonkuta cuidaqku? ¿Imaraykun chayta ruwaqku?

³ Ñaupa tiempopi escudokunaqa qarawan forrasqan karan. Chaymi soldadokunaqa escudonkuq qaranta grasawan llusiqku ama thantakunanpaq, fierro partenkunatapas grasawanmi llusiqku ama oxidakunanpaq. Ima partenpas malograsqa kaqtintaq usqhaylla allichaqku, chhaynapin listo kasharan guerrapaq. ¿Imatan chaymanta yachanchis?

 4. a) ¿Imaraykun iñiyninchista allinta qhawarikunanchis? b) ¿Imaynatan chayta ruwananchis?

⁴ Ñaupa tiempopi soldadokuna jinan iñiyninchista sapa kuti qhawarinanchis imayna kashasqanta, allintataq cuidananchis. Manan pipas rantinchispi chaytaqa ruwanmanchu. Chhaynapin listo kasun maqanakunanchispaq, cristianokunaqa supaykunawanmi guerrapi kashanchis (Efes. 6:10-12). Chhaynaqa, ¿imaynatan yachasunman sasachakuykunata aguantanapaq allin iñiyniyoqchus kashanchis icha manachus chayta? Chaypaqqa Diospa yanapaynintan ñaupaqta mañakunanchis. Chaymantataq Bibliata leenanchis Diospaq jinachu kausashanchis icha manachus chayta reparakunanchispaq (Heb. 4:12). Biblian nin: “Tukuy sonqoykiwan Señor Diosman jap’ipakuy, amataq qan kikiykiq yuyayniykimanqa k’askakuychu”, nispa (Prov. 3:5, 6). Chaypi nisqanta kasukurankichus manachus chayta yachanaykipaq tapukuy, ¿imatan ruwarani qolqey mana aypawaqtin? ¿Yuyariranichu Hebreos 13:5 textopi “manan jayk’aqpas saqesaykichu, manan jayk’aqpas qonqasaykichu” nisqa promesata? ¿Confiaranichu Jehová Dios yanapawananpi? Chayta ruwaranki chayqa allin iñiyniyoqmi kashanki.

 5. ¿Imatan reparasunman iñiyninchista allinta qhawarikuspa?

⁵ Iñiyninchis imayna kasqanta allinta qhawarispaqa reparasunpaschá imakunapi allinyananchis kasqanta. ¿Imaynapin iñiyninchispi pisipasunman? Sinchi llakikuykunapi tarikuspa, noqanchismanta llullakuspa rimaqtinku otaq pisi kallpayaqtinchis. Chhaynapi tarikuspa, ¿imatan ruwasunman iñiyninchispi ama pisipananchispaq?

 6. ¿Imakunamanta llakikuymi allin kanman?

⁶ Maytan munanchis Jehová Diospa sonqonta Jesuspa sonqonta kusichiyta (1 Cor. 7:32). Jatun juchata ruwasqanchis qhepamanpas maytan munanchis Jehová Dioswan jujmanta allinpi kayta (Sal. 38:18). Casarasqakunapas munankun esposankuta kusichiyta, llapanchistaq llakikunchis familianchiskuna iñiqmasinchiskunapas allin kanankumanta (1 Cor. 7:33; 2 Cor. 11:28).

 7. a) ¿Imaynatan sinchi llakikuykuna iñiyninchista pisiyachinman? b) Proverbios 29:25 textopi nisqan jina, ¿imaraykun runakunata mana manchapakunanchischu?

⁷ ¿Imakunamanta sinchita llakikuspan iñiyninchispi pisipasunman? Yaqapaschá sinchita llakikusunman imawan p’achakunanchismanta imata mijunanchismantapas (Mat. 6:31, 32). Jinaspa tukuy tiempo llank’ayta qallarisunman imaymanayoq kananchispaq, chhaynapitaq qolqe sonqoman tukupusunman. Pisi-pisimantataq iñiyninchispi pisipaspa Diosmanta karunchakapusunman (Mar. 4:19; 1 Tim. 6:10). Chaymantapas sinchita llakikusunman jujkuna imayna qhawariwananchismanta. Jinaspa Diosta manchakunanchismantaqa masta manchakusunman runakunaq burlakusqankuta otaq qatiykachasqa kayta. ¿Imatan ruwasunman chay trampaman ama urmananchispaq? Jehová Diostan rogakunanchis allin iñiyniyoq kanapaq mana manchakuq kanapaqpas (leey Proverbios 29:25; Luc. 17:5).

 8. ¿Imatan ruwananchis pipas Jehová Diosmanta hermanonchiskunamantawan llulla yachachikuykunata rimaqtinku?

⁸ Satanasqa “llullakunaq taytanmi”, chaymi runankunawan llulla yachachikuykunata Jehová Diosmanta hermanonchiskunamantawan willachimun (Juan 8:44). Diospa llaqtanmanta t’aqakuq runakunan internetpi, televisionpi, radiopipas Diospa llaqtan contra llullakuspa rimamunku. Chay llulla yachachikuykunaqa ‘Satanaspa raurashaq flechankuna’ jinan kanku (Efes. 6:16). ¿Imatan ruwananchis pipas llulla yachachikuymanta rimapayawaqtinchis? Manan uyarinanchischu. ¿Imarayku? Jehová Diospi hermanonchiskunapi confiasqanchisrayku. Chaymi manapuni chay runakunawanqa ch’aqwananchischu nitaq yachaq tumpallapas paykunawan parlananchischu.

 9. ¿Iman pasawasunman sinchita pisi kallpayaqtinchis?

⁹ Pisi kallpayaypas iñiyninchistan pisiyachinman. Mayninpiqa sasachakuykunapi tarikuspan pisi kallpayasunman. Sasachakuyninchismantaqa manan ayqenanchischu. Ichaqa manan allinchu kanman chayllapiña piensayqa, chayta ruwaspaqa Jehová Diospa sumaq promesankunatan qonqapusunman (Apo. 21:3, 4). Sinchita llakikuspaqa manañan Jehová Diosta serviyta munasunmanñachu (Prov. 24:10). Ichaqa kallpachakunanchismi ama chay pasawananchispaq.

10. ¿Imatan hermananchispa qelqasqanmanta yachanchis?

¹⁰ Estados Unidospi tiyaq hermanamanta yachasun, payqa sinchi onqosqa qosantan cuidan, chaywanpas imaymanatan ruwan iñiyninpi ama pisipananpaq. Paymi sucursalman juj cartata qelqaran, niranmi: “Mayninpin sasachakuyniyku sinchita llakichiwanku pisi kallpayachiwankupas, ichaqa Diospa promesankunapi piensaymi yanapawanku. Anchatan Jehová Diosta agradecekuyku iñiyniykupi ama pisipanaykupaq imaymana qowasqankumanta. Chaykunan yanapawanku Diosta servishanallaykupaq Satanaspa trampankunata aguantanaykupaqpas”, nispa. Noqanchispas chay hermana jinan ima sasachakuytapas atipayta atisunman. Chaypaqqa manan qonqananchischu sasachakuykunaqa Satanaspa trampankuna kasqanta, Jehová Dios consolayta atiwasqanchistapas. Anchatataq valorananchis Diospa qowasqanchis qelqakunata videokunata jujkunatapas.

11. Iñiyninchis allinchus kashan icha manachus chayta yachanapaq, ¿ima tapuykunatan ruwakunanchis?

¹¹ ¿Imaynan iñiyninchis kashan? Kay killakuna pasayta, ¿imatan ruwarani ama sinchita llakikunaypaq? ¿Kallpachakuranichu Diosmanta t’aqakuq runakunaq llulla yachachikuyninkunata ama uyarinaypaq paykunawan ama ch’aqwanaypaqpas? ¿Kallpachakuranichu ama pisikallpayanaypaq? Chaykunata ruwaranchis chayqa iñiyninchisqa escudo jinan allin cuidasqa kashan. Chaywanpas makillan kashananchis, ¿imarayku? Satanasqa juj trampakunawanñataqmi urmachiyta munawasun, jujninmanta yachasun.

12. ¿Iman pasawasunman imaymanayoq kayta ima jinaraq munaqtinchis?

¹² Sichus imaymanayoq kayta ima jinaraq munashanchis chayqa, iñiyninchispin pisipasunman, jinaspa Diosta pisillataña servisunman. Apóstol Pablo niran: “Manan pipas soldado kashaspaqa negocio ruwaykunaman jaykunmanchu, mana chayqa soldado kananpaq wajaqninchá mana allinpaq qhawarinman”, nispa (2 Tim. 2:4). Roma llaqtapi soldadokunaqa jark’asqan karanku ima negociotapas ruwanankupaq. ¿Imaraykun jark’aranku?

13. ¿Imaraykun soldadokuna mana atirankuchu negocioyoq kayta?

¹³ Kaypi piensasun. Tutamantanmi soldadokuna espadankuwan practicashanku guerraman rinankupaq. Tardentataq qhawarinku escudonku allichanapaqchus kashan icha manachus chayta, espadankutataq allinta afilanku. Jujnin soldadon ichaqa llaqtaman rispa restauranteta kichan. Jinaspa mijunata wayk’un vendenanpaq. Paqaristintaq enemigokunaqa qonqaylla llaqtaman phawaykamunku ch’usaqyachinankupaq. ¿Mayqen soldadon allin preparasqa kashan chay guerrapi maqanakunanpaq? ¿Mayqen soldadon comandantenta kusichinqa? ¿Mayqen soldadoq ladonpin kayta munawaq? Allin preparasqa soldadowanmi riki.

14. ¿Iman aswan importante Cristoq soldadonkunapaq?

¹⁴ Noqanchispas chay allin soldadokuna jinan kanchis, chaymi comandantenchis Jehová Diosta Jesustawan kusichiyta munanchis. Chay ruwaymi noqanchispaqqa aswan importante ima ruwaymantapas. Chaymi iñiyninchista escudota jina allinta cuidananchis, jinallataq Diospa qowasqanchis llapa armaduratapas. Chaymantapas manan tiemponchista kallpanchistapas usuchinanchischu juj ruwaykunapi.

15. ¿Imamanta cuidakunanchispaqmi apóstol Pablo niran? ¿Imaraykun chayta niran?

¹⁵ Apóstol Pabloq nisqan jina ‘qhapaq kaytapuni munaq runakunaqa’ ‘iñiymantan t’aqakapunku’, chaymi cuidakunanchis (1 Tim. 6:9, 10). ¿Imaynapin iñiymanta t’aqakapusunman? Yaqapaschá mana necesitasqanchis cosaskunata rantispa. Jinaspa ‘imaymana nanaykunawan’ tarikusunman. Satanasqa yachanmi chaykunata munapayaqtinchis iñiyninchispi pisipananchista.

16. Marcos 10:17-22 textopi nisqan jina, ¿imakunatan tapukunanchis?

¹⁶ Yaqapaschá askha qolqeyoq kanchis imaymanata rantinanchispaq. ¿Juchachu kanman imaymanata rantikuy? Manan. Ichaqa askha qolqeyoqña kanchis chaypas, kaykunatan tapukunanchis: “¿Necesitanipunichu chaykunata? ¿Tiempoypas kallpaypas kanqachu rantisqaykunata usanaypaq cuidanaypaqpas? ¿Wañuniraqchu cosasniykunamanta? ¿Jesuspa invitasqan qhapaq wayna jinachu kaqniykunarayku pisita Diosta servishani?”, nispa (Leey Marcos 10:17-22.) Jehová Diosta servinanchispaqmi tiemponchista kallpanchista qonanchis, chaypaqmi ichaqa kapuqnillanchiswan kusisqa kananchis.

17. ¿Imatan mana qonqananchischu?

¹⁷ Sapa p’unchaymi guerrapi jina tarikushanchis, chaymi soldadokuna jina allin preparasqa kashananchis, chaytan mana qonqananchischu (Apo. 12:17). Hermanonchiskunaqa manan rantinchispi iñiyninchista cuidanqakuchu, aswanpas noqanchismi cuidananchis.

18. ¿Imaraykun ñaupa tiempopi soldadokuna escudonkuta allinta jap’inanku karan?

¹⁸ Ñaupa tiempopi soldadokunaqa allin qhawarisqan karanku mana manchakuspa guerraman riqtinku. Ichaqa p’enqaymi karan guerramanta mana escudoyoq kutimpuyqa. Roma llaqtamanta Tácito runapas niranmi: “Mayqen soldadopas escudonta saqerpariqqa p’enqaypaq qhawarisqa karan”, nispa. Chaymi soldadokunaqa escudonkuta allinta jap’inanku karan.

19. ¿Imatan ruwananchis ‘iñiyninchista jatun escudota jina jap’inanchispaq’?

¹⁹ Allin iñiyniyoq kananchispaqqa juñunakuykunamanmi mana faltayta rinanchis, Jehová Diospa sutinmanta gobiernonmantawan runakunaman willananchis (Heb. 10:23-25). Chaymantapas sapa p’unchay Bibliata leenanchis, Jehová Diosmantataq yanapayninta mañakunanchis munasqanman jina kausananchispaq (2 Tim. 3:16, 17). Chhaynapin Satanaspa armankunaqa mana dañota ruwawasunchu (Is. 54:17). Iñiyninchistaq jatun escudo jina pakaykuwasun. Yanapawasuntaq hermanonchiskunawan kuska Jehová Diosta servishanallapaq. Allin iñiyniyoq kasun chayqa sapa p’unchaymi sasachakuyninchista atipasun, jinaspa kusikusun Satanasta supayninkunatawan Jesús chinkachipuqtin (Apo. 17:14; 20:10).