Diospa churasqan michiqkunata kasukusun

1, 2. ¿Imatan Jehová Dios rikuchiwanchis huk michiqwan tupanachikuspa?

JEHOVÁ DIOSMI huk michiqwan tupanachikun (Ezeq. 34:11-14). Chaywanmi sut’ita rikuchiwanchis imayna Dios kasqanta. Munakuywan michiqqa allintan ovejankunata cuidan. Payqa llullu q’achumanmi apan hinallataq ukyanapaq unuq kasqanman (Sal. 23:1, 2). Tutapas p’unchaypas qhawashallanmi ovejankunata (Luc. 2:8). Millay animalkunamantan amachaykun (1 Sam. 17:34, 35). Chayllaraq wachasqakunatan marq’ayninpi apan (Is. 40:11). Chinkasqakunatan maskhan, k’irisqakunatataq sumaqllata hampiykun (Ezeq. 34:16).

² Ñawpa tiempopi Israel runakunaqa chakra llank’aq, uywa michiqmi karqanku, chaymi allinta yacharqanku ovejakunata chhaynatapuni cuidana kasqanta. Runakunapas ovejakuna hinan necesitanchis iñiyninchispi hukkuna yanapawananchista (Mar. 6:34). Iñiyninkupi mana allin yanapaykusqa runakunaqa, ch’eqechisqa ‘mana michiqniyoq ovejakuna’ hinan ñak’ariykunapi rikukunku, qonqayllataqmi ima huchamanpas urmaykunku (1 Rey. 22:17). Jehová Diosmi ichaqa munakuywan ovejakunata michiq hina tukuy ima necesitasqankuta ovejankunaman qon.

 3. ¿Imakunamantan kay estudiopi yachasun?

³ Kunanpas rikushanchismi Jehová Diosqa allin michiq kasqanta. Payqa llapa kamachinkunatan yanapawashanchis. Ichaqa, ¿imaynatan pusariwashanchis, tukuy necesitasqanchistapas qowashanchis? ¿Imaynatan ñoqanchispas Diospa yanapaykuna qowasqanchista chaskikunanchis? Chaykunamantan kunan yachasun.

 4. ¿Imaynatan Jesús cuidan Taytanpa ovejankunata?

⁴ Jehová Diosqa Jesustan iñiq t’aqapi Uma kananpaq churarqan (Efes. 1:22, 23). Jesusqa ‘allin michiqmi’, Taytan hinataqmi kanpas. Payqa allintan ovejakunata cuidan munakunmi llapankutapas, chaymi ‘ovejakunarayku wañuytapas mana manchakurqanchu’ (Juan 10:11, 14, 15). ¡Runakunarayku kawsayninta qosqanqa ancha hatun regalon! (Mat. 20:28.) Jehová Diospunin munan Jesuspi ‘iñiqqa ama wañunanta, aswanpas wiñay kawsayniyoq kananta’ (Juan 3:16).

5, 6. a) ¿Pikunatan Jesús churan ovejankuna michiqta? b) ¿Imatan ruwananchis Jesuspa churasqan umallikunaq yanapayninta chaskikunapaq? c) ¿Imaraykun umallikunata kasukunanchis?

⁵ ¿Imaynatan rikuchisunman Jesucristoq ovejankuna kasqanchista? Jesusmi nirqan: “Ovejaykunaqa kunkaytan uyarinku, ñoqapas paykunataqa reqsinin, qhepaytataq purinkupas”, nispa (Juan 10:27). Arí, Jesuspa nisqanman hina kawsaspa, umallikunata kasukuspa iman rikuchinchis ovejankuna kasqanchista. Jesusmi willarqanña kay Hallp’api llank’ay qallarisqanta apostolkuna qatikuqninkuna ima aparinankuta. Paykunan ‘ovejankunata’ yachachispa cuidananku karqan (Mat. 28:20; leey Juan 21:15-17). Allin willakuykuna astawan mast’arikusqanman hinan aswan askha runakuna Jesuspi iñirqanku. Chaymi Jesusqa iñiyninpi allin poqosqa cristianokunata churarqan iñiq t’aqakunata michinankupaq (Efes. 4:11, 12).

⁶ Apóstol Pablon Éfeso llaqtapi umallikunata nirqan ‘Diospa iglesianta michinankupaq’ Diospa santo espiritun churasqanta (Hech. 20:28). Kunanpas llapa umallikunan santo espirituq churasqan kanku. ¿Imaraykun chayta ninchis? Umalli kayta munaqkunaqa Bibliaq nisqantan ñawpaqta hunt’ananku, chayraqmi umalli kanku. Chaymi paykunata kasukusqanchispi rikuchinchis allin michiq Jehová Diosta Jesucristotapas respetasqanchista (Luc. 10:16). Chayta yachasqanchismi kallpachawananchis umallikunata tukuy sonqomanta kasukunanchispaq.

 7. ¿Imaynatan umallikuna yanapasunki Dioswan allinpi kanaykipaq?

⁷ Umallikunaqa Bibliawanpunin iñiqmasikunata kallpachanku yuyaychanku ima. Chaytaqa ruwanku manan kawsayninkupi kamachikuyta munaspachu (2 Cor. 1:24). Paykunaqa munanku Bibliaq nisqanman hina imatapas allinta decidinanchistan, iñiq t’aqapi tukuy imapas chaninninpi ruwakunanpaq, thak kawsay kananpaqwan (1 Cor. 14:33, 40). Arí, umallikunaqa ‘michiwashallanchispunin’ (otaq ‘mana puñuspa almanchista qhawashanku’, Qheshwa Biblia). Chaytaqa ruwanku Jehová Dioswan allinpi kananchista munaspan. Chaymi pitapas “ima huchapipas” urmaykunanpaq hina kashaqtin otaq urmaykuqta rikuspaqa usqhaylla yanapanku (Gál. 6:1, 2; Jud. 22). Chayta yachasqanchispas kallpachawanchismi ‘umallikunata uyarikunanchispaq’ (leey Hebreos 13:17).

 8. ¿Imaynatan umallikuna Diospa ovejankunata pakaykunku?

⁸ Apóstol Pablopas munakuywan michiqmi karqan, chaymi Colosas llaqtapi iñiqkunata nirqan: “Makilla cuidakuychis, paqtan pipas q’otusunkichisman yanqa mana valeq yuyaykunawan, llulla yachachikuykunawan ima, paykunaqa manan Cristoq yachachisqantachu yachachinku, aswanpas runakunaq yachachikuynillantan kay pachata kamachiq espiritukunaq yachaynintawan yachachinku”, nispa (Col. 2:8). Chayta ruwasqanmi kallpachawallanchistaq umallikunata kasukunapaq. Paykunaqa ima peligropas kasqanta willawaspanchismi pakaykuwanchis. Pedropas iñiqmasikunamanmi willarqan “llulla profetakuna”, “llulla yachachiqkuna” hatarimunanta. Paykunan ‘iñiypi mana takyasqa runakunaq sonqonta suwananku’ karqan (2 Ped. 2:1, 14). Kunanpas umallikunaqa iñiqmasikunatan cuidanku chay hina peligrokunaman urmaykunankumanta. Paykunaqa iñiyninkupi allin poqosqa, experienciayoq cristianokunan kanku. Manaraq umalli kashaspan allintaña Bibliapi yachachikuykunata entiendeqku, cheqaq yachachiyta yachachinankupaq hinataqmi karqanku (1 Tim. 3:2; Tito 1:9). Arí, iñiyninkupi allin poqosqa kasqanku, allin yuyaywan imatapas ruwayta yachasqankun umallikunata yanapan iñiqmasikunata allinta michinankupaq.

 9. ¿Imaynatan Jesús ovejankunata mikhuchin pakaykun ima?

⁹ Jehová Diosqa askha espiritual mikhunatan llapa cristianokunaman qowanchis. Chay qelqanchiskunapin Bibliamanta horqosqa askha yuyaychaykuna kashan. Mayninpiqa umallikunapaqmi yachachikuykuna chayamun cartakunapi otaq iñiq t’aqakunata watukuq umalli apamun. Tukuy chaykunapin Diospa ovejankuna allin yanapaykunata chaskinku.

10. ¿Imatan umallikuna ruwananku pipas iñiq t’aqamanta karunchakapuqtin?

¹⁰ Umallikunaqa iñiq t’aqapi llapa ovejakunatan allinta cuidananku. Astawanqa iñiyninkupi pisiyapuq iñiqmasikunata hinallataq hatun huchaman urmaykuqkunata (leey Santiago 5:14, 15). Wakin ovejachakunaqa iñiq t’aqamantan karunchakapunku manataqmi Diosta servipunkuñachu. ¿Imaynatan munakuq umalli chay ovejachakunata yanapanan? Tukuy atisqantan kallpachakunan chay ovejachakunata maskhananpaq, tariruspataq kallpachanan iñiq t’aqaman kutinpunanpaq. Jesusmi nirqan: “Hanaq pachapi kaq Yayaykichispas mana munanchu kay huch’uykunamanta huknillanpas chinkanantaqa”, nispa (Mat. 18:12-14).

11. ¿Imaraykun wakin iñiqmasikunapaq sasa kanman umallikunata kasukuy?

¹¹ Jehová Diospas Jesuspas mana pantaq michiqkunan kanku, iñiq t’aqakunata michiqkunan ichaqa pantaq runakuna kanku. Chaymi wakinpaqqa sasa kanman paykunata kasukuy. Yaqapaschá ninkuman: “¿Imaraykutaq paykunatari kasukunay, manachu paykunapas ñoqa hina pantaq runakuna kanku?”, nispa. Arí, pantaq runakunan kanku, ichaqa manan pantasqankutachu qhawashana.

12, 13. a) ¿Imakunapin pantarqanku ñawpa tiempopi Diospa llaqtanta umalliqkuna? b) ¿Imaraykun Jehová Dios llaqtanpi umallikunaq pantasqanta Bibliapi qelqachirqan?

¹² Bibliaqa sut’illantan willan ñawpa tiempopi Diospa llaqtanta umalliq runakunaq pantasqankumanta. Hukninmi karqan David. Payqa Israel llaqtapin rey karqan, chaywanpas huchamanmi urmarqan. Arí, qosayoq warmiwanmi puñurqan qhepamantaq chay warmiq qosanta sipichirqan (2 Sam. 12:7-9). Apóstol Pedropas pantarqanmi. Payqa iñiq t’aqapin allin llank’aykunata chaskirqan, chaywanpas mana allin ruwaykunamanmi urmarqan (Mat. 16:18, 19; Juan 13:38; 18:27; Gál. 2:11-14). Adán Evaq tiemponmantapachaqa manan pipas kay Hallp’api mana pantaqqa karqanchu, Jesusllan mana pantaqqa karqan.

¹³ ¿Imaraykun Jehová Dios llaqtanpi umallikunaq pantasqanta Bibliapi qelqachirqan? Chhayna pantaq runakunawan llaqtanta pusariy atisqanta rikuchinanpaqmi. Ñawpaqmantapachan Diosqa chayta ruwarqan, chaymi mana pantasqankuta qhawarispachu umallikunata pisichana otaq paykunamanta rimakushana. Jehová Diosqa munanmi paykuna respetanata kasukunatapas (leey Éxodo 16:2, 8).

14, 15. ¿Imatan yachanchis llaqtanta qespichinanpaq Diospa willachisqanmanta?

¹⁴ ¿Imaraykun ancha allinpuni umallikunata kasukuy? Chayta entiendenapaq qhawarisun Egipto llaqtapi Israel llaqtawan sucedesqanta. Jehová Diosmi Moisesta Aarontawan churarqan imatachus ruwanankuta Israel runakunaman willanankupaq. Paykunaqa chunka kaq plagapi mana wañunankupaqmi huk hatun mikhuyta ruwananku karqan. Chay qhepamanmi ñak’asqanku ovejaq yawarninwan punkunkuq k’aspinta ch’aqchunanku karqan. Chaytaqa manan angelchu paykunaman willarqan, aswanpas Moisesmi Israel llaqtapi umallikunaman willarqan, chay umallikunataq llaqtaman willarqanku (Éx. 12:1-7, 21-23, 29). Arí, Jehová Diosmi Moiseswan umallikunawan ima chay kamachikuykunata llaqtaman willachirqan. Chay hinatan kunanpas Diosqa umallikunawan ima kamachikusqantapas willachiwanchis.

¹⁵ Yaqapaschá yuyarishanchis ñawpaq tiempopi Jehová Dios llaqtanta qespichinanpaq angelninkunata otaq kamachin runakuna kachamusqanta. Paykunamanmi Dios atiyta qorqan paypa rantinpi rimanankupaq. Hinaspapas llaqtamanmi willarqanku qespichisqa kanankupaq imatachus ruwanankuta. ¡Chay hinatapunichá kunanpas Diosqa ruwanqa Armagedón chayamuqtin! Ichaqa Diospa llaqtanpi umalli kanankupaq llapa churasqa kaqkunan kayta mana qonqanankuchu: Manan hayk’aqpas atiy chaskisqankuwan umata hoqarinankuchu.

16. ¿Imatan nishan “qhepaykipi rimaqta” uyariy nispa?

¹⁶ Diospa llaqtanqa ‘ch’ulla t’aqallan kanku, huk michiqnillayoq’, chay michiqqa Jesusmi (Juan 10:16). Jesusmi qatikuqninkunata nirqan: “Ñoqaqa qankunawanmi sapa p’unchay kashani kay pachaq p’uchukanankama”, nispa (Mat. 28:20). ¿Imaynatan chay prometesqanta hunt’ashan? Payqa hanaq pachapin reyña kashan, chaymi Satanaspa kamachisqan pacha chinkachisqa kananpaq tukuy imachus sucedenanta qhawarishan. ¿Imatan ruwananchis Diospa llaqtanmanta mana karunchakunapaq pakaykusqa kanapaqpas? Biblian kutichin: “Ninriykiwanmi qhepaykipi rimaqta uyarinki: Kayninmi ñanqa, kayninta puriy, nimuqta”, nispa. “Qhepaykipi rimaqta” nispaqa nishan Jehová Dios Simin Qelqapi yachachiwasqanchistan, umallikunawan tukuy yachachiwasqanchistawan (leey Isaías 30:21; Apocalipsis 3:22).

17, 18. a) ¿Imamantan Diospa ovejankuna cuidakunanku? b) ¿Ima promesan Bibliapi tarikun? c) ¿Imamantan qatimuq estudiopi yachasun?

¹⁷ Biblian nin: “Saqraqa qaparishaq león hinaraqmi tukuyneqta purishan pillatapas oqoykunanpaq maskhaspa”, nispa (1 Ped. 5:8). Arí, yarqasqa phiña animal hinan, t’aqanmanta karunchakapuqkunata pisi kallpakunatawan makilla qhawashan qonqaylla phawaykunanpaq. Chayta yachasqanchismi kallpachawallanchistaq Diospa llaqtanmanta, “waqaychawaqninchis, michiwaqninchis” Jehová Diosmanta amapuni karunchakunanchispaq (1 Ped. 2:25). Manchay ñak’ariypi qespichisqa kaqkunamantan Biblia nin: ‘Cordero [Jesusmi] paykunataqa michinqa, kawsay unu pukyukunamantaqmi paykunataqa pusanqa, Diostaqmi paykunaq lliw weqenkutapas pichanqa’, nispa (Apo. 7:17). ¡Kayqa ancha sumaq promesan!

¹⁸ Kay estudiopin yacharqonchis Diospa llaqtanpi umallikunaq llank’asqanku ancha chaniyoq kasqanta. Ichaqa, ¿imaynatan umallikuna Jesuspa ovejachankunata michinanku? Qatimuq estudiopin chaymanta yachasun.