56 YACHACHIKUY
Juj nisqalla kausay kananpaq yanapakuy
Iñiqmasinchiskunawan kaspaqa rey David jinan kusisqa kanchis. Paymi nirqan: “¡May allinmi hermanokuna juj sonqolla kasqankuqa! ¡May sumaqmi juj nisqalla kausasqankuqa!”, nispa (Salmos 133:1). Juj nisqalla kasqanchisqa manan kikillanmantachu paqarimun, sapanka kallpachakusqanchisraykun chhayna munayta kausanchis.
1. ¿Diospa llaqtanpi imayna kasqankun astawan gustasunki?
May llaqtapi, may nacionpi iñiqmasikunataña visitawaq chaypas manapaschá entiendenkichu rimasqanku simita, ichaqa wasiykipi jinan tarikunki. ¿Imarayku? Llapanchispas kaq qelqakunallata estudiasqanchisrayku, arí, kaq qelqaq yanapaynillanwanmi Bibliata estudianchis. Chaymantapas llapanchismi kallpachakunchis jujkuna-jujkunawan munanakunanchispaq. May llaqtamantaña kaspapas llapanchismi kallpachakunchis “Jehová Diospa sutinta jatunchananchispaq”, juj nisqalla servinanchispaqpas (Sofonías 3:9).
2. ¿Imaynatan yanapakuwaq juj nisqalla kausay kananpaq?
Bibliapin nin: “Tukuy sonqowanpuni qankunaqa munanakuychis”, nispa (1 Pedro 1:22). ¿Imaynatan chayta ruwasunman? Hermanonchiskunaq allinkuna ruwasqankumanmi yuyayta churananchis, manan imapi pantasqankumanchu. Chaymantapas manan pikunawanchus allinta apanakunchis paykunallawanchu juñukunanchis, aswanmi kallpachakunanchis llapa hermanonchiskunata reqsinanchispaq. Sonqonchismantapas wijch’unanchismi cheqnikuyta, jujkunamanta mal piensaytapas (leey 1 Pedro 2:17).a
3. ¿Imatan ruwananchis juj hermanowan mana allinpi kaspa?
Kallpachakunchisña juj nisqalla kananchispaq chaypas juchasapa kasqanchisraykun mayninpiqa noqanchispura k’irinakunchis. Chaymi Bibliapi niwanchis: “Qankunapura paciencianakuychis, perdonanakuychis”, nispa. Nillantaqmi: “Imaynan Jehová Diospas tukuy sonqowan perdonarqasunkichis chhaynallatataq qankunapas ruwaychis”, nispa (leey Colosenses 3:13). Chay textoq nisqan jina noqanchisqa tukuy tiempon Jehová Dios contra juchallikunchis, paymi ichaqa perdonawanchis. Chayraykun noqanchispas listo kananchis jujkunata perdonananchispaq. Sichus juj iñiqmasinchista ima ruwasqanchiswanpas k’irisunman chayqa usqhayllan chayta allichananchis (leey Mateo 5:23, 24).b
ASTAWAN YACHASUNCHIS
Kunanqa yachasun imaynatas yanapakusunman iñiq t’aqapi thaj kausay kananpaq, juj nisqalla kananchispaq chayta.
¿Imakunatan ruwananchis jujkunawan allipunananchispaq?
4. Llapa hermanokunatan igualta qhawarinanchis
Kallpachakunchisña llapa hermanonchiskunata munakunanchispaq chaypas wakintaqa manapaschá sumaqtachu qhawarisun. Juj llaqtayoq, juj simita rimasqankuraykupaschá mana sumaqtachu chaskisun. ¿Iman yanapawasunman chayta cambianapaq? Leeychis Hechos 10:34, 35 textota, jinaspa jamuq tapuykunaman jina parlariychis:
Jehová Diosqa llapa runakunatan munakun, llapa runatan llaqtanpi chaskin. Chhaynataq chayqa, ¿imaynatan qhawarinanchis waj llaqtayoq iñiqmasinchiskunata?
¿Imaynatan tiyasqayki llaqtapi qhawarinku waj llaqtayoq runakunata? ¿Imaraykun manapuni apachikunanchischu paykunaq piensayninwan?
Leeychis 2 Corintios 6:11-13 textota, jinaspa jamuq tapuyman jina parlariychis:
¿Imatan ruwawaq llapa hermanonchiskunata astawan munakunaykipaq?
5. Liston kashananchis hermanonchiskunata perdonananchispaq
Jehová Diosqa liston kashan juchanchiskunata perdonawananchispaq. Leeychis Salmos 86:5 textota, jinaspa jamuq tapuykunaman jina parlariychis:
Chay textoq nisqan jina, ¿imayna perdonakuqmi Jehová Dios?
¿“Gracias” ninapaq jinachu Jehová Diospa chhayna kasqan icha manachu? ¿Imarayku?
¿Imakunapin mayninpi sasa kanman jujkunawan allinta apanakuy?
¿Imatan ruwasunman Jehová Dios jina kananchispaq, chhaynapi juj sonqolla kausananchispaq? Leeychis Proverbios 19:11 textota, jinaspa jamuq tapuyman jina parlariychis:
Pipas sientechisunkimanpas, k’irisunkimanpas chay, ¿imatan ruwawaq imapas allillan kananpaq?
Mayninpiqa yaqapaschá noqanchis pitapas ofiendesunman, ¿imatan ruwasunman chhaynapi tarikuspa? VIDEOTA qhawaychis, jinaspa jamuq tapuyman jina parlariychis:
¿Imatan videopi rikusqanchis hermana ruwarqan juj iñiqmasinchiswan allipunananpaq?
6. Iñiqmasinchiskunaq allinkuna ruwasqanpin ñawinchisqa kanan
Iñiqmasinchiskunata allinta reqsispaqa imaymanakunatan paykunapi reparasun. Ichaqa, ¿imatan ruwasunman allin ruwaykuna ruwasqanpi masta yuyayta churananchispaq? VIDEOTA qhawaychis, jinaspa jamuq tapuyman jina parlariychis:
¿Iman yanapawasunman hermanonchiskunaq allin ruwaykuna ruwasqankupi masta piensananchispaq?
Jehová Diosqa imayna sonqochus kanchis, ima allin ruwaykunatachus ruwanchis chaytan mastaqa qhawan. Leeychis 2 Crónicas 16:9a textota, jinaspa jamuq tapuyman jina parlariychis:
¿Imaniwaqmi Jehová Dios allin ruwaykuna ruwasqanchista masta qhawasqanmanta?
Diamante rumimanta anillopas manan allin-allin ruwasqapunichu kashan, chaywanpas anchatan valen. Chhaynan hermanokunapas, juchasapa runakunaña kanku chaypas anchatan valenku Jehová Diospaqqa.
WAKIN RUNAKUNAN NINKU: “Payyá perdonta mañakuwachun, imaraykutaq mana mañakuwashaqtinri perdonayman”, nispa.
¿Imaraykun listo kashananchis jujkunata perdonananchispaq?
IMATAN YACHAMURQANCHIS
Sichus yachasun perdonakuq kayta, llapa iñiqmasikunatataq munakusunpas chayqa, juj sonqollan Diospa llaqtanpi kausasun.
Yuyarisun
¿Iman yanapawasunman llapa hermanonchiskunata igualta munakunanchispaq?
¿Imatan ruwananchis juj iñiqmasinchiswan phiñachinakuspa?
¿Atiwaqchu Jehová Dios jina jujkunata perdonayta? ¿Imarayku?
ASTAWAN YACHANAYKIPAQ
Manapunin allinchu jujkunamanta mana allinta piensayqa, chaytan Jesusqa juj ejemplowan yachachirqan. Chaymantan kay video rimashan.
Manaña noqanchischu juj iñiqmasinchista k’irisunman chaypas, ¿mañakunanchischu disculpata? Chaymantan willashan kay qelqapi.
“Sumaq kausay kananpaqqa disculpakuytan yachananchis” (Qhawaq, 2002 watapi 1 noviembre)
Kaypin yachanki imaynatas wakinkuna yachapurqanku igual-llata llapanta qhawariyta chaymanta.
Manaraq imapas kashaqtinmi ima phiñachinakuytapas allichana, ¿imaynatan chayta ruwasunman? Chaymantan kay qelqapi willashan.
“Iñiqmasinchiskunawan thajpi kausasun” (Qhawaq, 2016 watapi mayo killa)
a 6 willakuypin rimashan imakunatas Diospa llaqtanpi ruwakun hermanonchiskunaman ama ima onqoywanpas chimpaykachinapaq chayta.
b 7 willakuypin rimashan imaynatas negociopi problemakunata Bibliaq yachachisqanman jina allichasunman chayta.