“Diosllapaqña kawsaychis”

“Chay hinata tukuy ima kaqpas thunisqa p’uchukapunan kashaqtinqa, ¿imaynatataq kawsanaykichis? Qankunaqa Dios sonqo purispan Diosllapaqña kawsanaykichis.” (2 PED. 3:11.)

 1. ¿Imaraykun cristianokunapaq allinpuni karqan Pedroq iskaykaq cartan?

ISKAYKAQ cartanta Pedro qelqasqan tiempopaqqa unayñan Saqraqa cristianokunata pruebaman churasharqan, chaywanpas cristianokunaqa manan iñiyninkupi pisiparqankuchu, yapakushallarqankutaq kanpas. Chayraykun Saqraqa hukniraymantañataq paykunata urmachiyta munarqan imaynan ñawpaq tiempopi ruwarqan hinata. Paymi cristianokunata waqllichisharqan llulla yachachikuqkunawan, “wasanchay huchata ruwayllataña” munaq runakunawan, ‘imaymanata munapayanapaq allin yachachisqa kaqkunawan’ ima (2 Ped. 2:1-3, 14; Jud. 4). Chhaynapi tarikuspankun iñiqmasinchiskunaqa Diospaq hunt’aq kananku karqan. Chaypaqmi apóstol Pedro paykunata kallpacharqan iskaykaq carta qelqasqanpi.

 2. ¿Imamantan rimashan iskaykaq Pedro kinsa capitulopi? ¿Imakunatan tapukunanchis?

² Pedron qelqarqan: “Ñoqamanqa allinpunin rikch’akuwan, kawsanaykamaqa kay yuyaychaykunawan qankunata anyaykuyniy. Señorninchis Jesucriston willawanña pisillataña kay pachapi kawsanayta. Chayraykun tukuy sonqo kallpachakusaq, wañukapusqay qhepata chaykunata yuyarishanallaykichispaqpuni”, nispa (2 Ped. 1:13-15). Pedroqa yacharqanmi wañupunanpaqña kashasqanta. Chaymi munarqan yuyaychayninkunata yuyarinankuta. Chaykunaqa Bibliapin qelqasqa kashan, llapanchistaqmi chaykunamanta yachasunman. Kinsa capitulopi nisqanmi astawanqa yanapawasun, ‘qhepa p’unchaykunamanta’, ‘kay pachaq hanaq pachaq’ tukukapunanmantawan rimasqanrayku (2 Ped. 3:3, 7, 10). ¿Ima yuyaychaytan Pedro cartanpi saqewarqanchis? ¿Imaynatan yanapawasunman Dioswan allinpi kananchispaq?

3, 4. a) ¿Ima nirqanmi Pedro cristianokunata? b) ¿Imakunamantan kay estudiopi yachasunchis?

³ Kay pachaq tukukapunanmanta rimasqan qhepamanmi, Pedro nirqan: “Qankunaqa Dios sonqo purispan Diosllapaqña kawsanaykichis”, nispa (2 Ped. 3:11, 12). Chaywanmi Pedroqa nisharqan Jehová Diospa munayninman hina kawsaqkunalla ‘ayni-kutichina p’unchaypi’ mana wañunankuta (Isa. 61:2). Nillarqantaq: “Chayrayku, munasqa wawqe-panaykuna, ñawpaqmantaña chaykunata yachashaspaqa makilla cuidakuychis, paqtan mana chanin runakunaq pantachisqan kawaqchis, hinaspa allin takyasqa kashaspaykichispas urmawaqchis”, nispa (2 Ped. 3:17).

⁴ Pedroqa ‘ñawpaqmantañan’ yacharqan qhepa p’unchaykunaman imakuna sucedenanta, chaymi cristianokunata nirqan Dios sonqolla kanankupaq makilla cuidakunankuta. Qhepa watakunamanmi apóstol Juan willarqan imarayku makilla cuidakunamanta. Paymi huk rikhuriypi Satanasta rikurqan hanaq pachamanta qarqomusqa kasqanta, chay qhepamantaq rikullarqantaq ‘Diospa kamachikuynin hunt’aqkuna, Jesuspa willasqanpi qaqata sayaqkuna’ contra ‘sinchi phiñasqa’ phawarisqanta (Apo. 12:9, 12, 17). Ichaqa hanaq pachapaq akllasqakuna ‘wak ovejakunapas’ manan Satanaswan atipachikunqachu (Juan 10:16). Chaywanpas sapankanchismi tapukunanchis: ¿“Kay tiempoq tukukapunankamachu Diosta tukuy sonqoywan servisaq”? nispa. Chaypaqmi: 1) Diospa munayninman hina kawsananchis, 2) kallpachakunanchismi mana qhelliyoq, mana anyaykuna kawsananchispaq, hinallataq Dioswan allinpi kananchispaq 3) pruebakunatapas allin yuyaywanmi qhawarinanchis. Kay estudiopin chaykunamanta yachasunchis.

Diospa munayninman hina kawsasun

5, 6. Pedroq nisqanman hina, ¿imakunatan ruwananchis? ¿Imaraykun chaypaq ‘allintapuni kallpachakunanchis’?

⁵ Apóstol Pedron nirqan: “Allintapuni kallpachakuspa yapaykukuychis iñiyniykichisman allin kawsayta, allin kawsaymantaq yachayta, yachaymantaq cuerpowan kasuchikuyta, cuerpowan kasuchikuymantaq pacienciata, pacienciamantaq Dios sonqo-kayta, Dios sonqo-kaymantaq wawqe-pana munanakuyta, wawqe-pana munanakuymantaq llapa runa munakuyta. Lliw chaykunachus qankunapi kashan, askhayashantaqchus kanpas chayqa, Señorninchis Jesucristota reqsispan mana qellakuspa allinta llank’ankichis, hinan llank’asqaykichisqa mana yanqapaqchu kanqa”, nispa (2 Ped. 1:5-8).

⁶ Diospa munasqanman hina kawsananchispaqqa ‘allintapunin kallpachakunanchis’. Chaymi tukuy atisqanchista ruwananchis llapan huñunakuykunaman rinanchispaq, sapa p’unchay Bibliata leenanchispaq, hinallataq Familiantin Diosta Yupaychana Ch’isita sapa semana aparinapaqpas. Chaykunata sapa kutilla ruwasun chayqa, manañan sasapaqchu qhawarisun, astawanqa allinninchispaq kasqanta yachaspa.

7, 8. a) ¿Ima ninkun wakin iñiqmasinchiskuna Familiantin Diosta Yupaychana Ch’isimanta? b) ¿Imaynatan qanta yanaparqasunki?

⁷ Familiantin Diosta Yupaychana Ch’isiqa askha iñiqmasinchiskunatan yanapashan. Huk hermananchismi nin: “Imaymanamantan chaypi yachashayku”, nispa. Huktaq nin: “Manan munarqanichu Qelqamanta Yachanapaq Huñunakuy chinkapunanta anchata gustawasqanrayku. Kunan familiantin Diosta yupaychaspaykun ichaqa reparani necesitasqanchisman hina imatapas Dios tiemponpi qowasqanchista”, nispa. Huk iñiqmasinchismi nillantaq: “Ñoqatawan esposaytawanqa anchatan yanapawanku. Chaypin imachus necesitasqaykuman hina estudiayku, chayraykun kusikunapaq chay huñunakuyqa. Kunanqa aswan allintan kawsashayku santo espirituq rurunman hina, ancha kusikuywantaq predicashaykupas”, nispa. Huk taytapas ninmi: “Wawaykunaqa kusikuywanmi Bibliaq yachachikuyninkunata t’aqwishanku. Kunanqa allintan yachayku Jehová Dios ñoqaykupi interesakusqanta, mañakuyninkutapas kutichisqanta”, nispa. Qanrí, ¿chay iñiqmasinchiskuna hinachu chay huñukuyta qhawarishanki?

⁸ Chay huñukuyqa aswan importanten ima ruwanaykimantapas kanan. Huk casado warmi-qharin nin: “Kay tawantin jueves p’unchaykunapin yaqalla chay huñukuyta mana aparirqaykuchu qonqayllamanta ruwaykuna rikhurimusqanrayku, ichaqa manan saqerqaykuchu”, nispa. Mayninpiqa huk p’unchaypaschá chayta aparinanchis kanqa. Ichaqa amapuni saqesunchu ni huk semanallapas.

 9. ¿Iman Jeremiasta kallpacharqan? ¿Imatan chaymanta yachanchis?

⁹ Profeta Jeremiasmantan anchata yachasunman. Payqa allinpaqmi hap’irqan Diosmanta yachay chaskisqanta, chaywanmi kallpata hap’iq mana uyarikuq runakunata predicashanallanpaq. Chaymi nirqan: “Sonqoypin simiykiqa nina hinaraq rawrashan, tulluytaraqmi parichishan”, nispa (Jer. 20:8, 9). Jerusalén llaqtata thunichinanku tiempopi sasachakuykunawan ama pisipananpaqpas Diospa yachachikuyninkunan yanaparqan. Kunanqa hunt’asqatan Diospa Simin Qelqata hap’inchis. Tukuy yuyaywan chayta estudiasun chayqa, Dios hinan yuyaykusunchis, Jeremías hinataq mana pisipaspa predicashallasun, ima pruebapiña tarikuspapas Diospaq hunt’aq kasun, hinallataq mana qhelliyoq, mana anyaykuna kawsasunchis, Dioswanpas allinpi kasunchis (Sant. 5:10).

“Mana qhelliyoq, mana anyaykuna” kawsasunchis

10, 11. ¿Imaraykun kallpachakunanchis “mana qhelliyoq, mana anyaykuna” kawsananchispaq?

¹⁰ Cristianokunaqa yachanchismi tukukuy tiempopiña kawsashasqanchista. Chaymi runakunaqa Diospa cheqnisqan ruwaykunapi purishanku: hukpa kaqninta munapayanku, qhelli huchapi kawsashanku, maqanakunku, wañuchinakunku ima. Satanasqa ninmi: “Cristianokunata sasachakuykunawan mana pisipachiyta atispayqa ichapaschá Diospa cheqnisqan ruwaykunawan urmachiyman”, nispa (Apo. 2:13, 14). Chayraykun kasukunanchis Pedroq yuyaychasqanta, paymi nirqan: “K’uchilla kallpachakuychis mana qhelliyoq, mana anyaykuna, paywan thak-kaypi Diospa tarisqan kanaykichispaq”, nispa (2 Ped. 3:14).

¹¹ “K’uchilla kallpachakuychis” nisqanwanmi Pedroqa, ñawpaqpi nisqan hina, allinta kallpachakunanchispaq nisharqan. Jehová Diosqa yachanmi “mana qhelliyoq, mana anyaykuna” kawsananchispaqqa anchata kallpachakunanchista. Chayraykun tukuy atisqanchista ruwananchis ama mana allin ruwaykuna sonqonchispi saphichakunanpaq (leey Proverbios 4:23; Santiago 1:14, 15). Chaymantapas manan kasunanchischu imayna kawsasqanchismanta ‘contranchispi’ runakunaq rimasqankuta (1 Ped. 4:4).

12. Lucas 11:13 nisqanman hina, ¿imawanmi Jehová Dios yanapawasunchis?

¹² Huchayoq runa kasqanchisraykun sasa ñoqanchispaqqa allin kaqta ruway (Rom. 7:21-25). Ichaqa Diosmi yanapawasun, paymi santo espiritunta qowasun tukuy sonqomanta mañakuqtinchisqa (Luc. 11:13). Chay espiritun yanapawasun imayna kawsasqanchiswan Diosta kusichinanchispaq, hinallataq tentacionkunata, sasachakuykunata atipananchispaqpas, chaykunaqa aswantaraqmi yapakamunqa Jehová Diospa p’unchaynin cercapiña kashasqanrayku.

Pruebakunaqa kallpachawanchismi

13. ¿Imaynatan sasachakuykunata atipasunman?

¹³ Kay pachaq tukukunankamaqa kanqapunin sasachakuykunaqa. Ichaqa manan chayraykuchu pisipananchis, aswanmi kallpachakunanchis astawan Diosta munakunanchispaq, payman hap’ipakunanchispaq, Simin Qelqapi confiananchispaqpas. Santiagon nirqan: “Wawqe-panaykuna, imaymana sasachakuykunapichus rikukunkichis chayqa, anchata kusikuychis, iñiyniykichis probasqa kaqtin, aswan pacienciayoq kanaykichista yachaspa”, nispa (Sant. 1:2-4). Jehová Diosqa “yachanmi payta manchakuqkunata sasachakuymanta qespichiyta” (2 Ped. 2:9).

14. ¿Imaynatan kallpachasunki Josepa ejemplon?

¹⁴ Jacobpa churin Josemanta yachasunchis, paytan wawqenkuna venderqanku kamachi kananpaq (Gén. 37:23-28; 42:21). Joseqa manan chayraykuchu iñiyninpi pisiparqan, nitaq Diospaqpas phiñakurqanchu. Huk kutinmi huk warmi yanqamanta tumparqan: “Violaytan munawarqan”, nispa. Chaymi carcelman wisq’arqanku. Chhaynapi tarikuspapas qaqan iñiyninpiqa sayarqan (Gén. 39:9-21). Chay sasachakuykunan astawan kallpacharqan, qhepamantaq askha bendicionkunata chaskirqan.

15. ¿Imatan yachanchis Noemipa ejemplonmanta?

¹⁵ Sasachakuykunapi tarikuspaqa maytan llakikusunman, onqosunmanraqmi. Josepas, Diospa huk siervonkunapas chhaynapichá tarikurqanku. Noemipas sinchitan llakikurqan qosanpa, hinallataq iskay wawankunaq wañupusqanmanta, chaymi nirqan: “Ama Noemí niwaychischu, aswanpas Mara niwaychis, anchatapunin Tukuy-atiyniyoq Diosqa muchuchishawan”, nispa (Rut 1:20, 21). “Mara” simiqa “haya otaq p’osqo” ninanmi, chaytaqa nirqan sinchi llakikuypi tarikusqanraykun. Chaywanpas payqa José hinan mana pisiparqanchu iñiyninpi, Diospaqpas hunt’aq sonqollan kasharqan. Chaymi Diosqa yanaparqan (Rut 4:13-17, 22). Jehová Diosqa mosoq pachapin lliw munasqa serviqninkunaq llakikuyninta kusikuyman tukuchipunqa. “Ñawpaq sucedesqankunaqa qonqasqan kapunqa, manañan yuyarisqapasñachu kanqa.” (Isa. 65:17.)

16. ¿Imaraykun rogakuywan mañakunanchis?

¹⁶ Jehová Dios anchata munakuwasqanchista yuyarispaqa aguantasunmi ima sasachakuytapas (leey Romanos 8:35-39). Imataña Satanás ruwanqa chaypas, manan pisipachiwasunchu sichus ‘allin yuyaywan’ kawsasun, ‘makillataq Diosmanta mañakushasun’ chayqa (1 Ped. 4:7). Jesusmi nirqan: “Tuta-p’unchay Diosmanta mañakuspa rikch’ashaychis, tukuy chay hamuqkunamanta ayqenaykichispaq, hinaspa Runaq Churinpa qayllanpi rikhurinaykichispaq”, nispa (Luc. 21:36). Chaywanmi Jesusqa nisharqan tukuy rogakuywan Jehová Diosmanta mañakunanchispaq. Chaytaqa nirqan Taytanpa hinallataq paypa allin qhawarisqan kananchispaq kallpachakunanchispaqmi, paykunaq ñawpaqenpi allin kaspallan Jehová Diospa hatun p’unchayninpiqa mana wañusunchu.

Tukuy sonqowan Diospaq llank’ashallasun

17. ¿Imaynatan profetakunaq ejemplon yanapawanchis manaña uyariwaqtinchispas predicashanallanchispaq?

¹⁷ Diospaq llank’asqanchisqa kallpachawanchismi. Chay ruway importante kasqanta rikuchinanpaqmi Pedro nirqan: “Qankunaqa Dios sonqo purispan Diosllapaqña kawsanaykichis”, nispa (2 Ped. 3:11). Diosllapaqña kawsaspaqa allin willakuykunata predicaypin astawan llank’asun (Mat. 24:14). Wakin territoriokunapi runakunaqa manan uyariyta munankuchu, wakinqa hark’awanchismi otaq ruwayninkunallapi afanasqa kashanku, chaymi sasa kanman predicay. Ñawpaq tiempopi Diospa profetankunapas chhaynapin tarikurqanku, chaywanpas paykunaqa ‘mana thanispan sapa p’unchay’ willashallarqanku (leey Jeremías 7:24-26; 2 Cró. 36:15, 16). Paykunaqa Jehová Dios hinan qhawarirqanku servicionkuta, manan runakuna hinachu. Chaymantapas ancha allinpaqmi qhawarirqanku Diospa sutin apayta, chayraykun mana pisiparqankuchu (Jer. 15:16, NM).

18. ¿Imaynatan predicasqanchiswan hamuq tiempopi Diospa sutin hatunchasqa kanqa?

¹⁸ Ñoqanchispas kunanqa willashanchismi Diospa sutinmanta, qhepa tiempopi imachus ruwananmantawan. ¡Ima munaymi chay ruwayqa! Jehová Diospa phiñakuynin p’unchay chayamuqtinqa millay runakunaqa manan niyta atinqakuchu: “Manan yacharqaykuchu”, nispa. Faraón hinan sut’ita yachanqaku Diospa juicion kasqanta (Éxo. 8:1, 20; 14:25). Chay p’unchaymi Diosqa serviqninkunata hatunchanqa paypa representanten kasqankuta sut’ita rikuchispa (leey Ezequiel 2:5; 33:33).

19. ¿Imaynatan rikuchisunman Diospa paciencian allinninchispaq kasqanta?

¹⁹ Cartanta qelqayta tukushaspañan Pedro nirqan: “Yuyaychis Señorninchispa paciencianqa qespikunanchispaq kasqanta”, nispa (2 Ped. 3:15). ¿Imaynatan rikuchisunman Diospa paciencian allinninchispaq kasqanta? Allin cristiano kananchispaq kallpachakuspa, “mana qhelliyoq, mana anyaykuna” kawsaspa, sasachakuykunata allin yuyaywan qhawarispa, sapa kutilla predicaspa ima. Chhaynapin wiñaypaq kawsasunchis ‘mosoq hanaq pacha’ ‘mosoq hallp’a pacha’ chayamuqtin (2 Ped. 3:13).

¿Yuyarishankichu?

• ¿Imakunatan ruwananchis allin cristiano kananchispaq?

• ¿Iman yanapawasun “mana qhelliyoq, mana anyaykuna” kawsananchispaq?

• ¿Imatan yachanchis Josemanta Noemimantawan?

• ¿Imaraykun ancha allinpuni predicasqanchis?

[9 paginapi foto]

¿Imatan qosa ruwanan familian Diospaq hina kawsanankupaq?

[10 paginapi dibujokuna]

¿Imatan yachanchis José sasachakuykunata imayna atipasqanmanta?