19 YACHACHIKUY
¿Jesuspa nisqanman jinachu kausanku Jehová Diospa testigonkuna?
Jehová Diospa testigonkunaqa Jesusta qatikuqkunan kayku, paypa nisqanman jinan kausayku. ¿Maymantan jamun ima yachachisqaykupas? ¿Imaraykun “Jehová Diospa testigonkuna” nisqa sutiyoq kayku? ¿Imaynatan jujkuna-jujkunawan qhawarinakuyku? Chaykunamantan kunan yachasunchis.
1. ¿Maymantan jamun ima yachachisqaykupas?
Jesusmi Jehová Diosta nirqan: “Simiykin cheqaq kaqqa”, nispa (Juan 17:17). Jehová Diospa testigonkunaqa Jesús jinan Diospa simin Bibliapi creeyku, chaypi nisqanman jinataqmi imatapas yachachiyku. Ñaupaqpiqa “Biblia estudiaqkuna” nisqan karqayku. Biblia estudiaqkunaqa 1870 watapi jinan Bibliata allinta estudiayta qallarirqanku. Bibliaq nisqanman jinan imatapas yachachirqanku, manaña juj religionkuna chaywan kusisqachu karqanku chaypas. Biblia estudiaqkunaqa lliumanmi Bibliaq yachachisqanmanta willayta qallarirqanku.a
2. ¿Imaraykun Jehová Diospa testigonkuna nisqa sutiyoq kayku?
Jehová Diosmi “testigoykuna” nispa nirqan payta serviq runakunata, paymanta cheqaqta willaqkunata (Hebreos 11:4-12:1). Chaymi ñaupa tiempopi llaqtantapas nirqan: “Qankunan testigoykunaqa kankichis”, nispa (leey Isaías 43:10). Bibliapiqa Jesustapas “juntˈaq testigo” nispan nikullantaq (Apocalipsis 1:5). Chayraykun 1931 watapi Jehová Diospa testigonkuna nisqa sutiyoq kapurqayku. May kusikunapaqmi chay sutita apayqa.
3. ¿Jesús jina munakuqchu kanku Jehová Diospa testigonkuna?
Jesusqa familianta jinan qatikuqninkunata anchatapuni munakurqan (leey Marcos 3:35). Jehová Diospa testigonkunapas juj familia jinan munanakuyku, wayqentin panantin jinan kausayku (Filemón 1, 2). Chhaynapin kasukuyku “llapa iñiqmasikunata munakuychis” nispa Bibliaq nisqanta (1 Pedro 2:17). Jehová Diospa testigonkunaqa yanaparinakuspan kausayku, astawanqa sasachakuykunapi kaqkunatan yanapayku.
ASTAWAN YACHASUNCHIS
Kunanqa astawan yachasunchis Jehová Diospa testigonkunamanta, imaynatachus paykuna Cristoq nisqanman jina kausanku chaymantawan.
Cheqaq cristianokunaqa Bibliaq nisqanpin creenku, chayman jinataqmi runakunamanpas cheqaq kaqta yachachinku.
4. Bibliaq nisqanman jinan yachachiyku
Bibliaq nisqan jina, kay tukukuy p’unchaykunapin Diosmanta allinta yachakunan karqan. Leeychis Daniel 12:4 textota, jinaspa jamuq tapuykunaman jina parlariychis:
¿Imatan Jehová Diosta serviqkuna “t’aqwinanku” karqan? ¿Iman chaywan “askhayanan” karqan?
Kunan yachasun imaynatas ñaupa tiempopi Biblia estudiaqkuna Diospa simin qelqata t’aqwirqanku chayta. Chay t’aqapin Charles Russell hermanopas kasharqan. VIDEOTA qhawaychis, jinaspa jamuq tapuykunaman jina parlariychis:
Videopi rikusqanchis jina, ¿imaynatan Charles Russell hermano juj iñiqmasinkunapiwan Bibliata estudiayta qallarirqanku?
¿Yacharqankichu?
Mayninpiqa imachus creesqaykutan cambiarqayku. ¿Imarayku? Jehová Diospa yanapayninwan Bibliaq nisqanta aswan allinta entiendesqaykurayku (leeychis Proverbios 4:18). Bibliaq nisqanqa manan cambianchu. Chaymi Bibliataqa allinta estudiayku, chaypi yachasqaykuman jinataqmi imatapas ruwayku. Ima creesqaykutapas cambianayku kaqtinqa usqhayllan cambiayku.
5. Sutiykuq nisqanman jinan kausayku
¿Imaraykun “Jehová Diospa testigonkuna” nisqa sutiyoq kapurqayku? VIDEOTA qhawaychis, jinaspa jamuq tapuykunaman jina parlariychis:
¿Imaraykun ancha allinpuni “Jehová Diospa testigonkuna” nisqa suti?
¿Imaraykun Jehová Dios testigonkunata ajllakurqan? Paymanta cheqaq kaqta runakunaman yachachinankupaqmi. Jehová Diosmantaqa yanqa yachachikuykunatan runakunaqa paqarichirqanku, iskaymantan kunan yachasunchis.
Wakin religionkunapin yachachinku: “Taytachakunaman mamachakunaman k’umuykuspaqa Diostan adorashanchis”, nispa. ¿Cheqaqchu chay yachachisqanku kanman? Leeychis Levítico 26:1 textota, jinaspa jamuq tapuyman jina parlariychis:
Chay textoq nisqan jina, ¿imaninmi Jehová Dios idolokunamanta?
Wakin religioso umallikunan yachachinku: “Jesuswan Dioswanqa jujllan kanku”, nispa. ¿Cheqaqchu chay yachachisqanku kanman? Leeychis Juan 20:17 textota, jinaspa jamuq tapuykunaman jina parlariychis:
¿Imanirqanmi Jesús kay textopi? ¿Kaqllachu Jehová Dioswan Jesuswan kanku?
Jehová Diosmi testigonkunata kachamurqan paymanta Jesusmantawan cheqaq kaqta yachachinankupaq, ¿imaninkin chaymanta?
6. Anchatapunin munanakuyku
Diosta serviqkunaqa cuerpoq partenkuna jinan yanapanakuspa kausanku. Leeychis 1 Corintios 12:25, 26 textota, jinaspa jamuq tapuykunaman jina parlariychis:
¿Imatan cheqaq iñiqkuna ruwananku mayqen iñiqmasinpas ñak’ariqtin?
Rikusqaykiman jina, ¿imaynatan Jehová Diospa testigonkuna munanakusqankuta rikuchinku?
Jehová Diospa testigonkunaqa usqhayllan yanapanakuyku mayqenña ima sasachakuykunapiña tarikuqtinpas. VIDEOTA qhawaychis, jinaspa jamuq tapuyman jina parlariychis:
¿Imatan Jehová Diospa testigonkuna ruwanku sasachakuykunapi tarikuqkunata rikuspa? ¿Imaraykun chayta ruwanku?
Cheqaq cristianokunaqa jujkuna-jujkunawanmi munanakunku.
WAKIN RUNAKUNAN NINKU: “Jehová Diospa testigonkunaqa mosoq religionmi kanku”, nispa.
¿Jayk’aqmantapachan Jehová Dios serviqninkunata “testigoykunan kankichis” nirqan?
IMATAN YACHAMURQANCHIS
Jehová Diospa testigonkunaqa Jesuspa nisqanman jinan kausayku, chaymi pachantinpi juj sonqolla Jehová Diosta servishayku. Noqaykuqa Bibliaq nisqanman jinan cheqaq kaqta Diosmanta yachachiyku.
Yuyarisun
¿Imaraykun “Jehová Diospa testigonkuna” nisqa sutiyoq kapurqayku?
¿Imaynatan munanakusqaykuta rikuchinakuyku?
Rikusqaykiman jina, ¿Jesuspa nisqanman jinachu Jehová Diospa testigonkuna kausanku?
ASTAWAN YACHANAYKIPAQ
Astawan Jehová Diospa testigonkunamanta yachay.
Jehová Diospa testigonkuna. Juj kaq parte: Tutayaqmanta lloqsimunku (1:00:53)
Qhaway ima pantasqa yachachikuytas Jehová Diospa testigonkuna sut’iman orqorqanku chayta.
Kaypin astawan yachanki Jehová Diospa testigonkunamanta.
“Jehová Diospa testigonkunamanta tapukusqanku” (Internetpi qhawanapaq)
Stephen waynaqa sinchi mana allinkunatan ruwasqa. Ichaqa Jehová Diospa testigonkunaq munanakusqankuta rikuspan vidanta cambiasqa. Kaypin paymanta yachanki.
“Sinchi mana allin kausaypin rikukurqani” (Qhawaq, 2015 watapi 1 setiembre)
a Qhawaq qelqaqa 1879 watamantapachan mana faltayta lloqsimushan.