¿Imaraykun Dios israelitakunata kamachirqan paykunapuralla casarakunankupaq?

▪ Jehová Dios israelitakunaman kamachikuy qosqanpi nirqan: “Aman ususiykichista paykunaq churinkuwan casarachinkichischu, amallataq churiykichistapas ususinkuwan casarachinkichischu, paykunawan ama aylluntin kanaykichispaq”, nispa (Deuteronomio 7:3, 4). ¿Imaraykun chayta kamachirqan?

Satanasqa llapa israelitakunatan wak dioskunata yupaychaywan pantachiyta munarqan, chaytan Jehová Diosqa yacharqan. Chaymi israelitakunata nirqan: “Sichus Diospi mana iñiqwan casarakunkichis chayqa ñoqamanta karunchakuspan huk dioskunata serviyta qallarinkichis”, nispa. Hinaspapas manañan Jehová Dioswan allinpichu kankuman nitaq yanapaynintapas chaskinkumanñachu, chhaynapi tarikuspaqa enemigonkuq urmachisqanmi kankuman. Chayta ruwaqtinkuri, ¿imaynatan prometesqa Mesías chayamunman karqan? Chaychá Satanasqa munarqan israelitakuna wak dioskunata yupaychaq runakunawan casarakunankuta.

Diosqa sapanka israelitakunapin interesakurqan. Israelitakuna kusisqa allinta kawsanankupaqqa Dioswan amigontin kaymantan karqan. Chhaynaqa, ¿allintachu Dios rikuchisharqan mana iñiq runawan casarakusqankumanta llakikusqanta? Chaypaq rey Salomonpa ruwasqanta qhawarisunchis. Payqa yacharqanmi Diosta mana yupaychaq warmikunawan casarakuy mana allinpi tukusqanta. Chaymi Jehová Dios nirqan: “Paykunaqa sonqoykichistan q’ewichinkuman diosninkuta yupaychanaykichispaq”, nispa. Chaywanpas Salomonqa nirqanpaschá: “Ñoqaqa yachayniyoqmi kani manan chayqa pasawanqachu”, nispa. Chhaynapin Diospa kamachisqanta mana kasukurqanchu. ¿Imapin tukurqan? Pisi-pisimantan chay warmikunaqa ‘sonqonta Diosmanta q’ewichirqanku [...] hinan wak dioskunata yupaycharqan.’ ¡Chayqa ancha llakikunapaqmi karqan! Salomonqa mana kasukusqanraykun manaña Diospa amigonchu kapurqan, llaqtantapas t’aqanachirqan (1 Reyes 11:2-4, 9-13).

Ichaqa manan llapankuchu chhaynapi tukurqanku nispapaschá pipas yuyaykunman. Mahlón runapas Moab nacionniyoq warmiwanmi casarakurqan, tiempowanqa Diosta yupaychaq warmi kapurqan. Moab nacionniyoq warmikunawan casarakuqtinkuqa manan yachakuqchu allinpaq otaq mana allinpaq kasqanta. Chaytaña Mahlón ruwarqan chaypas Bibliaqa manan kallpachanchu chay ruwayta. Mahlonqa wayna kashaspallaraqmi wañukapurqan yaqapaschá Rut manaraq Diosta reqsishaqtin. Wawqen Quelionpas Moab nacionniyoq warmiwanmi casarakurqan payqa manan “diosninkunata” saqerqanchu. Boozmi ichaqa Rutwan casarakurqan unay tiempoña Dios yupaychaq kaqtinña. Chay qhepamantaq judiokuna Rut-ta nirqanku: ‘Judiokunaq Diosninta yupaychaq warmi’, nispa. Chay ruwasqankuqa allinmi karqan iskayninkupaq (Rut 1:4, 5, 15-17; 4:13-17).

Chaykunata yachaspa, ¿nisunmanchu: “Rutwan Mahlonwan Diospa kamachikuyninta mana valechinkuchu”, nispa? Chayta niyqa kanman qolqepaq pukllayqa allinmi kawsanaykipaq nispa niypas hinachá kanman. Chay ruwayqa manapunin allinchu kanman.

Bibliaqa llapa cristianakunatan kallpachan “Señorpi iñiqwanpuni” casarakunankupaq. Ichaqa nillantaqmi: “Ama iñiqkunaqa mana iñiqkunawan yugoman watasqa hina pareschakuychischu”, nispa. Chay yuyaychayqa llapa casarakuy munaqkunapaqmi. Biblia yuyaychan mana iñiqwan casarasqakunata casado kawsayninkupi sasaña kaqtinpas sumaqta kawsanankupaq (1 Corintios 7:12-16, 39; 2 Corintios 6:14). Chay iskay yuyaychaykunan rikuchin Jehová Dios casarakuyta paqarichisqanta, munantaqmi casadokuna solterokunapas kusisqa kawsanankuta.