¿Pita culpata charin?

Na Taita Diospa culpa cajpica ¿pipa culpamandata llaquicunaca tian? ¿Imamandata ashtaca gentecunaca yarjaimanda huañunajun, o pobre pobre causanajun? ¿Imamandata guerracuna, ungüicuna, terremotocuna, acapanacunapash tian? Bibliapica quimsa yuyaicunatami cun:

1. Paicunapilla pensarimanda, ansiarimanda, shujcunata millanayachimandami llaquicunaca tian. Eclesiastés 8:9​pica ninmi: ‘Runaca paipa llaquipallatami caishuj runataca llaquichin’ nishpa. Gentecunaca paicunapilla pensarimanda, nalicuna caimandami shujcunata llaquichin.

2. Na yashcapimi llaquicunaca japin. Eclesiastés 9:12​pica ninmi: “Ima punlla ima tucunataca na yachanllu” nishpa. Huaquinbica ñucanchillata na aliguta pensarimanda, pandarimanda o imacunamandapashmi accidentecunata charinchilla.

3. Diablomi cai mundotaca mandajun. 1 Juan 5:19​pica ninmi: ‘Cai pachapajta rurashpa causajcunataca, Diablomi tucuicunata mandajun’ nishpa. Diabloca ashtaca podertami charin. Callaripi ali ángel cashca cashpapash, ‘na llullashpami causana nishcataca na catingapaj’ munarcachu (Juan 8:44, MTQI). Huaquin angelcunapash Diablota catishpami, paicunapa munashcata rurashpa ayacuna tucurca (Génesis 6:1-5). Chai punllacunamandapachami Diablopash, paipa ayacunapash mundo enteropi gentecunata paicunapa munashcata rurachinajun. Diabloca ninandapacha culirashpami ‘tucui cai pachapi causajcunata umachijun’. Chaimi Bibliapica nin: “Alpapi causajcuna, mama cuchapi causajcunapash, ¡aij imachari tucunguichi!” nishpa (Apocalipsis 12:9, 12). Diabloca ninan nalipachami can. Gentecuna sufrinajujta ricushpaca, cushijushpa alicachishpami ricun. Llaquicunaca na Taita Diospa culpamandachu tian, Diablopa culpamandami tian.

PENSARIPAI: ¿Nachu ninan nalicunalla shuj gentecuna sufrinajujta ricushpaca cushijunman? Bibliapica ninmi: “Taita Diosca ninandapacha juyajmi” can nishpa (1 Juan 4:8). Shinaca, Taita Diosca na gentecunata llaquichinllu (Job 34:10).

Cunanga tal vez pensaripanguipashchari: “¿Ima horata Taita Diosca Diablopa nali ruraicunata tucuchinga?” nishpa. Imashinami yachajupashcanchi, Taita Diosca nali ruraicunataca millanayachinmi. Cutin gentecuna sufrinajujta ricushpaca, ninandami llaquirin. Bibliapicarin ninmi, ima llaquita charishpapash Taita Diosman villaichi, paica ninandami cangunamanda preocuparin nishpa (1 Pedro 5:7). Cati temapimi Taita Dios ñucanchita juyaimanda imacunatalla ruranata, tucui llaquicunata tucuchingapaj poderta charishcatapash yachajupashun.a