¿Imamandata ali gentecunapash llaquicunata charin?

Jehováa Diosmi tucuita rurarca, tucui podertami charin. Chaimandami ashtaca gentecunaca nin, Diospa culpamandami llaquicunaca tian nishpa. Shinapash Bibliapica ninmi:

• ‘Mandaj Diosca imata rurashpapash [alitami] ruran’ (Salmo 145:17).

• ‘Paipa rurashcacunaca ima pandapash illajmi. Imatapash aligutallami ruran. Na llullaj Taita Diosmi. Paipica ima nalipash na tianllu. Aligutalla ruraj Diosmi’ (Deuteronomio 32:4).

• “Jatun Diosca ninanda llaquishpa, juyaj cajtami ricuchijun” (Santiago 5:11).

Imashinami ricunchi, Taita Diosca na llaquicunata cachamunllu. Llaquicunata na cachamujpipash huaquingunaca ninmi, Taita Diosmi gentecunamanga nali munaicunata cun nishpa. Shinapash Bibliaca ninmi: “Nali munai maijandapash japijpica, ama caitaca Taita Diosmi carahuan yajuchun ninimi. Taita Diosca, nali munaitaca na charishpami, nali munaitaca pimambash na cujun” nishpa (Santiago 1:13). Shinaca, Taita Diosca gentecunaman nali rurana munaitaca na cunllu. Shinaca llaquicunamandaca ¿imata o pitata culpashun?

Bibliapica ninmi: “Ima punlla ima tucunataca na yachanllu” nishpa (Eclesiastés 9:12). Huaquin pushtucunapi, huaquin horascunapica ashtaca accidentecunami tian o imacunapashmi pasan. 2 mil huatacuna huashamanga Jesusca nircami, shuj punllaca shuj jatun torre urmashpami 18 gentecunata llapishpa huañuchirca nishpa (Lucas 13:1-5). Chai gentecunaca ¿juchasapa gentecuna caimandachu huañurca? Na. Paicunaca na cana pushtupi, na cana horaspi caimandami llapi tucushpa huañurca. Ñucanchi punllacunapipash 2010 huatapica shuj jatun terremotomi Haití llactapi tiarca. Haití llactamanda gobiernoca ninmi: “Pobre cashpa, charij cashpapash 300 mil yali gentecunami huañurca’ nishpa. Ungüicunapash cungashcapimi pitapash japinlla.

Shinapash huaquingunaca tapurinllari: “¿Imamandata Taita Diosca chai llaquicunata na trancarca? ¿Imamandata ali gentecunataca na salvarca? nishpa. Llaquicuna ama tiachun trancangapaca ima hora llaquicuna tianatami Taita Diosca yachana can. Taita Diosmanda parlashpaca tucui ima pasanatami yachai ushan. Shinapash ¿paica tucuita catiriashpachu yachangapaj munan? (Isaías 42:9.)

Bibliaca ninmi: “Ñucanchi Taita Diosca, jahua pachapimi. Paica tucui ima munashcatami rurashca” nishpa (Salmo 115:3). Shinaca Jehová Diosca tucuita rurai ushashpapash ima minishtirishcatallami ruran, ima minishtirishcatallami nin. Punda tiempo Sodoma, Gomorra llactacunata yaripashun. Chai llactacunaca ninan nalicunami carca. Chaimandami paita sirvij Abrahandaca Taita Diosca nirca: ‘Cunanga nalita rurashcamanda caparishcatapash ricungapaj uriajushpami yachasha’ nishpa (Génesis 18:20, 21). Asha tiempotaca chai llactamanda gentecuna nalita ruranajujta ricui ushashpapash Taita Diosca na ricungapaj munarcachu (Génesis 22:12). ¿Taita Diosca juchayu o débil caimandachu na ricungapaj munarca? Bibliaca ninmi: ‘Paipa rurashcacunaca ima pandapash illajmi’ can nishpa (Deuteronomio 32:4).b Shinaca Taita Diosllatami decidin imata ricunata, imata yachanatapash. Paica paipa munaita rurachunga na pitapash obliganllu.

Huaquinbica gentecunapa culpamandallatami llaquicunaca tian. Bibliapica ninmi: ‘Nali munaica gentecunapa shungupimi tiajun. Shina cashpami pitapash nalita rurachun yarichishpa urmachijun. Nali munaita rurajpimi juchaca ninanda miran. Juchaca huañuimanmi apan’ nishpa (Santiago 1:14, 15). Shinaca, shungupi charishca nali munaicunata rurashpaca paicunallatami llaquicunata charinga (Romanos 7:21-23). Shinallata, millai millai gentecunami shuj gentecunatapash ninanda llaquichin. Ashtahuangarin millai gentecunata ricushpami shuj gentecunapash nalicunata ruranata yachajun (Proverbios 1:10-16).

Shinaca ¿nachu Taita Diosca gentecuna nalita ama rurachunga trancana carca? Bibliaca ninmi, Taita Diosca paiman rijchatami gentecunataca rurarca nishpa. Taita Diosman rijcha caimandami pai imashina cajta ñucanchipash cati ushanchi (Génesis 1:26). Ashtahuangarin, ñucanchillata imata ruranata agllachunmi Taita Diosca gentecunataca rurarca. Shinaca gentecunallatami Taita Diosta juyanata o na juyanata, cazunata o na cazunatapash agllai ushanchi (Deuteronomio 30:19, 20). Cazuchun obligashpaca ¿ñucanchillata agllachun saquijunmanllu? Shinallata, cazuchun obligajpica ¿nachu robot maquinacuna cuenda canchiman? Ciertopacha destino tiajpipash imata ruranataca na agllai ushanchimanllu. Shinaca Taita Dios ñucanchi munaicunata respetashpa agllachun saquishcamandaca agradicinami canchi. Shujcunapa nali decisiongunamanda o pandarishcacunamanda cunanbi llaquirinajushpapash na shinalla causashunllu.

Budista, hindú gentecunaca huañushca jipa imapipash causarinata o karma nishcapimi crin. Shinapash karmapi crijcunaca ¿imatata nin? Karmapi crijcunaca ninmi, nara nacirishpallata punda causaipi alita rurashca cashpaca cunan causaipica alimi causanga, cutin nalita rurashca cashpaca cunan causaipica nalimi causanga nishpa. Shinaca cai revistapa punda paginapi tapuita ricuchijpica budista, hindú gentecunaca ninmanmi: “Nara nacirishpallata punda causaipi nalita rurashcamandami cunan causaipica llaqui apanajun” nishpa.c

Huañuimanda aliguta intindichunmi Bibliaca nin, Taita Diosca gentecunata rurashpaca jardín de Edén nishca pushtugupimi churarca nishpa. Adandaca Taita Diosca nircami: ‘Tucui yuracunapi fucushcata micui ushanguimi. Ashtahuangarin alita, nalita yachaita cuj yurapi fucushcataca ama micunguichu. Chai yuramanda micushpaca huañunguipachami’ nishpa (Génesis 2:16, 17). Taita Diosta Adán cazujpica para siempremi ñucanchica causanchiman carca. Taita Diosta Adán na cazujpimi huañuica tiai callarirca. Shinami Adán y Eva huahuacunata charijpica huañuipash tucuicunaman yalirca (Romanos 5:12). Shinaca juchamandami gentecunaca huañuita japinajun (Romanos 6:23, NM). Ashtahuangarin Bibliaca ninmi: ‘Huañushpami juchamandaca cachari tucunchi’ nishpa (Romanos 6:7, Mushuj Testamento Quichua Imbabura). Shinaca causajushpa rurashca juchacunamandaca huañuihuanmi paganchi. Huañujpica ñucanchi juchacunapashmi chingarin.

Cunan punllacunapica ashtaca millón gentecunami nin, karma nishcamandami gentecunaca sufrinchi nishpa. Karmapi crij gentecunaca cashnami sufrina cani o shujcunaca chashnami sufrina can nishpami, tranquilo sufrishpa causan. Llaquicuna tucurinataca na yanllu. Ashtahuangarin crinmi, huañushpa ña cutin imacunapipash tigrai tigrai causarishpa alita rurashpallami llaquicunamandaca salvarishun nishpa. Shinapash chaitaca Bibliapica na yachachinllu.d

Llaquicunaca na gentecunapa culpamandallachu tian. Ashtahuanbachaca Diablopa culpamandami llaquicunaca tian. Callaripica shuj ali angelmi Diabloca carca. Diablomanda parlashpaca Jesusca nircami: “Na llullashpami causana nishcataca na catishpami”, juchata ruranata gentecunamanga yachachirca nishpa (Juan 8:44, Mushuj Testamento Quichua Imbabura). Diablomi Adanda Evataca Taita Diosta ama cazuchun yachachirca (Génesis 3:1-5). Chaimandami Jesusca nirca, Diablomi cai mundota ‘mandajun’, ‘nalita rurachijuj’, nishpa (Juan 14:30; 17:15). Ashtaca gentecunaca Jehová Diosta na cazushpami Diablopa chaquita catinajun (1 Juan 2:15, 16). 1 Juan 5:19​pica ninmi: “Cai pachapajtalla rurashpa causajcunataca, Diablomi tucuicunata mandajun” nishpa. Diabloca huaquin angelcunatapash pandachishpami paicunahuan tandanajushpa ‘cai pachapi causajcunataca umachijun’ (Apocalipsis 12:9, 12).

Imashinami ricunchi, llaquicunaca na Taita Diospa culpamandachu tiashca. Taita Diosca na gentecunataca sufrichinllu. Ashtahuangarin, Taita Diosmi tucui llaquicunataca tucuchinga. Shinapash ¿imashinata tucuchinga? Chaitaca shamuj temapimi ricupashun.