‘Ñucapaman tigramuichi’

 1. Shuj huauqui o shuj pani congregacionman tigramujpica Jehová Diosca ¿imashinata sintirin?

CAISHUJ temapica shuj michijca juyaihuan, tiempoguta llujchishpa llama chingashcata mascajtami yachajuparcanchi. Jehová Diosca cai michijshnami can. Cada unotami ninanda juyan. Jehová Diosca paimanda caruyashca israelitacunataca cashnami nirca: ‘Ñucapaman tigramujpica, ñucapash cangunapaman tigrashami’ nishpa. Jehová Dios na cambiashca caimandami cunanbipash shinallata nin (Mal. 3:6, 7). Jesuspashmi nirca, shuj huauqui o shuj pani congregacionman tigramujpica Jehovapash, angelcunapash cushijunmi nishpa (Luc. 15:10, 32).

 2. Cai temapica ¿imatata yachajupashun?

² Cai temapica Jesús parlashca quimsa chimbapuraicunamandami yachajupashun. Chai chimbapuraicunapica congregacionmanda caruyashcacunata imashina ayudana cashcatami Jesusca yachachirca. Shinallata paicunata ayudangapaj ñucanchicuna ima cualidadcunata charina cashcata, paicunata imamanda cutin congregacionman tigramuchun ayudana cashcatapashmi yachajupashun.

3, 4. Lucas 15:8-10​pi parlashca huarmiguca ¿imamandata chingashca monedaguta mascangapaj ninanda esforzarin?

³ Jehovamanda caruyashca huauquipanicunata mascangapaca ninandami esforzarina capanchi. Lucas libropica, Jesusca shuj huarmigu dracma nishca culquita taringacaman ninanda mascashpa esforzarijtami parlan. Cai chimbapuraipica imatapash mascajushpa taringacaman ninanda esforzarina cashcatami yachachin (Lucas 15:8-10, liingui).

⁴ Jesuspa tiempopica shuj judía huarmigu cazaragrijuj punllapica huaquin mamacunaca dracma nishca 10 monedacunatami caran carca. Chai chimbapuraipi huarmiguca cai monedacunamandami shuj monedata talvez chingachishcanga. Chaimi shuj lamparaguta cindishpa ucu entero mascai callarin. Lámpara na punchayachijpimi ucutaca fichai callarin. Shina fichashpami dracma nishca monedagutaca tarin. Chaimi ninanda cushijun. Cai huarmigumanda parlashpami Jesusca nin, cai huarmiguca paipa amigacunata, vecinacunatapash monedaguta tarishcata villangapaj cayan nishpa.

 5. Congregacionmanda caruyashcacunataca ¿imamandata mascangapaj esforzarina capanchi?

⁵ Jesús parlashca chimbapuraipica imapash chingajpica taringapapacha ninanda mascana cashcatami ricuchirca. Shina cuendami congregacionmanda caruyashca huauquipanicunataca mascangapaj esforzarina capanchi. Paicunaca tauca huatacunatami talvez congregacionmanda huauquipanicunahuanga na parlashca canga. Shinallata paicunaca shuj ladopi causangapaj rishca caimandami paicunataca shuj huauquipanicunapash na rijsinga. Shinapash paicunaca congregacionman tigrangapaj, huauquipanicunahuanbash cutin Jehovata sirvingapami talvez munanajunga. Paicunaca shuj huauquipanicuna ayudachunmi minishtinajunga.

 6. Congregacionmanda caruyashcacunataca ¿imashinata ayudaita ushapanchi?

⁶ Congregacionmanda caruyashcacunataca ¿picunallata mascashpa ayudaita ushan? Congregacionmanda ancianocuna, propio familiacuna, precursorcuna shuj huauquipanicunapashmi paicunataca mascashpa ayudaita ushapanchi. ¿Ñucanchi familia ucumanda shuj familia o shuj rijsishca amigo congregacionmanda caruyashcata charipanchichu? Predicación publicapi, huasin huasin villachijushpa congregacionmanda caruyashca shuj huauquita o shuj panita tuparishpaca, paicunapa direccionda ancianocuna quiquinda visitachun munapanguimanllu nishpa tapupashunchi. Visitachun munajpica, anotashpa ancianocuna visitagrichunmi uchalla villana capanchi.

 7. Thomas huauquimandaca ¿imatata yachajupanchi?

⁷ Congregacionmanda caruyashcacuna cutin tigramuchunga ancianocunaca ¿imatata rurana can? Cunanga Españamanda Thomasb shuti anciano huauquimanda yachajupashunchi. Paica 40 yali huauquipanicunatami congregacionman cutin tigramuchun ayudashca. Paica ninmi: “Primero, ¿inactivo huauquipanicunata rijsinguichichu, maipi causajtapash yachanguichichu? nishpami huaquin huauquipanicunataca tapuni. Shinallata ¿pipash tandanajuiman ñana shamunajujta yachanguichichu? nishpapashmi tapuni. Shina tapujpimi tauca huauquipanicunaca paicunata mascaita ayudashunllami nin. Congregacionmanda caruyashcacuna maipi causajta ña yachashpaca, visitangapami arreglocunata rurani. Visitagrishpaca paicunapa huahuacunamandami tapuni. Congregacionmanda caruyashcacunaca paicunapa huahuacunandimi tandanajuicunamanga rin cashcanga. Huahuacunapashmi publicadorcuna cashcanga. Paicunatapashmi Jehová Diosman cutin tigramuchun ayudaita ushapanchi” nishpa.

 8. Lucas 15:17-24​pi nishca shinaca ¿imashinata shuj taitaca paipa churitaca chasquirca?

⁸ Congregacionmanda caruyashcacunata ayudangapaca ¿ima cualidadcunatata charina capanchi? Jesusca tucuita yanga tucuchishca jovenmandami parlarca (Lucas 15:17-24, liingui). Chai jovenga arrepintirishpa huasiman tigrashcatami Jesusca parlarca. Huasiman tigramujujta taita ricushpaca calpashpami churita ugllashpa chasquingapaj rin. Shina chasquijpipash churica nalita shinashcamandami canba huahua canatapash na merecinichu nishpa huacan. Chaimi taitaca shungu faquirishpa paipa churigutaca arripintirishcata ricun. Chaimi taitaca shuj fiestata rurashpa, ali ropata churachichun paipa trabajadorcunataca mandan. Shinami paipa churita juyashcata ricuchin.

 9. Congregacionman tigramuchun ayudangapaca ¿ima cualidadcunatata charina capanchi? (“Congregacionman tigramuchunga ¿imashinata ayudaita ushapanchi?” nishca recuadrota ricupangui).

⁹ Jesús parlashca chimbapuraipi taitashnami Jehová Diospash shuj juyaj taita can. Jehová Diosca congregacionmanda caruyashcacunata ninanda juyaimandami paicuna tigramuchun munan. Ñucanchicunapash Jehová Dioshnami cana capanchi. Congregacionmanda caruyashcacuna tigramuchunmi ayudaita ushapanchi. Chaipaca cai cualidadcunatami charina capanchi: pacienciata, intindinata, juyanata. Shinapash ¿imamandata cai cualidadcunata charinaca minishtirishcapacha can? ¿Imashinata cai cualidadcunata charita ushapanchi?

10. Congregacionmanda caruyashcacunata ayudangapaca ¿imamandata pacienciata charina minishtirin?

¹⁰ Congregacionmanda caruyashcacunataca pacienciahuanmi tratana capanchi. Paicuna cutin Jehovapa amigocuna tucuchunga tiempomi minishtirin. Tauca huauquipanicunaca ancianocuna, congregacionmanda huauquipanicunapash cutin cutin paicunata visitajpimi congregacionmanga tigrai ushashca. Nancy shuti paniguca Asiamandami can. Paica ninmi: “Congregacionmanda shuj ñañagumi ashtacata ayudahuarca. Paica paipa paya ñañatashnami juyahuarca. Jehovata sirvishpa ishcandicuna cushilla yalishcatapashmi yarichihuarca. Ñuca imashina sintirishcata parlajpica pacienciahuanmi uyahuan carca. Consejana cajpipash consejahuanllami carca. Paisi ñucapa alipacha amigami carca. Siempremi ayudahuarca” nishpa.

11. Pitapash intindinaca ¿imamandata minishtirishca can?

¹¹ Shuj huauquita o shuj panita llaquilla cajta intindinaca pomadaguta shuj chugrishcapi churanshnami can. Huaquin huauquipanicunaca talvez pipash paicunata nali sintichishcamandami congregacionmanda caruyashca. Cutin shujcunaca ñucataca yangamanda juchachishpami nali sintichihuarca nishpami talvez pensanga. Chaimi paicunaca paicunata ali uyachun, intindichunbash minishtin (Sant. 1:19). María paniguca ashtaca tiempotami congregacionmandaca caruyashca carca. Paica ninmi: “Pipash ñucata uyahuachun, intindihuachunmi minishtircani” nishpa.

12. Congregacionmanda caruyashcacunataca Jehová Diosca ¿imashinata ayudan? Intindichipai.

¹² Jehová Diosca huascahuan aisajunshnami ñucanchita juyashcataca ricuchin. Caita ali intindingapaca caipi pensaripashunchi. Shuj pozo utujupi urmashcanchiman. Chaimi ñucanchillaca na llujshita ushanchiman. Chaimi ñucanchita llujchichunga pipash shuj huascata shitamuchun minishtipanchiman. Jehová Diosca paimanda caruyashca israelitacunataca nircami: ‘Ñucaca, [cangunataca] huascahuan aisanshnami, juyashpa ñucapaman pushamurcani’ nishpa (Os. 11:4). Cunanbipash congregacionmanda caruyashca huauquipanicunataca shinallatami nijun. Congregacionmanda caruyashcacuna paicunapa problemacunahuan na ushajujpica Jehová Diosca paicunata ayudangapami munan. Chai huauquipanicunaca chai pozo utujupi urmashca cuendami can. Chaimi paicunata juyaimanda Jehová Diosca congregacionman tigramuchun munan. Paicuna tigramuchunga quiquindapashmi utilizaita ushan.

13. Huauqui Pabloca ¿imamandata congregacionman tigrangapaj munarca?

¹³ Congregacionmanda caruyashcacunataca Jehovapash, ñucanchicunapash paicunata ninanda juyashcatami yarichina capanchi. Caishuj temapi parlashca Pablo shuti huauquica 30 yali huatacunatami congregacionmanda caruyashca carca. Paica ninmi: “Shuj punllaca ñuca huasimanda llujshishca jipallami shuj mayorlla paniguhuan tuparircani. Paica cushi cushi, juyaihuanmi saludahuarca. Paihuan parlajushpaca shuj huahuashnami ninanda huacai callarircani. Quiquindaca Jehovallatami cachamushca yarin nircanimi. Chai jipallami congregacionman cutin tigrangapaj decidircani” nishpa.

14. Lucas 15:4, 5​pi nishca shinaca ¿imatata shuj michijca ruran?

¹⁴ Congregacionman cutin tigramushca huauquipanicunaca paicunata ayudachun, animachunbashmi minishtin. Paicunaca Jesús parlashca chimbapuraipi tucuita yanga tucuchishca jovenshnami shungu faquirishcashna llaqui llaqui sintiringa. Paicunaca cai nali mundomanda llujshishcamandami espiritualmentepash ashata nali canga. Chaimi paicunataca Jehovapi tucui shunguhuan crishpa catichun ayudana capanchi. Chingashca llamagumanda parlashca chimbapuraipica Jesusca nircami, llamaguta michijca llamaguta tarishpaca marcashpami chaishuj llamagucunapamanga apan nishpa. Llamata michijca chingashca llamaguta taringapaca tiempotami llujchishca. Chingashca llamaguca paimandallata na ri ushajpimi llamata michijca chaishuj llamagucunapaman apana can (Lucas 15:4, 5, liingui).

15. Congregacionman tigramuchunga ¿imatata rurana capanchi? (“Paicunata ayudangapaca ¿imatata charipanchi?” nishca recuadrota ricupangui).

¹⁵ Congregacionmanda caruyashcacuna tigramujpica, paicuna espiritualmente ali cachunmi tiempoguta llujchishpa ayudana capanchi (Rom. 15:1). Paicunata ayudangapaca, Jehová Diosca paipa espíritu santota, Bibliata, publicaciongunatapashmi cushca. Paicunata ayudanamanda parlashpaca shuj ancianoca ninmi: “Congregacionman tigramushca tauca huauquipanicunaca paicunata shuj huauqui o shuj pani Bibliamanda cutin yachachichunmic minishtin” nishpa. Chaimi ancianocuna shuj huauquita o panita Bibliamanda yachachipai nijpica cushijushpa yachachinalla capanchi. Ancianoca ninbashmi: “Congregacionman tigramushcacunaca shuj alipacha amigotapashmi minishtin” nishpa.

16. Angelcunaca ¿imashinata ayudanajun?

¹⁶ Congregacionman tigrangapaj munajuj huauquipanicunata tarichunga angelcunami ayudanajun (Apoc. 14:6). Por ejemplo, Ecuadormanda Silvio shuti huauquica, congregacionman cutin tigrangapaj munaimandami Jehovata tucui shunguhuan mañajurca. Pai mañajujpillatami ishcai ancianocunaca paipa huasiman chayarca. Chai ratomi ancianocunaca Silvio huauquita ayudarca.

17. Congregacionmanda caruyashcacunata ayudashcamandaca ¿imashinata sintiripanchi?

¹⁷ Shuj huauqui o shuj pani congregacionman tigrachun ayudashpaca ñucanchicunallatami ninanda cushijupanchi. Cunanga congregacionmanda caruyashca huauquipanicunata ayudaj shuj precursor huauqui imata nijta ricupashunchi. Paica ninmi: “Cushijuimandami huacaitapash huacanayan. Jehová Dios paipa llamagucunata juyaimanda, Diablopa maquimanda cacharichijta ricushpaca ninandami cushijuni. Ñucapash Jehovata ayudashcamandaca ninandami cushijupani” nishpa (Hech. 20:35).

18. Congregacionmanda caruyashca cashpaca ¿imatata na cungana capangui?

¹⁸ Quiquin congregacionmanda caruyashca cashpapash Jehová Dios ninanda juyajta, congregacionman tigramuchun munajujtapash na cunganachu capangui. Congregacionman tigramungapaca quiquinllatami ninanda esforzarina capangui. Shinapash Jesús parlashca chimbapuraimanda taitata yaripangui. Chai taitashnami quiquin congregacionman tigramuchun Jehová Diosca munan. Tigramujpica cushijushpami chasquinga.