Cusahuarmicuna cushilla, ali causangapaca ¿imatata rurana can?

1-3. Cusahuarmicunaca ¿ima llaquicunatallata charin? (Callari dibujota ricupangui.)

SHUJ cazado huauquica 38 huatacunata paipa huarmihuan cushilla causashpami nirca: “Huarmihuan ciertopacha ali causangapaj munashpa, tucui shunguhuan esforzarijpica Jehová Diosca bendicianmi” nishpa. Shinlli cajpipash cusahuarmicunaca cushilla, ali causaita ushanmi. Ima llaquicuna ricurijpipash ayudari ushanmi (Prov. 12:4).

² Ali causangapaj munashpapash Bibliapi nishca shinaca, cazarashcacunaca tauca ‘llaquicunatami’ charin (1 Cor. 7:28). Huaquinbica ishcandicuna juchayu caimandami imacunatapash randimanda nirishpa, randimanda llaquichirishpa aliguta parlaitaca na ushan (Sant. 3:2, 5, 8). Ashtaca cusahuarmicunacarin, trabajana, huahuacunata viñachinami can. Chai jahuapash culquipash na pactan, imapash ungüicuna o imapash llaquicunami ricurin. Chaimandami cusahuarmicunaca llaquirishca, shaijushca can, parlaringapaj tiempotallapash na charinllu. Ashtahuangarin, asha asha juyarinatapash saquishpami ñana respetarin. Huaquin cusahuarmicunacarin, ‘nali munaicunamanda’ caruyanami can. ‘Nali munaicunaca’ ¿maijanda can? Nali munaicunaca shuj huarmihuan o shuj jarihuan falta urmana, imapash pinganai cosascunata rurana, culirarina, pliturina, pihuanbash celana, imagumandapash fiñanajunami can (Gál. 5:19-21).

³ ‘Tucurimui punllacunapi’ causanajushcamandacarin paicunapilla pensarij gentepuracunapi, Taita Diosta na respetajpuracunapimi causanchi. Paicunapa yuyaicunata catishpaca ashtaca llaquicunatami cusahuarmicunaca charinga (2 Tim. 3:1-4). Diablopash cusahuarmicuna ali causachunga na munanllu. Chaimandami apóstol Pedroca nirca: ‘Cangunata fiñaj Diabloca, león huacashpa pitapash micungapaj mascajunshnami muyuriajun’ nishpa (1 Ped. 5:8; Apoc. 12:12).

 4. Problemacuna ricurijpipash ¿imashinata cusahuarmicunaca cushilla, ali causai ushan?

⁴ Japón llactamanda shuj huauquica ninmi: “Culquimandami ninanda preocuparin carcani. Ñuca huarmihuan parlangapaca tiempopash na tiarcachu. Paica llaquillami causajurca. Jipamangarin ungurcami. Huaquinbicarin ninanda preocuparishca caimandami ñucanchipurara fiñanajun carcanchi” nishpa. Imashinami ricupanchi, cusahuarmi causaipica shuj shuj problemacunami ricurin. Shinapash Jehová Diospa ayudahuanga chai problemacunata mishashpami cushilla, ali causai usharin (Salmo 127:1, liingui). Cushilla, ali causaj cusahuarmicunaca shuj ali, shinlli huasishnami can. Shinapash imashinami huasi pircata shayachingapaca bloquescunapash, cementopash minishtirin shinallatami cusahuarmicuna ali causangapaca huaquin ayudacunata minishtin. Shinaca cazarashcacuna cushilla, ali causachunga ¿imata bloquescunashna can? Picha ayudacunata ricushpa callarishunchi. Chai jipaca, juyaipash imashina cementoshna ayudajtami ricupashun.

5, 6. Cusahuarmicunaca ¿imashinata paicunapa causaipi Jehová Diospi pensarishcata ricuchin?

⁵ Cusahuarmicunataca Jehová Diosta juyana, cazunami ali causachun ayudan (Eclesiastés 4:12, liingui). Cusahuarmicunaca Jehová Diospa consejocunata uyashpami paicunapa cusahuarmi causaipi Jehovapi pensarinajushcata ricuchin. Punda tiempo israelitacunataca Jehová Diosca nircami: ‘Cangunapa huashamanda cashna nijtami uyanguichi: “Ñanga caitamari, cai ñanda purichi. Caimandaca, ali ladomanbash, lluqui ladomanbash na Ilujshinachu canguichi” nishpa’ (Is. 30:20, 21). Cunan punllacunapi cusahuarmicunaca ishcandillata Bibliata igual liishpami Taita Diostaca ‘uyanajun’ (Jos. 1:8). Shinallata Familiahuan Adorana Tutapi yachajungapaj tandanajushpami cushilla sintirin, Jehovata sirvingapajpash animarin. Ashtahuangarin, Jehovata cada punlla igual mañanami Diablopa trampacunapi ama urmachun ayudanga.

⁶ Alemania llactamanda Gerhard shuti huauquica ninmi: “Ñucanchipura fiñanajushpa na cushilla causai ushajujpica, Bibliapa consejocunami ama ñapash fiñarichun, perdonarichun ayudan. Na ñapash fiñarishpa, perdonarishpallami cusahuarmicunaca ali causai ushan” nishpa. Cusahuarmicuna ishcandillata Jehová Diosta igual sirvingapaj shinllita esforzarishpaca Jehovaman ashtahuan quimirishpami paicunapurapash ashtahuan ali llevarin.

 7. Cusacunaca ¿imashinata Bibliapi mandashcata pactachina can?

⁷ Cusacunaca Bibliapi mandashcata pactachishpami cusahuarmi causaipica cushilla, ali causai tiachun ayudanajun. Bibliapica cusacunataca mandanmi: ‘Cristoca tucui jaricunatami umashna mandajun. Cusapash paipa huarmitaca umashnami mandajun’ nishpa (1 Cor. 11:3). Apóstol Pablo nishca shinaca, Jesuspa ejemplota catishpami cusacunaca familiata ñaupaman pushana can. Jesusca humildemi carca. Paipa catijcunataca juyashpa, llaquishpa, intindishpa, na ñapash fiñarishpami tratan carca. Na ima horapash maltratashpa, mandashpalla charinllu carca (Mat. 11:28-30).

 8. Huarmi juyachun, respetachun munashpaca ¿imatata cusaca rurana can?

⁸ Jesusta catij cusacunaca ñucata na cazuhuanguichu, na respetahuanguichu nishpa paipa huarmita cutin cutin rimajunataca na minishtinllu. Ashtahuangarin, huarmicuna imashina cajta ‘aliguta yarishpami’ llaquishpa tratan. Shinallata, ‘huarmicunataca faquirinalla vasogutashna alicachishpami’ charin (1 Ped. 3:7). Chaimandami gentepi cashpa paicunalla cashpapash huarmicuna imashina sintirijta intindishpa juyaihuan respetohuan tratan. Imata parlashpa, imata rurashpapash paipa huarmita ninanda alicachishcatami ricuchin (Prov. 31:28). Caipi yuyaicunata catishpa aliguta ñaupaman pushajpica, huarmicunapa munaimi cusataca juyan, respetanbash. Shina aliguta causanajujta ricushpami Jehová Diosca ishcandicunatallata bendician.

 9. ¿Imashinata huarmicunaca humilde cashcata, cusata aliguta cazushcata ricuchina can?

⁹ Jehová Diospa consejocunata alicachina, Jehová Diosta tucui shunguhuan juyanami Jehovata cazuchun ayudan (1 Ped. 5:6). Shinapash ¿imashinata huarmicunaca Jehová Diosta cazushcata ricuchin? Huarmicunaca cusata apoyashpa, ayudashpami Jehová Diosta cazushcata ricuchin. Bibliapica ninmi: ‘Huarmicuna cangunapa cusacunataca Jesuspi crij cashcamandami, aliguta cazuna canguichi’ nishpa (Col. 3:18). Shinapash, cusapa decisionda huaquinbi nalicachishpaca ¿imatata huarmica rurana can? Bibliapa mandashcacunata na huashaman saquijujpica cusata apoyanami can (1 Ped. 3:1).

10. Huarmicunapaca ¿imamandata cusata aliguta cazuna, ayudanaca ali can?

¹⁰ Bibliapi nishca shinaca, huarmica cusapa “cumba”, cusata ‘ayudajmi’ can (Gén. 2:20). Chaimandami cusa imapash decisionda agllajpica pai imata pensajushcata huarmica parlai ushan. Shinapash pai imata pensashcata rurachunga na atichinachu can. Huarmi aliguta pensarishpa parlanata yachajpimi cusapash huarmita aliguta uyan (Prov. 31:10-31). Huarmicuna, cusacunata aliguta cazushpa, ayudashpami cangunapa familia cushilla, tranquilo, ali causachun ayudanajunguichi. Ashtahuangarin Jehová Dios mandashcata pactachishpaca ishcandillatami cushijunguichi (Efes. 5:22).

11. ¿Imamandata perdonanaca minishtirishcapacha can?

¹¹ Cusahuarmi cushilla, ali causangapaca perdonanatapashmi minishtin. Perdonanapash huasita shayachingapaj bloques cuendami can. Cusahuarmicuna ali llevaringapaj esforzarishpa randimanda perdonarishpaca, ashtahuan cushilla, alimi causai ushanga (Efes. 4:32). Cutin, punda pandarishcacunata yarishpa, chaicunatalla cutin cutin alzashpa fiñanajushpaca cusahuarmica ashtahuan jatun llaquicunatami charinga. Imashinami pirca partirishpaca ñana shinlli can, shinallatami imamandapash nanarishcalla purina, pandarishcata yarishpalla causanaca cusahuarmi ali causanataca huaglichin. Jipamangarin perdonaitapash na ushangachu. Shinapash Jehová Diospa ejemplota catishpa randimanda perdonarishpaca ashtahuan alimi llevaringa (Miq. 7:18, 19).

12. ¿Imamandata Bibliapica nin, ciertopacha juyashpaca pandarishcatapash ‘pacashpa anchuchinmi’ nishpa?

¹² Ciertopacha juyashpaca “na fiñashcalla causangapaj munanllu”. Ashtahuangarin pandarijpipash chai pandarishcataca ‘pacashpa anchuchingapami’ munan (1 Cor. 13:4, 5; 1 Pedro 4:8, liingui). Cutin cutin pandarishpa llaquichijpipash perdonanllami. Shuj punllaca mashna viajeta perdonana cani nishpami Pedroca Jesusta tapurca. Shina tapujpimi Jesusca nirca: “Canchis chunga canchistapash yalishpami perdonana cangui” nishpa (Mat. 18:21, 22). Shinaca, Jesusta catijcunaca mashna viaje cajpipash perdonanllami (Prov. 10:12).a

13. Perdonaita na ushashpaca ¿imatata rurana capanchi?

¹³ Annette shuti huarmiguca ninmi: “Cusahuarmicuna na perdonarishpaca nanarishcalla causashpami randimanda seguro, ali sintiritaca na ushan. Shina sintirinaca veneno cuendami can. Perdonarishpami cusahuarmicunaca ali llevarishpa, shujllashna caita ushan” nishpa. Shinaca, perdonaita na ushashpaca ¿imatata rurana canchi? Perdonai ushangapaca huarmi o cusa imata ali rurajta ricushpami chai cosasgucunamanda felicitana canchi (Col. 3:15). Shina rurashpami tranquilo sintirishpa ñucanchi huarmihuan, cusahuanga ashtahuan ali llevarishun. Jehová Diospash bendiciangami (Rom. 14:19).

14, 15. a) Lucas 6:31​pica ¿imatata Jesusca intindichirca? b) ¿Imamandata cusahuarmicunaca Jesuspa consejota pactachina can?

¹⁴ Tucuicunallatami shujcuna ñucanchita respetohuan ali tratachun munanchi. Ñucanchita ali uyajpi, imashina sintirijujta intindijpica alimi sintirinchi. Shinapash huaquingunaca nishcami: “Imashinami ñucata nali tratahuan shinallatami ñucapash nali tratasha” nishpa. Gentecuna razonhuan shina nijpipash Bibliapica ninmi: ‘Ama pai imashina llaquichishcashnallatami paimanbash tigrachisha ninguichu’ nishpa (Prov. 24:29). Shujcuna nali tratajpipash paicunata imashina tratana cashcata ricuchingapami Jesusca nirca: ‘Imashinami shuj gentecuna cangunaman aliguta rurachun munanguichi, chashnallatami cangunapash paicunaman alita rurana canguichi’ nishpa (Luc. 6:31). Jesús nishca shinaca, imashinami ñucanchita ali tratachun munanchi, shinallatami shujcunatapash ali tratana canchi. Ñucanchita llaquichijpica na randi llaquichinachu canchi. Jesuspa consejota cazushpami cusahuarmicunapash paicunata imashina tratachun munashcata yarishpa huarmita o cusataca tratana can.

¹⁵ Cusahuarmicuna shujllashna cangapaca huarmi o cusa imashina sintirijujtaca yariami cana can. Sudáfrica llactamanda huauquica ninmi: “Huaquinbi culirarishpapash Jesuspa consejota yarishpami, ñucanchita imashina tratachun munashcashna randimanda respetohuan, ali tratarinchi” nishpa.

16. Cusahuarmicunaca ¿imatata nunca na rurana can?

¹⁶ Ñucanchi huarmi o cusa ima nali costumbrecunata charijtaca nunca na shujcunaman parlajunachu canchi. Imapi pandarijujtapash nunca na quejarishpa shujcunaman parlajunachu canchi. Chaicunataca transiashpallapash na nijunachu canchi. Cusahuarmica na misharishpa caparijuna, imatapash nishpa huarmita o cusata llaquichijunachu can. Juchayu caimandacarin, tucuicunallatami siempre imagutapash nishpa imagupipash pandarinchi. Shinapash juchayumi cani nishpallaca na huarmita o cusataca imacunatapash nishpa pingaichijuna, llaquichijunachu canchi. Tangashpa saquina o huajtanacarin nimamanda nalichu can (Proverbios 17:27; 31:26, liingui).

17. ¿Imashinata cusacunaca huarmita ali tratashcata ricuchi ushan?

¹⁷ Huaquin llactacunapica jaripacha cani nishpa jariyajungapami cusacunaca huarmicunata maltratashpa charin. Shinapash Bibliapica ninmi: ‘Ninan shinlli runapa randica, na ñapash fiñarij runami ashtahuan ali. Paipa munaita jarcaj runami pueblota [llaquichij] runamandapash ashtahuan yali ali’ can nishpa (Prov. 16:32). Jesuspa ali ejemplota catishpa ama ñapash fiñaringapaca shinllitami jaricunaca esforzarina can. Ashtahuan jari cashcata ricuchingapaca huarmita rimana, macanaca na minishtirinllu. Chashna jaricunaca Jehová Diospa ñaupajpi ali ricuritaca na ushanllu. Bibliapica ninmi: “Fiñarishpapash, juchataca na ruranachu canguichi” nishpa (Efes. 4:26).

18. ¿Imamandata juyaita ricuchinaca minishtirishcapacha can?

¹⁸ (1 Corintios 13:4-7, liingui.) Juyaita ricuchinaca cusahuarmi causaipica minishtirishcapachami can. Bibliapica ninmi: ‘Cangunataca mushujta churachinshnami Taita Diosca juyashpa, paipalla causachun agllarca. Shinamandami, tucui shunguhuan pitapash llaquishpa juyashpa, na jariyashpa, pihuanbash aligutapacha causana canguichi. Ashtahuangarin juyarishpa causanatami yariashpa causana canguichi. Shina juyarishpami, tucuicuna aliguta causanguichi’ nishpa (Col. 3:12, 14). Cusahuarmicunaca Jesuspa ejemplota catishpami huarmita o cusataca llaquishpa juyana can. Ishcandillata juyarinami bloquescunata unijuj cementoshna can. Culquimanda, ungüimanda, pandaricunamanda o paicunapa familiapi imapash llaquicuna shamujpica randimanda juyarishpami cusahuarmicunaca llaquicunata aguantai ushanga.

19, 20. a) Cusahuarmicuna cushilla, ali causangapaca ¿imatata minishtin? b) Shamuj temapica ¿imatata yachajupashun?

¹⁹ Cusahuarmicuna cushilla, ali causangapaca randimanda shinllita esforzarinata, huarmitalla, cusatalla juyanatami minishtin. Problemacuna ricurishcandi ñana ushanichu nijunapa randica chai problemacunata mishashpa igual catinatami yaipi charina can. Ishcandimanda juyarij cusahuarmicunaca Jehovatapash juyashpami problemacuna ricurijpica juyaihuan chai problemacunataca arreglan. Bibliapica ninmi: “Juyaica, ima horapash na tucurinllu” nishpa (1 Cor. 13:8; Mat. 19:5, 6; Heb. 13:4).

²⁰ Cunan tiempopica “tucurimui punllacunapi” causanajushcamandami cusahuarmicunapaca cushilla, ali causanaca shinlli can (2 Tim. 3:1). Shinlli cajpipash Jehová Diospa ayudahuanga cushilla, ali causangami. Shinapash cunan punllacunapi gentecunacarin huarmihuan canatalla, jarihuan canatallami yaria causan. Chaimandami shamuj temapica chai peligromanda cusahuarmicuna imashina cuidarinata yachajushun.