¿Espiritualmente ñaupaman catingapaj esforzarinajunchichu?

1, 2. a) ¿Imashinata Isaías 60:22​pi shimicunaca cai tucurimui punllacunapi pactarijun? b) Jehová Diospa organizacionbica ¿imata ashtahuan minishtirin?

BIBLIAPICA ninmi: “Shuj uchillagumandaca, huaranga huarangashnami tucunga. Ashtahuan ashallagumandaca, ninan shinlli llactashnami tucunga” nishpa (Isaías 60:22). Cai shimicunaca cai tucurimui punllacunapimi pactarijun. Huata 2015​pica 8 millón 220 mil 105 testigo de Jehovacunami mundo enteropi villachinajurca. Jehová Diosca paipa llacta mirashpa catinamanda parlashpaca nircami: “Ñucallatami, caicuna chashna tucuna punllacunataca, ucha pactachisha” nishpa. Imashinami ricunchi, Jehová Diosta ashtahuan ashtahuan sirvingapami esforzarina canchi. Chaimanda tapuripashunchi: “¿Villachingapaj, yachachingapaca esforzarijunichu?” nishpa. Ashtaca huauquipanicunaca precursor regular o precursor auxiliar shinami sirvinajun. Cutin huaquingunaca villachinapi ayudangapami shuj ladopi sirvingapaj rishca. Cutin shujcunaca Tandanajui Huasicunata rurashpami shinllita ayudanajun.

² Mundo enteropica cada huatami casi 2 mil mushuj congregacionguna tiai callarin. Chai congregaciongunapica ancianocuna, siervo ministerialcunami minishtirin. Chaimandami cada huata ashtaca ashtaca huauquicuna siervo ministerialcuna tucuchun, cutin ña siervo ministerialcuna cashpaca ancianocuna tucuchun minishtirin. Imashinami ricunchi, jaricuna cashpa o huarmicuna cashpapash tucuicunami Jehová Diosta sirvingapaca ‘ashtahuan rurashpa catina canchi’ (1 Corintios 15:58).

3, 4. Jehovata ashtahuan sirvingapaca ¿imacunatata rurangapaj munanchiman?

³ (1 Timoteo 3:1, liingui). Apóstol Pabloca congregacionbi yachachishpa ashtahuan responsabilidadcunata charingapaj munaj huauquicunataca ashtacatami felicitarca. Apóstol Pablopa shimicunata liishpaca, imapash carupi cajpi japingapaj munashpa ninanda chutarishpa esforzarijtami pensarinchi. Ali intindingapaca shuj ejemplota churapashun. Shuj huauquica siervo ministerial cangapaj munashcanman. Shinapash, paipa causaipi ali cualidadcunata charingapaj esforzarina cashcata cuenta japishcanman. Ña chai cualidadcunata charishpa siervo ministerial tucushpaca anciano cangapami shinllita esforzarishpa catinga.

⁴ Huaquin huauquicunaca Jehová Diosta ashtahuan sirvingapami paicunapa causaipi huaquin cambiocunata ruranajun. Huaquingunaca precursorcuna cangapaj, Betelpi sirvingapaj o Tandanajui Huasicunata rurashpa sirvingapami munan. Shinaca, espiritualmente ñaupaman catichun Biblia imashina ayudajta ricupashun.

 5. Jehová Diosta ashtahuan sirvingapaca ¿imashinata jovengunaca paicunapa causaita aprovechai ushan?

⁵ Jovengunaca sanocuna caimanda, ashtaca fuerzata charimandami Jehová Diostaca shuj shuj ruraicunapi ashtahuan sirvita ushan. Bibliapica ninmi: “Jovengunaca shinllicuna caimandami ali ricurin. Rucullagucunaca ña ruculla caimandami juyailla ricurin” nishpa (Proverbios 20:29, NM). Betelpi sirvinajun huaquin jovengunaca librocunata rurashpa, imprimishpami sirvinajun. Cutin huaquingunaca Tandanajui Huasicunata rurashpa o arreglashpami ayudanajun. Cutin shujcunaca llaqui apashca llactacunapimi ayudangapaj rin. Cutin ashtaca precursorcunaca shuj ladocunapi villachigringapami shuj shimita yachajun.

6-8. a) Jehová Diosta ashtahuan sirvichunga ¿imata shuj jovendaca ayudarca? ¿Ima bendiciongunata chasquirca? b) ¿Imashinata Jehová Dios ‘ali cajta’ ricui ushapanchi?

⁶ Jehová Diosta juyaimanda ashtahuan ali sirvingapaj munashpapash, huaquinbica Aaron shuti huauquishnami sintiri ushanchiman. Chai huauquica Jehová Diosta cushilla sirvingapaj munashpapash na cushilla sintirinllu carca. Paica huahuamandapachami tandanajuicunaman rin carca, villachingapapash llujshinmi carca. Shinapash siempremi aburririn carca. Shinaca ¿imatata chai huauquica rurarca?

⁷ Chai huauquica cada punlla Bibliata liingapaj, tandanajuicunapa prepararingapaj, comentangapami esforzarirca. Ashtahuanbash, ashtaca viajecunatami Jehová Diosta mañai callarirca. Tucui chai ruraicunami espiritualmente ashtahuan ñaupaman catichun ayudarca. Shinallata, Jehová Diosta ashtahuan rijsishpami Jehovata ashtahuan juyai callarirca. Shinami chai huauquiguca ashtahuan cushilla sintirirca. Jipamanga precursor tucurca, llaqui apashca llactacunapi ayudarca, shinallata shuj llactapi sirvingapapashmi rirca. Cunanga ancianomi can, Betelpimi sirvijun. ¿Imashinata chai huauquica sintirin? Paica ninmi, Jehová Dios ‘ali cajtami’ ñucallata ricushcani nishpa. Chai huauquica Jehová Dioshuan dibi tucushca cuenda sintirishpami paita ashtahuan sirvingapaj munan. Jehová Diosta sirvishpa ashtaca bendiciongunata charinataca tucui shunguhuanmi crin.

⁸ Salmistaca nircami: “Mandaj Dios ali cajtaca, ricushpa yachaichiyari” nishpa. Ashtahuanbash nircami: “Mandaj Diosta mascajcunaca, ima alipash na illajmi causanajunga” nishpa (Salmo 34:8-10, liingui). Tucui ñucanchi fuerzahuan sirvijpi Jehová Dios ninanda cushijujta yachashpaca, ñucanchicunapashmi cushilla sintirinchi. Ashtahuanbash, Jehová Diosca pai nishcashnami ñucanchitaca cuidanga.

9, 10. ¿Imamandata ‘shuyashpa’ catinaca minishtirishca can?

⁹ Huaquinbica Jehová Diosta ashtahuan sirvingapami munanchi. Shinapash congregacionbi responsabilidadcunata na cujpi o ñucanchi causaipi imapash cambio na ricurijpica ¿imatata rurai ushanchi? Shina pasajpica pacienciatami charina canchi (Miqueas 7:7). Jehová Diosllami imamanda shina pasashcataca yachan. Shinapash, Jehová Dios ñucanchicunata siempre ayudanataca na cunganachu canchi. Abrahanda yaripashun. Jehová Diosca Abrahandaca nircami, shuj huahuagutami charigringui nishpa. Shinapash, ashtaca huatacuna jipami Abrahanga shuj churiguta charirca. Abrahanga chai tucui huatacunataca pacienciahuanmi shuyarca. Shinallata Jehová Diospa shimi pactarinatapash siempremi crirca (Génesis 15:3, 4; 21:5; Hebreos 6:12-15).

¹⁰ Huaquinbica shuyanaca na facilchu can (Proverbios 13:12). Shinapash, ñucanchi metacuna na ucha pactarinllu nishpa cutin cutin pensarijushpaca ninandami desanimarishun. Chashna pensarijunapa randica, congregacionbi responsabilidadcunata ali pactachingapaj, ali cualidadcunata charingapami esforzarishpa catina canchi. Shinaca ama desanimaringapaj imata rurana cashcata yachangapaca quimsa yuyaicunata ricupashun.

11. a) ¿Ima cualidadcunata charingapata esforzarina capanchi? b) ¿Imamandata chai cualidadcunata charinaca importante can?

¹¹ Ali cualidadcunata charingapaj esforzarishunchi. Bibliata liishpa, liishcapi pensarishpaca ali yuyaita charinata, aliguta pensarinata, ali decisiongunata agllanatami yachajushun. Congregacionda ñaupaman pushangapaca chashna ali cualidadcunata charingapami huauquicunaca esforzarina can (Proverbios 1:1-4; Tito 1:7-9). Bibliata ashtahuan yachajushpaca Jehová Dios imata pensajtami yachajushun. Shina yachajushpami Jehová Dios alicachishca decisiongunata cada punlla agllashpa shujcunata ali tratanata, culquita ali utilizanata yachajushun. Ropatapash, diversiongunatapash ali ricushpami agllashun.

12. ¿Imashinata imatapash ali pactachijcuna cashcata ricuchi ushanchi?

¹² Ñucanchiman mingashca responsabilidadta ali pactachingapami esforzarina canchi. Jehová Diospa templota rurajushpaca tauca responsabilidadcunapi ayudachunmi Nehemiasca huaquin jaricunata agllarca. Shinaca ¿picunatata Nehemiasca agllarca? Nehemiasca gentecunapa ñaupajpi ali ricurij jaricunatami agllarca. Chai jaricuna Jehová Diosta juyajta, mingashca responsabilidadcunata ali pactachinataca Nehemiasca alimi yacharca (Nehemías 7:2; 13:12, 13). Cunan punllacunapipash shinallatami can. Shuj huauquica paiman cushca responsabilidadta ali pactachingapami shinllita esforzarina can. Shina esforzarijpica shujcunapashmi paitaca alicachinga. Shuj responsabilidadcunatapashmi chasqui ushanga (1 Corintios 4:2). Jaricuna o huarmicuna cashpapash ñucanchiman cushca responsabilidadta ali pactachingapami esforzarina canchi (1 Timoteo 5:25, liingui).

13. Pipash ñucanchita llaquichijpica ¿imashinata Josepa ejemplota cati ushapanchi?

¹³ Jehová Diospa ayudata mascashunchi. Pipash ñucanchita nali tratajpica ¿imatata rurai ushanchi? Ñucanchicunaca imashina sintirishcatami paihuan parlai ushanchi. Shinapash, ñucanchicuna na culpata charishcata ricuchingapalla parlangapaj munajushpaca ashtahuan llaquipimi urmashun. Josepa ejemplota yaripashunchi. Josetaca paipa huauquicunallatami nali tratarca. Jipa punllacunacarin yangamanda juchachijpimi Josetaca preso churarca. Shinapash Joseca Jehová Diospa ayudatami mascarca. Joseca Jehová Diospa shimicuna pactarinata crishpami paita ali sirvishpa catirca (Salmo 105:19). Chai llaqui punllacunapi cashpaca ali cualidadcunata charingapami esforzarirca. Chai cualidadcunami jipa punllacunapi chasquishca responsabilidadta ali pactachichun ayudarca (Génesis 41:37-44; 45:4-8). Pipash ñucanchita llaquichishca cajpica, Jehová Diostami ali yuyaita cuhuai nishpa mañana canchi. Paimi ñucanchicuna tranquilo sintirichun, ñucanchita llaquichishca cajpipash juyaihuan tratachun ayudanga (1 Pedro 5:10, liingui).

14, 15. a) ¿Imamandata ñucanchicuna imashina villachijushcataca aliguta ‘yarina’ capanchi? b) Shujcunamanbash villachingapaca ¿imatata rurai ushapanchi? (Callari fotocunatapash, “¿Imashinata ashtahuan villachi ushanchi?” nishca recuadrotapash ricupangui).

¹⁴ Apóstol Pabloca Timoteotaca nircami, Diospa Shimita ashtahuan aliguta yachachingapami esforzarishpa catina cangui nishpa. Shinallata nircami: “Imashna causanatapash, imata yachachinatapash, aligutapacha canllata yaringui” nishpa (1 Timoteo 4:13, MTQI, 16). Timoteoca ashtaca huatacunata villachishpa purijuimandaca ashtaca experienciatami charirca. Shinaca ¿imamandata esforzarishpa catina carca? Gentecunapa yuyaipash, causaipash cambianmi. Chaimandami Timoteoca gentecuna uyashpa catichun munashpaca, mejorashpa imashina ashtahuan ali yachachinatapash ricuna carca. Ñucanchicunapash villachijushpaca Timoteopa ejemplota catingapami esforzarina canchi.

¹⁵ Villachingapaj rijpica huaquin gentecunaca na huasipi canllu. Cutin shuj pushtucunapica gentecuna huasipi cajpipash, chai huasicunaman o pushtucunamanga na yaicui ushanchichu. Shina pasajpica, chai gentecunaman imashina villachinatami ricuna canchi.

16. Ashtaca gentecuna tiashca pushtucunapi villachingapaca ¿imatata rurai ushapanchi?

¹⁶ Ashtaca huauquipanicunaca ashtaca gentecuna tiashca pushtucunapi villachinatami alicachin. Chaimandami tren paradacunapi, bus paradacunapi, plazacunapi, parquecunapi villachin. Gentecunahuan parlai callaringapaca ¿imatata paicunaca ruran? Huaquingunaca chairalla llujshishca noticiamandami parlan. Shujcunaca huahuacuna ali portarijta ricushpami gentecunahuan parlai callarin o trabajomanda parlan. Gentecuna ali uyajpica, Biblia ima nijta parlai callarishpami tapun, quiquinga imatata caimandaca pensapangui nishpa. Shinami Bibliamanda ali parlai ushashca.

17, 18. a) Ashtaca gentecuna tiashca pushtucunapi cushijushpa villachunga ¿imata ñucanchicunataca ayudanga? b) Quiquinba yuyaipica ¿imamandata villachijushpaca rey Davidpa shimicunata yarina capanchi?

¹⁷ Huaquinbica na rijsishca gentecunahuan callepi parlai callarinaca shinllimi can. Nueva York llactamanda Eddie shuti huauquipash shinallatami pensan carca. Paica precursormi can. Shinapash na rijsishca gentecunahuan parlai ushangapaca ¿imatata rurarca? Familiahuan Adorana Tutapica paipash, paipa huarmipashmi gentecuna na uyangapaj munajpi imata ninata yachangapaj informacionda mascan. Ashtahuangarin, shuj testigo de Jehovacunatami ayudahuai nin. Cunanga Eddie huauquica ashtaca gentecuna tiashca pushtucunapimi cushijushpa villachin.

¹⁸ Cushijushpa ashtahuan ali villachingapaj esforzarijta ricushpaca shujcunapashmi ñucanchicuna espiritualmente ñaupaman catijushcata cuenta japinga (1 Timoteo 4:15, liingui). Huaquinbicarin shujcuna testigo de Jehová tucuchunbashmi ayudai ushashun. Rey Davidca nircami: “Mandaj Diostaca, tucui punllacunapimi alicachijushalla. Ñuca shimihuanga, paitaca alicachijushallami. Mandaj Dioshuanmi, ñuca almaca cushijunga. Ali shungucunami, paita uyashpaca cushijunajunga” nishpa (Salmo 34:1, 2).

19. ¿Ñucanchi munashcashna Jehovata na sirvi ushashpapash ¿imamandata cushilla caita ushapanchi?

¹⁹ Rey Davidca nircapashmi: “Mandaj Dioslla, tucui can rurashcacunaca canda alicachinajuchun. Cambajlla causajcunapash, canda alicachinajuchun. Can mandajuj llactaca, punchapamba cajta villanajuchun. Cambaj ninan ushaimandapash parlanajuchun. Shina parlajpimi, huañuna aichayu runacunaca, ninan ushaihuan can rurashcacunataca yachanajunga. Can mandajuj llactapash, punchapamba juyaillagupacha cajtapashmi yachanajunga” nishpa (Salmo 145:10-12). Jehová Diosta juyajcuna, tucuipi cazujcunaca tucui shunguhuanmi Jehovamanda shujcunaman parlangapaj munan. Shinapash ña mayorlla caimanda o huaquinbica ungushcalla parajuimandami munashpapash ñana huasin huasin rishpa villachi ushanchi. Shinaca ¿imatata rurai ushanchi? Na cunganachu canchi, doctorcunaman o enfermeracunaman villachishpaca Jehová Diostami alabanajunchi. Cutin ñucanchi crishcacunamanda preso cashpaca ¿imatata rurai ushanchi? Preso cashpapashmi Jehová Diosmanda shujcunaman parlai ushanchi. Chaita ricushpaca Jehová Diosca ninandami cushijun (Proverbios 27:11). Jehová Diosca ñucanchi familiacuna na paita adoranajujpipash ñucanchicuna paita sirvijujta ricushpaca ninandami cushijun (1 Pedro 3:1-4). Shinlli llaquicunahuan cashpapashmi Jehová Diosta jatunyachi ushanchi, paipa amigo caita ushanchi, espiritualmente ñaupaman cati ushanchipash.

20, 21. Espiritualmente ñaupaman catingapaj esforzarishpaca ¿imashinata shujcunatapash ayudapanchi?

²⁰ Paipa amigocuna cashpa catingapaj, ñucanchi rurai ushashcata rurangapaj esforzarishpa catijpica Jehová Diosca ninandami bendicianga. Ñucanchi causaipi, ñucanchi horariopi cambiocunata rurashpaca, Jehová Dios imata ruranata parlangapami ashtahuan oportunidadta charishun. Ñucanchi huauquipanicunatapash tal vez ashtahuan ayudaita ushashunmi. Ñucanchicuna congregacionbi sirvingapaj ninanda esforzarijushcata huauquipanicuna ricushpaca ashtahuanmi ñucanchitaca juyanga.

²¹ Jehová Diosta mashna huatacunata sirvinajushpapash tucuicunallatami paipa ashtahuan ali amigo cashpa catingapaj, espiritualmente ñaupaman catingapaj esforzarina canchi. Cati temapica espiritualmente ñaupaman catichun shujcunata imashina ayudanatami yachajushun.