Cutin causarinaca ¿imata can?

Griegomanda japishca shimitami Bibliapica “cutin causarina” nishpa churashca. Chaica “cutin jatarina o shayarina” nisha ninmi. Pipash cutin causarishpaca chai persona cutin jatarijuj cuendami canga. Causarishpaca chai persona nara huañushpa charishca yuyaicunahuanllatami causaringa (1 Corintios 15:12, 13).

Escrituras Hebreaspica cutin causarina shimica na tiajunllu. Shinapash cutin causachi tucuna esperanzamandaca parlanmi. Por ejemplo Taita Diosca profeta Oseasmaga cashnami nirca: “Paicunataca, Seolman rinamandapash quishpichishami, huañunamandapash llujchishami” (Oseas 13:14; Job 14:13-15; Isaías 26:19; Daniel 12:2, 13).

¿Huañushcacunaca maipishi causaringa? Huaquin gentecunaca cielopimi Jesushuan reycuna cangapa causachi tucunga (2 Corintios 5:1; Apocalipsis 5:9, 10). Cieloman rijcuna causachi tucunamanda parlashpami Bibliapica “punda causarina” nin (Apocalipsis 20:6; Filipenses 3:11). Shinaca jipa causarinapash tiashcatami ricuchin. Jipamanga ashtaca ashtaca gentecunami causaringa. Paicunaca cai Alpapimi causanga (Salmo 37:29).

¿Imashina cuerpohuanda causaringa? Taita Diosca huañushcacunata causachichunga Jesusmanmi poderta cushca (Juan 11:25). Chai poderhuanmi Jesusca ‘huañushpa pambai tucushcacunataca’ causachinga. Paicunataca nara huañushpa charishca yuyaicunahuanllata, paicuna parlashca parlohuanllatami causachinga (Juan 5:28, 29). Cai Alpapi causangapa causachi tucushcacunaca sano, jucha illaj cuerpotami charinga (Isaías 33:24; 35:5, 6). Cutin cielopi causangapa causachi tucushcacunaca shuj ‘espíritu cuerpohuanmi causaringa’ (1 Corintios 15:42-44, 50).

¿Picunatallashi causachinga? Bibliapica ‘[alita rurajcuna], [nalita rurajcuna] huañushcatapash Taita Diosca causachinatami’ yachachin (Hechos 24:15). Alita rurajcuna purapica Noé, Abrahán, Sarapashmi causaringa (Génesis 6:9; Hebreos 11:11; Santiago 2:21). Cutin nalita rurajcuna purapica Diosta, paipa mandashcacunatapash na rijsi chayashca gentecunapashmi causaringa.

Shinapash Diosta nimamanda na cazungapaj munaj gentecunaca cutinga na causachi tucungachu. Chai nali gentecuna huañushpaca para siempremi huañunga (Mateo 23:33; Hebreos 10:26, 27).

¿Huañushcacunaca imaurashi causachi tucunga? Cieloman rijcunaca Jesús mandai callarij tiempopi causachi tucuna cashcatami Bibliapica nijurca. Jesusca 1914 huatapimi mandai callarirca (1 Corintios 15:21-23). Cutin cai alpapi causangapa causachi tucunacunaca Jesús cai alpata Mil Huatacunata Mandajujpimi causachi tucunga. Chai tiempopimi cai alpaca shuj paraíso tucunga (Lucas 23:43; Apocalipsis 20:6, 12, 13).

¿Huañushcacunaca ciertopachachu causaringa? Ari. Bibliapica nueve gentecuna causarishcamandami parlan. Chaitaca shuj gentecunapashmi ricunajurca (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; 20:7-12; 1 Corintios 15:3-6). Lázaro causachi tucushcata yaripashun. Paica chuscu punllacunatami ña huañushca carca. Shinapash Jesusca tucuicuna ricujtami Lazarotaca causachirca (Juan 11:39, 42). Jesusta na ricunayachij gentecunapashmi Jesús Lazarota causachishcata yachaj chayarca. Chaimandami paicunaca Jesustapash, Lazarotapash huañuchingapa munanajurca (Juan 11:47, 53; 12:9-11).

Bibliapica Taita Diosca huañushca gentecunata cutin causachingapa ushaita charijtami ricuchin. Diosca gentecuna nara huañushpa imashina cashcataca tucui tucuitami yarin. Paica Tucui Ushaita charijmi can. Chaimandami huañushcacunataca causachi ushan (Job 37:23; Mateo 10:30; Lucas 20:37, 38). Huañushcacunata causachingapa poderta charimandami Taita Diosca huañushca gentecunata causachingapapacha munan. Bibliapica “cambaj maquihuan rurashcataca juyanguimi” nijunmi (Job 14:15). Cai shimicunaca huañushca gentecunata causachijuj horas Taita Dios imashina sintirinatami ricuchin.

Cutin causarinamanda panda crishcacuna

Huaquingunaca nishcami: Causarishpaca ñucanchipa na huañuj almami cutin ñucanchi cuerpomanllata tigran.

Bibliapica ninmi: Bibliapica almaca shuj causaj cuerpo cashcatami ricuchin. Cuerpo huañushca jipa imapash causashpa catin cashcataca na nijunllun (Génesis 2:7; Ezequiel 18:4). Pipash causarishpaca nara huañushpa charishca cuerpohuanshnallatami causarin.

Huaquingunaca nishcami: Huaquingunaca causarishcandimi tucuchi tucunga.

Bibliapica ninmi: Huañuimanda causarishcacunamandaca Bibliapica “imatapash nalitalla rurashpa causashcacunaca, ninanda llaquichi tucungapajmi causaringa” ninmi (Juan 5:29). Shinapash nara huañushpa nali cosascunata rurashcamandaca na juzgai tucungachu. Chaipa randica causarishca jipa rurashca cosascunamandami juzgai tucunga. Chaimandami Jesusca cashna nirca: ‘Diospaj Churi imata villajujta huañushcacuna uyashpa cazujcunaca [...] causaitami causagringa’ (Juan 5:25). Huañuimanda causarishcacunaca Jesús nishcata uyashpa, cazushpallami paicunapa shuticuna “causaita causagrinata villajuj lobropi [ o rollocunapimi]” escribishca tiajunga (Apocalipsis 20:12, 13).

Huaquingunaca nishcami: Causarishpaca nara huañushpa charishca cuerpohuanllatami causariringa.

Bibliapica ninmi: Huañujpica ñucanchi cuerpo ishmushpami tucurin (Eclesiastés 3:19, 20).