Te Papetito—Ka Anoanoia no te au Kerititiano

1, 2. (a) Eaa te manako o tetai au metua me inangaro ta ratou tamariki i te papetito? (e) No teaa i ui ia ai ki te aronga tei inangaro i te papetito me kua akatapu ratou ia ratou uaorai kia Iehova? (Akara i te tutu mua.)

KUA akara ua te nga metua o Maria i ta raua tamaine meangiti e tu ra ki te pae i te aronga tei inangaro kia papetitoia. Kua ui te vaa tuatua e rua uianga. Kua pau a Maria na roto i te reo maata e te taka meitaki. Kare i roa i muri mai, kua papetitoia aia.

² Kua ngakau parau tikai te nga metua o Maria, no tei akatapu ta raua tamaine i tona oraanga kia Iehova e kua papetitoia. Inara i mua ake i te reira, kua manata rai te mami o Maria. Kua manako aia: ‘Penei e tamariki roa a Maria kia papetitoia? Kua mārama tikai ainei aia mei teaa te pakari o te akatapu anga iaia uaorai kia Iehova? Naringa aia i tiaki ka papetitoia ai?’ E manganui te au metua aroa tei ui i teia au uianga kia ratou uaorai, me karanga mai ta ratou tamariki e ka inangaro ratou i te papetito. (Koheleta 5:5) Mei te mea e, ko te ikianga puapinga rava atu teia ta tetai ka rave kia akatapu i tona oraanga kia Iehova e kia papetitoia.—Akara i te pia “Kua Akatapu Ainei Koe ia Koe Uaorai Kia Iehova?”

3, 4. (a) Akapeea te apotetoro ko Petero te apii mai anga ia tatou, e e puapinga tikai te papetito? (e) Eaa a Petero i akaaite ei i te papetito ki ta Noa akatu anga i te araka?

³ Kua akaaite te apotetoro ko Petero i te papetito ki te akatu anga i te araka o Noa. Karanga aia; “Ko tei tau i te reira ra,” koia oki te araka, “ko te bapetizo ïa e ora katoaʼi tatou i teianei.” (E tatau ia 1 Petero 3:20, 21.) E akapapu anga te araka ki tetai pae, e kua inangaro tikai a Noa ma te ngakau katoa i te rave i te anoano o te Atua. Kua rave tiratiratu a Noa i te angaanga ta Iehova i oronga kiaia kia rave. No to Noa akarongo, kua akaora a Iehova iaia e tona ngutuare tangata i te tuatau o te Vaipuke. Eaa ta Petero e tauta ra i te apii mai ia tatou?

⁴ Te kite anga te tangata i te araka, kite meitaki ratou e e akarongo to Noa ki roto i te Atua. Me kite te tangata i tetai e papetitoia ra, kite ratou e kua akatapu aia i tona oraanga ki te Atua no tona akarongo ki roto i te akatu anga o Karaiti. Mei ia Noa rai, ka akarongo te aronga tei papetitoia ki te Atua e ka rave i te angaanga tana i oronga kia ratou. E mei ia Iehova tei akaora ia Noa i te tuatau o te Vaipuke, ka akaora aia i tona au tavini tiratiratu tei papetitoia me takore aia i teia ao kino. (Mareko 13:10; Apokalupo 7:9, 10) Te taka meitaki ua ra, e puapinga tikai i te akatapu i to tatou oraanga kia Iehova e kia papetitoia. Te tika, me tavarevare tetai kia papetitoia, ka ngere aia i te ora e tuatau ua atu.

5. Eaa ta tatou ka apii i roto i teia atikara?

⁵ No tei kite tatou i teianei te pakari o te papetito, ka anoanoia tatou kia pau i teia au uianga e toru: Eaa ta te Pipiria e karanga ra no runga i te papetito? Eaa ta tetai tangata ka rave i mua ake ka papetitoia ai? Eaa tatou ka akamaara ua ai i te puapinga o te papetito me apii i ta tatou tamariki me kore tetai tei apii i te Pipiria?

TA TE PIPIRIA E APII MAIRA NO TE PAPETITO

6, 7. (a) Eaa te aiteanga o te papetito anga a Ioane? (e) Eaa te papetito anga tei tuke mei te katoatoa, e no teaa ra?

⁶ Te tangata mua i roto i te Pipiria ta tatou i tatau tei papetito i tetai ke, koia oki ko Ioane Papetito. (Mataio 3:1-6) Eaa te tangata i aere ei kiaia kia papetitoia? Kua pera ratou ei akaari e kua tataraara i ta ratou ara, koia oki, kua akakite e kua akarongo kore ratou i te Ture a Mose e kua tataraapa tikai. Inara te papetito puapinga rava atu ta Ioane i rave, e aiteanga tuke tikai te reira. E tu ngateitei maata to Ioane kia papetito ia Iesu, te Tamaiti apa kore a te Atua. (Mataio 3:13-17) Kare rava a Iesu i rave ana i te ara. Kare aia i anoanoia kia tataraara. (1 Petero 2:22) Eaa i reira a Iesu i papetitoia ai? Ei akaari e kua papa aia i te taangaanga i tona oraanga kia rave i te anoano o te Atua.—Ebera 10:7.

⁷ I muri ake te akamata anga a Iesu i te tutu aere, kua akamata tana au pipi i te papetito i tetai ke. (Ioane 3:22; 4:1, 2) Kua papetito katoaia te reira aronga no te mea kua tataraara ratou i ta ratou ara i raro ake i te Ture a Mose. Inara i muri ake te matenga a Iesu e kua akatuia mai, ko te aronga tei inangaro kia riro ei pipi na Iesu, e tuke te tumu i papetitoia ai ratou.

8. (a) Eaa te akaueanga ta Iesu i oronga i muri ake i tona tuakaouanga? (e) Eaa te au Kerititiano ka anoanoia ai kia papetito?

⁸ I te mataiti 33, i muri ua ake i tona tuakaouanga, kua tuatua a Iesu ki te tere atu i te 500 tane, vaine, e penei te tamariki. Penei ko te tuatau teia i tona karanga anga: “E teianei, ka aere kotou, e akariro i to te pa enua katoa ei pipi; ka bapetizo atu ei ia ratou i te ingoa o te Metua, e no te Tamaiti, e no te vaerua tapu; Ma te apii atu ia ratou, kia akono i te au mea katoa taku i akaue atu kia kotou.” (Mataio 28:19, 20; 1 Korinetia 15:6) Kua akaue a Iesu i tana au pipi kia kimi ma te apii i te pipi. Tetai ua atu tei inangaro kia riro ei pipi nana, me kore e apai i tana “amo,” ka anoanoia kia papetito. (Mataio 11:29, 30) Ei tavini i te Atua i te tu kia akamareka Iaia, ka anoanoia tetai tangata kia āriki e te taangaanga ra te Atua ia Iesu ei akatupu i Tona anoano. I reira, ka papetitoia te reira tangata i ta te Atua e mareka ra. Te oronga maira te Pipiria i te akapapu anga maata e kua kite te au pipi mua a Iesu i te puapinga tikai kia papetito. Kare ratou i manako ana kia tavarevare kia papetitoia.—Angaanga 2:41; 9:18; 16:14, 15, 32, 33.

AURAKA E TAVAREVARE KIA PAPETITOIA

9, 10 Eaa ta tatou ka apii mai mei te papetito anga o te tangata Etiopia e to Saula?

⁹ E tatau ia Angaanga 8:35, 36. E tangata Etiopia tei āriki i te akarongo ngati Iuda te aere ra ki te kainga i muri ake i te akamori anga i te iero i Ierusalema. Kua tono te angera a Iehova ia Philipi kia tutu aere kiaia, e kua apii a Philipi “i te tuatua no Iesu kiaia.” Akapeea te tangata Etiopia te ariu anga atu? Kua mārama aia i te puapinga kia āriki ia Iesu ei Atu, e kua inangaro aia i te rave i ta Iehova e umuumu ra no te au Kerititiano. No reira kare aia i tavarevare ana kia papetitoia.

¹⁰ Tetai akaou akaraanga ko te tangata ngati Iuda ko Saula. Kua akatapuia te katoa anga o te iti tangata ngati Iuda ki te Atua, inara kua kopae a Iehova i te ngati Iuda no te mea kare ratou i akarongo ana kiaia. Irinaki a Saula e te tavini tika ra te ngati Iuda i te Atua, no reira kua takinokino aia i te au Kerititiano. Inara i tetai rā, ko Iesu tei akatuia mai, ta Saula i manako e kua mate, kua tuatua tika mai kia Saula mei te rangi. Akapeea a Saula i te ariu anga atu? Kua āriki rekareka aia i te tauturu mei te pipi Kerititiano ko Anania. Karanga te Pipiria: “Tu akera [aia] ki runga, e bapetizoia iora oki.” (Angaanga 9:17, 18; Galatia 1:14) Kua kitea aia i muri mai e ko te apotetoro ko Paulo. I tona mārama anga e te taangaanga ra te Atua ia Iesu ei akatupu i Tona anoano, kare a Saula i tavarevare ana kia papetitoia.—E tatau ia Angaanga 22:12-16.

11. (a) Eaa te akakeu ra i te aronga apii Pipiria i teia tuatau kia iki kia papetitoia? (e) Eaa to tatou manako me papetitoia tetai?

¹¹ I teia tuatau katoa, te aiteite ra ki te aronga apii Pipiria, te mapu e te pakarikari. No te mea te inangaro ra e te irinaki ra ratou i ta te Pipiria e karanga ra, e te aruaru ra i te akatapu i to ratou oraanga kia Iehova e kia papetitoia. Te tika, e tuatau akaperepereia te ako papetito i ko i te au akaputuputuanga e te au uruoaanga. Te mataora ra te Au Kite o Iehova, me kite i te aronga tei apii i te Pipiria e āriki ra i te tuatua mou e kua iki kia papetitoia. Ka mataora tikai te au metua me pera katoa ta ratou tamariki. I te mataiti tavini anga 2017, tere atu i te 284,000 aronga ou tei papetitoia tei akaari kua akatapu i to ratou oraanga kia Iehova. (Angaanga 13:48) Taka meitaki, kua mārama ratou e ka anoanoia te au Kerititiano kia papetitoia. Inara eaa tei anoanoia kia rave ratou i mua ake ka papetitoia ai?

12. Eaa ta te aronga apii Pipiria ka anoanoia kia rave i mua ake ka papetitoia ai?

¹² I mua ake ka papetitoia ai te aronga apii Pipiria, ka anoanoia ratou kia apii i te tuatua mou no runga i te Atua, tona akakoroanga no te tangata e te enua, e tana ka rave ei akaora i te tangata katoatoa. (1 Timoteo 2:3-6) E oti ka anoanoia ratou kia akatupu i te akarongo, te ka tauturu ia ratou kia aru i te au ture a te Atua e kia akamutu i te rave i tana e rikarika ra. (Angaanga 3:19) E mea puapinga teia, no te mea kare a Iehova e āriki i te akatapu anga o tetai tangata tei rave ua i Tana e rikarika ra. (1 Korinetia 6:9, 10) Inara e maata atu te anoanoia ra. Te aronga tei inangaro i te akatapu i to ratou oraanga kia Iehova, ka anoanoia kia aere ki te au uipaanga putuputuanga e kia tutu tamou i te nuti meitaki e te apii i tetai ke. Ka anoanoia tetai ua atu tei inangaro i te aru ia Karaiti. (Angaanga 1:8) Ko tetai ua atu tei apii ka anoanoia aia kia rave i teia au mea. I reira ka akatapu aia i tona oraanga kia Iehova na roto i tetai pure takake kia papetitoia.

E TUKU I TE PAPETITO EI AKAKOROANGA NO TE ARONGA APII PIPIRIA

13. Me apii tatou i tetai ke, eaa tatou ka akamaara ai kia papetitoia ratou ei au Kerititiano mou?

¹³ Me tauturu tatou i ta tatou tamariki e te aronga apii Pipiria kia rave i teia au mea tei anoanoia, kia akamaara tatou e ko te aronga tei inangaro kia riro mai ei pipi mou na Iesu, ka anoanoia ratou kia papetitoia. Kare i reira tatou e mataku i te akakite i te tuatau tau, te puapinga o te akatapu anga e te papetito anga. Inangaro tatou i ta tatou tamariki e te aronga apii Pipiria kia tere ki mua e kia papetitoia!

14. Eaa tatou ka kore ei e opara i tetai ua atu kia papetitoia?

¹⁴ E tika, kare e anoanoia kia opara, me kore kia māro, i tetai tamaiti, tamaine me kore tangata apii Pipiria kia papetitoia. Kare a Iehova e māro ana i tetai ua atu ia tatou kia tavini iaia. (1 Ioane 4:8) Me apii tatou i tetai ke, ka anoanoia tatou kia tauturu ia ratou kia mārama i te puapinga, kia akatupu i tetai pirianga kia Iehova. I reira, me te mataora ra tetai tangata apii Pipiria i te kite i te tuatua mou no runga i te Atua, e te inangaro tikai ra i te rave i te au mea ravarai ta te au Kerititiano mou ka rave, ka inangaro aia kia papetitoia.—2 Korinetia 5:14, 15.

15, 16 (a) Ka anoanoia ainei tetai kia tano tona mataiti kia papetitoia? Akamārama mai. (e) Eaa tetai tangata apii Pipiria ka papetitoia ai ei Au Kite o Iehova noatu e kua papetito takereia aia ki roto i tetai akonoanga ke?

¹⁵ Kare tetai ua atu e anoanoia kia tano tona mataiti kia papetitoia. Tukeke te katoatoa, tetai pae aronga apii Pipiria ka tere ki mua, tetai pae ka tuke. E manganui kua papetitoia, ia ratou e meangiti ra, e kua vai tiratiratu kia Iehova ia ratou e maata maira. Tetai pae te pakarikari ra i to ratou apiianga i te tuatua mou Pipiria e kua papetitoia. Tetai pae e tere atu i te 100 mataiti te pakari!

¹⁶ Tetai vaine tei apii i te Pipiria kua papetito takereia aia i roto i te au akonoanga ke ke. Te tumu te reira i ui ei aia ki tona puapii Pipiria me ka anoano tikaiia aia kia papetito akaou. Kua akaari tona puapii i te au irava Pipiria ei pau i tana uianga. Te mārama anga te vaine i ta te Pipiria e umuumu maira iaia, kua papetito iaia, noatu e kua vaitata aia i te 80 mataiti. Eaa ta tatou ka apii mai mei teia akaraanga? Ka āriki anake ua a Iehova i to tatou papetito anga me kua kite tatou i te tuatua mou no runga i tona anoano. No reira noatu e kua papetitoia tatou ki roto i tetai akonoanga ke, ka anoanoia rai tatou kia papetitoia ei Au Kite o Iehova.—E tatau ia Angaanga 19:3-5.

17. Eaa ta tetai ka akamanako i te rā e papetitoia ai aia?

¹⁷ Ko te rā e papetitoia ai tetai ko te rā mataora rava atu teia. E tuatau katoa teia no te akamanako meitaki i te aiteanga o te akatapu anga e te papetito anga. E angaanga pakari no te rave i te au mea ravarai tei umuumuia e tetai Kerititiano mou. Kare ta Iesu au pipi “e akono akaou ia ratou uaorai i te ora anga nei, kia akono ra iaia i tei mate e tei tu akaou no ratou ra.”—2 Korinetia 5:15; Mataio 16:24.

18. Eaa te au uianga ka uriuri tatou i te atikara ka aru mai?

¹⁸ Mei ta tatou i apii i teia atikara, e tumu anga pakari tikai te ikianga kia riro ei Kerititiano mou. Te tumu te reira i ui ei te mami o Maria kiaia uaorai te au uianga tei taikuia i te akamata anga o te atikara. Me e metua koe, penei kua ui koe kia koe uaorai: ‘Kua papa tikai ainei taku tamaiti, tamaine kia papetitoia? Kua rava ainei te pakari o taku tamaiti, tamaine kia kite no runga ia Iehova kia akatapu iaia uaorai ki te Atua? Kia rauka ainei tetai apii meitaki e te ngai angaanga na taku tamaiti, tamaine i mua ake ka papetitoia ai? Akapeea me ka rave taku tamaiti, tamaine i tetai ara kino i muri ake i tona papetito anga?’ Ka uriuri tatou i teia au uianga i te atikara ka aru mai, e ka apii tatou akapeea te au metua Kerititiano i te akamanako meitaki anga i te papetito anga.