UI TE AU MAPU E
Ka Akamaata Ainei Au i Toku au Oa?
“Kua matau ua au i toku pupu oa, e e ngatā iaku i te akaruke ia ratou.”—Alan.
“E manga pupu oa toku, e ko taku te reira e reka ana. Kare au e tae i te tuatua ki tetai ua atu aronga kare au i kite.”—Sara.
Kua aite ainei koe mei ia Alan e Sara? E manga pupu oa ua ainei toou e e ngatā i te kimi akaou i tetai?
Me koia ia, noou teia atikara!
Te manamanata o te pupu
Kare i te mea kino me rauka tetai au pupu oa. Ka riro toou au oa ei akamaroiroi ia koe e ka āriki ua ratou ia koe—noatu toou au tarevake.
“Mataora me rekaia mai koe e tetai ke e te piri atu ki roto i tetai pupu. Ei mapu, ka inangaro koe i te aru patete ua atu ia ratou.”—Karen, 19.
Kite ainei koe? E 12 apotetoro o Iesu tei riro ei au oa nona, inara e toru ia ratou—ko Petero, Iakobo, e Ioane—e au oa piri mou nona.—Mareko 9:2; Luka 8:51.
Inara, me kapiti ua koe ki tetai pupu oa—e te kopae atu i tetai pae—ka tupu te manamanata. Ei akaraanga:
Ka tāpupu te reira ia koe kia kore e aravei atu i tetai ke te ka riro ei oa noou.
“Te au oa e piri ua ana koe, ka tāpu ratou ia koe kia kore e rauka tetai pirianga ou—e ki tetai au oa meitaki tikai.”—Evan, 21.
Akaari maira te reira i toou tu iriiri oa.
“Me e pupu oa takake toou, tera te aiteanga kare koe e inangaro i te tuatua atu ki tetai ke.”—Sara, 17.
Ka akakeu ia koe kia ō atu ki roto i tetai takinokino anga.
“Penei kare e na tetai e takinokino atu i tetai ke, me piri ra toou au oa ki roto, ia ratou e meitaki ua te reira—noatu e mea kanga ua.”—James, 17.
Ka ō koe ki roto i te manamanata—noatu toou inangaro i te piri ki te reira pupu.
“Me rave ana e tai ua tangata i te kino, ka aru ua atu te katoatoa.”—Martina, 17.
Taau ka rave
Akara matatio i taau e akaperepere ra.
Ui kia koe uaorai: ‘Eaa taku e akaperepere ra mei toku oraanga? Ka māmā me kore ka ngatā ainei i toku au oa i te aru i taku e akaperepere ra? Ka akaperepere maata ainei au i toku au oa?’
Kaveinga Pipiria: “E kino te tuatua meitaki i te kapiti anga kikino ra.”—1 Korinetia 15:33.
“Me kare toou pupu e aru ana i taau e akaperepere ra, penei ka māroia koe kia rave i ta ratou e rave ra.”—Ellen, 14.
Akara meitaki i te au mea puapinga.
Ui kia koe uaorai: ‘E puapinga ainei toku au oa kiaku e ka āriki ua au i ta ratou e rave ra? Eaa taku ka tuatua me rave toku oa i te tarevake?’
Kaveinga Pipiria: “Ko taku katoa e akaperepere ra, ko taku ïa e ako.”—Apokalupo 3:19.
“Me tupu te manamanata ki tetai oa mei toou pupu e ka akakite koe i te tika, te takino ra koe i toou pirianga kiaia.”—Melanie, 22.
Akamaata i toou au oa.
Ui kia koe uaorai: ‘Ka puapingaia ainei au me akaoaoa atu au ki toku au oa e tetai ke?’
Kaveinga Pipiria: “Auraka te tangata e akono i tona anake uaorai au mea, e akono katoa ra i to etai ke ra au mea.”—Philipi 2:4.
“Te au tamariki kare o ratou oa penei e ngatā te oraanga i te ngutuare. Me akamatau ra koe kia ratou, kite mai koe e aronga mataora ua ratou.”—Brian, 19.
Mea puapinga: Kare i te tarevake me piri atu ki tetai pupu oa. I reira katoa, ka puapingaia rai koe me akaoaoa atu ki tetai ke. Karanga te Pipiria: “E tei tamauu ki te vai ra, ka tamauu katoaia mai aia.”—Maseli 11:25.