E Atua mataora a Iehova e te inangaro maira aia ia tatou kia mataora katoa. (1 Timo. 1:11) Kua oronga mai aia i te au mea meitaki kia mataora te oraanga. (Iako. 1:17) Ko tetai o teia au mea, ko te oraanga akaipoipo. Me akaipoipo te tane e te vaine, ka tia raua kia inangaro, akangateitei e te akaperepere i tetai e tetai. Me akamatutu te tane e te vaine i to raua pirianga akaipoipo, ka mataora to raua oraanga. Te mea maromaroa kare te au tokorua akaipoipo i teia tuatau e akaari ana i te aroa e te akangateitei ki tetai e tetai, mei ta raua i tia. Tei tupu, kare raua e mataora ana. Akapeea tetai tane me akono i tana vaine kia tau kia Iehova? Te akaue maira a Iehova i te au tane kia akangateitei i ta ratou vaine. Ko tetai tane tei akangateitei i tana vaine, ka akono aia iaia ma te takinga meitaki e te aroa.—1 Pete. 3:7. w25.01 8 ¶1-2; 9 ¶4-5

E mea papu e kua tauturu te reta a te apoteroto ko Paulo i te au Kerititiano mua, kia akapapa no te tumatetenga. Kua akamaroiroi a Paulo i tona au taeake kia apii i te tuatua mou e kia mārama meitaki i te reira. Ka tauturu teia ia ratou kia kite i te au manako tarevake e te pikikaa e kia patoi i te reira, no te mea ka takino te reira i to ratou akarongo. Kua akamaroiroi aia ia ratou kia akaketaketa i to ratou akarongo e kia aru i te aratakianga a Iesu e te aronga e arataki ra i te putuputuanga. Kua tauturu katoa aia i te au Kerititiano kia kite i te puapinga kia akakoromaki i te au timataanga e kia tereniia e to ratou Metua aroa. Ka taangaanga katoa tatou i teia akoanga mei roto i te Pipiria. Ka rauka i reira ia tatou i te akakoromaki e tae ua atu ki te openga.—Ebe. 3:14. w24.09 13 ¶17, 19

I roto i te Pipiria, ko te oko te tutaki no te tapoki i te ara e te akatupu akaou i te ’au. Kia Iehova, ko te ravenga anake teia no te akaoki mai i ta Adamu e Eva i ngere. Akapeea ra? E akamaara, kua ngere a Adamu e Eva i to raua tu apa kore e te oraanga mutu kore. No reira, ko te oko te tutaki tei aite ki ta raua i ngere. (1 Timo. 2:6) Ka tutakiia te reira e tetai tangata (1) apa kore; (2) tei rauka te ora mutu kore i te enua nei; e te (3) tei puareinga i te oronga e te akaatinga i tona ora no tatou. E akamanako ana e toru tumu i rauka ai ia Iesu i te tutaki i te oko. (1) E tangata apa kore aia, “tei kore roa i rave i te ara.” (1 Pete. 2:22) (2) No te reira, kua rauka iaia te ora e tuatau ua atu i te enua nei. (3) Kua puareinga ua aia i te mate e te oronga i tona ora no tatou.—Ebe. 10:9. w25.02 4-5 ¶11-12