Paraparau, Me 21
Koai, e Iehova, te ka tuitarere i toou ra puakapa? . . . ko te tangata . . . tei tuatua i te tuatua-mou i roto i tona ra ngakau.—Sala. 15:1, 2.
I teia tuatau, e mea matauia te pikikaa. Karanga te atikara “Te Tumu ka Pikikaa ei Tatou,” na Y. Bhattacharjee, e kua “riro te pikikaa ei peu matauia na te tangata.” Mei tera te tu, e mea natura ua na te tangata kia pikikaa. E pikikaa putuputu ana te tangata ei paruru ia ratou uaorai, penei ka uuna i to ratou tarevake me kore angaanga kino. Te pikikaa katoa ra i ta ratou kimikimi anga moni e kia akapuapinga ia ratou uaorai. Karanga katoa te atikara e ka pikikaa te tangata ki “te aronga ke, te aronga angaanga, te au oa, e te aronga akaperepereia.” Eaa te ka tupu mai mei teia au pikikaa? Kare te tangata e irinaki akaou i tetai e tetai, e ka kore te au pirianga. Kua pure te tata salamo ko Davida kia Iehova: “Ko te tuatua-mou no roto ra taau e inangaro!” (Sala. 51:6) Kua kite a Davida e no roto maira te tu tika i to tatou ngakau. I te oraanga katoa, “ei tuatua-mou ta te tangata katoa e tuatua ki tona tangata tupu.”—Zeka. 8:16. w18.10 4 ¶4; 5 ¶9-10; 8 ¶19
Varaire, Me 22
Kua arataki aia ia ratou ma te ora, e kare ratou i mataku.—Sala. 78:53.
Penei te vaira e tere atu i te toru mirioni au Iseraela tei akaruke ia Aiphiti i te mataiti 1513 i mua ake ia Karaiti. Te vaira te tamariki, te aronga pakarikari, penei rai te aronga makimaki e te pirikoki. Ka anoanoia tetai Arataki aroa e te manako meitaki no teia urupu maata. Kua rave a Iehova i te reira na roto ia Mose. Tei tupu, kua vai meitaki ua te ngati Iseraela ia ratou e akaruke ra i to ratou kainga. (Sala. 78:52) Akapeea a Iehova te akono anga i tona iti tangata kia vai meitaki ua? Kua akaaere aia i te iti tangata Iseraela ki roto i te ‘aerenga mei to te pupu tamaki ra’ te akaruke anga ratou ia Aiphiti. (Exo. 13:18) No te mea kua akaaere meitakiia ratou, taka meitaki e na te Atua ratou e arataki ra. Kua oronga katoa a Iehova ‘i te tumurangi i te ao,’ e ‘te mārama ai i te po’ ei akamaara ia ratou e te vaira aia ki rotopu ia ratou, te aratakianga e te paruruanga ia ratou. (Sala. 78:14) Kua anoano te iti tangata o Iseraela i te akapapuanga no tei tupu i muri mai. w18.09 24 ¶11-12
Maanakai, Me 23
Naringa koe e akapipini iaku ki te vaarua e, . . . angairi koe e akataka i te taime noku, ka maara mai ei iaku nei!—Iobu 14:13.
I te tuatau Pipiria, kua manako kino katoa tetai au tavini tiratiratu o te Atua i to ratou manamanata e kua inangaro kia mate ratou. Ei akaraanga, no tona mamae i karanga ai a Iobu: “Kua iu au; auraka au kia ora roa atu.” (Iobu 7:16) Kua ati ngakau tikai a Iona i tona karanga anga: “E Iehova, teia taku e pati kia koe, ka rave mai koe iaku kia mate, e mea meitaki oki iaku te mate i te ora.” (Iona 4:3) Kua taitaia te peroveta ko Elia te karanga anga: “Kua oti ua; e teianei, e Iehova, ka rave mai koe iaku.” (1 Ari. 19:4) Inara kua akaperepere a Iehova i teia au tavini tiratiratu nona e kua inangaro kia ora ratou. Kare aia i akaapa ana i to ratou manako. Inara, kua tauturu aia ia ratou kia rauka akaou te anoano no te tavini tiratiratu iaia. w18.09 9 ¶4