Soske moł duredyr te prynćkireł Biblia?

Perdy dawa, kaj prynćkirdzian Biblia, baryja tyro kamlipen ke Deweł. Duredyr de but pał da kamplipen. Pszykharesa pes ke Jehowa syr syklosa Łeskre Ławestyr (1 Piotra 2:2). Dział pał tyro dzipen, sawo ligiresa perdy ciry napogindłe. De apre Jana 17:3 i Judy 21.

Syr duredyr prynćkiresa Dewłes, zorałedyr Łeske zapaciesa. Perdy tyro paciaiben kamesa pes butedyr te udeł Jehowake (Hebrajczyków 11:1, 6). Kamesa te sparuweł peskro dzipen pe fededyr i te na rysioł ke do hyrja, so keresys gił — widziała tuke dawa pre łaćho. De apre Dzieje 3:19.

Kamesa te rakireł wawirenge pał dawa, so syklos Dewłeskre Ławestyr — łaćho ław, sawo isy Dewłes jamenge. Syr duredyr syklosa Bibliatyr, dzinesa syr te rakireł manusienca pał tyro paciaiben dre Jehowatyr i dawa so isy gił jamendyr. De apre Rzymian 10:13-15.

Ker saro, kaj te rakires pał Biblia tyre semencasa i dałenca, sawen dzines. Na rakir pre zor. Na wysa pes dałestyr dre so pacien, ophen pał dawa, so łaćho kameł te deł jamenge Deweł. Rypyr, siukar ława nani saro — tyro patywało dzipen pheneła butedyr pał ciacipen syr ława. De apre 2 Tymoteusza 2:24, 25.

So desa hor apre Dewłeskro Ław, to tyro paciaiben dre Łestyr barjoła. Pośli sawoś ciro rykiresa pes zorałes Dewłestyr. Jehowa deł tuke Peskro ław, kaj Jow ‛jaweła tuke Dad’. De apre 2 Koryntian 6:18.

Kana dzines, kaj te jawes zorałes terdo dre ciacipen, san duredyr te prynćkireł Dewłeskro Ław (Hebrajczyków 5:13, 14). Pomang Jehowakre Świadken, kaj te ligiren tusa studium Bibliatyr perdy buha Czego nas uczy Biblia? Dawa, so syklosa, wligireła but łaćho dre tyro dzipen. De apre Psalm 1:1-3 i Jozuego 1:8.

Rypyr, pszykharesa pes ke Jehowa, so jawesa maśkir manusiendyr, sawe Łes kamen (Hebrajczyków 10:24, 25). Dawa, saro so keres, kaj te udes pes Dewłeske, phiraweł tuke drom ke ciaciuno dzipen — dzipen perdy ciry napogindłe. Syr ciacipnasa san paś Dewłestyr, dawa isy najbaredyr barwalipen, sawo isy pre sweto. De apre 1 Tymoteusza 1:11; 6:19.